EFESNA 6
6
Gorra u somoyosiya
1Agi gorra sun magira fok Bu Suuna ni humugi u somoyogiya agi li wa na ni jiviya. 2«Hum u buŋ u suŋu,» ni gaɗta jewra dlaɓi u vi vunna vi Lona, 3«Kay aŋ mba kak u furira kak iiri ta ta kay ndaŋgara.»
4Agi somi gorra lagi goryogi co a ɓeŋesi kiɗi, wulusiya, haɗasi u gaɗta vi Bu Suunara.
Mborɓiina u maliyasina
5Agi mborɓiina humugi u maliyagina kaŋga kay ndaŋgara tani, lasi ndaarasiya u huu ma jivina, ni ko agi sunni Kristu na. 6Lagi jivira ni fokosi hu li ma asi ka gologina ɦawaɗi, a furiyusi hurusira ni agi lini u minda vi Lona u hurugi halaŋ ko agi ni mborɓii suu vi Kristuna na. 7Lagi sun magira mbaɓura u minda jivira, ko agi sunni Bu Suuna na ka ni suuna ɦawaɗi. 8Humugi gagi kay gegelay, mbaɓuna ɗowba sa vuɗina, hin fi warak mamma ko Bu Suuna kay sunda nam laɗ jivira.
9Agi maliyasina li mborɓii magisina ko ndaɗta na may, ɦeɓesi kay dlara liraɗi. Humugi gagi kay agi may mborɓii magisina may, malagina ka kolo huulona dew, nam ka ɓorow ii saɗi.
Kawi ma duuna vi suu vi Lonna
10Kay ndaɗta soogi tagi hu taɓ magira u Bu Suuna hu saɓak mamma ŋgolna. 11Yowogi kawi ma duuna vi Lona kogi halaŋ kay agi mba fi saɓak ma col a duu u ganyamba vi Satanna. 12Kay aygi ka njogo tay a duu taygi ni u suunaɗi, duu taygi ni u saɓakŋa vi fuli suu co suu ha kolona, asi ti mulla u saɓak masina a maliyaŋ duliyara hu ndufunda. 13Ni kay ndaɗta vagi kawi ma duuna vi Lona kogi halaŋ, ni buu ma cona hin mba wa ni, agi ndak a col saɓak fok saagi ma babalira, agi duu wa na gak gak hu daɓpa wanni agi li coli saɓak hu dlaagira.
14Minigi tagiya, njunugi gasira hurugi ko baraw damba na, cukugi ɗegeera tagi ko koroŋ ma duuna na. 15Ko minda di Boy ma Ayra ma heɓpa li cuki segi ko tuɓuruna na, a tuɗ dam ki maŋ suuna. 16Tlagi vira kogi ko mbarina na a ci ku mbuurura vi sa ma cona a mun egegira. 17Vagi suɗta kogi ko jumba na, vagi Boy Lonana ma Musuk Lonara ɦaginana ko ndal ŋgewna na. 18Lagi dla ndaɗta halaŋŋi hu cenda, joɓogi Lona nam njun ugiya, cenegi kay tlena halaŋŋi u minda vi Musukka. Lakagi jek jekee, loɓogiɗi u ndaɗta na gak gak, cenegi kay suu vi Lonna halaŋ. 19Cenegi Lona kanu a Lona ɦan boy ma jivina hu li ma an a damma, kay an a di u eŋga a tak dlara ŋgayra vi Boy ma Ayra kiyo. 20Anni sa ma gi sunda kay Boy ma Ayra, lini an cecemi ka hu daŋgayna lay, cenegi kay an di boyna u eŋga ko an a lira na.
Gi deɓpa daɓ daganda
21Tisik wayaygi ma ɗegeena ma aygi minim ma njunun hu sunda vi Bu Suuna hin takagi ki kay dlaanda an ka cecemira halaŋ, kay agi mba wi u dla ndaɗta ki ana an ka ni ana mege. 22An sunugina ha ni kay nam dagi u dlara aygi hin laɗta, kay ɦagi saɓakŋa hurugi lay.
23Ko Lona Buna u Bu Suuna Yesu Kristu ɦal heɓpa, minda u vira maŋ gorseygina halaŋ. 24Ko oora vi Lona kak u suu min Bu Suuna mayna Yesu Kristu u minda ka daɓbira halaŋ.
Currently Selected:
EFESNA 6: BMS
Highlight
Share
Copy
Want to have your highlights saved across all your devices? Sign up or sign in
Bible Moussey © Bible Society of Chad, 2002.
