1 MULINA 16
16
1Yawe mba di Jehu, ma goŋ Hananina, kay dlara vi Beasara ana, 2«An coloŋ ay ki kolo duk buɗna, kakaŋ a mulna kay suu man suu Israelna. Aŋ hin tli koŋŋi voɗta vi Jeroboamba olo. Aŋ cukun suu man suu Israelna hu dla cora a duu u an u dla coosira asi laɗta. 3An tuɗ ci Beasa ki u suu mamsina halaŋ. An hin mbuɗuŋ ziiŋ ki ni ko ndal ma vi Jeroboamma, goŋ Nebana na may. 4Suu vi Beasa suu miɗ hu ɦoŋzinana diginina hin komosi maɗasi ni asiya. Suu miɗ ha ki ŋgoo bagina layagi suu pii kolona hin komosi ni asi may.»
5Dlara daŋga Beasa laɗta halaŋ ka ɓiiri hu magaara Sunda vi Muli suu Israelnara. 6Beasa buu ga eg somoyomu. Asi pammi hu Tirsa. Gooromma Ela varak balamam a mulna. 7Hu li ma Yawe di dlara maŋ Beasa fun sa ma jok vun Lona, Jehu, ma goŋ Hananina, na ni kay dla cora na mba' ta jewra ni Beasa u suu mamsina halaŋ li dlara ka ii Yawe jiviɗira. Asi ɓalakam hurum ki u dla coosira asi laɗta ni ko ndal Jeroboam u suu mamsina lira na olo. Ta mbara ni kay ana Beasa ci dee suu vi Jeroboamma ki na halaŋ halaŋga may.
Ela, mul ma Israelna
8Hu basara dok-mba' yam karkiya ta Aza kaki a mul ma Yudana ni Ela, ma goŋ Beasana, kak a mulna kay suu Israelna may, kak ay ni hu ɦoŋzi ma Tirsana, li basara hu mulla ni mba'. 9Sa maa dew duk suu ŋgolo mam suu duuna, Zimri, sa ma ŋgolla fok nus kulumi suu pus pusna vi vunum ki kam u suu daŋŋa. Ni hu li ma mulna ay hu Tirsa vi Arsa, sa ŋgol ma vo taraŋ hu ziŋ mulnana, nam ka ci summa, guruɗ ki may. 10Zimri kal ha vo taraŋ tuɗ ci Ela kiyo. Ni hu basara dok-mba' yam kiɗisiya ta Aza kaki a mulna fok suu Yudanara. Nam varak balamam a mulna gaw may. 11Hu li ma nam mbuɗ mulna na gaw ni, nam ci dee suu vi Beasana ki halaŋ halaŋ, hin go njuf ka na dewɗi. Sa ma ana hin gol jona dagan kaɗi lay. 12Zimri daɓ suu vi Beasana ki halaŋ halaŋ. Ni ko ndal boy ma Yawe dam ay ki kay Beasa fun saam ma jokom vunumma, Jehu, kay Beasara na may. 13Kay dla cora vi Beasara, kay dla cora vi goromma Elara, cora asi laɗta, cuk suu Israelna halaŋ hu suluk namma, ɓalak huu Yawe, Lona vi suu Israelna, ki egesiya, ni u fuli masi suu ɦawana. 14U dlara Ela laɗta halaŋ ka ɓiiri hu magaara Sunda vi Muli suu Israelnara.
Zimri, mul ma Israelna
15Hu basara dok-mba' yam kiɗisiyara hu li ma Aza kaki a mulna fok suu Yudana ni Zimri mbuɗ a mulna fok suu Israelna buu kiɗisiya hu Tirsa. Suu Israelna duu u zi ma Gibetonna hu mbassa vi suu Filistinna. 16Suu ha fun duuna asina hum boy namma ha ana, «Zimri li ŋgeŋŋa kay mulna, cam ki lay.» Hu buu namma dukusi hu kaŋ masina na gaw ni, asi vi Omri, ma ŋgol asgaana fokosi a mulna ni na gaw. 17Omri wi ana nam tli zina ki wa ni nam tuɗ u suu mam suu duuna tuɗ nduk ɦoŋzi ma Tirsana. 18Zimri wi ana nam tli zina ki wa ni, nam kal hu ziŋ mulnara. Nam gi ku ziŋ mulnara kam, ŋgal tam kiyo. 19Dla ndaɗta li na ni kay Zimri li dla cora, li dlara ka ii Yawe jiviɗira. Nam li ni co su Jeroboam olo. Nam sa ma cuk suu Israelna kaŋga hu cora halaŋŋa.
20U dlara Zimri laɗta halaŋ ka ɓiiri hu magaara Sunda vi Muli suu Israelnara. Asi ɓak dla ŋgeŋ ma nam lamma hu lay.
21Hu li ma Zimri miɗ kina ni suu Israelna irisi ɓorow ki mba'. Suu ɦiw min kak fokosi a mulna ni Tibni ma goŋ Ginatna. Suu hiniŋŋa minni Omri may. 22A daɓpa ni suu vi Omrina hin tiya. Asi su kay suu vi Tibni ma goŋ Ginatna. Tibni miɗ kiyo. Omri hin kak a mulna ni namu.
Omri, mul ma Israelna
23Hu basara dok-hindi yam dew ta Aza kaki a mul ma Yudana ni Omri mbuɗ a mulna kay suu Israelna may. Nam li basara hu mulla ni doogo yam mba'. Nam kak ay hu Tirsa basara karkiya. 24Ŋgoo dagan nam hin gus lina ko Semer. Nam gusum mbura Samarira ki komu u gursura buɓ buɓ karkiya. Nam min ɦoŋzi ŋgolna kay mbu ndaɗta tin sem ɦoŋzi namma ana Samari. Ni u sem Semer sa ma nam gus li namma komma. 25Na may, Omri li dlara ka ii Yawe jiviɗira. Dlaamba ki ni co su muli suu kak ay fokom jewna halaŋ halaŋ. 26Poy mamba ki co sura vi Jeroboam ma goŋ Nebatna ma cuk suu Israelna kaŋga hu dla cora halaŋ halaŋ, ɓalak huu Yawe, Lona vi suu Israelna, ki egesi bel bel u fuli masi suu asi tokolosina.
27U dlara Omri laɗta halaŋ ka ɓiiri hu magaara Sunda vi Muli suu Israelnara. Asi njaɗ dlara nam laɗta u ɦiŋ mamba nam takaɗ kira. 28Hu li ma nam miɗna, asi pammi hu Samari. Gooromma Akab varak kay mulla ni namu.
Akab, mul ma Israelna
29Hu basara dok-hindi yam kalavandi ta Aza kak a mul ma Yudana ni Akab ma goŋ Omrina kak a mulna kay suu Israelna may. Nam li basara hu mulla ni dok-mba' yam mba' kay suu Israelna. Nam ti mulla ni hu Samari. 30Akab ma goŋ Omrina li dlara ka ii Yawe jiviɗira, ki co su muli suu kak ay fokom jewna olo. 31Ka irim jivi a li dlara Jeroboam goŋ Nebatna laɗtaɗi ni, nam tuɗ ta ta ɗum Jezabel ta goŋ Etbaal mul ma vi suu Sidonna. Nam goɓ kaŋga fok Baal, cenemu. 32Nam min givin ma togolla maŋ Baal hu zira nam minimba ka hu Samarira. 33Akab pi ɦinira ceɗi ta teteɗta ta vi Aserra. Nam tuɗ fok u dlara ɓalak huu Yawe, Lona vi suu Israelna, na gak gak. Ki co su muli suu Israel suu kak ay mulla fokom jewna halaŋ halaŋ. 34Hu cokira Akab kaki a mulnara ni Hiyel ma Betelna min ɦoŋzi ma Yerikona ki koloo. Hu li ma nam gi u zina ga may ni, Abiram, gorom ma ŋgolna, miɗ kiyo. Hu li ma kom daɓ ki eg vun grekŋa may ni, gorom ma toɓona miɗ ki gaw may. Dla ndaɗta li ni ko ndal boy ma Yawe dam ay ki jew fun Josuwe ma goŋ Nunnara na.#Jos. 6.26
Currently Selected:
1 MULINA 16: BMS
Highlight
Share
Copy
Want to have your highlights saved across all your devices? Sign up or sign in
Bible Moussey © Bible Society of Chad, 2002.
