1 MULINA 15
15
Abiyam, mul ma Yudana
1Hu basara doogo yam kalavandira vi Jeroboam ma goŋ Nebatna hu mullara ni Abiyam mbuɗ a mul ma Yudana may. 2Nam li basara Yerusalem a mulna ni hindi. Sem sum ana Maaka ni goŋ Absalomba. 3Nam li ni suluk ma bum lam ka ki fokom jewna na tew olo. Hurum ka toki ɗegee u Yawe, Loommaɗi. Ka ko ndal bum ŋgolo David lira naɗi lay. 4Ni kay ɗegeera vi Davidta, Yawe Loomma ɦam pindilla hu Yerusalem. Nam man sa a kak kay a ti mulla hu Yerusalemba.#1 Mul. 11.36 5Ni kay ana David li dlara ɗegeera ii Yawe. Dlara nam dambara halaŋ nam hin ta ka bay liɗi. Hu iiri mamba kay ndaŋgara halaŋ, coomba ni kay dlara vi Uri ma Hitna doy hol.#2 Sam. 11.1-27 6Duk ɦoŋ gi Roboam u Jeroboammi duuna ka tew tew hu iiri mamba kay ndaŋgara tanira.
7Sunda Abiyum laɗta halaŋ ka ɓiiri hu magaara Sunda vi Muli suu Yudanara. Duuna ka duk ɦoŋ gi Abiyam u Jeroboam tew tew. 8Abiyam buu ga u somoyomu. Asi pammi hu Ҥoŋzi Davidna. Goromma Aza varak kay mulla balamamu.
Aza, mul ma Yudana
(2 DLAŊ MULINARA 14.1,2; 15.16-19; 16.1-6,11-14)
9Hu basara dok-mba' ta Jeroboam kak a mulna vi suu Israelnara ni Aza mbuɗ a mul ma Yudana may. 10Nam ti mulla hu Yerusalem basara dok-fiɗi yam dew. Sum ŋgolo seɗ ana Maaka. Ndaɗ ni goŋ Absalomba. 11Aza li dlara ɗegeera ii Yawe ko ndal bum ŋgolo David lira na. 12Nam bulum dlara suu li ɓivun zoŋga ki hu mbas mamba, ɓalak fuli suu somoyom minisi a lo ma daŋŋa ki bel bel. 13Nam doo sum ŋgolo Maaka ki kay sun maɗta ca mulla su suunara lay. Kay ana ndaɗ li fuli maɗna maŋ Asera. Aza kaaɗ fuli maɗ namma ki ŋgalam ki fun mbo lum ma Sedronna. 14Na may li ma mbuy kolona bulum ka kiɗi. Lay ni Aza hurum tini ɗegee kay Yawe gak gak daɓ iiri mamba kay ndaŋgarara. 15Nam mbaa tle may suu asi u bum lasi ki teteɗna ki hu Ziŋ Yawera, doonora, lorra, u tlesuu sunda hu zira.
16Duuna li duk ɦoŋ gi Aza u Beasa, mul ma Israelna, gak gak fun miɗ mamma. 17Beasa, mul ma Israelna, duu Yuda. Nam ɦal saɓakŋa maŋ ɦoŋzi ma Ramana a doo voɗta ki fok Aza, mul ma Yudana. 18Aza yow gursura u lorra ta hin hu Ziŋ Yawera ura hin hu ziŋ mulnara. Sun saam ma sunda u asi maŋ Ben-Hadad, goŋ Tibmonna. Go ŋgolo Heziyonna, mul ma Sirina, ma ka cuki hu Damasna dam ana. 19«Vay banara, ko ndal somoyoy ti banara ay jew duk tasira na may. Aŋ gola an sunuŋ gursuna u lorra ha wanna a puura ɦawaa. Aŋ tuɗ bus galam maŋga u Beassa, mul ma Israelna, kiyo kay a nam hin yow suu duu mamsina ki hu mbas manda.» 20Ben-Hadad hum vun mulna Aza. Nam sun suu mam suu duuna a duu u suu Israelna. Nam ci gi Yon, Dan, Abel-Bet-Maaka suu hu mbassa Kinerotta halaŋ u suu hu mbassa vi Neftalira lay. 21Hu li ma Beasa hum boy namma na gaw ni, nam hin njunda njun u ɦoŋzi ma Ramana, tuɗ kak ha ki hu Tirsa gaw. 22Mulna Aza tok suu Yudana halaŋ hin sa ka ki dewɗi. Asi tuɗ yow ɦinira u gu ma Beasa cukum ha hu Rama a soosi usina. Mulna cuk tle asina ki hu Geba ta vi Benjaminda a soosi usira may. Hu Mispa may ko ndal mulna Aza dira na.
23Dlara daŋga Aza laɗta u sun mamba halaŋ. Tle asina ka ɓiiri ga hu magaara Sunda vi Mulinara. Va ma ka huɗina ni, mbuɗta nam mbuɗ ki maara, buu ma nam fi tuguɗiira ay ga eg sem na ɗowna hol. 24Aza buu ga eg somoyomu. Asi tosom eg somoyom hu Ҥoŋzi Davidna. Goromma, Josafat, varak a mulna balamam may.
Nadab, mul ma Israelna
25Hu basara mbara hu li ma Aza kak a mul ma Yudana ni Nadab ma goŋ Jeroboamma kak a mul ma Israelna may. Nam ti mulla ni basara mba'. 26Nam li dlara ka jivi ii Yaweɗira. Nam li dlara ni ko bum na olo, li dla cora nam cuk suu Israelna ka ki huruɗ halaŋga. 27Beasa ma goŋ Ahiyana hu deera vi Isakarra vi vunum u suuna kay mulna. Na ni Nadab u suu duu suu Israelna ha ki ŋguy ni kay ɦoŋzi ma Gibetonna may, ni hu mbassa vi suu Filistinna. Beasa tuɗ ŋgaɗ mulna Nadab kiyo. 28Dla ndaɗta li ni hu li ma Aza basa ki hu mulla kay suu Yudana hindira. Beasa ɓal mulla kiyo. 29Hu li ma nam kak a mulnana may ni nam ci njaf suu vi Jeroboamma ki halaŋ halaŋ, hin sa ma hu njafam ka iiri na dewɗi. Nam ci suu warna ki bel bel, ni ko ndal Ahiya ma Silona di dlara Yawe dambara ay ki fok jewra na may.#1 Mul. 14.10 30Dla ndaɗta mbay halaŋŋi kay ana Jeroboam li dla cora, cuk suu Israelna halaŋ hu dla co ndaɗta. Dla ndaɗta ɓeŋ huu Yawe Lona vi suu Israelna ki cocoo. 31U dlara Nadab laɗta halaŋ ka ɓiiri hu magaara Sunda vi Mulinara. 32Duuna li duk ɦoŋ gi Aza u Beasa, mul ma Israelna, tew tew ta ta hu miɗ mamma.
Beasa, mul ma Israelna
33Hu basara hindira hu li ma Aza, mul ma Yudana, kak a mulnara ni, Beasa ma goŋ Ahiyana kak a mul ma Israelna may. Nam kakŋi hu Tirsa li basara hu mulla ni dok-mba' yam fiɗi. 34Nam li dlara ka ii Yawe jiviɗira. Nam tli kommi voɗta vi Jeroboamba olo. Li ni dla cora nam cuk suu Israelna huruɗ halaŋga.
Currently Selected:
1 MULINA 15: BMS
Highlight
Share
Copy
Want to have your highlights saved across all your devices? Sign up or sign in
Bible Moussey © Bible Society of Chad, 2002.