1 MULINA 13
13
Sa ma jok vun Lona kaɓakŋa kay li ma ŋgal ɓivun ma Betelna
1Sa ma jok vun Lona col ay hu Yuda, Yawe sunum ay hu Betel, mba fi ni Jeroboam ŋgal ɓivunna hu kay givin ma togolla may. 2U boy ma Yawe dammana, nam sawalla kolo di ana, «Givin ma togolla, givin ma togolla Yawe di ay ana, gola goona hin vuɗ hu njaf ma vi Davidna, hin tinim sem ana Josiyas. Nam hin li ɓivunna ki kaŋ u muli suu ka li ɓivunna hu li ma teteɗna wanna, givin ma togolla ta asi ŋgal ɓivunna jew huna hin ŋgal sok suu warna ki huwa.»#2 Mul. 23.15-16 3Hu buu namma gaw ni sa ma jok vun Lona tak dlara ki di ana,
«Gola ni va ma Yawe takam kina.
givin ma togolla hin ɓuk kiyo,
mbul ma ay kolo kayamma hin vo ki kaŋgaa.»
4Hu li ma mulna Jeroboam hum boy ma sa jok vun Lona damma may ni, nam maɗ kom ha ki na ana, «Vagina aya.» Ay kolo hu givin ma togolla na wanna, kom so ha ki ni na gaw, ka hoŋ ay kaŋga um oloɗi. 5Givin ma togolla ɓuk ki ni na gaw. Mbulna cuk ay ki ga ko boy ma Yawe dam ay maŋ sa ma jok vun Lonana na may. 6Mulna di sa ma jok vun Lona ana, «Heɓ huu Yawe Looŋŋa ha na heɓge, cen ha kanu, hinin a kon hoŋ cuk ki ga na cage.» Sa ma jok vun Lona heɓ huu Yawe ko mulna hin hoŋ cukka kaŋga may. Kom hoŋ ki balamam ko fok jewra na. 7Mulna di sa ma jok vun Lona ana, «Kal ay vo varan a ti funa. An hin puuruŋ lay.» 8Sa ma jok vun Lona di mulna ana, «Lini aŋ ɦan ki ni nus ziiŋŋa lay ni an ka kal vo varaŋgi. An ka ti fuɗi, ka hin a ci yo hu li namma taniɗi lay. 9Kay dira dan ay fun Yawe ni ana, Aŋ hin ka ti fuɗi, aŋ hin ka ci yoɗi. Aŋ hin ka hoŋ vo ni hu voɗta aŋ tlaɗ ha jewra oloɗi.» 10Nam gi tam tli kommi voɗta daŋga, hoŋ ka hu voɗta nam tlaɗ ay jew a mbay Betella oloɗi.
Sa ma jok vun Lona ŋgel gaɗta
11Sa maa ma jok vun Lona ka hu Betel dew. Goryom tuɗ cuɗum dlara sa ma jok vun Lona daɗta. Asi cuɗum boy ma nam dam maŋ mulnana ki halaŋ halaŋ. 12Busi joɓosi ana, «Nam tli ni voɗ taarage?» Goryom tuɗ joɓ ay kay voɗta sa ma jok vun Lona ma col ay Yudana tlaɗta. 13Nam di goryom ana, «Ganangi korra.» Asi ganam korra. Nam ful kaɗu. 14Nam cuɗ u sa ma jok vun Lona, tuɗ fam kaki ga u ŋgus gu ma ŋgolna. Nam joɓom ana, «Ni aŋ sa ma jok vun Lona ma col ay Yudana su?» Nam hoŋom dira ana, «Ni anu.» 15Nam dam ana, «Mbay vo varan ti fu ay funuŋ nde.» 16Sa ma jok vun Lona dam ana, «Ҥawaa an ka ndak a hoŋ daganɗi, ka tuɗ u aŋgi lay. An ka hin ti fuɗi, ka ci yoɗi lay, ka ti va hu li namma taniɗi. 17Kay Yawe dan boy namma ka ni namu ana, aŋ hin ka ti fuɗi, aŋ hin ka ci yo hu li nammaɗi lay. Aŋ ka hin hoŋ vo hu voɗta aŋ tlaɗ ay jewra oloɗi lay.» 18Sa ma jok vun Lona ma maana dam ana, «Anni sa ma jok vun Lona ko aŋ na may. Sa sunda huulona dan ay ni diya ni boy ma vi Yawena ana, tuɗ hoŋom aya uŋ vo hu ziiŋu, nam ti funa may, ci yona may.» Nam kaammi boyna. 19Sa ma jok vun Lona hoŋ ay u namu, mba ti funa may, ci yona may.
Sa ma jok vun Lona ɓakŋa vamwa
20Hu li ma asi ka laki a tira ni Yawe di sa ma jok vun Lona ma hoŋom ayna. 21Sa ma jok vun Lona ma maana sawalla kolo eŋga, di sa ma jok vun Lona ma col ay Yudana ana, «Gola Yawe di ana, aŋ ŋgel gaɗta vi Bu Suunara, min ka a li u gaɗta Yawe Looŋŋa daŋgaraɗi. 22Aŋ hin hoŋ aya, ti funa, ci yona lay. Hu li ma an daŋ ana ti fu huɗi lay, ci yo huɗi layna, tliwiŋ hin ka pi hu zulla vi somoyoŋga oloɗi.» 23Hu li ma sa ma jok vun Lona ti funa ki may, ci yona mayna, sa ma jok vun Lona ma maana gan korra vi sa ma jok vun Lona ma nam hoŋom ay daganna. 24Nam gi tam may, dlona ŋgafam kolo hu voɗta, cam kiyo. Maɗam hin ki gi ga hu voɗta. Korra col ki keŋ dew may, dlona col ki keŋ maa dew may. 25Suu jak voɗna wi maɗ sana gi ga hu voɗta may, dlona coli keŋem zol may ni, asi mba njaɗ boy namma vo hu hoŋzi ma sa ma maa ma jok vun Lona ka huna. 26Sa ma jok vun Lona ma hoŋom ay voɗna hum boy namma na ni di ana, «Ni sa ma jok vun Lona ma ŋgel gaɗta vi Yawena. Yawe ɦam ki maŋ dlona cam ki wa, ni ko ndal nam dam ay ki fok jewra na may.» 27Nam di goryom ana, «Ganangi korra.» Asi ganamba may. 28Nam tuɗ ni fam maɗam gi kaŋga hu voɗta. Korra u dlona coli keŋem ca may. Dlona kom maɗ sana kaɗi, ci korra ka kiɗi lay. 29Sa ma jok vun Lona ma maana tli maɗ ndaramma kolo kay korra hoŋom ay voo. Sa ma maa ma jok vun Lona hoŋ ay hu ɦoŋzina mba tiirimu, pam may. 30Nam gi maɗ sana ni hu zulum tamba. Asi lam hahawam di ana, «Ҥii, wayanna.» 31Hu li ma nam pam ki pi ni hin di goryom ana, «Hu li ma an miɗ wa ni agi panni hu zulla an pi sa ma jok vun Lona huruɗ wanda. Agi gangi sokonni keŋ sokom may. 32Kay boy ma nam sawalla dam wanna hin li kiyo. Ni boy ma vi Yawena. Ni kay givin ma togolla hu Betel wanna, kay zi ma hu li ma mbuy kolona halaŋ, ma ka hu ɦoŋzi ma Samarina.»
33Dlara li vaɗ na lay ni, mulna Jeroboam ka hin poy mamba co ndaɗta kiɗi. Nam tuɗ fok u yowra yow muli suu li ɓivunna ay duk suu weɗnara gak gak. Sa ma min sun ndaɗta ni nam ɦamba ni na gaw. 34Dla ndaɗta mbuɗ ni suluk ma vi suu vi Jeroboamma halaŋ. Kay ndaɗta, ziim ɓalak kiyo, dlam bulum ki kay yam ndaŋgara halaŋ.
Currently Selected:
1 MULINA 13: BMS
Highlight
Share
Copy
Want to have your highlights saved across all your devices? Sign up or sign in
Bible Moussey © Bible Society of Chad, 2002.