1 MULINA 12

AY HU COKIRA MULLA ƁOROW KI MBARA TA TA MULLA ISRAELLA DAƁ KIYO

Tokka ŋgolla hu Sekem

(2 DLAŊ MULINARA 10.1—11.4)

1Roboam tuɗ hu Sekem kay ni li ma suu Israelna tok tasi ay hu halaŋ a ɦam mullana. 2Jeroboam ma goŋ Nebatna ha ki ni hu Egipte tuwa hu li ma nam pii ha ki ko mulna Salomonna. Hu li ma nam hum ana tokka ŋgolla ka hu Sekemmi, nam di ana nam min a kakŋi hu Egipte gak gak. 3Asi gi sunda kay Jeroboam. Nam mbay hu tokka ko tam u dee suu Israelna suu ay ii mbayawna halaŋ. Asi mba ɓak Roboam ana, 4«Buŋ kak kami wanni lasami cocoo. Aŋ may ni tli dlaŋ buŋga oloɗi. Nekka nam tinimira kami cocora aŋ tlaɗ kiyo ni ami hin sunuŋu.» 5Nam hoŋosi dira ana, «Tuɗugi voo lagi buuna ay hinda hin hoŋogi ay egen tuwa.» Suuna hin njay ki vo may. 6Mulna Roboam joɓ dlara ko suu maa suu li li sunda fok bumma hu li ma nam ka iiri tuna ana, «Agiya agi min a an hoŋ dira maŋ suuna ni ana mege?» 7Asi dam ana, «Cemi ni lini aŋ hoŋ taŋ kaŋga fok suuna, lini aŋ sunusiya, lini aŋ hoŋosi dira u boy ma jivina ni asi hin li ni a suu sun maŋsina gak gak.» 8May Roboam min gaɗta vi suu maarinara kaɗi. Nam yi gorzoŋina egemu, ni suu wul ko tasi dewna ni suu ka sunumma lay. 9Nam dasi ana, «Agi may ni agi min a an di ni ana mege maŋ suu may suu di ana an tlasi nek ki kasi ɦiw ta bun tinisira ka kasi cocora.» 10Gorzoŋi suu wul ko tasi dewna hoŋom dira ana, «Gola aŋ hin di ni ko ndal wandara na, maŋ suu may suu ɓakaŋ ay asina ana buŋ tinimi nekka kami cocoo, aŋ may ni tlami nek ndaɗta ki kamiya, aŋ hin hoŋosi dira ana, Gogor konda goora ni ŋgol su u fuu bunu, 11Bun tinigi nekka ka kagiya an may ni hin cuk ha kay nek ndaɗta hu olo. Bun waɗagi ni u balafna, an may ni balaf manna hin li ni su ma vi bunna.»

12Hu buu ma hindina ni Jeroboam u suu Israelna halaŋ tok ay eg Roboam ko nam dasi hara na may. 13Mulna min gaɗta vi suu maanara kaɗi. Nam hoŋ dira maŋ suuna u saɓakŋa cocoo. 14Li ni u gaɗta vi ndarayam gorzoŋinara di ana, «Bun tinigi dlara nekka kagiya, an may ni hin tinigi nekka ha kagi ni su olo. Bun waɗagi ni u balafna. An may ni balaf manna hin li ni su ma vi bunna olo.» 15Mulna min ka a hum vun suu Israelnaɗi. Yawe mbuɗ dla ndaɗta ki na ni kay a faɗ ki ni vi vun ma nam vam u Jeroboam ma goŋ Nebatna ay fun Ahiya ma Silona.

Mulla ɓorow kiyo

16Hu li ma suu Israel suu ii mbayawna wi ana mulna humusi boy masina kaɗi ni, asi di ana,

«Va ma ami a fam u Davidna ni mege?

Jo ma ami a fam vi goryoŋ Jesena ni mege?

Aygi suu Israelna, tuɗuygi hu mbutluɓ maygina#12.16 Tuɗuygi hu mbutluɓ maygina Boy namma min di ana «Hoŋaygi voo.».

Aŋ njaf ma vi Davidna tuɗ fok u mul maŋga ɗaŋ.»

Asi njay ki hin li namma ni na gaw.#2 Sam. 20.1 17Suu Israelna suu ka hu mbassa Yudara tuna Roboam hin a mulna kasiya u njaf suu vi Yudana halaŋ. 18Mulna Roboam sun Adoram sa ma ŋgol suu sunda haa. Suu Israelna gikim ki u gogoyra, cam kiyo. Mulna Roboam ful hu pus pus mamma, pii tuɗ Yerusalem. 19Suu Israelna garak ki u njaf suu vi Davidna ta ta cemi.

20Hu li ma suu Israelna hum ana Jeroboam hoŋ ay vo wana ni asi yi tok masira kay tasiya. Asi kakam a mulna kay suu Israelna halaŋ. Njaf suu vi Yudana hin u suu vi Davidna ni asi doy hol. 21Roboam mba tew Yerusalem tew ni tok suu vi Yudana kaŋga halaŋ u dee suu vi Benjaminna may, yow suu duuna na 180,000 a asi tuɗ duu u suu Israelna, a hoŋ mulla ay ni ko Roboam ma goŋ Salomonna dew. 22Lona di Semaya sa ma jogom vunumma ana, 23«Tuɗ di Roboam goŋ Salomonna mul ma Yudana maŋ suu Yudana halaŋ u suu vi Benjaminna u suu Israel suu hinna halaŋ. 24Ana Yawe di ana, Agi ka ndak a tuɗ duu u gorseginaɗi ni goryoŋ Israelna, hoŋogi voo. Kay an li dla ndaɗta na ni an daŋ may.» Asi hum boy ma vi Yawena, hoŋ dagan kay a li u boy ma vi Yawena.

Jeroboam cuk suu Israelna hu cora

25Jeroboam mbuɗ ɦoŋzi ma Sekemma u ɦinira vi Efrayimba ki saɓak cocoo nam cuk ni huwa. Ŋgoo dagan nam hin Sekem ki tani jok ki hu ɦoŋzi ma Penuwelna, nam mbuɗ ɦonzi namma saɓaki.

26Jeroboam ɓak tam hurum ana, «Dlara li tuɗ ni ko wanda na ni suu hu mul mandana hin hoŋ ki daa u njaf suu vi Davidna. 27Lini suu Israelna tuɗ kolo Yerusalem gak a li ɓivunna hu Ziŋ Yawera ni huu suu asina hin mbuɗ u mul masina Roboam, mul ma Yudana. An may ni asi hin can kiyo. Asi hin hoŋ ay ki halaŋŋi u Roboam mul ma Yudana.» 28Mulna fi saara daŋga. Nam yoo gor mbutlina mba' u lorra. Nam di suu Israelna ana, «Agi tuɗ tew tew ni Yerusalemmi gola agi suu Israelna Loogina wanna, ni ma cukugi ay ki hu mbassa Egiptera.»#Kal. 32.4 29Jeroboam col taa hu Betel dew may, col ta mbara ha ki hu Dan may. 30Nam zuɗ u suuna a li cora. Suuna bolow coco tuɗ u fuli namma a tuɗ tinim hu Danda. 31Jeroboam min zira cenda may. Nam vaa suu a li ɓivunna hu zi ndaɗtana ni ka suu hu njaf Levi ma li ɓivunnaɗi lay. 32Nam tin luuna dew ni hu buuna doogo yam vadl u til ma kalavandina. Luu namma ni ko ma ka lam hu Yudana na may. Nam mbaa ɓivun mamma ay u tamba kay givin ma togolla may. Gola ni dlara nam laɗ ay hu Betella. Li ɓivunna maŋ gor mbutli suu nam yoorosina. Nam cuk muli suu li ɓivun suu daŋŋa hu li ma teteɗna may.#Lev. 23.33-34 33Hu buu ma doogo yam vadlna hu til ma kalavandina ni nam tuɗ kolo hu givin ma togolla, buu mam ma nam ŋgaɓam kay tamma. Nam tin luuna maŋ suu Israelna, ŋgal tlesuu his jivina hu givin ma togolla may.

Currently Selected:

1 MULINA 12: BMS

Highlight

Copy