1 MULINA 11

Suluk ma Salomon lamma

1Mulna Salomon min boyogi suu ka hu njaf suu Israelɗina cocoo. Goŋ Farawra, gorɓii suu Moabma, suu Amonna, suu Edomma, suu Sidonna, suu Hitna.#Gaɗ. 17.17 2Asi halaŋ ay ni hu njaf suu Yawe di suu Israelna kasi ana, «Agi ka kal vi suu asinaɗi. Suu asina kal varagiɗi may. Li ka naɗi ni asi hin mbuɗugi hurugi ki u loogi masisina.»#Kal. 34.16; Gaɗ. 7.3-4 3Nam ɗum goryoŋ mulinana ni na kis kis kiɗisiya, gorɓii suu ɓoli mamsina ni kis kis hindi may. Boyogom mbuɗum hurum kiyo.

4Hu cokira Salomon mbuɗ ki maara ni boyogom pereɗem hurum ki u loogi masisina. Hurum ka ɗegee u Yawe Loomma oloɗi. Hurum ka ɗegee ko ndal huu bum David li ayra na oloɗi. 5Salomon goɓ ciciwra, Astart, lo cara ta vi suu Sidonnara, u Milkom, lo ma dlam co ma vi suu Amonna. 6Salomon li dlara ka ii Yawe jiviɗira. Nam ka tuɗ u Yawe hol ko bum David lira naɗi. 7Hu coki ndaɗta ni Salomon min li ma li ɓivunna kolo kay ɦinira vok taɗ u Yerusalem maŋ Kemos lo ma vi suu Moabma. Nam hin min li ma daŋŋa maŋ Milkin lo ma vi suu Amonna may. 8Nam min lina maŋ loogi suu daŋ suu vi boyogom suu daŋŋa ni na lay. Kay a asi li ɓivunna maŋ loogi masisina, ŋgal mbul ma his jivina may. 9Yawe hurum ɓeŋ ki eg Salomon kay ana hurum ka toki um dew oloɗi. Lo ma vi suu Israelna ma tak tam irim yam mbana nam ɦal ŋgorom ki mamu. 10Nam dam ay ki jivi ana nam goɓ lo ma daŋgi. Salomon hin hum ka u dlara Yawe dambaraɗi. 11Yawe di Salomon ana, «Aŋ mbuɗ huruŋ ki ni ko ndaɗta na, min ka a li u galamba an vaɗ u aŋgaɗi, ka hum u gaɗ mandaɗi lay ni. An hin ɓaɗaŋ mulla ki koŋu, hin ɦaɗ ki maŋ saaŋ ma sun maa dew. 12Na may an ka li dla ndaɗta ni hu li ma aŋ ka iiri tunaɗi, ni kay jivira vi buŋ David. An hin ɓaɗaɗ ki ni hu duk ko gooŋŋa. 13Na may an hin ka ɓaɗ mulla ki halaŋgi. Dee maŋ ta hin hin ka hu mulla dew ni kay jivira vi buŋ David, kay Yerusalem ta an manaɗ ki duk ndarayaɗnara may.»

Suu babalira u Salomona

14Yawe col sa ma babalira kolo eg Salomon. Ni sa ma Edomma yam ana Hadad. Nammi hu deera vi mul ma Edomma. 15Hu cokira David duu ay u mul ma Edommara, saam ma ŋgol asgaana Joab tuɗ u suu duuna a pi suu Israel suu miɗ fun duunana. Asi ci gor njufii suu Edomma ki halaŋ halaŋ. 16Joab u suu mam suu duuna li tilna ay hu Edommi karkiya. Ni kay a ci gor njufii suu Edomma kira sak sak. 17Hu coki ndaɗta Hadad ni gogona tuwa. Nam pii tuɗ ki hu Egipte u suu taa um ɦiw, ni suu li ay a li sunda vi bumma. 18Asi yow ha hin mbassa Madiyanda ka ki tani, calaɗ mbassa Paranda. Hu li namma nam haɗ suu taa u nam ɦiw. Nam tuɗ hu Egipte eg mul ma kay mbas ndaɗtana. Mulna ɦal zi ma buuna maŋ Hadad, ɦam ndaŋgara may. Nam dam ana nam min a ɦam tina. 19Faraw min Hadad cocoo. Nam ɗumum tanamba, wayaŋ caamba Tapenessa. 20Wayaŋ Tapeness vuɗum go njufna. Nam tinim sem ana Genuba. Tapenes wulummi vo taraŋ vi mulna Faraw. Nam wul ni ko tam u goryoŋ mulnana dew. 21Hu li ma Hadad ay vi mulna tuna, nam hum ana mulna David miɗ kiwa. Sa ma ŋgol asgaana Joab miɗ ki wa lay. Ni nam di Faraw ana, «Hinin an hoŋ vo hu mbas manda.» 22Faraw joɓom ana, «Aŋ vo varan tani ni va ma kaɗak kaŋŋa ni mege? Aŋ hal a hoŋ hu mbas maŋga mbee ni kay mege?» Nam hoŋom dira ana, «Va ma kaɗak kan kaɗi, may ni aŋ hin an hoŋ hu mbas manda.»

23Lona col sa ma babali ma daŋŋa kolo eg Salomon olo. Ni Rezon ma goŋ Eliyadna. Nam ay ki ŋgay vi malamma Hadad-Ezer, mul ma Sobana. 24Hu cokira David ci suu duu suu vi Hadad-Ezerna kira ni Rezon tok suuna um tokŋi, mbuɗ tam fokosi a ŋgolla vi suu babalira. Asi tuɗ ki hu Damas lak ay ki huwa. Asi hin mbuɗ saɓakŋa, tli ŋgolla ni na gaw. 25Rezon mbuɗ ni sa ma babalira u suu Israelna hu cokira Salomon kaki a mulnara halaŋ. Ay keŋ hiŋŋa ni Hadad ka li cora ay hu gak may. Hu li ma nam kaki a mul ma Sirina ni nam ka ŋgaf u suu Israelnaɗi.

Jeroboam mbuɗ yara u Salomon

26Jeroboam goŋ Nebatna, nammi hu deera vi Efrayimba ay hu mbassa Seradara. Sem sum ana Seruwa. Ndaɗ ay ki ni doono. Nammi sa sunda vi Salomon lay. Nam gijaŋŋa duu u mulna. 27Gola ni dlara nam li yara u mulna kaɗta. Hu li ma Salomon mbu giriŋ ma yam ana Millona, min gulumun ma kay zi ma yam ana Ҥoŋzi Davidnana ki may. 28Jeroboam namma saɓak cocoo, ndaki coco lay. Salomon wi goo zoŋ namma ki ni hu li ma nam ka li sundana. Nam tinim a ŋgolla fok suu ka li sunda hu ɦoŋzi ma vi Josefna. 29Hu coki ndaɗta hu li ma Jeroboam kal ay ki hu Yerusalemma, sa ma jok vun Lona Ahiya ma Silona ŋgafam kolo hu voɗta. Ahiya u baraw ma wilina cuki egemu. Asi ki ŋgoo bagi ni vay dasi na mba'. 30Ahiya fok baraw mam ma wili namma, haaram irim ki duk na doogo yam mba'. 31Nam hin di Jeroboam ana, «Yow ii baraw ma haari doogo wanna. Yawe Lona vi suu Israelna di ana, an hin ɓaɗ mulla ay ki ko Salomon. An hin haŋ njaf suu uŋ doogo. 32Njaf ma hin hin ka um dewna ni kay jivira vi saan ma sunda David, kay ɦoŋzi ma Yerusalem ma an manam ki duk ndarayamma na may. 33Ni kay ana asi noyon kiyo. Asi goɓ kaŋga fok ciciwra, Astart, lo cara ta fi suu Sidonnara, fok Komos lo ma vi suu Moabma, fok Milkom lo ma vi goryoŋ Amonna. Asi min ka a tuɗ hu voɗ mandaɗi, ka li dlara irin ɗegeeraɗi lay, ka li u gaɗ manda u dlara an miniɗta ko bum David lira naɗi. 34An ka tli mulla ki ko Salomonɗi kay an kakam a mulna ni ta ta hu daɓpa vi buu mam ma kay ndaŋgarana. Ni kay dla saan ma sunda David ma an manamma. Nammi sa ma li u vun gaɗ mandana. 35Na may an hin ɓaɗ mulla ki ko goromma, hin ɦaŋga ki maŋu, ɦaŋ dee suuna ki uŋ na doogo. 36Maŋ goromma an hin ɦam deera ummi na dew daŋ, ni kay ana pindilla vi saan ma sunda li fokon tini hu Yerusalem tew tew, ni ɦoŋzi ma an manam ki a sen yi huna. 37Aŋ Jeroboam may ni an ɦaŋ mulla ko aŋ minda na. Aŋ hin kak mulna kay suu Israelna aragelay ko aŋ minda na. 38Lini aŋ hum u dlara an hin daŋgara, lini aŋ tuɗ ɗegee hu voɗ manda, lini aŋ li dlara irin ɗegeera, li u gaɗ manda u neenda ko ndal saan ma sunda David lira na ni, an hin li u aŋu, an hin coloŋ njafaŋ kolo saɓak ko ndal an li u njaf ma vi Davidna na may, an hin ɦaŋ suu Israelna ni maŋu. 39Kay ndaɗta an hin hoŋ yam njaf suu vi Davidna ki kaŋgaa, ni ka a fafaɗtaɗi kama.»

40Salomon hal mbeleŋa a ci Jeroboam kiyo. Nam pii tuɗ ki Egipte eg mulna Sisak, juɓ ta ta Salomon miɗ ki tuwa.

Miɗ ma Salomon miɗna

41Sunda vi Salomon ta hinda u yal mamma, tle asina ka ɓiiri hu magaara sunda vi Salomonda#11.41 magaara vi Salomonda magaa ndaɗta duk magaari suu jewna ni sa faɗ kaɗi. Cemi ni ndaɗ kaɗi.#2 Dlaŋ 9.29-31 42Salomon basa a mulna kay suu Israelna hu Yerusalemmi basara dok-fiɗi. 43Hu li ma Salomon miɗna, asi pammi hu Ҥoŋzi Davidna eg bum David, goromma Roboam varak a mulna balamammi namu.

Currently Selected:

1 MULINA 11: BMS

Highlight

Copy