Markus 6

Ɗii na Nazaret detaf nən Zezu ɓa

(Matiye 13.53-58 / Luka 4.16-30)

1Zezu azarək sədaka ambatək atəki aɓayə: Gewleɗ nan asbanənka. 2Adan pay naffet* agapə, atəŋgək wərban sit zəga adəv gəla nakkal net Yahudiyenɗe. Ɗii diiɗa apprəmənək wənnani, agətaŋka, aɓɗaŋ na: Səŋga arəh wənnəŋ di? 3Ndəni wətən məntar wəleŋɗe nak ɓa sa, wətət Mariyi məlmən Zak də Zozef gəm Zuda də Simoŋ ɓa sa? Milmiŋgiɗin muguliŋgit bo tahəŋ də mənam aŋ yaŋka'a ɓa sa? Vi vaski dətafnən wənan ɓa. 4Yaŋ Zezu apsit na: Məs kleŋ warah gakdak ko aŋga amma aka dələv nani, gəm aweleŋgit milmiŋgiɗin gəm aweleŋgit ɗii naŋgil annan da arah na gakdak ɓa. 5Zezu dəɓap wəɗɗa sokene adak ko muwan di ɓa, say aɗiyək van aket məs gbəgbaɗe ambəl gitike. 6Zezu agətək sawɓa vi tahəŋ də wətaf ɓa.

Zezu asliŋik gewleɗ nan klaw kiyit sula

(Matiye 10.5-15 / Luka 9.1-6)

Yaŋ Zezu abal aweleŋgit gəleɗe, naka dələv nadak pakə, arbanək wən sit ɗiiyi. 7Ayek gewleɗ nan klaw kiyit sula atəŋgək wəsliŋgit sula sula. Apsitik sembe nawtak wəla əmpəs mbrayen. 8Apsit na: Kədaw gəmaŋ ko mi avokum vi tive na malaka ɓa, ko zəga nawzəma, ko nzəkari na gəpa, ko suleyɗe aziba nokum kədaw gəmaŋ ɓa, say zleŋge kaaka'ə. 9Məgəm henseki, amma kədaw guloŋ lukut sula ɓa. 10Apsit əmpa na: Pay kəgapaŋ awalaŋ gəla, məsoŋ adəv gəla məs mətafkum ha gap pay nawmbat nokum sədaka. 11An ɗii walaŋ gəla maɓɓan aɓoŋguk dawtafkum, məzar sədaka, məttu burɗuk səza təlkum siti. Dəsan gən saydawa azeti. 12Apelinək wənna Maŋgəlva sit ɗiiyi dətubiyaŋ gəni, dəppanən gən mbrayen neti. 13Arɓihinik tuyeŋɗe mbreyit diiɗa, ambəl gitinik məs gbəgbaɗe diiɗa də wəpay sit mele.

Wəmta na Zaŋ məgəɗ baptem

(Matiye 14.1-12 / Luka 9.7-9)

14Daga dəpaski, Herodə agəmət Herodiya ga məlmən Filipi, yaŋ Zaŋ anahsən Herodə na: Dəslə kəgəmtə gən ga məlmuk ɓa. 15Adan Herodə apprəm vaska, armak Zaŋ aɓurkuko asganək a daŋgay, vi wənnata.

16Vi wənnani bo, Herodiya təzel Zaŋ, daga dəpas təkay tive nawbayən. Amma tərah tive nan ɓa, 17vi Herodə ageslne sənək Zaŋ, vi asənək na ɗəf mogoni, salalayi, agakka. Adan apprəm wən sə mani akkerik sawɓa, də aspak apprəmək dəzən neki. 18Yaŋ pay muwa Herodə agapə, yaŋ aɗɗa zəga nawzəma, aye ɗii gugiriɗ nani dit dayeɗe net sozeɗi, gəm ɗii gugiriɗ naka dələv na Galile.

19Wətət Herodiya məguluŋgut təguluk abalakə, təskəlka, annekik ze Herodə dit ɗii məyet pakə. Məlĩ assohotək gorku. Mi kəŋgəl nəpsuk gən di? Wanəpsuk zəga məs kəŋgəl pakə.

20-21Asɓanək wənnan də wəsuwaya, amna: Wanəpsuk zəga məs kəŋgəl pakə, ko wəɗɗak na məlĩ nawa. Goruk təgilke təmbatək azat mata təpsət na: Mi nədassoh ava məlĩ di? Mat təpsət na: Aŋglu ki Zaŋ məgəɗ baptemi. 22Go'ləŋ goruk təmilik aza məlĩya, təssohonka: Nəŋgələk kəpsu gən ki Zaŋ məgəɗ baptem aka pəlay nawəŋka. 23Wəssoh nan asiripik zə məlĩ sawɓa. Amma dəɓap wəɓoŋ sət ɓa, vi wənna əsuway məs asuway abet ɗii məs məyetiŋki. 24Aslənək soze də wəɗi sən wənnan dəki gən ki Zaŋ məgəɗ baptem. Soze ambatək a daŋgay atawək ki Zaŋ. 25Akiyək kini aka pəlay, apsətək gorku. Nat bo təpsətək mata. 26Adan gewleɗ na Zaŋ apprəmənən vaska, azoŋko agəmənək gəbay nani, adəkənka. 27Yaŋ məlĩ Herodə apprəm labara na Zezu, vi ɗii pak asənənək iya na Zezu. Ɗii tahəŋ wənahaŋ na: Zaŋ məgəɗ baptem dəsil sətəki əmta. Vi asan də sembe naɗɗe sokeneɗi. 28Amma ɗii meɓɓet aɓɗaŋ na: Ndəni Eliyas. Ɗii meɓɓet tamə aɓɗaŋ na: Ndəni məs kleŋ, səmbet məs kleŋɗe en farə. 29Adan Herodə apprəm vaska amna: As Zaŋ məgəɗ baptem an məs nəslən wətaw kiyən naki dəsil sətəki əmta.

Zezu azəm gitik ɗii uzinere sle

(Matiye 14.13-21 / Luka 9.10-17 / Zaŋ 6.1-14)

30Yaŋ masləŋɗe amilyoŋ akkalaŋgək aza Zezu. Anah sənənək an aɗɗaŋ də an məs arbanən pakə. 31Ɗii diiɗa məs dədazoŋ məs dədawmbataŋ, ha Zezu dit gewleɗ nan dərəhaŋ tive nawzəm way ɓa. Vini Zezu anah sit na: Mədam katər gəm awra, məfet gən suɗike. 32Ambataŋgək katirgit də bəlay awra.

33Amma ɗii meɓɓet awleninik dawmbataŋ asinninke. Agulyoŋguk daga suwalaŋ gəleɗe pakə, anzoŋguk də tilti, agapaŋgək dabəŋ ki Zezu dit gewleɗ nani. 34Adan Zezu aprik sədəv bəlay awlek ɗii məkkelit diiɗa. Awlak səsahati, vi tahəŋ va timeŋgiɗ məza məzutaɗɗa net ɓa. Atəŋgək wərban sit zəga diiɗa. 35Adan moskoy agəɗə gewleɗ na Zezu azoŋguk azani, apsənən na: Pay moskoy bo agəɗka aŋ bo awrayi. 36Apsit tive sit ɗii dəmbataŋ gən anet ɗii da daga awalaŋ gəleɗe tuwəɗ ki məŋki, dəlbəhaŋ gən zəga nawzəm sən kiti. 37Zezu azlansitike: Munokum sən kikum məpsit zəga nawzəma, yaŋ assohonəni: Kəŋgəl məl gən wəlbah dupeŋ dit suleyɗe səkat sula, məpsit gən dəzəmən gən sa? 38Yaŋ Zezu apsit na: Dupeŋɗe mbarwaŋ avokum di? Mudoŋ mule. Adan awlenini, apsənən na: Dupeŋɗe sle əŋgə dit kilif sula.

39Yaŋ Zezu anah sit gewleɗ nan na: Mənah sit ɗii dəsoŋ də təɓilit aka kevile mədəkani. 40Asoŋguk səkat səkatə, gəm kaklaw sle kaklaw sle. 41Zezu agimik dupeŋɗe sle neki gəm kilif sula neki, aslanək haran a disiŋ agəɗək soko sən Maŋgəlva. Yaŋ arɗet dupeŋɗe, apsit gewleɗ nani, gewleɗ bo apsitinik ɗiiyi. Vaski bo awɗeket kilif sula nek sit ɗiiyi. 42Ndəɗaŋ pak azəmaŋka abaŋka. 43Dərɓagani gewleɗ nan akkeletinik an dəmbraŋ aknəhinik keŋkelɗe klaw kiyit sula də an dəplaŋ səzet dupeŋɗe dit kilif neki. 44Wəŋɗa net ɗii məs dəzəmaŋ dupeŋɗe agəɗək uzinere sle, məzaŋɗet gil ɓa.

Va Zezu adaw aket iŋkile a pe'e

(Matiye 14.22-27 / Zaŋ 6.16-21)

45Dərɓagan ləŋgə, Zezu adewliyik gewleɗ nan dətoŋgoŋgən adəv bəlay, vi dəmbataŋ gən dabəŋ kiyən dəgar ki pe'e kla awalaŋ Baytisayda, pay nani tay milgit ɗii kana. 46Dərɓaga atrayaŋ: Ambatək aka gərma vi kawzuliya. 47Adan moskoy agəɗə bəlay tay adak pe'e yaŋ Zezu tay katər gən ama busgum. 48Awlek gewleɗ nan tahəŋ wəgayaŋ də wəŋkor bəlay, vi səmnya tayəɓleti aspak ba pum pumi tagay təki dəɓəl wədaŋ ɓa, tayəzan azet də wədaw aket iŋkile, agəɗək va wətoŋ kiti. 49Net bo adan awlanən adadaw aket iŋkile, azet na məs vevfi, anzlaŋgək vamvəlla. 50Ndəɗaŋ pak awlanənka, ageslne'eŋke. Amma Zezu apel sitik gu'u, apsit na: Məsok mokrokum əntə, kədaw geslne'eŋ ɓa. 51Yaŋ agul adəv bəlay azeti, səmnya bo aɓətka. Maɗulet azlərwika. Yaŋ gewleɗ pak agətaŋgə. 52Vi dəsənən wənnet dupeŋɗe nek ɓa, makret ɓəlli.

Zezu ambəl gitik məs gbəgbaɗe a Genezaret

(Matiye 14.34-36)

53Səza agaraŋ ki pe'e, agapaŋ ka aka dələv na Genezaret, apanənək bəlay atəki napet bəlayɗe ama busgum. 54Adan agilyoŋ sədəv bəlay, ɗii asənənək Zezu ləŋgə. 55Yaŋ anzoŋgu ko səŋga pakə səka dələv nani, aki sənənək məs gbəgbaɗe məslet aka zəga nafna neti. 56Ko aŋgay ambatə, aweleŋgit gəleɗe, walla awalaŋ gəla metiŋ də aweleŋgit gəleɗe ana mapoho, tahəŋ wəsekin məs gbəgbaɗe agilet lumiɗi, akkamanənka dəpetigən dərəŋgənəngən ko maŋgava lukut nan dayday, en məs dərəŋgənən pak ambəlaŋka.

Currently Selected:

Markus 6: GDRNT85

Highlight

Copy