Markus 4

Wən məkpaŋga na məzəslga

(Matiye 13.1-9 / Luka 8.4-8)

1Zezu atəŋkə yeget ɗii əmpa ama pe'e na Galile. Ɗii diiɗa azoŋko azani. Vi ni atoŋ adəv bəlay, asanka daka. Bəlay bo taya ket iŋkile a pe'e, ɗii bo tahəŋ ama busgum. 2Ayagen sitik zəga diiɗa dəwən məkpaŋga. Yaŋkan adəv wən adayagan sit nak kan na anah sit na: 3Məpprəma! Məzənse ambatka gulyo, vi kaw ndol haya. 4Adan adaw ndolni, zemve maɓɓan abətək aka tive, ɓiŋgeɗ azoŋko ayaɗ nənka. 5Zemve maɓɓan abətək aka soyomo, dələv taya kan ɓa. Go'ləŋgə agilke, vi dələv taya mban ɓa. 6Adan pay agili, azlaka, aɓətka, vi dərah təki nampa siwerin ɓa. 7Zemve maɓɓan əmpa abətək awalaŋ hogoy, aɓayaŋgək dəndən pakə, azəm gənək saka. 8Amma zemve maɓɓan abətək kəmpa aka ba'arə, agilke, aɓayka, aɗiyək aran sawɓa. Maɓɓan kaklaw hoku, maɓɓan kaklaw slire, maɓɓan səkatə. 9Yaŋ Zezu anah sit kana: Ɗəffan də sləman napprəma say dəpprəma.

Vi mi Zezu adawpel də wən məkpaŋga di?

(Matiye 13.10-17 / Luka 8.9-10)

10Dərɓaga wənnəska Zezu tay katər gəni, ɗii meɓɓeti dit gewleɗ nan klaw kiyit sula, assohonənək Zezu aka wən məkpaŋga naka. 11Zezu azlansitike: Nokum Maŋgəlva arban sukumək wən məɗama na məlĩ nani. Amma ɗii meɓɓeti, say də wən məkpaŋga adapprəmən wənnəs pakə. 12Vi vaski,

Wawlanən də hereti, amma asənən na ɓa.

Wapprəmən də sləmeti, amma apprəmanən na ɓa.

Vi adaw milyoŋ aza Maŋgəlva ɓa

Maŋgəlva bo adaviyan sit mambray net ɓa.

Zezu agil gənək kotak na wən məkpaŋga naslga naka

(Matiye 13.18-23 / Luka 8.11-15)

13Yaŋ Zezu apsit na: Kəpprəmənən wən makpaŋga nan ɓa sa? Ya an vaski na mbar kədapprəmən wən məkpaŋga an pak di? 14Məzəzlga tayəzlga wəpel na Maŋgəlva. 15Zemve an naka tive, ndəni ɗiiyen dəpprəmən wənna Maŋgəlva, go'ləŋ Satan adeke, agəmək wəpel an məzlgan sə məkreti. 16Ɗii meɓɓet bo tahəŋ va zemve məs dəbət aka soyomo. Adan apprəmən wəpel na Maŋgəlva, go'ləŋ atafənək də wəneken ziti. 17Amma wənna Maŋgəlva dəmpa siwerin amekret ɓa, wasoŋ pay suɗike, vi vaski an wən tattuwãh də wərmama asilik vi wənna Maŋgəlva, wapanən wənnan go'ləŋgə. 18Ɗii meɓɓeti tahəŋ va zemve dəbət awalaŋ hogoy. Net bo tahəŋ wəpprəmən wənna Maŋgəlva. 19Amma zəga nawsime, də zəga nawzəma, dəwərak na arya də suniɗ temtem watoŋ amekreti waray gən wəpel na Maŋgəlva wəpel na Maŋgəlva arana wənzləra amekret ɓa. 20Ɗii meɓɓet tahəŋ va zemve dəbət aka dələv mogoni, tahəŋ wəpprəmən wəpel na Maŋgəlva, atafənka, wanzlər gənəni, meɓɓet kaklaw hoku, meɓɓet kaklaw slire, meɓɓet səkatə.

Wən məkpaŋga na pitirla

(Luka 8.16-18)

21Zezu apsit na: Ɗəf waki pitirla vi kawɗəp mosgoy akan sa, walla kawɗiyən amba hargaŋgu? Walla atəki naɗiyən adaɗiyəni? 22Zəga an məɗama pak wasan appaka, wən məs məseske'ən pak wapprəm appaka. 23Ɗəf an dəsləmani, say dəpprəma.

24Zezu apsit əmpa na: Məzi zukum aza an məs kədapprəmaŋ. Wəsla an məs kədawslenin ɗiiyiŋki, dəni Maŋgəlva adawslumkum, wəslukum daykiyən neti. 25Ɗəffan də zəga avani warah akan diiɗa, ɗəf məs tay də zəga ɓa kawtafəni ana van suɗike.

Wən məkpaŋga na zemve

26Zezu anah kəmpa: Məlĩ na Maŋgəlva tay va ɗəf məzundol zemve agulyo nanda. 27Yaŋ adawleŋge afɗaahə, dəfəɗ də kapay zemve agilke, aɓayka, amma dəsən va aɓay ɓa. 28Vi dəlva fuŋ waɗi hay aran katər gəni: Dabəŋ wapoku asna bu'um askana hay aɗika. 29Ndəni kana hay aɓəlka, asna ɗəf wagəm slogoy nani kabəla vi mawala agəɗka.

Wən məkpaŋga na zemve na sita

(Matiye 13.31-32,34 / Luka 13.18-19)

30Zezu amna: Də mi mədasla məlĩ na Maŋgəlva di? Də wən məkpaŋga awan mədaslan di? 31Aslək də zemve na sita (sita naka dələv neti) ndətə məzliyək daykiyit zemveɗe namba dələv pakə, an məslgəti. 32Amma pay məslgəta, watəgili, watəɓay daykiyit zigeɗ məslget pak də gaslamba watəska kivat diiɗa ha biŋgeɗi nawra wazoŋ wəzaɓən gəla net ara zeŋgille na vata.

33Zezu arbanək wən sit ɗii diiɗa də wən məkpaŋga vaska, arban sitik va adaɓapən wəpprəməni. 34Amma dəpel də wən maɓɓan ɓa, say də wən məkpaŋga. Amma adan tay dit gewleɗ nan katirgiti, agil gən sitik wənnan pakə.

Zezu tay ɓitgit barkataŋ

(Matiye 8.23-27 / Luka 8.22-25)

35Moskoy nan dəpaska, Zezu apsit gewleɗ nan na: Mədaməs dəgar ki pe'e. 36Appetinik ɗii məkkelti, gewleɗ nan aguloŋguk adəv bəlay məs Zezu asani. Bəlayɗe meɓɓet tahəŋ amaŋgavani. 37Barkateŋɗe asilyeŋgək də sembe, vovolumɗe aslkərənək bəlay, ha bəlay aknahək dit iŋkile. 38Zezu tay məleŋgin aza gabba bəlay dərɓe, aɗiyək kiyən aka antoŋ. Gewleɗ nan afɗaahanənka, yaŋ apsənən na: Mərbə zəga kaɗumən na wəza mədaza ɓa sa? 39Zezu asilke ahayanək barkataŋ amna: Aɓətə, barkataŋ aɓətka, yaŋ zəga pak sləɓək agəɗə. 40Yaŋ Zezu apsit gewleɗ nan na: Vi midəray kədaw geslne'eŋ vaŋ di? Vi mi munokum tat də wətaf ɓa di? 41Ageslne'eŋgək sawɓa, yaŋ anahaŋ awalaŋ zit na: Aŋ ɗəf miyaŋ di, ko barkataŋ də pe'e pak wəpprəmən manəŋ di?

Currently Selected:

Markus 4: GDRNT85

Highlight

Copy