Markus 3

Ɗəf məs van məmtəni

(Matiye 12.9-14 / Luka 6.6-11)

1Yaŋ Zezu agul adəv gəla nawpel wənnet Yahudiyenɗe əmpa. Ɗəf məs van məmtən taya daka. 2Ɗii meɓɓet tahəŋ adak ulanən Zezu də kuket neti, kuzuŋ wambəl gən ɗəffəŋ pay naffet* na kawəliyən. 3Zezu ayak ɗəf məs van məmtən naka, apsən na: Asili, aziw aweleŋgit ɗii pakə. 4Yaŋ assohet ɗii yen dədawlanəni: Mi ma henziŋ nam apsəm tive naɗɗan pay naffet di? Wəɗɗa mogon sa, walla wəɗɗa mbrayen? Wəkoho gən zeŋgille ɗəf sa, walla wəzani? Amma dəzlanən ɓa. 5Zezu awlek na gədəfən nawda, makra ɓəɓəl net asanəka. Yaŋ anahsən ɗəf məs van məmtən naka: Appar voko. Apparək vani. Van abəlka. 6Farisiyenɗe* ambataŋka, akkalaŋgək dit ɗii na Herodə, aslerinik meti vi kawbay Zezu.

Ɗii dəzoŋ aza Zezu ama pe'e

7Yaŋ Zezu ambat dit gewleɗ nan kla ma pe'e na Galile. Ɗii diiɗa asbanənka daga sə Galile gəm sə Zude, 8gəm sə Zerusalem, gəm səka dələv na Idumaya, daga səbal sən məlpa na Zordan, gəm səka dələv na maŋgava Tirus də Sidon. Ɗii pak azoŋguk azani, vi apprəmənək labara na wəza nan ɗaahə. 9Zezu anah sitik gewleɗ nan də kayaŋ sənən gən bəlay, vi ɗii adawhaslanən ɓa, vi ɗii net diiɗahəŋ sawɓa. 10Vi daga laŋka ambəlgitik ɗii diiɗa, vi vaski məs gbəgbaɗe pak akkalaŋgək azani vi kawrəŋ gəni. 11Ɗii məs də əmpəs mbrayen aketi, adan awlanən Zezu asbəraŋgək abani, aɗiyaŋgək geŋgere: Əstə Wətən Maŋgəlva*. 12Zezu ahayetik ɗii mitemit də sembe, vi adarbanən ɓa.

Va Zezu awel masləŋɗe klaw kiyit sula

(Matiye 10.1-4 / Luka 6.12-16)

13Yaŋ Zezu ateŋ aka gərma, ayek ɗii məs aŋgələ dəzoŋ gən azani. 14Awelik klaw kiyit sula, ayek na masləŋɗe. Vi dəsoŋ gən dəni, kawslinit wəpel wənna Maŋgəlva. 15Zezu apsitik sembe narɓahan əmpəs mbrayen. 16Klaw kiyit sula məs Zezu awel nek yeŋki: Simoŋ (Zezu apsənək iya na Piyer), 17Zak wətən Zebede də Zaŋ an məlməni. (Zezu apsitik iya na Bonerges va wənah na ɗii məs dəgulyoŋ va hay na buna.) 18Andre, Filip, Bartolomi, Matiye, Tomas, Zak wətən Alfa, Tadde, Simoŋ na Kanana, 19gəm Zudas Iskariyot məs dəzəm ki Zezu azet məzuzelini.

Zəga tay dəsapan Zezu də Satan ɓa

(Matiye 12.22-33 / Luka 11.14-23; 12.20)

20Zezu amilik eŋgili. Ɗii akkalaŋgək azan diiɗa əmpa, ha Zezu dit gewleɗ nan dərəhaŋ təki nawzəm way ɓa. 21Adan hilfiŋgiɗin apprəmənən vaska, azoŋguk wəɓelin, vi ɗii tahəŋ wənahaŋ na: Mitemini.

22Məsənaŋ zəga na ma henziŋ azoŋguk daga sə Zerusalem aɓɗaŋ na: Tay də Belzebul akani. Ɗii meɓɓet aɓɗaŋ na: Məlĩ net tuyeŋɗe dəpsən sembe narɓihti. 23Zezu ayek ɗii azani apel sitik də wən məkpaŋga. Amna: Mbarmbar Satan adawɓap wərbahan Satan di? 24An məlĩ awdakək temtem na, məlĩ nan asana ɓa. 25An ɗii na daŋgla taka awslereŋ ɓa, asna daŋgla nan asanna mogon ɓa. 26Vaski bo an Satan asilik aka zəni asna məlĩ nan wawɗakə aziw na ɓa, asna sembe nan bo wagrakə.

27Ɗəf aɓapna wətoŋ eŋgil ana ɗəf guromda kawhal zigeɗ nan ɓa, say an aɓrukuk ɗəf gurom tagay dəndegin zigeɗ nani.

28Gesiŋ nədawnah sukum: Ɗii warəhaŋ wəviyan mambray net pak də wəpel mbrayen məs adawpeleŋ. 29Amma ɗəf dədawpel mbrayen aka Əmpəs Salala* arah na wəviyan mambray nan ɓa ha faɗə, mambray nan wasan ha faɗə. 30Zezu anah vasna vi ɗii meɓɓet anahaŋgək na: Zezu tay də əmpəs mbrayen akani.

Milmiŋgiɗin Zezu dət mani

(Matiye 12.46-50 / Luka 8.19-21)

31Yaŋ ma Zezu dit milmiŋgiɗin azoŋgu. Aziweŋgək appaka, aslənaŋgək azan wəyani. 32Ɗii diiɗa tahəŋ ɗew ɗew amaŋgavani. Apsənən na: Mok dit milmiŋgiduk tahəŋ wəkoyokəni. 33Azlan sitik na: Nawattə əmma di? Mədəŋgaŋ milmiŋgiɗu di? 34Awlek ɗii yen dəkdahaŋ kiyən amaŋgavani amna: Əŋkiŋ may əmma dit milmiŋgiɗwa. 35Ɗəf məs dədaɗɗa wəŋgla na Maŋgəlva ndəni məlmuwa gəm məlmu məguluŋgəta dət əmma.

Currently Selected:

Markus 3: GDRNT85

Highlight

Copy