Markus 2

Zezu ambəl gənək məs gbəgba' məɗeŋgreŋ

(Matiye 9.1-8 / Luka 5.17-26)

1Dərɓaga wəvoŋ suɗike, Zezu amndanək a Kafarnahum. Ɗii apprəmənək na tay eŋgili. 2Ɗii akkalaŋka azani ko təki dəmbər ɓa, də memeŋle pakə. Yaŋ Zezu arban sit zəga. 3Yaŋ ɗii meɓɓet azoŋ, aki sənən ɗəf məs gbəgba' məɗeŋgreŋ sən Zezu, ɗii poɗo də slanənni. 4Dərəhaŋ wəgap gən aza Zezu ɓa vi ɗii tahəŋ diiɗa. Vi vaski abətən ki gəla atəki məs Zezu asani. Yaŋ apriginin məs gbəgba' məɗeŋgreŋ nak məvoŋ gən aka hargaŋgu nan də helege, aɗiyənək aba Zezu. 5Adan Zezu awla wətaf neti, apsən məs gbəgba' məɗeŋgreŋ na: Wətuwa, mambray nok avika. 6Məsənaŋ zəga na ma henziŋ tahəŋ adak ɗew ɗewi, yaŋ aɗumoŋ a mekret na: 7Vi mi ɗəffəŋ adawpel mbrayen vaŋ ka Maŋgəlva di? Naway nawɓap wəviyan mambray di, an Maŋgəlvayi katər gən ɓa di? 8Zezu asənək wəɗum na mekreti. Assohetike: Vi mi kədaɗumoŋ a mokrokum vas di? 9Awani məza tay tuwãh ɓa di, wənahsən məs gbəgba' məɗeŋgreŋ na: Mambray nok avika sa, walla wənahsən na: Asili, aslan zəga nawvoŋ noko doko? 10Amma nəŋgəl na kəsənən gən na Wətən Ɗəf* tay də sembe aka dələv na viyan mambraya. Yaŋ apsən məs gbəgba' məɗeŋgreŋ na: 11Əntat ənah suko: Asili, aslan zəga nawvoŋ nok doko.

12Kakaŋkani asilke, slanək zəga nawvoŋ nani, ambatək keret pakə, agətaŋgək sawɓa, agakdakanənək Maŋgəlva aɓɗaŋ na: Mul ɗaah zev zəga vaŋ ɓa.

Va Zezu aya Lewi

(Matiye 9.9-13 / Luka 5.27-32)

13Zezu ambatək əmpa, kəla ma pe'e na Galile. Ɗii diiɗa azoŋguk azani, arban sitik zəga. 14Adan adasban tive, awlak Lewi wətən Alfe tay ɗewwe adəv gəla na duwan. Apsən na: Asbawa. Lewi asilke, asbanəka.

15Yaŋ Zezu asan ana Lewi da vi kawzəma. Yaŋ duwenɗe diiɗa dit məs mambrayɗe asuwaŋgək kawzəm də Zezu dit gewleɗ nan pakə. 16Adan məsənaŋ zəga na ma henziŋ dit Farisiyenɗe* awlanən dawzəm dit duwenɗe gəm məs mambrayɗe, assohetinik gewleɗ na Zezu: Vi mi adaw zəm dit duwenɗe may dit məs mambrayɗe di? 17Adan Zezu apprəm vaska, apsit na: Ɗiiyen də zam na zit na, wəray net tay naŋgla zloktor ɓa. Say məs gbəgbaɗe. Nəde vi kawye ɗiiyen salala ɓa, say ɗii məs mbreyiti.

Wəssoh aka wənna see' meme

(Matiye 9.14-17 / Luka 5.33-39)

18Yaŋ pay mbərən gewleɗ na Zaŋ məgəɗ baptem dit Farisiyenɗe* tahəŋ wəsee'eŋ meme. Yaŋ ɗii azoŋ, assohonən Zezu: Vi mi gewleɗ na Zaŋ məgəɗ baptem dit Farisiyenɗe adawsee'eŋ meme, amma gewleɗ nok asee'eŋ meme ɓa di? 19Zezu azlansitike: Ɗii məyet atəki wəɓel wasee'eŋ meme an məzu ɓel tay dənɗaŋ sa? Agəɗ na ɓa sam. Aɓapaŋ na wəsee meme an tay dənɗaŋ ɓa. 20Pay maɓɓan wade məzu ɓel wambat səzeti, asna pay nani wasee'eŋ meme.

21Ɗəf aɗisəna lukut məsvan də gabaga meleketen ɓa, vi gabaga an məɗisənəŋ waŋgar lukut məsvani wəŋgar nan bo waday ki an laŋka. 22Vi vaski bo, ɗəf aɓapna kawzi biya məza dəhəs ɓa adəv konekoneɗ məsvet ɓa, vi biya waŋger konekoneɗ dawhəssa, warayaŋ biya nan bo wambat afuŋ. Amma ɗəɗaah wəzi biya məza dəhəs ɓa adəv konekoneɗ meleketeti.

Zezu gəm pay naffete*

(Matiye 12.1-8 / Luka 6.1-5)

23Yaŋ pay naffet na Zezu atoŋguk kla dəv guli na alkamari (zev hay neti) dit gewleɗ nani. Adan adawmbataŋ, gewleɗ nan anzlaŋkiyən taka taka. 24Vi vaski Farisiyenɗe* assohonən Zezu: Vi mi gewleɗ nok adaɗɗaŋ wəza an dəslə naɗɗa pay naffet ɓa di? 25Zezu azlansitike: Kəŋɗanən ɗaah an məs Davit agəɗ gala maay adaa ɓa sa, tay də zəga nawzəm ɓa, ndəni dit ɗii nan pak ɓa sa? 26Atoŋguk adəv gəla na Maŋgəlva, azəmik dupeŋɗe məs məɗiyit vi wəza na Maŋgəlva. Abiyatari daya net məs dəlveŋge na Maŋgəlva pay nani, mətawaŋ wəla zəga sən Maŋgəlva həŋ ma henziŋ apsit tive nawzəm dupeŋɗe net kaaka'ə. Amma Davit azimike, apsitik ɗii nani. 27Yaŋ Zezu anah na: Pay naffet tay vi kawtər wəray sən ɗəffa. Məɗɗani ɗəf vi pay naffet ɓa. 28Vi vaski Wətən Ɗəffi* affən pay naffete.

Currently Selected:

Markus 2: GDRNT85

Highlight

Copy