Markus 15

Zezu aba Pilatu

(Matiye 27.1-2,11-14 / Luka 23.1-5 / Zaŋ 18.28-38)

1Adan təki adaŋgə, ɗii dayaɗe net məs dəlveŋge na Maŋgəlva, dit ɗii gugiriɗ na dəlva dit məsənaŋ zəga na ma henziŋ, gəm məzaɓaŋ wənna, aslerinik met pakə. Aɓrukunək Zezu, akanənka, apsənənək ava Pilatu. 2Nan bo assohonək Zezu: Əstə məlĩ net Yahudiyenɗe sa? Zezu azlan sənəka va kənahə. 3Dayaɗe net məs dəlveŋge na Maŋgəlva, awəliyinək Zezu də wən temtemi. 4Yaŋ Pilatu assohon man əmpa na: Kawzlan ɓa sa? Kapprəmən va adawəlikun də wən temtem məŋ ɓa sa? 5Amma Zezu dəŋgəm wəpel ɓa, Pilatu bo asanək gərəŋgə.

Mətawi kita namta aka Zezu

(Matiye 27.15-26 / Luka 23.13-25 / Zaŋ 18.38—19.16)

6Pay wəzləra na Paska* agəɗ pak Pilatu tay əpan sit ɗii ɗəf taka məs aŋglaŋ sə daŋgay. 7Dəpasna ɗəf taya daŋgay iya nan na Barabbas. Ndəni dit ɗii meɓɓeti aɗɗaŋgək wənna, abayaŋgək ɗəffa pay adawsil gənən wənna. 8Yaŋ, ɗii atəŋgaŋ wəɗi geŋgere, anahsənən Pilatu na aɗɗasəm va laŋka. 9Pilatu apsit na: Kəŋglaŋ nəppan sukum gən məlĩ net Yahudiyenɗe sa? 10Asənka daya net mətawaŋ wəla zəga sən Maŋgəlva akansənən Zezu na vi kotoroki. 11Amma dayaɗe net məs dəlveŋge na Maŋgəlva araketinik ɗiiyi məŋglu dəpan səm gən Barabbas. 12Pilatu anah sitik ɗii məkkelit əmpa na: Mi nədaɗɗa də ɗəf məs adawyaŋ na məlĩ net Yahudiyenɗe di? 13Aɗiyaŋgək geŋgere: Alaw aka wəlaŋga məzliwrihe! 14Pilatu assohotike: Mbrayen mi agəɗ di? Amma aɗiyaŋgək geŋgere dayki laŋka: Alaw aka məzliwrihe! 15Pilatu aŋgələk wəɗɗa an neneken zit ɗiiyi. Vi ni apansit Barabbas. Amma aɗiyək wənnani avərənək Zezu, apsitik Zezu aveti, dəkpa' nəŋgəni aka wəlaŋga məzliwrihe.

Sozeɗ anahaŋgək wən aza Zezu

(Matiye 27.27-31 / Zaŋ 19.2-3)

16Yaŋ sozeɗ akanənək Zezu eŋgil ana Pilatu da, ayeninik sozeɗ pakə. 17Aguloŋ sənənək lukut peppreŋge, atroɗinik gedirgeɗi ka mətər kiya, aɗupsənənək akani. 18Yaŋ kan asɗanəni: Usɗoko məlĩ net Yahudiyenɗe? 19Arganənək aza kiyən də zleŋge, atufinik mifɗe akani, akdukoŋguk abani aɓe'eŋ sənənka. 20Adan agrakən wənəh wənna zani, agbukunək lukut peppreŋ naka, agul sənənək lukut nani. Yaŋ akanən ama poho vi kawlawən aka wəlaŋga məzliwrihe.

Məkpa'ni Zezu aka wəlaŋga məzliwrihe

(Matiye 27.32-44 / Luka 23.26-43 / Zaŋ 19.17-27)

21Adan ambataŋ aka tive na, almaŋ sənənək ɗəf na Siriya iya nan na Simoŋ, affən Aleksandər də Rufus, nan bo tayəzan sə gulyo. Yaŋ sozeɗ aɗɗaŋ sənənək dewle dəslan gən wəlaŋga məzliwrihe səka Zezu. 22Akanənək Zezu atəki məs adawyaŋ na Golgata (va wənah na bəbər kiya). 23Aŋglaŋ wəpsənən biya məslahan də an tatraha dəsaa gəni, amma Zezu dəŋgəm wəsan ɓa.

24Yaŋ akpanən aka wəlaŋga məzliwrihe, awɗeketinik lukutɗe nani, askaŋgək saasa aka lukut nan məza wərma taya zan ɓa, kuzuŋ naway dədaw zəmən. 25Dəpasna ler vaytaki, də mompumoyi akpanən aka wəlaŋga məzliwrihe. 26Averinik wənna kita nan aka papalam vaska: Məlĩ net Yahudiyenɗe.

27Akpa'inik ɗii sula məvoŋgoŋ tive aket wəleŋɗe məzliwrihe amaŋgava Zezu, maɓɓan aka van dəzəŋ, maɓɓan aka van zlaɓay. 28[Agəɗ vasna vi an məverin adəv ɗerewel dəgrak gəni amna: Məŋɗani aweleŋgit ɗii mbrayti.]

29Ɗii məzu toŋgoŋ dədak aɓlanənək kiti, aranənka: Aɓɗaŋ na: Is naɓzlu gəla metiŋ naw zuliya*, karkan pay hoku, 30akoh gən zuk kana. An Wətən Maŋgəlva* kənani aprik səka wəlaŋga məzliwriheŋka. 31Vaski bo dayaɗe net məs dəlveŋge na Maŋgəlva dit məsənaŋ zəga na ma henziŋ, anahaŋ wənna aza Zezu, awkohgitik ɗii meɓɓeti, aɓapna wəkoh gən zən ɓa sa? 32Say an mulak Messiya* məlĩ net Israyelɗe tay priken səka wəlaŋga məzliwrihe, asna wamətafa. Ɗəffan məkpa'ən də Zezu aka wəlaŋga məzliwrihe nak pak aranək Zezu.

Wəmta na Zezu

(Matiye 27.45-56 / Luka 23.44-49 / Zaŋ 19.28-30)

33Daga pay ziwi, guzli titir agəɗək aka dəlva pak ha gap ler hoku moskoyo. 34Də təbəs hoku Zezu aɗiyək geŋger diya diya: Eloy, Eloy, lema sabaktani. (Va wənah na: Aw Maŋgəlva nawa, aw Maŋgəlva nawa, vi mi kəpaw di?) 35Ɗii en də ziweŋ adaka, adan apprəməni, aɓɗaŋ na: Məpprəma tay iya məs kleŋ Eliyas! 36Ɗəf maɓɓan anzanək də kakara, aguluk gizlete ara zlərga asləkək ama ngava. Yaŋ atəl sən Zezu dəsaa gəni, amna: Tagay mula səmə kuzuŋ Eliyas wade wəpri gən səka wəlaŋga məzliwrihe sokoh. 37Amma Zezu aŋgəzlək vamvəl metiŋgin ndən man bayə.

38Gabaga məs mətawan gədəv gəla metiŋ na zuli aŋgarək səka dədakan sek sula daga sə disiŋ ha afuŋ. 39Ɗəfdaya net sozeɗ na Roma awlak va Zezu amtə aka wəlaŋga məzliwrihe, amna: Ɗəffəŋka Wətən Maŋgəlvayi* gesiŋ.

40Gil meɓɓet tahəŋ adaka tahəŋ ulanən səka faraɗa. Suwaleŋgit bo ndəɗaŋgəŋ Mari daga sə Makdala, dət Mari ma Zak muzliya də Zozes gəm Salome. 41Asbanənək Zezu daga asan a Galile tahəŋ wəɗɗaŋ sənən wəza. Gil meɓɓet tahəŋ diiɗa məs dəpeŋgeŋ dəndən a Zerusalem.

Va andəkən Zezu

(Matiye 27.57-61 / Luka 23.50-56 / Zaŋ 19.38-42)

42Pay nani moskoyi, ndəni nawzaɓan zəga, va wənah na: Dabəŋ ki pay naffete*. 43Zozef nawalaŋ gəla metiŋ na Arimatiya, adeke. Ɗəf metiŋgi də gakdaki aweleŋgit məzaɓaŋ wənna. Nan bo tay ga məlĩ na Maŋgəlva. Armak makrani, aguluk aza Pilatu assohonək gəbay na Zezu. 44Pilatu bo agətək sawɓa: Mbari Zezu amtə gu vas di. Ayak ɗəfdaya net sozeɗi, assohonəka: Far amtə sa? 45Adan ɗəfdaya net sozeɗ anahsən labara namta nani, Pilatu apsənək tive sən Zozef dəslan gən gəbay na Zezu. 46Zozef albahək boɗoko kukuɗo apri gənək gəbay na Zezu səka wəlaŋga məzliwrihe, atərək də boɗoko naka, avoŋgunək adəv ma gamas məs məssoho'ən adəv məlɓe. Yaŋ akəɗəŋgəl gərəm metiŋgin ama vovu. 47Mari daga sə Makdala dət Mari ma Zozes aziweŋgək aki məndək Zezu.

Currently Selected:

Markus 15: GDRNT85

Highlight

Copy