Luka 9

Zezu aslinik gewleɗ nan klaw kiyit sula

(Matiye 10.5-15 / Markus 6.7-13)

1Yaŋ Zezu akkelet gewleɗ klaw kiyit sula, apsitik daya də sembe narɓih tuyeŋɗe gəm na mbəl git məs gbəgbaɗe. 2Aslinik wərban wənna məlĩ na Maŋgəlva də wəmbəl git məs gbəgbaɗe. 3Apsit na: Kədawgəmaŋ zəga vi malaka nokum ɓa, ko zleŋge walla gabal ɓa, ko zəga nawzəma ko deleɗ ɓa, ko naway adawgəm lukut sula ɓa, 4adəv gəla an mətaf kum pak məsoŋ adak ha gap pay nawmbat nokum. 5An ɗii aɓoŋgoŋguk dawtaf kumən awalaŋ gəla nani, məgil suwalaŋ gəla nani, mətu hologodo səza tulkum dəsan gən saydawa azeti. 6Ambataŋka, ambataŋgək awalaŋ gəla temtemi, arbanənək halabara neneke, ambəl gitinik məs gbəgbaɗe.

Attapanək Herodə

(Matiye 14.1-12 / Markus 6.14-29)

7Yaŋ Herodə daya na dəlva, apprəm halabara nani, attapanəka. Vi ɗii meɓɓet aɓɗaŋ na: Zaŋ dəsil səka əmta. 8Ɗii meɓɓet tamə aɓɗaŋ na: Eliyas dəde. Yaŋ əmpa ɗii meɓɓet aɓɗaŋ na: Suweleŋgit məs kleŋɗe en daga farfar dəsil səka əmta. 9Amma Herodə amna: Nətawək ki Zaŋ. As ɗəf naŋgay məs nədapprəm adawpelenən wənnan kpak kəŋ di? Yaŋ akay tive kawla Zezu.

Zezu azəm gitik ɗii uzinere sle

(Matiye 14.13-21 / Markus 6.30-44 / Zaŋ 6.1-14)

10Masləŋɗe amilyoŋko, anahsənənək Zezu an məs aɗɗaŋ pakə. Andek ketirgiti ambataŋgək atəki maɓɓani, kla za walaŋ gəla məs adawyaŋ na Baytisayda. 11Ɗii pak apprəmənənka, asbanənka. Zezu atefike, apel sitik halabara na məlĩ na Maŋgəlva, ambəl gitik ɗiiyen də wəray naw mbəl gən ziti.

12Adan pay go'oy aza wətəpa, gewleɗ klaw kiyit sula nek azaraŋgək amaŋgavani, apsənən na: Anah sit ɗiiyiŋ dəmbataŋ kla aweleŋgit gəleɗe, dərəhaŋ gən zəga nawzəma də təki nafna, vi aŋka awra mənani. 13Zezu apsit na: Munokum məpsit zəga nawzəma. Amma yaŋ azlanən na: Zəga taya vam ɓa, say dupeŋɗe sle gəm kilif sula kaaka'ə. Asna an kəŋgələk na məmbatə, məlbaah gən zəga nawzəm sit ɗiiyiŋ pak kan soko? 14Wəŋɗa net ɗii bo uzine sle. Zezu apsit gewleɗ nan na: Mənah sit dəsoŋ kaklaw sle sle. 15Aɗɗanənək vaska, asoŋguk pak vaska. 16Zezu agimik moŋgosokɗe dit kilif sula neki. Aslanək haran a disiŋ agəɗək soko sən Maŋgəlva vi way vani, yaŋ awɗakani, yaŋ apsit gewleɗ nani vi duɗakanən gən sit ɗiiyi. 17Ɗii pak azəmaŋka, abaŋka, yaŋ akkaletin dəmbər git moŋgosokɗe, aknahaŋgək kekelɗe klaw kiyit sula.

Piyer agəɗ saydawa na Zezuwi Messiya*

(Matiye 16.13-19 / Markus 8.27-29)

18Yaŋ pay maɓɓani Zezu tay zuli katər gəni. Gewleɗ nan a zoŋguk azani. Assohetike: Mi ɗii adawpeleŋ akawkpak di? 19Azlan sənənək na: Ɗii meɓɓet tahəŋ wənahaŋ na Zaŋ məgəɗ baptem kənani, ɗii meɓɓet tahəŋ wənahaŋ na Eliyas kənani, ɗii meɓɓet tamə ɗəffi səmbet məs kleŋɗe en farfarə disil səkəti əmta. 20Assohetike: Ya nokum, ka nawa kədawɗi wən di? Piyer amna: Əstə Messiya na Maŋgəlva.

Zezu arbanək əmta nan də wəsilya nani

(Matiye 16.20-28 / Markus 8.30—9.1)

21Yaŋ Zezu aɗi wənnan sit gewleɗ nan də gagay adawnah sənən ɗəf ko taka wənnan ɓa. 22Yaŋ aməs wənaha dewle Wətən Ɗəf* wazəm saha diiɗa, avet ɗii gugiriɗ dit dayaɗe net məs dəlveŋge na Maŋgəlva, dit məsənaŋ zəga na ma henziŋ wasganən agisbe. Wabayəni amma dərɓaga wəvoŋ hoku wasil sətəki əmta də zeŋgilleni. 23Yaŋ anah sit ɗii pakə. An ɗəf aŋgələk wəsbawa, say dəpan wəɗum vi ki zəni, də slan wəlaŋga məzliwrihe nan pay pakə, dəsbaw gəni. 24Vi ko naway dəŋgəl əkoh gən zeŋgilleni wazani. Amma məs dəzan zeŋgillen vi wənnawa, wakoh gəni. 25An ɗəf arəhək duniya pakə, amma azannək zeŋgilleni, walla adayək ki zəga pak mi altər sən di? 26Vi vaski an wil adanənək ɗəf suwa walla vi wəpel wənnawa, Wətən Ɗəf wagəɗ sən zəga na wil pay adazan də gakdak nani gəm gakdak na Affəni, gəm gakdak net maslayɗe en salala*. 27Gesiŋ nədawnah sukum ɗii meɓɓet suwalaŋkum amtaŋ na ɓa say an awlanənək məlĩ na Maŋgəlva.

Zezu akpaŋganək zəni

(Matiye 17.1-8 / Markus 9.2-8)

28Yaŋ wuvoŋ dədopoɗo dərɓaga apel labareɗeski, agəmək Piyer də Zaŋ gəm Zak apeŋgək aka gərəm vi kawzuliya daka. 29Adan adawzuliya haran akpaŋka, lukut nan akpaŋgək babar ndasl, awiɗke. 30Go'ləŋ ɗii sula tahəŋ wəpeleŋ dəndən may Moyissi də Eliyas. 31Arbanənək gakdak na disiŋ, apeleŋgək aka wənna wəza nan va adagrak də wəmta nan a Zerusalem. 32Piyer dit ɗiiyen dəndən pak aleŋgeŋgək diiɗa sawɓa, amma adan afɗaahaŋ, awlanənək gakdak na Zezu dit zel sula məs dəsoŋ dəndən. 33Gala ɗiiyeŋ sula adadoŋ səza Zezu Piyer apsən na: Mərbə zəga mogoni məsamgən aŋka. Appam məzaɓ zlereɗe hoku, taka viko, taka vi Moyis, taka əmpa vi Eliyas dəsən məs adawpel ɓa. 34Adan adawpelin vaska, ernene adek wəsiritti. Gewleɗ nan ageslne'eŋke adan awlanən aguloŋ adəv ernene. 35Wəla adek sədəv ernene naka, amna: Aŋki Wətuwa an məs nəweli, məpprəm mani. 36Adan wəla nak apeli, dulaŋ ɗəf maɓɓan ɓa, say Zezu katər gəni. Daga pay dəpaska'a ləŋ gewleɗ assuwaŋgək ɓata ɓata'ə, də nahaŋ sənən ko ɗəf taka an məs awlaŋ ɓa.

Va Zezu ambəlgən wiyən mitemin

(Matiye 17.14-18 / Markus 9.14-27)

37Adan aprikeŋ səka gərma vit pumpum nani, ɗii diiɗa azoŋko, almaŋgək də Zezu. 38Ɗəf aŋgəzlək vamvəl aweleŋgit ɗiiyi, amna: Mərbə zəga nəkamokuko, wiyən naw yana, ndəni taka, ndəni meɗegewe nawa. 39Tuya tay wərmani, ndən ləŋ gəm wənzla vamvəlla, wəɓlan də sembe gəm wəgil gən masla amani, tay zəm gən saha. Wəɓəta na say də tattuwãha, dərɓaga an azəm gənək saha. 40Nəkametik gewleɗ noko dərɓahanən gəni, amma dəɓapən wərɓəhən ɓa. 41Zezu azlanək na: Awlet kana munokum məs wətaf nokum tay diiɗa ɓa, məs mambrayɗe, pay gbəgbari nənzi də munokum kpak di? Aŋga nan namagaŋ wəɓəs sukum di? Aki wətuk van ɗa. 42Adan adazani, tuya aslbaka, aɓlanək də sembe. Amma Zezu aɗiyək wənnan sən tuya, ambəl gənək wiyən naka, amndaganək aza affəni. 43Ɗii pak agətaŋgək aka sembe na Maŋgəlva.

Zezu arbanək wəmta nan ma sula'ən də wəsilya sətəki əmta

(Matiye 17.22-23 / Markus 9.30-32)

Adan ɗii pak agətaŋgək aka an məs Zezu agəɗə, apsit gewleɗ nan na: 44Məpprəm lewlewi, an məs nədawnah sukum kakaŋka. Wapsənən Wətən Ɗəf avet ɗiiyi. 45Amma gewleɗ nan dəpprəmən gabba wənnan ɓa, wənnan akpaŋgək azet məɗama vi adapprəmnən ɓa. Geslne adek dassohon aka wənnani.

Naway nawsan daya di?

(Matiye 18.1-5 / Markus 9.33-37)

46Yaŋ gewleɗ adassohonən zit na naway nawsan daya di? 47Zezu asənək wəɗum na makreti, aslanək wiyən muzliya aziwginik aweleŋti, 48apsit na: Ko naway dətaf wiyən muzliya də iya nawa: Anaw atafə. Ko naway dətafwa ana ɗəf də slənu atafə, ɗəffan muzliya nambokum pakə, ndəni daya.

Ɗəffan məs dəzeləm ɓa ɗəf nami

(Markus 9.38-40)

49Yaŋ Zaŋ anahsən Zezu na: Mərbə zəga, mulak ɗəf tayərɓəh tuyeŋɗe də iya noko. Amma mətakəka, vi tay də mənam ɓa. 50Zezu azlan sənəka: Kədawtakənən ɓa, ko naway an tay də kire nokum ɓa, ɗəf nokumi.

Ɗii na Samariya dəŋgəmaŋ wətaf Zezu ɓa

51Adan pay nawmbat a disiŋ go'oy, yaŋ aɗum nawmbat a Zerusalem. 52Aslinik mesliŋɗe nan abani. Ambataŋka, atoŋgoŋguk awalaŋ gəla net Samariyeɗi vi kawzaɓan təki naw teh nani. 53Dətafnən ɓa vi aŋgələk wəmbat a Zerusalem. 54Adan Zak də Zaŋ awlanən vaska, aɓɗaŋ na: Ɗəfdaya wakəŋger məs soh gən offo dəpri gən sə disiŋ dəzet gən sa? 55Amma Zezu akpaŋganək harani, ahayetike, amna: Kəsəŋgən na əmpəs awani azokum di ɓa. 56Wətən Ɗəf* dəde vi kawzan zeŋgillet ɗii ɓa, amma ade na vi kawkoh gən zeŋgilleti. Yaŋ ambataŋ awalaŋ gəla maɓɓani.

Ɗii məs dəŋglaŋ wəsbanən Zezu

(Matiye 8.19-22)

57Yaŋ adadoŋ aka tive, ɗəf taka apsəna: Wanəsboko ko aŋga kəmbat di pakə. 58Zezu azlan sənək na: Balwayɗe tahəŋ də vovɗe, biŋgeɗ tahəŋ dit gəleɗe. Amma Wətən Ɗəffa* tay də təki naw voŋ na feten zən ɓa. 59Apsən ɗəf maɓɓan na: Asbawa. Ɗəf nan apsən na: Məsən zəga apəl su tive ndaw wəndək əbba tagay. 60Zezu apsənna: Appet ɗii mimtit də ndikin mimtit neti, amma nok dok kərban Wən Nenek na məlĩ na Maŋgəlva. 61Ɗəf maɓɓan bo apsəna: Wanəsboko Ɗəfdaya, amma apəl su tive nəmbat wənah sit ɗii nanaw da na naw nəmbatək kana. 62Zezu apsən na: Ko naway dəɗi van aka bardaw, yaŋ adawla dirɓe, atər na wəray aza məlĩ na Maŋgəlva ɓa.

Currently Selected:

Luka 9: GDRNT85

Highlight

Copy