Luka 17

Mambray

(Matiye 18.6-7,21-22 / Markus 9.42)

1Yaŋ Zezu apsit gewleɗ nan na: Tay məs dədawgul ɗii adəv mambray pay pakə. Amma bonoy aza ɗəffan dədawki mambray vani. 2Ɗəɗaah sən an minan səni gərəm metiŋgin awlani, məsgani aret iŋkile kpukpumɗe ki an adawrakan muzliya taka səmbet kirni. 3Məga zukum.

An məlmuk agəɗək mbrayen, anahsən də maɗula. An atubika, aviyan səni. 4An agəɗ sukuk mbrayen təl buhul pay taka, tayəzan azok təl buhul nan pakə, tay nah na nəɗɗiyək marava Aviyan səni.

Wətafa

5Yaŋ masləŋɗe apsənən Ɗəfdaya na: Apsəm meŋgesl wətafa. 6Ɗəfdaya bo amna: An munokum tat də wətaf ko suɗike va zemve na sita, wakənah sənən korvoŋ: Apətə, ampə aret iŋkile, waɓe sukum.

Wəza na ɗəf məgəɗ wəza

7Naway səmbokum də məgəɗ wəza nan məzənsee walla məzutaɗa na zəga mamaya, an adek sə gulyo wanah səna: Azar aŋ go'o, azəmə di? 8Anah na ɓa amma wanah sən dərəŋ na: Azaɓan su zəga nawzəma, agəm lukut na wəza noko, agəɗ su wəza an əntatə zəma, əntatə saa, dərɓagan tamə, wakə zəmə wakə sə. 9Wagəɗ sən soko sən gawlaŋ vi aɗɗa sən məs an aŋgələŋ sa? 10Vaski nokum van adawsan sukum, an kəɗɗanənək an məs Maŋgəlva aɗi sukum pak mənah na: Mənam ɗarkəŋ məɗɗaŋ wəza mənani, nam məɗɗak an dəslə səm naɗɗa.

Zezu ambəl gitik məs kokoleɗ klaw

11Zezu ambatək a Zerusalem atoŋguk dəkawalaŋ Samariya də Galile. 12Yaŋ atoŋ awalaŋ gəla maɓɓani, məs kokoleɗ klaw azoŋko, almaŋgək dəndən. Aziweŋgik faraɗa. 13Anzlaŋgək vamvəl daya daya, aɓɗaŋ na: Zezu mərbə zəga aw awəl saha akamə. 14Yaŋ awle apsit na: Mədoŋ mərban zukum azet məs dəlveŋge. Adan adadoŋ adaka, ambəlaŋka. 15Ɗəf taka səmbeti, adan awla na ambəlka, amilke, tay gakdakan Maŋgəlva də wəlan daya daya. 16Aɓegənək mirbisin aka dəlva fuŋ azuliyək amba təl Zezu, agəɗ sənək soko. Ɗəf nan məSamariyayi. 17Zezu assohonko: Ya ɗii klaw pak dəmbəlaŋ ɓa sa? Ya ngahəŋ ɗii meɓɓet vaytakiŋ di? 18Tay məs dəɗum wəmilnyan nawgəɗ sən soko sən Maŋgəlva ɓa sa, say malakaŋ kaka sa? 19Yaŋ apsən na: Asili, doko, wətaf nok akoh gukuko.

Wəziya na məlĩ na Maŋgəlva

(Matiye 24.23-28,37-41)

20Farisiyenɗe* assohonənək Zezu: Dewɗe məlĩ na Maŋgəlva adazan di? Azlan sitik na: Məlĩ na Maŋgəlva adena də ulan ɓa. 21Anahaŋ na tayaŋka, walla taya ada ɓa. Vi vaski məsəna məlĩ na Maŋgəlva tayawalaŋ kum.

22Apsit gewleɗ nan na: Pay wade, akəŋglaŋ ula pay taka səmba pay na Wətən Ɗəffa*, amma kulanən na ɓa. 23Wanah sukumən na tayaŋka, taya da. Kədadoŋ adak ɓa, kəda nzoŋ adak ɓa. 24Va buwən adawwiɗ a disiŋ daga sə maŋgava ha amaŋgava maɓɓani, vaski bo wəziya na Wətən Ɗəf adawsanni. 25Amma dabəŋ nani say dəzəm gən saha diiɗa, ɗii dəɓoŋgoŋ sənən gəni dəsganən gəni. 26An məs dəgəɗ pay na Nuwa, vas adaɗɗa pay na Wətən Ɗəffa. 27Ɗii tahəŋ wəzəmaŋ, wəsaŋ, wəkayaŋ gili wəpsit kirtit sit ɗii kagili, ha gap pay Nuwa atoŋ adəv bəlay, iŋkile məs dənsləŋgaŋ azoŋko, azetinik pakə. 28An məs dəgəɗ pay na Lot, vas adaɗɗa: Ɗii tahəŋ wəzəmaŋ, tahəŋ wəsaaŋ, tahəŋ wəlbahaŋ, tahəŋ wəvələni, wəslgaŋ, wərkaŋ gəleɗe. 29Amma pay Lot agil sə Sodoma, offo aziyək sə disiŋ va muhurən, azetik dembirgit pakə. 30Vas adawsan pay na Wətən Ɗəf adarban zəni.

31Pay nani ɗəf məs naka balak adawprike wəgəm zigeɗ sədəv gəla nan ɓa. Ɗəf an na gulyo adaw milyan dirɓe ɓa. 32Məɗumon wənat ga Lot. 33Ɗəffan dəkayan wəkoh gən zeŋgilleni, wazani, amma ɗəffan dəzanni wakoho gəni. 34Intatə nah sukum: Dəfəɗ nani ɗii sula wavoŋgoŋ aka hargaŋgu taka, kaw gəmi taka mbək taka. 35Gil sula wasəraŋ aka buwən taka, kaw gəmi taka, mbək taka. 36[Ɗii wasoŋ sula agulyo, kaw gəmi taka, mbək taka.] 37Gewleɗ nan apsənən na: Aŋga as adaɗɗa kandi Ɗəfdaya? Zezu azlansitike: A təki mogugoy asani adaki mogdokɗe adakalaŋ.

Currently Selected:

Luka 17: GDRNT85

Highlight

Copy