Luka 13

An kətubiyaŋ ɓa wakəzaŋ

1Pay ɗii meɓɓet anahsənən Zezu wənnet ɗii na Galile en məs Pilatu abay daga adawtawaŋ wəla zəga sən Maŋgəlva (aslehetik mbel net də mbel na zəga məs mətaw wəlani). 2Zezu azlansitik na: Azokum na Galileyenɗe es aɗɗaŋgək mambray daykiyit meɓɓet vi agəɗ vas sa? 3Intatənah sukum tay vas ɓa, amma an kətubiyaŋ ɓa, wakəzaŋ venet pakə. 4Walla ɗii klaw kiyit dədopodo məs gəla naw ga aɓəsl aket a Silowama, amtaŋ, azokum na adayaŋgək kiyit ɗii na Zerusalem pak də mambray sa? 5Intatənah sukum, tay ɓa, amma an kətubiyaŋ ɓa munokum pak wa kəzaŋ vaska.

Wən məkpaŋga na sukoyo ndarzlay

6Yaŋ Zezu apel sit wən məkpaŋga: Ɗəf tay ampək sukoyo adəv guli nani, yaŋ ade kaw ɓuh uwa nani, amma dərah ɓa. 7Yaŋ anahsən məgə guliyo: Awla wəsva hoku nədazaw wə ɓuh uwa na sukoyoŋka, amma nawrah ɓa. Abəla vi mi adawray gən sembe na dəlva fuŋ ɗar mekeleŋ di? 8Məgə guli apsən na: Daya nawa, apan dabyaŋ kəmpa, wanəso' gabbani, wanəzisən ba'arə, 9kuzuŋ dəkki na wawə an də wə ɓakan na kə bəllə gən kana.

Guluk məvitata təmbələk pay naffete*

10Yaŋ Zezu adarban wən adəv gəla nawpel wənnet Yahudiyenɗe, pay naffete. 11Ɗak maɓɓat tatadaka məs tuya avitata wəsva klaw kiyən dədopoɗo, tuya avittatka, aɓegətəka tawɓap wəsilyat ziw ɓa. 12Adan Zezu awləta, apel sətka, apsət na: Gulku kəpetik səka wəvit noko. 13Aɗiyək van akata, go'ləŋgə guluk təziwke, təgakdakanək Maŋgəlva. 14Amma daya nawpel wənnet Yahudiyenɗe gədəvən adəka vi mi Zezu ambəl gət ɗak pay naffet di, apsit ɗii na: Pay slire tay vi kəɗɗa gən wəza, vasna ade mbəl gət dəpaska, amma mogoni wəmbəl gət pay naffet ɓa. 15Ɗəfdaya azlan sənəka: Munokum, muluvuluvuɗe kənanaŋ, nokum kapanən ngari nokum walla koro nokum pay naffet vi dəmbat gən wəsa iŋkile ɓa sa? 16Guluk zev Abraham kəŋkə, Satan aynatək wəsva klaw kiyən dədopoɗo, də slə kaw pələt pay naffet ɓa sa? 17Adan apel vaska, ɗii nadak wil edeninke, amma ɗii pak zit eneke vi zigeɗ gakdekɗeŋ agəɗiŋki.

Wən məkpaŋga na zemve na sita

(Matiye 13.31-32 / Markus 4.30-32)

18Yaŋ Zezu anah əmpa na: Va mi məlĩ na Maŋgəlva agil di? Dəmi mədawslan di? 19Agilik va zeve na sita maɓɓani, ɗəf wagəməta wasl gəta aguli nani, watəgili, watəkpaŋ wəlaŋga metiŋgin ha biŋɗe wazaɓaŋ gəla net akani.

Wən məkpaŋga na wuɗo

(Matiye 13.33)

20Zezu anah əmpa: Va mi məlĩ na Maŋgəlva agil di? 21Agilik va wuɗo guluk təgəməka, təslahanək ara gəpa tasa kaklaw sula kiyən sle, ahəsək gəpa pakə.

Madamba feŋge

(Matiye 7.13-14,21-23)

22Yaŋ Zezu atoŋ dəka waleŋgit gileɗe gugiriɗe, may dəka va makiɗe, arbək wən daga adawtoŋ a Zerusalem. 23Ɗəf apsən na: Ɗəfdaya ɗii suɗike dədawkohoŋ sa? Zezu azlan sitke: 24Məsok zukum mətoŋ kəla madamba feŋge. Intatə nah sukum: Ɗii diiɗa wakayaŋ batam nawtoŋgo, amma arəhaŋ na ɓa.

25An affən gəla asilke, ampanək madamba, munokum an appaka kənanaŋ, kətəŋgaŋgək wərga madamba, munokum tatə nahaŋ na: Ɗəfdaya akol səm madamba. Wazlan sukum na: Nəsən təki kəzoŋ ɓa. 26Wakətəŋgaŋ wənah na: Məzəmək də wə saa aboko, kərbək wən aket tiveɗ namə. 27Wanahsukum na: Nənah sukumko nəsən təki kəzoŋ ɓa. Məzar səzawa munokum məɗɗaŋ mambraya. 28Wakə həmmaŋ wakəmpəranən slaykum adaka, an kulanənək Abraham də Isak gəm Zakub dit məs kleŋɗe pak adəv məlĩ na Maŋgəlva, nokum tamə kasgokumi appoho. 29Ɗii wazoŋ daga səmba pay nampum na moskoyo na disiŋ na dohoŋ wasoŋ adəv məlĩ na Maŋgəlva vi kawzəma. 30Asna ɗiiyen nebe kakaŋka, wakpaŋgaŋ dirɓe, ɗiiyen dirɓe, kakaŋka wakpaŋgaŋ ɗii nebe.

Zezu ahəm gənək Zerusalem

(Matiye 23.37-39)

31Yaŋ dəpaska Farisiyenɗe* meɓɓet azoŋgu apsənən Zezu na: Dok səŋka Herodə manaka bayko. 32Zezu apsit na: Mədoŋ mənah sən balway əŋka: Intatə wərɓi tuyeŋɗe, əntat wəmbəl git məs gbəgbaɗe, dəpaŋ də pumpum pay mo hoko'ən wa nəgrak wəza nawa. 33Amma say nəsban gən tive nan dəpaŋ də pumpum gəm huruɓ pumpum taka, vi dəslə məs kleŋ dəmtə gən ama poho na Zerusalem ɓa.

34Midi, Zerusalem, Zerusalem, kəbeyək məs kleŋɗe, kəskek mesliŋɗe na Maŋgəlva dit kuneŋge. Nəgayək wəkkelet ɗii nok təl diiɗa, va gəmnda ada kelet kirtin amba perslekeni, amma kəŋgereŋ ɓa. 35Apprəma gəla nokum wakpaŋ va ki məskiya. Amma əntatə nah sukum: Kuluwənna dərɓaganəs ɓa hagap pay an kədawnahaŋ na: Zəzay aza ɗəf dədazan də wəya na Ɗəfdaya.

Currently Selected:

Luka 13: GDRNT85

Highlight

Copy