Luka 14

Zezu ambəl gənək məs gbəgba'a

1Yaŋ pay naffet* maɓɓani, Zezu ambatək eŋgil ana daya net Farisiyenɗe* da, vi kawzəm adaka. Ɗiiyen nadak aziyənək zit wətaɗən. 2Yaŋ ɗəf gədəvən məskan taya bani. 3Zezu apel sitik məsənaŋ zəga na ma henziŋ dit Farisiyenɗe, amna: Ma henziŋ nam apsəmək tive sa, walla dəpsəm ɓa sa na mbəl gən ɗəf pay naffete? 4Ndəɗaŋ ɓataɓata. Yaŋ Zezu appar van aka ɗəf naka, ambəl gənka, Zezu apanək ɗəf nak dəmbat gəni. 5Yaŋ apsit na: Naway səmbokum, an wətəni walla ngari nani asbərək avov net iŋkile na akdəh na pay naffet ɓa di? 6Dəɓapaŋ wəzlan sənən ko wən taka ɓa.

Ɗii miyet awelinək təki nasso

7Zezu apel sitik ɗiiyen miyet də wən məkpaŋga, vi awlek awelinik kəti mogoni. Apsit na: 8An ɗəf ayukuk atəki wəɓele, kədasok a kəti mogon diiɗa ɓa. 9Kuzuŋ ɗəf tay aweleŋgit ɗii miyet də daya, vi ɗəf məs dəyukum adawnah na: Apəl təki sən ɗəffəŋka. Wil wadukən dawmbat wəsuwa aka zəga an dirɓe. 10Amma an məyukki, dokku sok aka zəga an dirɓe, hagap ɗəffan diyuk adeke, wanahsuko: Baynawa ade sok atəki mogoni. Wakpaŋ gakdak azok amaret ɗiiyen məs kədawzəmaŋ dənɗaŋ pakə. 11Vi ɗəffan dəɓay gən kiyən pak kamnda gani dirɓe, ɗəffan dəɓegən kiyən pak kawɓay gəni.

12Yaŋ Zezu apel sən ɗəf məs diya naka: An kəgəɗək zəga nawzəm na kədawye bayneŋgiɗuk ɓa, walla milmiŋgiɗuk ɓa, walla megeŋgiɗuk məs aryeɗ ɓa, vi adawgukun kaw faɗ suk akan ɓa. 13Amma an kəgəɗək zəga nawzəm nawzləra, aye məs sahaŋɗe məs zit məmtəni dit vədelɗe, gəm deŋgerɗe. 14Akənneken zuko vi aɓapəna wəfaɗ suk agəlan ɓa. Maŋgəlva wafaɗ suk agəlan pay wəsilyo net ɗii təstəssə.

Wən məkpaŋga na way diiɗa

(Matiye 22.1-10)

15Yaŋ ɗəf taka səmbet ɗii na Zezu apprəm wənɗeska, amna: Zəzay aza ɗəffan nawzəm zəga adəv məlĩ na Maŋgəlva. 16Zezu azlan sənək na: Ɗəf maɓɓan agəɗək zəga nawzəm diiɗa, ayek ɗii diiɗa. 17Pay nawzəma aslənək gawla dənah sit gin ɗii miyet na: Məde vi zəga pak məzaɓani. 18Ndəɗaŋ pak atəŋgaŋgək wəpel aka ziti vi dəppet gini. An dabəŋ amna: Nəlbahək gulyo wanəmbat ulani, nəkomoko. 19Ɗəf maɓɓan bo amna: Nəlbahək wazliɗe nense kəlaw waməmbat wəyegeti nəkomoko kəppaw gəni. 20Dəf maɓɓan bo amna: Kakaŋ nəgəm gulku vi ni nərah na wəmbat ɓa. 21Gawla amndanək aza daya nani, anahsənək wənnan pakə. Yaŋ gədəv affən gəla adə, apsən gawla nan na: Dok awalaŋ gəla go'u, aye məs sahaŋɗe məs zit məmtəni, dit deŋgerɗe gəm vədelɗe. 22Gawla asilke ambatka amilke, amna: Ɗəfdaya an məs kəɗi su wənnan nak agəɗka, amma təki apəlkəmpa'e. 23Ɗəfdaya apsən gawla na: Dok abet tiveɗ metiŋgiti dit tiveɗ mimeɗeŋɗe, agəɗ sən gagay sən ɗəf kərah adak pakə, dəzoŋ, gəla naw dəknah gəni. 24Intatə nah sukum: Ko ɗəf səmbet ɗii miyet dabəŋ a nan na ɗaah zəga nawzəm naw ɓa.

Va ɗəf adakpaŋ gawla na Zezu

(Matiye 10.37-38)

25Ɗii diiɗa tahəŋ wəmbataŋ də Zezu aka tive. Zezu akpaŋganək harani apsit na: 26An ɗəf aŋgələk wəkpaŋ gawla nawa an dəzel affən dət mani dət ɗak nani dit kirtini dit milmiŋgiɗin mezeŋgilleketi dit muguluŋgiti, daga də zeŋgillen pak ɓa, aɓapna wəsan gawla naw ɓa. 27Vi ko naway dəslan wəlaŋga məzliwrihe nan dəsbaw gən ɓa, aɓapna wəsan gawla naw ɓa. 28Ko naway səmbokum an aŋgələk wərka gəla naw ga, wasan wəɗumon tagay, an məs adawzanni kawla an məs adagrak wəza nani. 29Vi an a təŋgəkka, dəɓap wəgrakən ɓa, ɗiiyen məs dədawlanən pak wamasaŋ akani. 30Də wənah na: Ɗəffaŋ atəŋgək wərka gəla dəɓap wəgrakən ɓa. 31Walla məlĩ awani, an aŋgələk wəlpa də məlĩ mbərən, asanna wəɗumon, an waɓap wəmbat dit ɗii uzine klaw kaw ləmsən ɗəffan dədazan wəzəm walaŋ gəla nan dit ɗii uzine kaklaw sula ɓa di?. 32An aɓap na ɓa, adan məlĩ andak tay faraɗa tagay wasləŋ masləŋɗe azani vi kassohon dəslereŋ gəni. 33Vaski bo azokum, an ɗəf dəppet zigeɗ nan pak ɓa, aɓapna wəsan gawla naw ɓa.

Bəttu məza atər na wəray ɓa

(Matiye 5.13 / Markus 9.50)

34Bəttu zəga mogoni, amma an lelem na bəttu agraka madaw tər əmpa di? 35Atər na wəray aza dəlva fuŋ ɓa ko va ba'ar ɓa, kakgbani agisbe. Məs də sləman napprəma dəpprəma.

Currently Selected:

Luka 14: GDRNT85

Highlight

Copy