Cenisihs 35

Cekap Kiishawenimikotc Kishemanitoon

1 # Gen 28.11-17. Kishemanitoon hsa Cekap (Jacob) okii'ikoon, “Weti Pehtal (Bethel) ootenaank ishi antawi kapehshin. Miitahsh weti keshi oshihtamawiyan pakitinaahsowin. Niin iitok Kishemanitoo kaakii naakosiihtawinaan ahpii kii⁠maaciipa'iwaanatipan kiicihkiwensi Iihswaa (Esau).”

2Miitahsh Cekap kaa'inaatc owiicitaamaakana', i'i kaye kahkina kaa⁠wiiciiwikotc, “Wepinihkwak mayaki manitoohkaanak eyaawekwaa, pehki'itisok, kaye tahsh meshkocihkonayek. 3Weti hsa Pehtal ootenaank kitishaamin o'o kaa⁠maacaayank. Miitahsh weti keshi oshihtamawak Kishemanitoo pakitinaahsowin. Wiin iitok kaa⁠pi naatamawitc kii⁠maanshihsewak, kaye tahsh eh⁠pi wiiciiwitc misiwe piko pemi ishaawak,” okii'inaa'. 4Pemaatisiwaatc itahsh okii miinaawaan Cekapoon kahkina omayaki manitoomiwaa', naapihtepisona' kaye kaakiih kikishkawaawaatc. Miihsh Cekap kaa⁠ishi ninkwa'waatc anaami oohk tinowaahtikonk pehsho weti Pehtal ootenaank.

5Ahpii tahsh Cekap, i'i kaye pemaatisinitc kaa⁠wiiciiwikotc e⁠maacaawaatc, Kishemanitoo kiih⁠tootam wiinke ci⁠kohtaacinitc i'imaa ootenaahkaank eyaanitc pemaatisinitc. Kaawiin itahsh awiyan cikiih piminisha'okowaatc. 6Kiih⁠pi takohshin itahsh Cekap i'i kaye kahkina kaa⁠wiiciiwikotc i'imaa Laas (Luz) eshi kihkencikaatenik Pehtal, Kenan (Canaan) ahkiink. 7Miitahsh i'imaa Cekap kaa⁠ishi oshihtootc pakitinaahson ekii ishinihkaatank Pehtal, Kishemanitoo Otayaawin. Kishemanitoon iitok okii naakosiihtaakoon ahpii kii⁠maaciipa'iwaanaatc wiicihkiwensiwan. 8Oripehka (Rebekah) hsa omashkihkiiwihkweman Teporah (Deborah) eshinihkaasonitc kii‑ishkwaa pimaatisiwan. I'imaa hsa tahsh anaamahkamik ciikaya'ii oohk tinowaahtik kii‑ishi na'inaawan ciikaya'ii shaawanonk inahke Pehtal ootenaank. Miihsh kaa⁠ishinihkaatamowaatc “Eshi mawinaaniwank oohk mihtikonk.”

9Ahpii hsa Cekap kii⁠pionci kiiwetc Mesopohtemiya (Mesopotamia), Kishemanitoon miinawaa okii naakosiihtaakoon ekiih shawenimikotc. 10#Gen 32.28. Miihsh kaa'ikotc Kishemanitoon “Cekap hsa kitishinihkaas. Kaawiin itahsh i'i awahshime kika ishinihkaasohsii. Isriyal (Israel) hsa kika ishinihkaas.” Mii 'i iitok Isriyal ekii ishinihkaanikotc Kishemanitoon. 11#Gen 17.4-8. Miihsh kaye kaa'ikotc, “Niin kaaMaawaci mashkawisiitc Kishemanitoo. Niipiwa' ayaaw apinoonciishak. Ta⁠paahtiinwewaanakisiwak hsa pemaatisiwaatc kepi onciiwaatc kiin onci. Kihciokimaak ihsa kaye tani ayaawak kiin onci. 12I'i hsa ahkiini kaakii miinak Eparahaam, a'a kaye Aaisik kiwii miinin. Nimiinaak kaye kipiiwesiimak keni ayaawaatc mihsawaa ko ishkwaa ayaayan,” okii'ikoon. 13Miitahsh kaa⁠ishi nakanikotc Kishemanitoon i'imaa kaakii ishi kakanoonikotc. 14#Gen 28.18,19. Mii hsa i'imaa kaa⁠ishi onaapihkiniketc ahsiniin ekiih patahkinaatc Kishemanitoon kaakiih tashi kanoonikotc. Shoominaapo kaye ekiih siikinak, aalip tino pimiteni kaye, ekiih pakitinaahsowaaketc. 15Pehtal hsa tahsh okii ishinihkaataan i'imaa.

Orehcal Kii'ishkwaapimaatisitc

16I'imaa hsa tahsh Pehtal (Bethel) Cekap kii⁠onci kosiwak. Keyaapi tahsh waahsa ci‑ishaawaatc cipwaa otihtamowaatc ayaawin Ehparaht (Ephrath) miihsha'i Orehcal (Rachel) kii⁠maacii aahkositc ewii otapinoonciishimitc. Nawac itahsh iko kiih⁠pwaanawi'aawahso. 17Maawac itahsh e⁠wiihsakaahpinetc o'o okii'ikoon ihkwewan wetahpinaawahsonitc, “Keko sekisihken, miinawaa ohsha kwiiwisenhs kitayaawaa.” 18Ishkwaac itahsh e⁠ani pakitanaamotc e⁠ani ishkwaa pimaatisitc, Penonaai (Benoni) okii ishinihkaanaan ini okosihsan. Oteten itahsh a'a kwiiwisenhs Penciman (Benjamin) okii ishinihkaanikoon.

19Miihsh Orehcal kii‑ishkwaa pimaatisi. I'i hsa tahsh miihkanaank enamoninik Ehparaht kii‑ishi na'ihshimaa. Noonkom itahsh Pehtalihem (Bethlehem) icikaate i'imaa. 20Cekap (Jacob) ihsa tahsh kii⁠onaapihkinike ekiih patahkinaatc ahsiniin ke⁠onci maamihkawitc. Keyaapi tahsh noonkom kaa⁠kiishikahk kihkinawaasinaakwan Orehcal kaakii ishi na'inintc. 21Cekap hsa kii⁠ani maaciikosi ekii ishi kapehshitc akaamaya'ii eshi'ayaanik ahshawaapiiwin Iitar (Eder) ecikaatenik.

Cekap Okosihsa' Ehtashimimintc

22 # Gen 49.4. Mekwaa hsa weti Cekap e⁠ishitaatc i'imaa ahkiink, Oroopin (Reuben) okii wiihpemaan Pilhawan (Bilhah) peshik oteten otaanihke wiiwini. Ahpii Cekap kaa⁠noontank wiinke kii⁠kihci nishkaatisi.

Cekap ihsa kii⁠mitaahshiniishiwa' okosihsa'. 23Miitahsh o'o kaa⁠ishinihkaasowaatc Liiyawan (Leah) kaa⁠omaamaawaatc. Oroopan sesiihkisit, Simiyan (Simeon), Liipaai (Levi), Coota (Judah), Isahkaar (Issachar), kaye Sepiyolan (Zebulun). 24Iki tahsh wemaamaawaatc Orehcalwan o'o kii‑ishinihkaasowak. Coosap (Joseph), a'ahsh kaye Penciman (Benjamin). 25Iki tahsh wemaamaawaatc ini Pilhawan, pemiihtaakonitc Orehcalwan (Rachel) o'o kii‑ishinihkaasowak. Ten (Dan) a'ahsh kaye Napihtalaai (Naphtali). 26Iki tahsh wiin wemaamaawaatc Silpawan (Zilpah) pemiihtaakonitc Liiyawan o'o kii‑ishinihkaasowak. Ket (Gad) a'ahsh kaye Aahshar (Asher). Miiwa' ihsa 'o Cekap okosihsa' kaakii nihtaawikinitc weti Mesopohtemiya (Mesopotamia) ahkiink kii⁠ayaatc.

Aaisik Kii'ishkwaapimaatisitc

27 # Gen 13.18. Cekap (Jacob) kii‑ishi kiiwe Mamri (Mamre) ayaawinink ishi ciikaya'ii inahke Hiiparan (Hebron) ootenaank eshi'ayaanitc oteten Aaisikoon (Isaac). Mii iitok i'imaa Eparahaam (Abraham) a'a kaye Aaisik kaa⁠ishitaawaakopanen. 28Ninkotwaahk nihshwaahsimitana (180) kiih⁠tahso pipoonwe a'a Aaisik. 29Miihsh kaa⁠ishi ishkwaa pimaatisitc, wiinke ekii ahkiwensiiwitc piinihsh ekiih kawikihkaatc Ini hsa okosihsa' Iihswaan, ini kaye Cekapoon okii na'inikoo'.

Currently Selected:

Cenisihs 35: OJBR

Highlight

Copy