Cenisihs 34

Taayina Kiipihshikwaaci'intc

1Aapitink eh⁠kiishikaninik Taayina (Dinah) wetetetc Cekapoon (Jacob), wemaamaatc Liiyawan (Leah) kii‑ishaa Kenan (Canaan) ahkiink e⁠mawatihsaatc weti ihkwewa'. 2Ahpii hsa Shiihkam (Shechem) e⁠waapamaatc ini ihkwewan okii otihtinaan ekiih pihshikwaaci'aatc. Shiihkam kii⁠otete Hemar (Hamor) eshinihkaasonitc Kipii (Hivite) ekiih tinowinitc ekii okimaahkantaminitc i'i ayaawin. 3Wiinke hsa okii mihsawenimaan ini ihkwewan wetetenitc Cekapoon. Wiinke kaye okiih saaki'aan ekiih kakwe mino kakanoonaatc. 4Miihsh Shiihkam kaakii'inaatc oteten Hemaran, “Taka ontinamawihshin wa'a ihkwe ci⁠wiiwiyaan.”

5Cekap itahsh kii⁠noontam ekiih pihshikwaaci'imintc otaanihsan. Okosihsa' ihsa kii⁠ayaawa' mihshawahkamik eshi'ayaanitc otawahkaanima'. Kaawiin itahsh kekoon cikii ihkitotc paanimaa kaah⁠pi takohshininitc okosihsa'. 6Ini hsa Hemaran wekosihsinitc Shiihkamoon okiih pi kakanoonikoon a'a Cekap. 7Miihsh i'i ahpii Cekap okosihsa' kaakiih pionci takohshininitc mihshawahkamik. Ahpii tahsh e⁠noontaminitc aaniin kaa⁠inahkamikaninik, wiinke hsa kii⁠maanentamoo', wiinke kaye kii⁠nishkaatisiwa' o'o ekii ishihcikenitc Shiihkamoon. Kaawiin iitok kii⁠minwaapancikaatehsinoon i'i tino ishihcikewin i'imaa Isriyal (Israel) kaa⁠ishi'ayaawaatc ci⁠pihshikwaaci'imintipan Cekap otaanihsan. Kaawiin i'i cikii ishihcikenaaniwankipan. 8Miihsh o'o kaa'ikotc Hemaran, “A'a hsa ninkosihs Shiihkam osaaki'aan kitaanihsan. Taka pisaan inentan ci⁠miinatc ci⁠wiiwitc. 9Taka inentantaa ci⁠waawiitikentiyank. Miishihshinaam kitaanihsiwaak, keniinawint itahsh kika miinikoom nintaanihsinaanik. 10Pisaan itahsh iko o'omaa kika ishi kapehshim, eh⁠tawinamaakooyek o'omaa nintahkiiminaanink pisaan ci‑ishitaayek. Pisaan kaye ci⁠anohkaatamek, kaye tahsh ci⁠tipinawewisiyek,” okii'ikoon.

11Miihsh Shiihkam kaakiih kanoonaatc Cekapoon, okosihsini kaye ekii ihkitotc, “Taka minotootawihshik. Wekonen ihsa komehsawentamek kika miinininim. 12Wiintamawihshik wekonen entawentamek ke⁠miininakook, pisaan iko niipiwa' inakimihk a'a ke⁠wiitikemak, mii hsa piko 'i minihk ke⁠tipa'amawinakook. Mii ehta eshi mihsawentamaan ci⁠miishiyek a'a ihkwe ci⁠wiiwiyaan.” 13I'i hsa tahsh Cekap okosihsa' kaawiin kwayahk kii‑inentansiiwa' e⁠nahkwehtawaanitc ewii onci wayeshimaanitc ini Shiihkamoon wetetenitc Hemaran, aaniihsh Shiihkamoon okii pihshikwaaci'aani ini Taayinawan otawemaawaan. 14Miihsh o'o kaa⁠ishi nahkwehtaminitc, “Kaawiin i'i nintaa ishihcikehsiimin, ci⁠miikiweyaankipan nintawemaanaan ci⁠wiitikemaatc ininiwan kaa⁠kihkinawaatashakeshwaahsiwimintc. Nintaa onci aanwaapamikoomin. 15Mii hsa 'owe ekooyek, ninka inentaamin ci‑ishihcikeyaank i'i ehkitoyek kiishpin kotehta kihkinawaatashakeshontwaa kahkina kitininiimiwaak ci‑ishinaakosiwaatc taapishkoo eshinaakosiyaank. 16Miitahsh i'i payesh ci⁠miinikooyek nintaanihsinaanik, kaye tahsh ci⁠otaahpinankitwaa kitaanihsiwaak. Miihsh keshi kapehshiyaank mekweya'ii eshi'ayaayek ci⁠peshikwentaakosiyank. 17Kiishpin itahsh wiin inentansiwek ci⁠kihkinawaatashakeshokooyek, miihsh keshi maacaayaank ci⁠tako maaciinankitc nintawemaanaan,” okii'inaawaa'.

18Aahpici hsa Hemar a'a kaye Shiihkam kii⁠minohtamook kaakii'inintwaa. 19A'a tahsh oshkiniiki shemaak kii‑ishihcike kaakii'inintwaa aaniihsh wiinke okii antawenimaan ini ihkwewan wetetenitc Cekapoon. Wiin iitok kaye maawac kii⁠kihci inentaakosi i'imaa oteten otaawininiink.

20Miihsh a'a Hemar a'a kaye Shiihkam kii‑ishaawak ootenaank entashi onaahkonikenk ekiih tipaacimowaatc kaakii'inintwaa. Miihsh kaa⁠ihkitowaatc, 21“Etatawe ohsha iinsan kiwiih saaki wiiciiwikonaanik iki ininiwak; taka pisaan ta⁠kapehshiwak kitahkiiminaanink, pisaan kaye oka anohkiinotaanaawaa. Mankitawaa iitok kitahkiiminaan ci⁠tepitaawaatc. Pisaan itahsh kika wiiwiwaamin otaanihsiwaa', pisaan itahsh kewiinawaa ta⁠wiiwiwak kitaanihsinaani'. 22Iki hsa ininiwak ta⁠inentamok ci⁠wiici ayaaminankwaa, ci⁠wiitaatisiimankwaa kiishpin kotehta kihkinawaatashakeshontwaa kahkina kitininiiminaanik taapishkoo kaa⁠tootawintwaa. 23Kahkina otawahkaanimiwaa' kahkina kaye tepentamowaatc kiinawint kika tipinawewisimin. Taka hsa pisaan inentantaa ci‑ishihcikewank eninankwaa, ci⁠wiicitaaminankwaa,” kii‑ihkitowak. 24Kahkina hsa tahsh kaakii ishaawaatc eshi onaahkonitiwintc i'imaa ootenaank kiih⁠pisintamook kii‑inentamook aaniin ehkitonitc Hemaran ini kaye okosihsini Shiihkam eshinihkaasonitc. Kahkina hsa iinsan ininiwak kii⁠kihkinawaatashakeshwaawak.

25Nihsokiishik itahsh e⁠ani ishihsenik mekwaa e⁠wiihsakentaminitc i'i ininiwa', a'a hsa Liipaai (Levi), a'a Simiyan (Simeon) wetetewaatc Cekapoon, wetawemaawaatc Taayinawan kiih⁠kiimooci ishaawak i'imaa ootenaank. Pashipa'ikewihkomaanan ekii maaciitowaatc, kahkina hsa ininiwa' okii nihsaawaa'. 26Inihsh kaye Hemaran ini kaye okosihsimaan Shiihkaman okiih tako nihsaawaan. Miitahsh kaa⁠ishi ishaawaatc Shiihkaman owaahkaa'ikaniniink ekiih kiiwewinaawaatc otawemaawaan Taayinawan, miihsh kaa⁠ishi maacaawaatc. 27I'i tahsh kotak Cekap okosihsa' kiih⁠piishaawa' i'imaa ootenaank kaa⁠ishkwaa nihshiwenaaniwaninik, ekiih pi naasihkaminitc kahkina kekoonan i'imaa ootenaank. Miihsh kaakii onci ishihcikewaatc onsaam aaniihsh otawemaawaan kii⁠pihshikwaaci'aawan. 28Okii'maaciinaawaa' kaye maanahcaanihsha', pishihkiwa', maanshimihtatimoo' kaye, kahkina hsa kekoon eyaanik mihshawahkamik, i'imaa kaye ootenaank. 29Kahkina hsa ko kekoon kaa‑akintenikin okii maaciitoonaawaa. Awaac kaye apinoonciisha', ihkwewa' kaye, kahkina kaye kekoon eyaanik otaawininiink.

30Miitahsh Cekap kaa'inaatc okosihsa' Liipaaiyan, ini kaye Simiyanan, “Mii hsa 'i hsa eh⁠kashkihtamawiyek maanshihsewin o'o kaakii ishihcikeyek. Miihsh ci⁠kakwaanihsakenimiwaatc oko Kenan ahkiink wenciiwaatc, iki kaye Perisii (Perizzites) kaatinowiwaatc o'omaa eyaawaatc ahkiink. Aahpici hsa akaahsiinowak nintininiimak. Kiishpin itahsh maamawiinowaatc miikaashiwaatc mii hsa 'i ci⁠nihsikooyaan, kahkina kaye kaa⁠wiici ayaamakwaa,” okii'inaa'. 31Miihsh o'o kaa'ikotc, “Kaawiin iitok itahsh i'i otaakiih tootawaahsiin nintawemaanaanin taapishkoo pihshikwaacihkwenk,” okii'ikoo'.

Currently Selected:

Cenisihs 34: OJBR

Highlight

Copy