Luka 6
6
Yéésù sán nɛ́b bəd in nyàm nyi'ǹmbə̀ yílú
(Mata 12.1-8; Markus 2.23-28)
1 Nyàm nyi'ǹmbə̀ sɛŋ nə́ŋ̀ kàani, Yéésù tə́ taàn lɛ́' bərú, kə̀ nɛ́b sáànmbə̀ oò bəd tá. Nɛ́b sáànmbə̀ oò bəd ìì və̀l yɛd bəd nyìì ba, bə̀ nwɔ̀gə̀rì nɛɛ̀n tɛ́mə́ gə́, bít bə̀ fù' yɛd wàà rə kúnú. 2Farisa kambəd bàà bə̀: «Kə̀ níìbə̀ íí mà' taà in aa Musa indaŋ̀mbə̀ bàà nɛ́ŋə̀ oò mà' nyàm nyi'ǹmbə̀ bə sí rə gú?»
3Yéésù kè' í' bàà bə̀: «Íí gád in aa Dauda mà' nyàm nə́ŋ̀, sɛŋ aa yíl oò, kə̀ nɛ́b oò bəd tá, bə̀ kìì gulùm də sínì? 4Dauda pìì Vɛnɛ́b wúuú, pà' bə̀rɛ́d aa bə̀ pii Vɛnɛ́b doó, líí kúnú, bít pii nɛ́b bəraa kə̀ oò tə́ rə kɔ̀. Zá aarə kɔ̀, gìd kíìn boò bə̀ líìnmbìá. Indaŋ̀mbə̀ pii kpaŋ̀ láŋsə́ gààd bəd boò líí sə̀ní.»
5Bít Yéésù bàà Farisa bəd gə̀b: «Nɛ́ŋə̀ aa bə̀ dɛ̀rə̀ Nɛ́ŋ Váàndo Wàà rə, kùmsə̀n Báátììkpɛ̀ŋ nyàm nyi'ǹmbə̀ bə bìá!»
Nɛ́ŋ váàndo nɛɛ̀n valá
(Mata 12.9-14; Markus 3.1-6)
6 Nyàm nyi'ǹmbə̀ nə́ŋ̀ gɔ̀ŋ ba, Yéésù pìì Yahudu bəd wúlwáàlbə̀ rú, bít pìì nɛ́b bəd in sáànmbìá. Nɛ́ŋ váàndo nə́ŋ̀ kùm wúu wərə̀ kɔ̀, nɛɛ̀n váàn oò valá. 7Nɛ̀n indaŋ̀mbə̀ bəd gə̀b kə̀ Farisa bəd gə̀b tá, bə̀ ɛ̀gə̀ núù ba. Bə̀ sèl boò tɛ́mú gə́, dá bée nɛ́ŋ váàndo aarə nɛɛ̀n gáŋ̀ nyàm nyi'ǹmbə̀ beè, bɔ̀b oò bə̀ gúsuúm vədǹ laànmbə̀ yílú. 8Zá Yéésù gàb inselké boò yàá; bàà nɛ́ŋ váàndo nɛɛ̀n val lə: «Ǹ zá' lɛgú, bít ǹ dìì zɔ̀ŋə nɛ́b zùúm númú.» Nɛ́ŋ váàndo rə, zá' dìì lɛgú.
9Bít Yéésù bàà bə̀: «Máà dɛ̀ri bə́ŋ̀ ge, níì sɔ̀ɔ̀n kànsə̀n ma'ǹmbə̀ nyàm nyi'ǹmbə̀ bə gú' Sɔ̀ɔ̀nkè ma'ǹmbèì, sínkɔ̀ invaksə́ ma'ǹmbèì? Nɛ́ŋə̀ gɔ̀ŋsə́ súùnmbèì, sínkɔ̀ nɛ́ŋə̀ lo'ǹmbèì?»
10Kàanyée gə́, Yéésù gə́l núù boò kóólé yílú, bít bàà nɛ́ŋ váàndo nɛɛ̀n val lə: «Ǹ wɔ̀d nɛɛ̀n ń də bə́ŋ̀ ge.» Wɔ̀d nɛɛ̀n gə́, bít nɛɛ̀n oò gág yàá. 11Farisa bəd gə̀b kə̀ nɛ̀n indaŋ̀mbə̀ bəd gə̀b tá, ìì nyìì bəd kə̀ nɔ̀má, bít ìì dɛ̀d bəd ɔ̀dnə́ŋ̀ boò bòdba: «Báan níì báàn ma'ǹmbə̀ kə̀ Yéésù gú?»
Yéésù sààvúŋ Gbantumsə̀ oò bəd kób zè iira
(Mata 10.1-4; Markus 3.13-19)
12Sɛŋ də bərə, Yéésù zá' na' kɔ̀l ba, Vɛnɛ́b nyɛɛ̀mbìá; bít tá' tígə́l nə́ŋ̀ kə̀ Vɛnɛ́b nyɛɛ̀mbìá. 13Nwúun nyɛd gə́, dɛ̀rà nɛ́b sáànmbə̀ oò bəd kóólé, sààvúŋ kób zè iira boò tə́ŋú, pii bə̀ nə́gə́l gbantumsə̀ bəǹ bərá. 14Simon (nɛ́ŋə̀ aa Yéésù piiù nə́gə́l Piyɛr) roó, kudvɛɛ̀l oò Andre ra, Yakuba ra, Filip kə̀ Bartelemi tá, 15Mata kə̀ Tomas tá, Yakuba Alfa wàà ra, Simon nɛ́ŋə̀ aa bə̀ dɛ̀rə̀ màn aa nə́' kè' yɛ́b oò roó, 16Yudas Yakuba wàá, kə̀ Yudas Iskariyot, màn aa dáá lɛ́b Yéésù roó.
Yéésù sán nɛ́b zùúm bəd iná, bít gáŋ nɛ́b mad bə̀ bərá
(Mata 4.23-25)
17Yéésù símà kɔ̀l yílú, kə̀ nɛ́b sáànmbə̀ oò bəraa kób zè iirə rə tá, bít yaà dìì zɔ̀ŋ gbaad nə́ŋ̀ ba. Nɛ́b sáànmbə̀ oò bəd zùúm bə̀ dìì wərà. Nɛ́b zùúm gùùbə̀ kùm wərə̀ kɔ̀, bə̀ vúgə́là Yahudiya yɛ́b bə kóólé, Urusalima bìlú, bít kə̀ bìl bəraa nwuu gbà'á kàd bə Tirus bìlú, kə̀ Sidon bìlə́ roó. 18Bə̀ yaà nwɔŋ oò bəd kiìnmbìá, bít nɛ́b mad bə̀ kam kɔ̀, bə̀ yaà oò sunú, bɔ̀b oò gáŋ bənə́ sisá. Nɛ́b kam bəraa bə̀ kə̀ nwul vaksə́ naà rə kɔ̀, Yéésù gáŋ bə̀ yàá. 19Nɛ́b bəd kóólé, ìì sàà oò bə̀ pigǹmbìá. Kàandə, màìgə́, kpɛŋsɛ́l nə́ŋ̀ vúg oò sisú, bít gáŋ bə̀ sisá, boò kóólé.
Làmkèá kə̀ búúrá
(Mata 5.1-12)
20Yéésù ɛ̀g nɛ́b sáànmbə̀ oò bəd kə̀ aakíin yée gə́, bít bàà bə̀: «Vɛnɛ́b zígi nɛɛ̀nì yílú, íí nɛ́b búúd bə̀ bərá,
kàandə, Vɛnɛ́b ləə gààd tə́ aí yílú!
21Nɛ́b aa íí tə́ kuùm kə̀ gulùm bə́ŋyée roó,
Vɛnɛ́b zígi nɛɛ̀n tə́ yílú,
kàandə, íí dá inlíìnmbə̀ bɔbm̀ zùúm!
Nɛ́b aa íí tə́ kpə̀ə́ǹ kpəə̀n bə́ŋyée roó,
Vɛnɛ́b zígi nɛɛ̀n tə́ yílú,
kàandə, íí dákíìn loonàá!
22«Màìgə́ nɛ́b bəd tə́ ii kíìn zeenàá, bə̀ tə́ ii ɛgǹ kə̀ nɛ́b tɛdń bəd kíin, bə̀ tə́ ii kíìn dúlàá, bít bə̀ tə́ nə́gə́l íí ɛgǹ kə̀ in vaksə́ kíin, nɛɛ̀n aa íí bàg nɛ́ŋə̀ aa bə̀ dɛ̀rə̀ Nɛ́ŋ Váàndo Wàà rə bòórú gə́, Vɛnɛ́b zígi nɛɛ̀n tə́ yílú.
23«Ìì kùm kə̀ tɛ́m làmkèá, nyàm aa in aarə dá wə́ə̀n bəroó, bít ìì sə́d lɛgú, kə̀ lóórá. Kàandə, mú'sɛ̀l dùm gbà'á tə́ ii nwáàn Vɛnɛ́b yiilú, lɛgə́ poú. Nɛɛ̀n aarə rú, doo boò bəd bə̀ í' taà Vɛnɛ́b gbantumsə̀ bəd búúrá.
24«Zá búúd tə́ aí yílú, íí nɛ́b yàám bə̀ bərá,
kàandə, aí gə́, íí bɔ̀b làmkè aí bə̀ì gbòód!
25Búúd tə́ aí yílú, nɛ́b aa íí kə̀ inlíìnmbə̀ zùúm naà bə́ŋyée roó,
kàandə, íí dá gulùm kíìn kiinàá!
Búúd tə́ aí yílú, nɛ́b aa
íí tə́ lód loòn bə́ŋyée roó, kàandə, bòórú gə́,
íí dá kuùm kə̀ tɛ́m nwuukèá, bít íí dákíìn kpəənàá!
26Búúd tə́ aí yílú, màìgə́ nɛ́b bəd bə̀ káŋi tə́ kíìn gə́ roó, kàandə,
doo boò bəd mà' bə̀ sáá kə̀ aarə kíin, kə̀ Vɛnɛ́b gbantumsə̀ gúsuúm bə̀ bəraa
nyàamdoorú roó!»
Ìì í' ɔ̀dmáàn íí bərá
(Mata 5.38-48; 7.12a)
27«Zá mə́ tə́ ii kíìn baanàá, nɛ́b aa íí tə́ mə́ zɛŋ̀ yóo' Ìì í' ɔ̀dmáàn íí bərá. Nɛ́b aa tə́ ii zeèn də kɔ̀, ìì mà' bə̀ sɔ̀ɔ̀nkèá. 28Ìì dɛ̀d Vɛnɛ́b oò zíg nɛ́b aa tə́ ii dúùl də nɛɛ̀n yílú. Bít nɛ́b aa tə́ ii búúd í'ǹ də kɔ̀, ìì nyɛ̀m Vɛnɛ́b kə̀ boò ra. 29Nɛ́ŋə̀ nə́ŋ̀ zìb m nɛɛ̀n kàrì lám nə́ŋ̀ bə gə́, ǹ ì'ù lám kàd nə́ŋ̀ aa kɔ̀; bít nɛ́ŋə̀ nyá' kè' n dàálì gə́, ǹ dààù nyá' oò kè' kə̀ gɔ̀'wà dùù bə̀ tá. 30Nɛ́ŋə̀ aa yaà dɛ̀d n in də gə́ kóólé, m̀ piiù kúnú, bít nɛ́ŋə̀ pà' inì ám naà kɔ̀, ǹ dɛ̀rə̀ sɔ̀ŋ sí. 31Ìì mà' nɛ́b bəd kìínmbə̀ nɛɛ̀n aa íí í' boò kɔ̀ boò mà' ii rú rə kíin.
32«Íí í' tə́ nɛ́b aa tə́ ii í'ǹ də ní gə́, kə̀ níìbə̀ íí nwán taà nɛ́b bəd boò mɔ̀' ii kíìn gú? Bə̀ mɔ̀' ii gá. Nɛ́b vaksə́ bə̀ bəd kɔ̀, ìì í' nɛ́b aa bə̀ tə́ bə̀ í'ǹ doó. 33Dáà íí mà' sɔ̀ɔ̀nkè, tə́ nɛ́b aa bə̀ mà' ii sɔ̀ɔ̀nkè rə ní gə́, kə̀ níìbə̀ íí nwán taà boò mɔ̀' ii kíìn gú? Bə̀ mɔ̀' ii gá, kàandə, nɛ́b vaksə́ bə̀ bəd kɔ̀ ìì mà' tə́ kàani! 34Dáà íí pii kpob tə́ nɛ́b aa íí zíg tɛ́m boò gə́, ìì dá ii kíìn káàn bí'ǹ də bə gə́, kə̀ níìbə̀ íí nwán taà nɛ́b bəd boò mɔ̀' ii kíìn gú? Bə̀ mɔ̀' ii gá, kàandə, nɛ́b vaksə́ bə̀ bəd kɔ̀, ìì pii kpob boò nɛ́b vaksə́ bə̀ bəraa kə̀ boò kíin doó, bɔ̀b boò bí' bənə́ nɛɛ̀n aarə rú ní kɔ̀! 35Zá aí gə́, ìì í' ɔ̀dmáàn íí bərá. Ìì mà' bə̀ sɔ̀ɔ̀nkèá, bít íí pii bə̀ kpobì gə́, ìì zíg tɛ́m baànmbə̀ káá boò bí' bənə́ kíin sí. Dáà íí mà'ì kə̀ aakíin gə́, mú'sɛ̀l dùm íí dá kuùm gbà'á, bít íí dá kuùm Vɛnɛ́b lɛgə́ paà bə̀ yɛb bərá. Kàandə, Vɛnɛ́b mà' sɔ̀ɔ̀nkè kə̀ nɛ́b aa bə̀ mɔ̀'ù síndoó, bít kə̀ nɛ́b vaksə́ bə̀ bərá. 36Ìì nyìì kə̀ sɔ̀ɔ̀nkè tɛ́mú, kìínmbə̀ Báá íí Vɛnɛ́b kɔ̀ nyìì kə̀ sɔ̀ɔ̀nkè rə kíni.»
Ìì fág nɛ́b kambəd sí
(Mata 7.1-5)
37Yéésù tə́ diìn nɛ́b bəd in sáànmbə̀ ní: «Ìì fág nɛ́b bəd sí, bít Vɛnɛ́b kɔ̀ fág ii gá. Fág ìì kò' nɛ́b bəd sí, bít Vɛnɛ́b kɔ̀ fág kò' ii gá. Lɛ́' ìì dàà invaksə́ bəraa nɛ́b bəd mà' ii rə kíìn tɛ́m ba, bít Vɛnɛ́b kɔ̀ dá ii aí bə̀ kíìn lɛ́'ǹ daanàá. 38Ìì pii nɛ́b bəd in aa íí kə̀ naà rə kúnú, Vɛnɛ́b kɔ̀ dá ii aa kə̀ naà rə kíìn piinàá. Də́' bə̀ dá kə́dǹ aí dìgú, kə̀ tasaù sɔ̀ɔ̀nkèá, wáá bə̀ dá kudǹ sɔ̀ɔ̀nkè, bít bə̀ dákíìn sɛgəràá, nyìì dá zadǹ yɛ́b ba. Bə̀ dá ii də́'ǹ kə̀ in aa də́' íí sáá kə̀ nɛ́b bəd doó.»
39Yéésù nàà ì' bə̀ zagəm aa sɔ̀ŋ: «Nyəd nə́ŋ̀ dá béení báàn nyəd nə́ŋ̀ ɔ̀d kpaŋ̀ i'ǹmbèì? Ma'míìn gá. Síngə́ boò iirə kóólé, ìì dáráàn píìl lɔ̀ŋú. 40Wàà sánán nə́ŋ̀má kàn nɛ̀n oò gá. Zá wàà sánán aa sán inì sɔ̀ɔ̀nkè rə, dá kuùm kìínmbə̀ nɛ̀n oò kíni.
41«Kə̀ níìbə̀ ḿ bé' taà saal wàà ɔ̀dnə́ŋ̀ ń núùrú, bít ḿ bé' taà téé wàà aa ám núùrú rə gá gú? 42Ééleè ń dá taà ɔ̀dnə́ŋ̀ ḿ báàn baànmbə̀: ‹Ɔ̀dnə́ŋ̀ mə́ra, ǹ dàà pà' máà vú' n saal wàà tə́ núùrú, ám kɔ̀ ń tə́ kə̀ téé wàà ám núùrú gú?› Ń nɛ́d gú' iirúb bə̀ aa yóo, éèn pà' ǹ vúŋ téé wàà aa ám núùrú rə sína; bít kàandə, ń dá taà báàn saal wàà aa ɔ̀dnə́ŋ̀ ń núùrú rə, vú'ǹ nyɛdkè.»
Téé nyìì kə̀ wàà oòra
(Mata 7.16-20; 12.33-35)
43«Téé nyìì sɔ̀ɔ̀n bán wàà vaksə́ lɛbm̀bə̀ gá, bít téé nyìì vaksə́ kɔ̀ bán wàà sɔ̀ɔ̀n lɛbm̀bə̀ gá. 44Téé nyìì gə́ kóólé, bə̀ dáù gabm̀ kə̀ wàà oòra. Bə̀ yɛ̀b gààm yɛb gəəku' nyìì bə gá. Kə̀ aakíin də kɔ̀, bə̀ yɛ̀b lèéǹ wàà ku' nyìì bə gá. 45Nɛ́ŋə̀ sɔ̀ɔ̀n gə́, vúŋ sáá insɔ̀ɔ̀nkè bəraa nyìì oò tɛ́mú roó. Zá nɛ́ŋə̀ vaksə́ bə̀ gə́, vúŋ sáá in vaksə́ bəraa nyìì oò tɛ́mú roó. In aa nyìì nɛ́ŋə̀ tɛ́mú rə, gú' oò kɔ̀ gám sáá taá.»
Wúl bəraa iirə rə nwɔŋá
(Mata 7.24-27)
46«Bít kə̀ níìbə̀ íí dɛ̀d mə́ taà: ‹Báátììkpɛ̀ŋá, Báátììkpɛ̀ŋá›, zá íí mà' taà in aa mə́ bàà ii rə gá gú? 47Má ii màn aa dáà yaànà máá sunú, màn aa kìì nwɔŋ mə́ yàá, bít mà'ì kə̀ tù' rə, nɛ́ŋə̀ aa lúŋ də i'nàá: 48Lúŋ tə́ nɛ́ŋ váàndo aa gàb wúl wə'ǹmbə̀ roó. Nɛ́ŋ váàndo aarə, zá' pìì wúl wə'ǹmbìá. Gbə̀' dɛ́l yɛ́b bə zé kílə́b, bít páá wúl bèl lə bəŋ yílú. Zɔ̀ŋ aa wəl záá yaà sùd wúl lə gə́, wá'ù sé. Kàandə, bə̀ wə̀'ùwì sɔ̀ɔ̀nkè. 49Zá nɛ́ŋə̀ aa zɛ̀ŋ nwɔŋ mə́ bəd yàá, mà' in aa mə́ bàà rə síndə, lúŋ tə́ nɛ́ŋə̀ aa wə̀' wúl yɛ́b bə kàaní, páá wúl bèl bə síndoó. Zɔ̀ŋ aa wəl záá yaà sùd wúl lə gə́, wúl lə ti'ì wɔbə̀l bɛ́d bəní kùrùb.»
Currently Selected:
Luka 6: SLNT98
Highlight
Share
Copy
Want to have your highlights saved across all your devices? Sign up or sign in
Nouveau Testament en Samba Leko © Alliance Biblique du Cameroun, 1998.
