Mga Buhat 18

Si Pablo Diyà Ta Corinto

1Su maiwas haena uminawà si Pablo diyà ta Atenas dayun duminiyà ta Corinto. 2Diyà nakilala din sa sabuwa ha Judio ha taga-Ponto ha tagngaranan ki Aquila. Bag-u pa sidan nakauma ki igbahi din ha si Priscila sa nangapuun ta prubinsya ta Italia ta insugù hi Claudio ha sa alan ha mga Judio umawà diyà ta Roma. Aman nakig-ahà si Pablo kandan. 3Tumenged ta iling kandan sa pangabuhì hi Pablo ha iyan sa pagpamuhat hu tulda, diyà haena migtimà ta kandan daw migtrabahu duma kandan. 4Kada Sabadu nakiglalang si Pablo diyà ta simbahan ta daw makabig sa mga Judio daw sa kenà mga Judio duun hu pagtuu ki Jesus.

5Su makagapen en si Silas daw si Timoteo sa nangapuun ta Macedonia iyan dà binuhat hi Pablo sa pagpanunultul hu lalang hu Dios ta daw sa mga Judio tumuu gayed ha si Jesus iyan su Misiyas. 6Ba suminupak ki Pablo sa mga Judio daw pigtameyes dan haena. Aman inyabyab din sa aliyabuk duun hu bisti din ha iyan timaan ha ag-awaan din en sidan, dayun inikagiyan din sidan, “Hurà kud labet ku silutan kaw hu Dios. Sugud iman agduun ad hu kenà mga Judio.”

7Aman inawaan sidan hi Pablo dayun diyà migtimà ta balay hi Titio Justo sa kenà Judio ba masinimbahen hu Dios. Sa balay din diyà dà ta kilid ta simbahan. 8Si Crispo sa agalen duun taena ha simbahan tuminuu daan hu Ginuu duma hu pamilya din. Madakel pa gayed sa taga-Corinto ha migpaliliman ki Pablo daw tuminuu ki Jesus dayun binautismuwan.

9Amin daleman ha inikagiyan hu Ginuu si Pablo pinaagi hu panan-awen, “Harì ka agkahaldek ba dayuna sa pagpanunultul nu 10ta tagdumahan ku ikaw. Hurà gayed makapasipala ikaw ta duun taini ha banuwa madakel pa sa tumuu kanak.” 11Aman si Pablo migtimà diyà ta Corinto hu nangkatuig daw tengà hu pagtudlù hu lalang hu Dios.

12Ba su iyan en paman gubirnadur ta Acaya si Galio sa mga Judio migsabuwa hu pagdakep ki Pablo daw inuwit dan haena duun hu hukmanan. 13Kagi dan, “Saini migkabig hu mga etaw hu pagsimba hu Dios duun hu paagi ha supak hu balaud taw.”

14Su agtubag en ngaay si Pablo inikagiyan hi Galio sa mga Judio, “Ku saini ha etaw amin din nabuhat ha adagi ha salà magpaliliman a ngaay inyu. 15Ba tumenged ta mga lalang dà man daw mga ngaran hu kapuun nuy daw hu inyu ha Kasuguan iyan kaw en maghusay ta hurà ku duun labet.” 16Aman impaawà din sidan duun taena ha hukmanan. 17Dayun dinakep dan si Sostenes sa agalen duun taena ha simbahan daw pagbunalai duun hu atubangan ku hukmanan. Ba si Galio hurà en maglabet-labet kandan.

Sa Paglikù Hi Pablo Diyà Ta Antiokia

18Si Pablo migtimà pa diyà ta Corinto hu pila ha aldaw. Dayun inawaan din sa mga tumutuu diyà daw lulan hu barku payanaen diyà ta prubinsya ta Siria duma ki Priscila daw ki Aquila. Su makauma sidan diyà ta Cencrea migpatabulug si Pablo ha iyan timaan ha natuman din en sa panaad din duun hu Dios. 19Su makauma sidan diyà ta Efeso inawaan din si Priscila daw si Aquila. Sumineled si Pablo duun hu simbahan hu mga Judio daw nakiglalang kandan. 20Hinawidan dan si Pablo diyà ba hurà en haena kabayà. 21Bà dà uminikagi su aghipanaw en, “Ku iyan pagbayà hu Dios aglikù a dà dini ta inyu.” Aman uminawà ta Efeso daw luminulan dayun hu barku. 22Su makauma si Pablo diyà ta Cesarea duminayun haena diyà ta Jerusalem daw nakig-ahà hu mga tumutuu diyà dayun luminikù diyà ta Antiokia.

23Su malugay-lugay hu pagtimà din diyà huminipanaw dà paman payanaen duun hu mga banuwa ha sakup ta Galacia daw ta Frigia ta daw malig-enan din sa pagtuu hu mga tumutuu.

Si Apollo Diyà Ta Efeso Daw Ta Corinto

24Duun daan taena ha panahun amin Judio ha taga-Alejandria ha tagngaranan ki Apollo sa nakauma diyà ta Efeso. Matatau haena daw natun-an din gayed sa insulat ha lalang hu Dios 25daw natudluan daan hu tinuuwan mahitenged hu Ginuu. Madasigen gayed hu pagpanudlù daw hustu sa pagsaysay din mahitenged ki Jesus bisan ku iyan din dà natun-an sa pagbautismu hi Juan. 26Su magtudlù haena duun hu simbahan hu mga Judio hurà din gayed kahaldek. Ba su mapaliman haena hi Priscila daw hi Aquila dinuma dan haena diyà ta balay dan daw tudlui hu hurà din pa katun-i ha insulat ha lalang hu Dios mahitenged ki Jesus ta daw mahustu gayed sa pagtudlù din.

27Agkabayà gayed si Apollo agdiyà ta Acaya aman sa mga tumutuu diyà ta Efeso migdasig kandin dayun sinulatan dan sa mga tumutuu diyà ta Acaya ha dawaten dan si Apollo. Su makauma si Apollo diyà sa pagtudlù din nakabulig gayed hu mga nakatuu ki Jesus pinaagi hu grasya hu Dios 28ta pinaagi hu insulat ha lalang hu Dios napamatud-an ha si Jesus iyan su Misiyas. Aman nadaeg din sa mga Judio ha nakigsawalà kandin duun hu atubangan hu mga etaw.

Currently Selected:

Mga Buhat 18: bkd

Highlight

Copy