Mga Buhat 19

Si Pablo Diyà Ta Efeso

1Su diyà en si Apollo ta Corinto si Pablo huminipanaw diyà ta bubungan dayun nakauma ta Efeso. Naahà din diyà sa duma ha mga tumutuu 2daw ininsaan din sidan, “Su tumuu kaw ki Jesus inulinan kaw ba hu Balaan ha Ispiritu?”

Tuminubag sidan, “Hurà ta hurà day katun-i ha amin man diay Balaan ha Ispiritu.”

3Aman ininsaan din sidan, “Inu man diay sa katudluanan hu pagbautismu inyu?”

Tuminubag sidan, “Ki Juan ha katudluanan hu pagbautismu.”

4Dayun inikagiyan sidan hi Pablo, “Sa intudlù hi Juan iyan sa maghinulsul sa etaw dayun mabautismuwan, daw tinudluan din daan sa kaet-etawan ha tumuu sidan taena ha makauma ha hudiyan dì kandin ha iyan si Jesus.”

5Su matun-an dan haena binautismuwan sidan tumenged hu pagtuu dan ki Jesus ha Ginuu. 6Dinampà hi Pablo sa ulu dan dayun inulinan sidan hu Balaan ha Ispiritu. Nakaikagi sidan hu harì dan agkasabut ha mga inikagiyan daw insaysay dan daan sa igpaikagi hu Dios. 7Sampulù daw daruwa sidan alan.

8Tatulu ha bulan sa pagtudlù hi Pablo hu mga etaw duun taena ha simbahan hu mga Judio daw hurà din daan gayed kahaldek hu pagdasig kandan mahitenged hu pagharì hu Dios ta daw makabig sidan. 9Ba sa duma ha mga etaw hurà gayed tuu ta madesen sa henà-henà dan daw bà dan dà pigtameyes duun hu atubangan hu mga etaw sa tinuuwan mahitenged ki Jesus. Aman uminawà si Pablo diyà ta kandan. Dinuma din sa mga tumutuu dayun aldaw-aldaw miglalang-lalang sidan duun hu iskwilahan ha binalay hi Tirano. 10Iyan haena binuhat dan duun hu daruwa ha tuig. Aman pinaagi taena sa lalang hu Dios napaliman hu alan ha mga etaw ha tagtimà ta prubinsya ta Asia sa mga Judio daw sa kenà.

Sa Mga Batà Hi Esceva Ha Sinabà Hu Busaw

11Madakel gayed ha belenganen sa binuhat hi Pablo ta ginaheman hu Dios. 12Bisan sa manggad ha pakaugsak diyà ta lawa hi Pablo ku ag-uwiten duun hu agkadaluwan daw duun hu pinasipalahan hu busaw agkaulian haena. 13Amin mga Judio ha tagduun-duun hu mga banuwa ta agpamugaw daan hu mga busaw. Sinulay dan sa pagbugaw hu busaw pinaagi hu ngaran hi Jesus ha Ginuu. Kagi dan, “Umawà ka duun taini pinaagi hu ngaran hi Jesus ha intultul hi Pablo.” 14Sa migbuhat taena iyan su pitu ha batà ha maama hi Esceva sa Judio ha iyan tungkay labaw ha sinaligan hu paghalad. 15Ba su busaw tuminubag, “Nakilala ku si Jesus daw si Pablo, ba sinyu sin-u kaw man?” 16Dayun linaksuwan sidan ku etaw ha tinaguan hu busaw daw nadaeg sidan. Aman nakapulaguy sidan duun ku balay sa nangaadulan daw nangalebasan.

17Su mapaliman haena hu mga Judio daw hu kenà mga Judio ha tagtimà diyà ta Efeso nangahaldek gayed sidan daw nadayè gayed si Jesus ha Ginuu. 18Madakel sa tuminuu ha migsugid hu mga madaet ha buhat dan. 19Amin daan diyà mga salamangkiru ha tuminuu aman inamul dan sa mga librito dan daw bigsuli duun hu atubangan hu kaet-etawan. Sa bali taena ha mga librito kalimahan ha libu ha salapì. 20Pinaagi taena nakalekep sa lalang hu Dios daw migdakelà gayed sa nangakatuu.

Sa Kagubut Diyà Ta Efeso

21Su maiwas haena nakahenà-henà si Pablo ha umagi diyà ta Macedonia daw ta Acaya daw dayun diyà ta Jerusalem. Uminikagi pa, “Ku maiwas haena agdiyà a pa daan ta Roma.” 22Impauna din diyà ta prubinsya ta Macedonia sa daruwa ha sinaligan din ha iyan si Timoteo daw si Erasto ta si Pablo diyà pa hu kandin ta prubinsya ta Asia.

23Duun taena ha panahun amin kasamuk diyà ta Efeso tumenged hu tinuuwan mahitenged ki Jesus. 24Amin mananalsal ha tagngaranan ki Demetrio ha namuhat hu diyus-diyus taena ha simbahan hu diyus dan ha bahi ha iyan si Artemis. Pinaagi taena migsapian gayed sidan duma hu mga sakup din ha mananalsal. 25Inamul din sa mga sakup din daw sa duma ha mananalsal daw ikagiyi sidan, “Mga suled, natun-an nuy en ha migsapian kuy taini ha patigayun taw. 26Ba agkatun-an nuy en daan ha madakel en ha mga etaw sa nakabig hi Pablo dini ta Efeso daw apit en pakalekep duun hu mga banuwa ha sakup ta Asia tumenged ta tigtudlù din ha sa diyus-diyus ha binuhat hu etaw kenà laus ha Dios. 27Aman pinaagi taini tameyesen dan gayed sa patigayun taw. Maikagi dan daan ha hurà en pulus taini ha simbahan hi Artemis sa diyus taw ha iyan sinimba hu kaet-etawan dini ta Asia daw duun hu bisan hindu daw maawà daan sa pagkabantugan din.”

28Su mapaliman haena hu mga mananalsal nangapauk gayed sidan daw namangulahì ha tagyanaen, “Bantugan gayed si Artemis sa diyus hu taga-Efeso.” 29Aman amin kagubut ha nakalekep taena ha banuwa. Dayun migdengan sidan hu pagdakep ki Gayo daw ki Aristarco sa taga-Macedonia ha mga duma hi Pablo hu paghipanaw din daw pinangguyud dan sidan duun hu tigumanan. 30Agkabayà ngaay si Pablo agpangatubang duun taena ha kaet-etawan ba binaldeng hu mga tumutuu. 31Amin din daan mga amigu ha upisyal diyà ta Asia ha migpasugù diyà ta kandin hu paghangyù ha harì dumuun ku tigumanan.

32Sa mga etaw diyà ta tigumanan nangalibeg gayed ta hurà en mag-iling sa ingkulahì dan. Sa kadakelà kandan hurà man ganì makatuen ku imbà sidan kaamul-amul diyà. 33Amin mga Judio ha migsugù ki Alejandro ha iyan mangatubang hu kaet-etawan hu pagpangatarengan mahitenged kandan. Dayun migsingyas haena ta daw humagteng sidan. 34Ba su matun-an dan ha si Alejandro Judio diay namangulahì sidan seled hu daruwa ha uras ha tagyanaen, “Bantugan gayed si Artemis sa diyus hu taga-Efeso.”

35Impahagteng sidan hu sikritaryu taena ha banuwa daw minikagi, “Mga suled ku dini ta Efeso, hurà ba diay katun-i hu alan ha sikuy sa mga taga-Efeso iyan sinaligan ha magbantay taini ha simbahan hu bantugan ha diyus taw ha si Artemis daw hu larawan ha batu ha napuun diyà ta langit? 36Tumenged ta hurà man gayed makaikagi ha saini kenà laus kinahanglan ha humagteng kaw daw harì kaw tagbuhat hu kagubut, 37ta insumbung nuy haini sa mga etaw ha hurà magtameyes ki Artemis daw hurà panakaw diyà ta simbahan. 38Ku amin igsumbung hi Demetrio daw hu duma din ha mananalsal amin taw maghuhukum daw amin daan panahun hu paghusay na duun sidan magsumbung. 39Ku amin pa duma ha agkabayaan nuy ha mahusay angati nuy sa naanadan ha pag-amul-amul. 40Ta mabaluy kuy ha isumbung iman tumenged ta binuhat taw sa kagubut ha hurà taw duun katarengan.” 41Su maikagi din haena impaulì din sa kaet-etawan.

Currently Selected:

Mga Buhat 19: bkd

Highlight

Copy