ᓭᑲᕒᐋᔭ 14
14
ᒉᕒᐆᓴᓬᐊᒻ ᐁᑕᔑᒋᑳᑌᒃ, ᐃᑭ ᑲᔦ ᐁᑕᓶᐙᓇᑭᓯᐙᒡ ᐯᒫᑎᓯᐙᒡ
1ᐋᔕ ᐅᔕ ᐯᔓᓈᑾᓐ ᒋᐃᔑ ᑮᔑᑲᓂᓂᒃ ᑳᑎᐯᒋᑫᒡ ᑳᐐ ᑎᐹᑯᓂᐌᒡ᙮ ᒦᔥ ᐃᐃ ᐊᐲ ᐆᑌᓇ ᒉᕒᐆᓴᓬᐊᒻ Jerusalem ᑫᔖᑰᒋᒋᑳᑌᒃ ᒋᒪᑲᒥᑰᔦᒃ ᑌᐱᓇᐌᐎᓯᔦᒃ᙮ ᑭᑲ ᑲᓇᐙᐱᒻ ᐃᑕᔥ ᓀᓈᐎᓂᑳᑌᑭᓐ᙮ 2ᑳᑎᐯᒋᑫᒡ ᐃᑕᔥ ᐅᑲ ᒫᐗᑑᓈᐞ ᑲᑭᓇ ᐁᑕᓶᐙᓇᑭᓯᓂᒡ ᐯᒫᑎᓯᓂᒡ ᒋᒦᑳᑕᒥᓂᒡ ᑭᒋ ᐆᑌᓇ ᒉᕒᐆᓴᓬᐊᒻ᙮ ᐃᐃᓴ ᑭᒋ ᐆᑌᓇ ᑕᔖᑰᒋᒋᑳᑌ᙮ ᐙᑳᐃᑲᓇᓐ ᒋᓂᔑᐗᓈᒋᒋᑳᑌᑭᓐ, ᐃᑴᐗᒃ ᓅᒋᑯ ᒋᑑᑕᐎᑣ᙮ ᐋᐱᑕ ᓴ ᐃᐃᒫ ᐌᒌᐙᒡ ᐊᐎᔭᒃ ᑕᒫᒌᒋᑲᓂᐎᐗᒃ ᐸᑳᓐ ᐊᑮᕽ ᒋᐃᔑᐎᓂᑣ᙮ ᐃᑭ ᑕᔥ ᑯᑕᒃ ᐋᐱᑕ ᐊᐎᔭᒃ ᑳᐐᓐ ᑕᒫᒌᓈᓰᐗᒃ᙮ 3ᒦᑕᔥ ᑳᑎᐯᒋᑫᒡ ᒋᒦᑳᓱᒡ, ᒋᒦᑳᓈᒡ ᐃᐃ ᐁᑕᓶᐙᓇᑭᓯᓂᒡ ᐯᒫᑎᓯᓂᒡ ᑖᐱᔥᑰ ᐅᑖᓈᕽ ᑳᑮ ᐱ ᐃᔑᒋᑫᐸᓐ᙮ 4ᒦᔥ ᐃᐃ ᐊᐲ ᑮᔑᑲᓂᓂᒃ ᑳᑎᐯᒋᑫᒡ ᒋᓃᐸᐎᒡ ᐗᑭᑕᑎᓐ ᒋᓵᒥᔥᑲᕽ ᐋᓬᐃᑉ ᐱᑾᑎᓈᓂ ᐙᐸᓄᕽ ᐃᓇᑫ ᐁᔮᓂᒃ ᒉᕒᐆᓴᓬᐊᒻ᙮ ᒦᑕᔥ ᐃᐃ ᑳᐱᑾᑎᓈᒃ ᒋᑖᔥᑭᓭᒃ, ᐙᐸᓄᕽ ᐃᔑ ᐃᓇᑫ ᐅᒋ ᒫᒋᓭᒃ ᐲᓂᔥ ᐌᑎ ᐃᔑ ᐃᓇᑫ ᓂᑳᐲᐊᓄᕽ ᒋᔑ ᐴᓂᓭᒃ᙮ ᐃᐃᔥ ᐋᐱᑕ ᑳᑮ ᑖᔥᑭᓭᒃ ᑮᐌᑎᓄᕽ ᐃᓇᑫ ᑕᔑ ᔔᔥᑯᔥᑳ᙮ ᐃᐃ ᑕᔥ ᑯᑕᒃ ᔖᐗᓄᕽ ᐃᓇᑫ ᑕᔑ ᔔᔥᑯᔥᑳ᙮ ᒦᔥ ᐃᐃᒫ ᑫᐅᒋ ᑭᒋ ᐸᓴᑎᓈᒃ᙮ 5ᒦᑕᔥ ᐅᐅᒫ ᐃᓇᑫ ᐸᓴᑎᓈᕽ ᑫᐅᒋ ᔖᐾᔦᒃ ᐌᑎ ᐲᓂᔥ ᐁᐅᒋᒋ ᐊᔮᒃ ᐁᓴᓬ Azel ᐁᔑᓂᑳᑌᒃ᙮ ᑭᑲ ᒫᒌᐸᐃᐌᒻ ᐃᓴ ᑖᐱᔥᑰ ᑭᑫᑌᔭᐋᒥᐙᐸᓃᒃ ᑳᑮ ᐃᔑ ᒫᒌᐸᐃᐙᑕᒧᐙᑯᐸᓀᓐ ᐁᑯᔥᑯᓭᓂᒃ ᐊᑮᓂ ᐊᐲ ᔫᓵᔭ Uzziah ᑮᑭᒋᐅᑭᒫᐎᐸᓐ ᒎᑕ ᐊᑮᕽ᙮ ᒦᑕᔥ ᑳᑎᐯᒋᑫᒡ ᒋᐱᑕᑯᔑᕽ, ᒋᐱ ᐐᒌᐎᑯᒡ ᑲᑭᓇ ᑫᑌᑖᑯᓯᓂᒡ ᐅᑌᒐᓬᐃᒪᐞ᙮
6ᐃᐃ ᑕᔥ ᐊᐲ ᐃᔑ ᑮᔑᑲᒃ, ᑳᐐᓐ ᑕᑭᓯᓈᓯᓅᓐ, ᑳᐐᓐ ᑲᔦ ᑕᓂᑮᑾᑎᓯᓅᓐ᙮ 7ᑕᑭᒋ ᒪᔭᑭ ᑮᔑᑲᓐ ᐃᐃ ᐊᐲ ᒨᔕᒃ ᑕᑮᔑᑲᓐ ᒥᓴᐙ ᑯ ᑎᐱᑲᒃ ᑕᑮᔑᑲᓐ᙮ ᑳᑎᐯᒋᑫᒡ ᐃᑕᔥ ᐁᑕ ᐅᑭᑫᑖᓐ ᐊᐲ ᐅᐅ ᑫᐃᔑᓭᓂᒃ᙮
8 # Ezk 47.1; Jhn 7.38; Rev 22.1. ᒦᔥ ᑲᔦ ᐃᐃ ᐊᐲ ᐱᒫᑎᓰᐎᓂᐱ ᑫᐅᒋᒋᐗᕽ ᒉᕒᐆᓴᓬᐊᒥᕽ ᐋᐱᑕ ᒋᐃᔑᒋᐗᕽ ᓂᐴᐎ ᑭᒋ ᓵᑲᐃᑲᓃᕽ, ᑯᑕᒃ ᐋᐱᑕ ᑕᔥ ᑕᐃᔑᒋᐗᓐ ᒣᑕᒐᕒᐁᓂᔭᓐ Mediterranean ᑭᒋᑲᒦᕽ᙮ ᒨᔕᒃ ᐃᓴ ᑯ ᑕᐱᒥᒋᐗᓐ, ᓃᐱᕽ, ᐱᐴᕽ ᑲᔦ᙮ 9ᑳᑎᐯᒋᑫᒡ ᐃᑕᔥ ᐐᓐ ᐃᑯ ᑕᑭᒋᐅᑭᒫᐎ ᒥᓯᐌ ᐊᑮᕽ᙮ ᐃᐃᔥ ᐊᐲ ᑮᔑᑲᓂᓂᒃ ᑕᒥᒋ ᐯᔑᑯ ᐁᑎᐯᒋᑫᒡ, ᐅᐐᓱᐎᓐ ᑲᔦ ᑕᒥᒋ ᐯᔑᑾᓂᓂ᙮
10ᒥᓯᐌ ᑕᔥ ᐃᐃᒫ ᐃᓇᑫᑲᒥᒃ ᐆᑌᓈᕽ ᑮᐸ Geba ᐅᒋ ᐲᓂᔥ ᐌᑎ ᑭᒋ ᐆᑌᓈᕽ ᕒᐃᒪᓐ Rimmon ᐁᒋᑳᑌᒃ, ᔖᐗᓄᕽ ᐃᓇᑫ ᒉᕒᐆᓴᓬᐊᒥᕽ ᑕᐃᔑᓈᑾᓐ ᒋᑕᑕᒀᒃ᙮ ᒉᕒᐆᓴᓬᐊᒻ ᐃᓴ ᑕᔑ ᐸᑕᑭᑌ ᐁᔑ ᐃᔥᐸᑲᒥᑳᒃ᙮ ᐃᐃᒫ ᓴ ᑕᔥ ᐯᒋᒪᓐ Benjamin ᐅᑎᔥᒀᑌᒻ ᐁᒋᑳᑌᓂᒃ ᐲᓂᔥ ᐌᑎ ᓂᑕᒻ ᐃᔥᒀᑌᒻ ᐁᒋᑳᑌᒃ, ᐲᓂᔥ ᐌᑎ ᑮᑫᐗᐎ ᐃᔥᒀᑌᒻ ᐁᒋᑳᑌᒃ, ᐃᐃᒫ ᑕᔥ ᑲᔦ ᐅᓵᐱᐎᓂᕽ ᐊᓇᓃᔭᓬ Hananel ᐁᒋᑳᑌᒃ ᐲᓂᔥ ᐌᑎ ᐁᔑᐊᔮᒃ ᑭᒋᐅᑭᒫ ᑳᔑ ᐅᔑᒋᑳᑌᓂᒃ ᐅᔔᒥᓈᐴᒻ᙮ 11#Rev 22.3. ᐃᑭ ᓴ ᐯᒫᑎᓯᐙᒡ ᐱᓵᓐ ᐃᐃᒫ ᒉᕒᐆᓴᓬᐊᒥᕽ ᑕᐊᔨᑖᐗᒃ᙮ ᑳᐐᓐ ᒦᓇᐙ ᐐᑳ ᑕᓇᓃᓵᓂᓯᓰᐗᒃ ᒋᓂᔑᐗᓈᒋᐃᑣᐸᓐ᙮
12ᒦᑕᔥ ᐅᐅᐌᓂ ᑳᑎᐯᒋᑫᒡ ᑫᐃᓈᐱᓀᐋᒡ ᑲᑭᓇ ᐁᑕᓶᐙᓇᑭᓯᓂᒡ ᑳᐱ ᒦᑳᑕᒥᓂᒡ ᐆᑌᓇ ᒉᕒᐆᓴᓬᐊᒻ᙮ ᐅᐐᔭᐎᐙᓐ ᐃᓴ ᑯ ᑕᐗᓈᑕᓂᓂᐗᓐ ᒣᒀ ᐱᒫᑎᓯᐙᒡ᙮ ᐅᔥᑮᔑᑯᐙᓐ ᑲᔦ ᑕᐗᓈᑕᓂᓂᐗᓐ, ᐅᑌᓇᓂᐎᐙᓐ ᑲᔦ ᑕᐗᓈᑕᓂᓂᐗᓐ᙮ 13ᒦᔥ ᑲᔦ ᐃᐃ ᐊᐲ ᑳᑎᐯᒋᑫᒡ ᑫᑑᑕᐙᒡ ᐃᐃ ᐃᓂᓂᐗᐞ ᒋᐗᐙᓀᑕᒥᓂᒡ ᑫᐊᐲᒋ ᓭᑭᓯᓂᒡ᙮ ᒦᔥ ᐃᑯ ᐃ ᒋᒪᒪᓂᐱᓂᑎᓂᒡ ᒋᒫᒦᑳᑎᓂᒡ᙮ 14ᐃᑭ ᑕᔥ ᑲᔦ ᐃᓂᓂᐗᒃ ᒎᑕ ᐊᑮᕽ ᐌᒌᐙᒡ ᐃᐃᒫ ᑕᑕᔑ ᒦᑳᓱᐗᒃ ᒋᓈᑕᒪᐙᑕᒧᐙᒡ ᒉᕒᐆᓴᓬᐊᒻ᙮ ᒦᔥ ᑫᔑ ᒪᑲᒫᐙᒡ ᐁᔑ ᐌᓅᑎᓯᓂᒡ ᑲᑭᓇ ᐁᑕᓶᐙᓇᑭᓯᓂᒡ ᐯᒫᑎᓯᓂᒡ᙮ ᓃᐱᐗᐞ ᐅᓵᐎ ᔔᓂᔮᓐ, ᐙᐹᐱᑯ ᔔᓂᔮᓐ ᑲᔦ, ᓃᐱᐗᐞ ᑲᔦ ᑭᑭᔥᑭᑲᓇᓐ ᑕᒪᑲᑗᐗᒃ᙮
15ᐃᐃ ᓴ ᐯᔑᑾᓐ ᐃᓈᐱᓀᐎᓐ ᐅᑲ ᐅᑎᓯᑯᓈᐙ ᐃᑭ ᒥᑕᑎᒨᒃ, ᔔᔔᒥᑕᑎᒨᒃ ᑲᔦ, ᐱᒀᐎᑲᓀ ᒥᑕᑎᒨᒃ ᑲᔦ, ᒫᔑᒥᑕᑎᒨᒃ ᑲᔦ᙮ ᑲᑭᓇ ᓴ ᑯ ᐊᔭᐋᐎᔕᒃ ᐁᔮᐙᒡ ᐃᐃᒫ ᐁᔑ ᑲᐯᔑᓂᒡ ᑳᒦᑳᓂᑯᐙᒡ᙮
16 # Lev 23.39-43. ᐃᑭ ᑕᔥ ᐁᑕᓶᐙᓇᑭᓯᐙᒡ ᐯᒫᑎᓯᐙᒡ ᑳᑮ ᒦᑳᑕᒧᐙᐸᓐ ᒉᕒᐆᓴᓬᐊᒻ ᑫᐃᔥᑯ ᓂᓯᑣ, ᑫᐐᓇᐙ ᑕᐃᔖᐗᒃ ᐌᑎ ᒉᕒᐆᓴᓬᐊᒻ ᐁᑕᓱ ᐊᑭ ᒋᐊᑕᐊᓇᒥᐁᑕᐙᐙᒡ ᑭᒋᐅᑭᒫᓐ ᑳᒫᐗᒋ ᒪᔥᑲᐎᓰᓂᒡ ᑳᑎᐯᒋᑫᓂᒡ ᒋᐐᑑᑳᓱᐙᒡ ᐐᑾᑎᓈᓂᐗᓂᓂᒃ ᐁᔑᓂᑳᑌᓂᒃ ᐊᑲᐙᑌᐃᑲᓂ ᐐᑾᑎᐎᓐ᙮ 17ᑮᔥᐱᓐ ᐃᑕᔥ ᐃᑯ ᐯᔑᑴᐙᓐ ᐯᒫᑎᓯᐙᒡ ᐋᓉᑕᒧᐙᒡ ᒋᐃᔖᐙᒡ ᒋᐊᐎ ᐊᓇᒥᐁᑕᐙᐙᒡ ᐁᔑ ᑭᒋᐅᑭᒫᐎᓂᒡ ᑳᒫᐗᒋ ᒪᔥᑲᐎᓰᓂᒡ ᑳᑎᐯᒋᑫᓂᒡ, ᑳᐐᓐ ᐃᓴ ᑕᑭᒥᐗᓯᓂᓂ ᐅᑕᑮᒥᐙᕽ᙮ 18ᑮᔥᐱᓐ ᐃᑕᔥ ᐄᒋᐸᑮᕽ Egypt ᐌᒌᐙᒡ ᐃᔖᓯᒀ ᒋᑮ ᐐᑑᑳᓱᐙᐸᓐ ᑳᔑ ᐐᑾᑎᐎᓐᒡ ᐁᒋᑳᑌᓂᒃ ᐊᑲᐙᑌᐃᑲᓂ ᐐᑾᑎᐎᓐ; ᒦ ᓴ ᐃ ᑫᐐᓇᐙ ᒋᐅᑎᓯᑯᐙᒡ ᐃᓈᐱᓀᐎᓐ ᑳᑎᐯᒋᑫᒡ ᑳᑑᑕᐙᓂᒡ ᐃᐃ ᐁᑕᓶᐙᓇᑭᓯᓂᒡ ᐯᒫᑎᓯᓂᒡ ᐁᔖᓯᓂᒃ ᐁᔑ ᐐᑾᑎᐎᓐᒡ᙮ 19ᒦ ᓴ ᐅᐌ ᓇᑫ ᑫᔑ ᓇᓇᐊᓯᑣ ᐄᒋᑉ ᐌᒌᐙᒡ, ᐃᑭ ᑲᔦ ᑲᑭᓇ ᐁᑕᓶᐙᓇᑭᓯᐙᒡ ᐯᒫᑎᓯᐙᒡ ᐁᔖᓯᒀ ᐊᑲᐙᑌᐃᑲᓂ ᐐᑾᑎᐎᓐ ᐁᒋᑳᑌᓂᒃ᙮
20ᒦᑕᔥ ᐃᐃ ᐊᐲ ᔑᓇᐎᐆᒋᑲᓂᕽ ᐁᑰᑌᑭᓐ ᒥᑕᑎᒧᐎ ᐊᐱᑲᓂᕽ ᑫᔑ ᐅᔑᐲᐃᑳᑌᒃ ᐅᐅ ᒋᐃᑭᑑᒪᑲᒃ, ᒦ ᓴ ᐅᐌᓂ ᑳᒦᓂᓐᒡ ᒋᑎᐱᓇᐌᐎᓯᒡ ᑳᑎᐯᒋᑫᒡ᙮ ᐃᑭ ᑕᔥ ᑲᔦ ᒌᐹᑴᐗᑭᑾᒃ ᑕᑭᑕᑭᓱᐗᒃ ᐁᔮᐙᒡ ᑭᒋ ᐊᓇᒥᐁᐎᑲᒥᑯᕽ ᒋᐃᓇᑭᒥᑣ ᑖᐱᔥᑰ ᐁᓇᑭᑌᓂᑭᓐ ᐅᓈᑲᓇᓐ ᐁᔮᓂᑭᓐ ᑳᔑ ᐸᑭᑎᓈᓱᐎᓐᒡ᙮ 21ᐃᑭ ᓴ ᑲᑭᓇ ᒌᐹᑴᐗᑭᑾᒃ ᐁᔮᐙᒡ ᐃᐃᒫ ᒉᕒᐆᓴᓬᐊᒥᕽ ᐃᐃᒫ ᑲᔦ ᒎᑕ ᐊᑮᕽ ᑕᑭᑕᑭᓱᐗᒃ ᐸᑳᓐ ᒋᐃᔑ ᐋᐸᑎᓯᐙᒡ ᐊᓇᒥᐁᑕᐎᓐᒡ ᑳᒫᐗᒋ ᒪᔥᑲᐎᓰᒡ ᑳᑎᐯᒋᑫᒡ᙮ ᐃᑭ ᓴ ᑕᔥ ᐊᐎᔭᒃ ᑫᐸᑭᑎᓈᓱᐙᒡ, ᒦᐗᐞ ᐃᐃ ᑫᐋᐸᒋᐋᐙᒡ ᐊᑭᑾᐞ ᐊᐲ ᑲᐹᑑᐙᒡ ᐐᔮᔅ ᑫᐸᑭᑎᓇᒧᐙᒡ᙮ ᐊᐲ ᑕᔥ ᐃᐃ ᐊᓂ ᐃᔑᓭᒃ ᑳᐐᓐ ᑲᓇᑫ ᐊᐙᒡ ᑕᐊᔮᓰ ᑫᐋᑖᐌᐃᐌᒡ ᐃᐃᒫ ᑭᒋ ᐊᓇᒥᐁᐎᑲᒥᑯᕽ ᑌᐯᑕᒥᓂᒡ ᑳᒫᐗᒋ ᒪᔥᑲᐎᓰᓂᒡ ᑳᑎᐯᒋᑫᓂᒡ᙮
Currently Selected:
ᓭᑲᕒᐋᔭ 14: OJBS
Highlight
Share
Copy
Want to have your highlights saved across all your devices? Sign up or sign in
Ojibwe Shorter Bible (Syllabic Script) © 2008 Canadian Bible Society
