ᒉᓂᓯᔅ 38

ᒎᑕ ᔑᑾ ᑌᒫᕒ

1ᐃᐃ ᓴ ᐊᐲ ᒎᑕ Judah ᐅᑮ ᓇᑲᓈᐞ ᐐᒋᑭᐌᔭᐞ ᐁᑮ ᐊᑕ ᐐᒋᑖᒫᒡ ᐃᓂᓂᐗᓐ ᐋᐃᕒᐊ Hirah ᐁᔑᓂᑳᓱᓂᒡ ᐌᒌᓂᒡ ᐌᑎ ᐆᑌᓈᕽ ᐋᑕᓬᐊᒻ Adullam ᐁᒋᑳᑌᓂᒃ᙮ 2ᒦᔥ ᐌᑎ ᐅᑮ ᐙᐸᒫᓐ ᐃᑴᐗᓐ ᑫᓇᓐ Canaan ᐊᑮᕽ ᐌᒌᓂᒡ ᐌᑌᑌᓂᒡ ᔔᐊ Shua ᐁᔑᓂᑳᓱᓂᒡ᙮ ᒦᐗᓐ ᐃᑕᔥ ᐃᓂ ᑳᐐᐎᒡ ᐁᑮ ᐐᐯᒫᒡ᙮ 3ᒦᔥ ᑳᑮ ᐅᓃᒑᓂᓯᓂᒡ ᐁᑮ ᓂᑖᐎᑭᓂᒡ ᑸᐎᓭᓴᓐ ᐁᕒ Er ᐁᑮ ᐃᔑᓂᑳᓈᐙᒡ᙮ 4ᒦᓇᐙ ᓴ ᑮᑭᑭᔥᑲᐙᐗᓱᐗᓐ ᐁᑮ ᓂᑖᐎᑭᓂᒡ ᑸᐎᓭᓴᓐ ᐆᓇᓐ Onan ᐁᑮ ᐃᔑᓂᑳᓈᐙᒡ᙮ 5ᑫᔮᐱ ᑕᔥ ᑮᐊᓂ ᓂᑖᐎᑭᐗᓐ ᑸᐎᓭᓴᓐ, ᔒᓬᐊ Shelah ᓴ ᐅᑮ ᐃᔑᓂᑳᓈᐙᓐ᙮

6ᒎᑕ ᓴ ᑕᔥ ᐅᑮ ᐅᑎᓇᒪᐙᓐ ᓂᑕᒻ ᐅᑯᓯᓴᓐ ᐁᕒ ᐁᔑᓂᑳᓱᓂᒡ, ᐃᑴᐗᓐ ᑫᐐᐎᓂᒡ ᑌᒫᕒ Tamar ᐁᔑᓂᑳᓱᓂᒡ᙮ 7ᐊᐊ ᑕᔥ ᐁᕒ ᑮᒪᒋᐃᔑᐌᐱᓯ᙮ ᑳᐐᓐ ᐅᑮ ᒥᓍᐸᒥᑯᓰᓐ ᑳᑎᐯᒋᑫᓂᒡ, ᒦᔥ ᑳᑮ ᓂᓯᑯᒡ᙮ 8ᒦᑕᔥ ᒎᑕ ᑳᑮᐃᓈᒡ ᐃᓂ ᑯᑕᒃ ᐅᑯᓯᓴᓐ ᐆᓇᓐ ᐁᔑᓂᑳᓱᓂᒡ, ᒫᒑᓐ ᐊᐎ ᐐᐯᒥᒻ ᑮᒋᑭᐌᓯ ᐐᐗᓐ ᒋᑑᑕᐗᒡ ᐊᐊ ᐃᑴ ᐋᓃᓐ ᑫᑮ ᐃᔑᒋᑫᐃᑯᐸᓐ ᐐᓂᒨᓐ ᒋᓂ ᐊᔮᐙᒡ ᐊᐱᓅᒌᔕᐞ ᑫᓂ ᓂᑖᐎᑭᓂᒡ, ᑮᒋᑭᐌᓯ ᒋᓂ ᐊᔮᓂᒡ ᐅᐲᐌᓰᒪᐞ᙮ 9ᐆᓇᓐ ᐃᑕᔥ ᐅᑮ ᑭᑫᑖᓐ ᒋᑎᐱᓇᐌᐎᓯᓯᒃ ᐃᐃ ᐊᐱᓅᒌᔕᐞ ᑫᓂ ᓂᑖᐎᑭᓂᒡ᙮ ᒦᔥ ᐁᑕᓯᕽ ᐁᐐᐯᒫᒡ ᐃᓂ ᐐᒋᑭᐌᓯᐗᓐ ᐐᐎᓂ ᒥᑕᑲᒥᒃ ᐃᓴ ᑮᐃᔑ ᒦᓰ ᒋᓂᑖᐎᑭᓯᓂᒃ ᐐᒋᑭᐌᓯᐗᓐ ᑫᓂ ᐅᐲᐌᓰᒥᓂᐸᓐ᙮ 10ᑳᐐᓐ ᐃᑕᔥ ᐅᑮ ᒥᓍᐸᑕᓰᓂ ᑳᑎᐯᒋᑫᓂᒡ ᐃᐃ ᑳᑮ ᑑᑕᕽ, ᒦᔥ ᑫᐐᓐ ᑳᑮ ᐅᒋ ᓂᓯᑯᒡ᙮ 11ᒦᑕᔥ ᒎᑕ ᑳᐃᓈᒡ ᐅᔒᒥᓴᓐ ᑌᒫᕒᐊᓐ, ᒫᒑᓐ ᑭᑌᑌ ᐅᑖᐎᓂᕽ ᐊᐎ ᐃᔑᑖᓐ ᐲᓂᔥ ᒋᑮᔖᐯᐎᒡ ᓂᑯᓯᔅ ᔒᓬᐊ᙮ ᑮᐙᒋᑴᕽ ᐃᓴ ᒌᔑ ᐱᒫᑎᓯᔭᓐ, ᐅᑮᐃᓈᓐ᙮ ᒦᔥ ᐃᐃ ᑌᒫᕒᐊᓐ ᑳᐃᔑᒋᑫᓂᒡ ᐅᑌᑌᑳᕽ ᒋᔑ ᑮᐌᓂᒡ᙮ ᐅᐅ ᐄᑐᒃ ᑮᐃᓀᑕᒻ ᒎᑕ, ᑫᐐᓐ ᒫᐐᓐ ᔒᓬᐊ ᑕᓂᐳ ᑖᐱᔥᑰ ᑳᑮ ᐃᔑ ᓂᐳᓂᒡ ᐐᒋᑭᐌᔭᐞ᙮

12ᑭᓉᔥ ᐃᑕᔥ ᐁᐊᓂ ᐃᔑᓭᓂᒃ, ᒎᑕ ᐐᐗᓐ ᐌᑌᑌᓂᒡ ᔔᐊᐗᓐ Shua ᑮᐃᔥᒀ ᐱᒫᑎᓯᐗᓐ᙮ ᐊᐲ ᐃᑕᔥ ᑳᐃᔥᒀ ᒫᓀᑕᕽ ᐌᑎ ᑎᒻᓇ Timnah ᐆᑌᓈᕽ ᑮᐃᔖ ᐁᔑ ᒪᓇᑐᐌᔓᒥᓐᒡ ᒫᓇᒑᓂᔕᐞ᙮ ᐃᓂ ᓴ ᐅᓵᑭ ᐐᒌᐙᑲᓇᓐ ᐋᐃᕒᐊ ᐁᔑᓂᑳᓱᓂᒡ ᐌᒌᓂᒡ ᐌᑎ ᐆᑌᓈᕽ ᐋᑕᓬᐊᒻ ᐁᒋᑳᑌᓂᒃ ᐅᑮ ᐐᒌᐎᑰᓐ᙮ 13ᑌᒫᕒ ᐃᑕᔥ ᑮᐐᑕᒪᐙ, ᑭᔑᔐᔥ ᐄᓴᓐ ᐃᔖ ᐌᑎ ᑎᒻᓇ ᐆᑌᓈᕽ ᐁᐊᑕᐎ ᒪᓇᑐᐌᔣᒡ ᐅᒫᓇᒑᓂᔑᒪᐞ᙮ 14ᑌᒫᕒ ᐃᓴ ᑕᔥ ᐅᑮ ᑮᒋᑯᔥᑳᓇᓐ ᑮᐙᒋᑴᐎ ᑭᑭᔥᑭᑲᓇᓐ ᐁᑮ ᒣᔥᑯᒋᑯᓇᔦᒡ᙮ ᒦᔥ ᑳᐃᔑ ᐱᓯᑲᕽ ᐋᑲᐐᑴᐅᓐ ᒋᑭᑫᒋᑲᓂᐎᓯᒃ᙮ ᐃᐃᒫᔥ ᑮᐃᔑ ᐅᓇᐱ ᐁᓂᔑ ᐲᑎᑫᕽ ᐆᑌᓈᕽ ᐄᓀᐃᒻ Enaim ᐁᒋᑳᑌᓂᒃ ᐁᔮᓂᒃ ᐁᓇᒧᓂᓂᒃ ᐌᑎ ᑎᒻᓇ᙮ ᑳᐐᓐ ᐄᑐᒃ ᒪᔑ ᑮᒦᓈᑲᓂᐎᓰ ᒋᐐᑎᑫᒥᑯᒡ ᔒᓬᐊᐗᓐ᙮

15ᐊᐲ ᑕᔥ ᒎᑕ ᐗᔮᐸᒫᒡ, ᐱᔑᒀᒋᑴ ᐊᐊᐌ, ᑮᐃᓀᑕᒻ, ᐋᓃᔥ ᑮᐋᑲᐐᑴᐅᐗᓐ᙮ 16ᒦᔥ ᑳᐃᔑ ᐊᑕ ᐙᐸᒫᒡ ᐁᔑᐊᔮᓂᒡ ᐸᑫᑲᓇ ᐁᑮᐃᓈᒡ, ᑕᑲ ᐸᑭᑎᓂᔑᓐ ᒋᐐᐯᒥᓈᓐ᙮ ᑳᐐᓐ ᐄᑐᒃ ᐅᑮ ᑭᑫᓂᒫᓰᓐ ᐃᓂ ᐁᐅᔒᒥᓯᒡ᙮

ᒦᔥ ᐅᐅ ᑳᐃᑯᒡ, ᐌᑯᓀᓐ ᐃᑕᔥ ᑫᒦᔑᔭᐸᓐ ᒋᐐᐯᒥᓈᐹᓐ?

17ᒦᔥ ᑳᐃᓈᒡ, ᐅᔥᑭ ᐊᔮᐯ ᒫᓇᑎᒃ ᐃᓴ ᑭᑲ ᒦᓂᓐ ᒋᐅᑎᓇᒃ ᐁᔑ ᐅᑸᓄᐙᒡ ᓂᒫᓇᑎᑾᒃ᙮

ᒦᔥ ᑳᐃᑯᒡ, ᑫᑰᓐ ᐃᓇ ᑭᑖ ᒦᔥ ᑫᐅᒋ ᑫᒋᓈᐁᑕᒫᓐ ᒋᑆ ᐲᒋᓂᔕᐗᒡ ᐊᐊ ᒫᓇᑎᒃ᙮

18ᐌᑯᓀᓐ ᑕᔥ ᑫᒦᓂᓈᓐ ᑫᐅᒋ ᑫᒋᓈᐁᑕᒪᓐ? ᐅᑮᐃᓈᓐ᙮

ᒦᔥ ᑳᐃᔑ ᓇᑴᑖᑯᒡ, ᐃᐃ ᑭᑭᑭᓇᐙᒋᐅᓐ ᑳᔑᓅᑖᑲᓂᑲᑌᒃ, ᐃᐃ ᑲᔦ ᑭᓴᑲᐅᓐ ᑳᑕᑯᓇᒪᓐ, ᐅᑮᐃᑰᓐ᙮ ᒦᔥ ᑳᐃᔑ ᒦᓈᒡ ᐁᑮ ᐐᐯᒫᒡ᙮ ᒦᑕᔥ ᑳᑮ ᑭᑭᔥᑲᐙᐗᓱᓂᒡ᙮ 19ᒦᔥ ᑌᒫᕒ ᑳᐃᔑ ᑮᐌᒡ ᐁᑮ ᑮᒋᑯᔥᑲᕽ ᐅᑖᑲᐐᑴᐅᓐ ᐁᑮ ᐱᓯᑲᕽ ᐃᑕᔥ ᒦᓇᐙ ᑮᐙᒋᑴᐎ ᑭᑭᔥᑭᑲᓇᓐ᙮

20ᒎᑕ ᓴ ᐅᑮ ᐊᓅᓈᓐ ᓭᔮᑭ ᐐᒌᐙᒡ ᐋᐃᕒᐊᐗᓐ ᒌᔑᐎᑕᐙᓂᒡ ᐃᓂ ᐊᔮᐯ ᒫᓇᑎᑾᓐ ᒋᒦᓈᓂᒡ ᐃᓂ ᐃᑴᐗᓐ ᒋᑮᐌ ᒦᓂᑯᒡ ᑳᑮ ᒦᓈᐸᓐ ᐅᑭᑭᓇᐙᒋ ᒦᑭᐙᓇᓐ᙮ ᑳᐐᓐ ᐃᑕᔥ ᐋᐃᕒᐊ ᐅᑮ ᒥᑲᐙᓰᓐ ᐃᓂ ᐃᑴᐗᓐ᙮ 21ᒦᔥ ᑳᐃᔑ ᑲᑴᒋᒫᒡ ᐃᓂᓂᐗᐞ ᐃᐃᒫ ᐁᔑᑖᓂᒡ, ᐋᑎ ᑕᔥ ᐊᐊ ᐱᔑᒀᒋᑴ ᑳᐊᔮᐸᓐ ᐸᑫᑲᓇ ᐌᑎ ᐄᓀᐃᒻ ᐆᑌᓇ᙮

ᒦᔥ ᑳᐃᑯᒡ, ᑳᐐᓐ ᐐᑳ ᐱᐅᒋ ᐊᔮᓰ ᐱᓯᒀᒋᑴ ᐅᐅᒫ᙮

22ᒦᔥ ᑳᐃᔑ ᐊᑕ ᐙᐸᒫᒡ ᒎᑕᐗᓐ ᐁᑮᐃᓈᒡ, ᑳᐐᓐ ᐅᔕᓈ ᓂᒥᑲᐙᓰ ᐊᐊ ᐃᑴ᙮ ᐃᓂᓂᐗᒃ ᐃᑕᔥ ᑲᔦ ᐌᑎ ᐁᔑᑖᐙᒡ ᐃᑭᑐᐗᒃ ᐐᑳ ᐁᐱ ᐊᔮᓯᓂᒃ ᐌᑎ ᐱᔑᒀᒋᑴᐗᓐ, ᐅᑮᐃᓈᓐ᙮

23ᒦᔥ ᐅᐅ ᒎᑕ ᑳᐃᑭᑐᒡ, ᑕᑲ ᒫᓄ ᐅᑲ ᑕᔑ ᑲᓇᐌᑖᓇᓐ ᐃᓂ ᐁᔮᒡ᙮ ᑳᐐᓐ ᑭᓇᑕᐌᑕᓰᒥᓐ ᒋᐹᐱᐃᑰᔭᕽ᙮ ᓂᑖᓇᑮ ᐃᔑᓂᔕᐙ ᐄᑐᒃ ᐗᐊ ᒫᓇᑎᒃ, ᑳᐐᓐ ᐃᑕᔥ ᑭᑮ ᒥᑲᐙᓰ, ᑮᐃᑭᑐ᙮

24ᓂᓱᑮᓯᔅ ᐃᑕᔥ ᐁᐊᓂ ᐃᔑᓭᓂᒃ ᒎᑕ ᑮᐐᑕᒪᐙ ᐁᑮᐃᓂᓐᒡ, ᐊᐊ ᑭᔒᒥᔅ ᑌᒫᕒ ᑮᐱᔑᒀᒋᑴ ᐄᓴᓐ, ᒦᔥ ᑳᐅᒋ ᑭᑭᔥᑲᐙᐗᓱᒡ᙮

ᒦᔥ ᒎᑕ ᑳᐃᑭᑐᒡ, ᓵᑭᓯᐃᒃ, ᒋᒑᑭᓱᓐᒡ ᒋᓂᐳᒡ, ᑮᐃᑭᑐ᙮

25ᐁᐱ ᓵᑭᓯᐃᓐᒡ ᐃᑕᔥ ᐊᐊ ᐃᑴ ᑮᐊᓅᑮ ᒋᐊᐎ ᐐᑕᒪᐎᒥᓐᒡ ᐅᔑᔐᔕᓐ ᒋᐃᓂᒥᓐᒡ, ᐗᐊ ᓴ ᐃᓂᓂ ᓂᑮ ᑭᑭᔥᑲᐙᐗᓲᐃᒃ ᑌᐯᑕᕽ ᐅᓄᐌᓂᐗᓐ᙮ ᑕᑲ ᑕᔥ ᐱᐙᐸᑕᓐ ᑕᑲ ᒋᑭᑫᓂᒫᐗᑗᓐ ᐊᐌᓀᓐ ᑌᐯᑕᕽ ᐅᐅ ᑭᑭᓇᐙᒋᐅᓐ ᑳᔑᓅᑖᑲᓂᑲᑌᒃ, ᐅᐅ ᑲᔦ ᓴᑲᐅᓈᒃ᙮

26ᒎᑕ ᓴ ᐅᑮ ᓂᓯᑕᐎᓈᓐ ᒦᔥ ᑳᐃᑭᑐᒡ, ᓇᐗᒡ ᐄᑐᒃ ᑾᔭᒃ ᐐᓐ ᑮᐃᔑᒋᑫ ᐊᐲᒡ ᓃᓐ᙮ ᑳᐐᓐ ᐄᑐᒃ ᓂᑮ ᐃᔑᒋᑫᑕᒪᐙᓰ ᑫᑮ ᐃᔑᒋᑫᔮᐹᓐ ᒋᑮ ᒦᓇᑭᐸᓐ ᓂᑯᓯᓴᓐ ᔒᓬᐊᐗᓐ Shelah ᒋᐅᓈᐯᒥᒡ᙮ ᑳᐐᓐ ᐃᑕᔥ ᒦᓇᐙ ᒎᑕ ᐅᑮ ᐅᒋ ᐐᐯᒫᓰᓐ ᐃᓂ ᐃᑴᐗᓐ᙮

27ᐌᒋᒋᓭᓂᒃ ᐃᓴ ᐊᐲ ᒋᓂᑖᐎᑭᓈᐗᓱᒡ, ᑮᑭᑫᓂᒫ ᓃᔓᐅᑌᐞ ᐄᓴᓐ ᐁᐊᔮᐙᒡ᙮ 28ᒣᒀ ᑕᔥ ᐁᓂᑖᐎᑭᓈᐗᓱᒡ, ᐯᔑᒃ ᐄᓴᓐ ᑮᐸᐱᓂᑫᓂᐗᓐ᙮ ᒦᔥ ᐃᓂ ᐄᓴᓐ ᐌᑖᐱᓈᐗᓱᓂᒡ ᑳᑮ ᑕᑯᐱᓈᓂᒡ ᒣᔅᑯᓯᓂᒡ ᑲᔥᑭᒀᒋᑲᓀᔮᐲᓐ ᐅᓂᑭᓂᕽ ᐁᑮ ᐃᑭᑐᓂᒡ, ᒦ ᓴ ᐗᐊ ᓂᑕᒻ ᓀᑖᐎᑭᒡ᙮ 29ᒦᔥ ᐄᓴᓐ ᑳᐃᔑ ᐅᒋᓂᑫᐸᓂᐅᓂᒡ, ᐃᓂᔥ ᐄᓴᓐ ᐐᒋᑭᐌᔭᓐ ᓂᑕᒻ ᑮᓂᑖᐎᑭᐗᓐ᙮ ᒦᔥ ᐅᐅ ᐌᑖᐱᓈᐗᓱᒡ ᑳᐃᑭᑐᒡ, ᒦᐄᓴᓐ ᐃᐃ ᓇᑫ ᐁᔑ ᓵᑭᒋᐸᓂᐅᔭᓐ! ᐲᕒᐁᔅ#38.29 ᐲᕒᐁᔅ: ᐃᐃᐌ ᐃᔑᓂᑳᓱᐎᓐ ᐲᕒᐁᔅ ᑳᐃᒋᑳᑌᒃ, ᓵᑭᒋᐸᓂᐅᐎᓐ, ᒦ ᐃᐌ ᐁᓂᑖᑾᓂᓂᒃ ᑳᐃᔑᑮᔗᐙᒡ ᐄᐸᕒᐆᐗᒃ᙮ Perez ᐃᑕᔥ ᐅᑮ ᐃᔑᓂᑳᓈᓐ᙮ 30ᐃᓂ ᑕᔥ ᐐᒋᑭᐌᔭᓐ ᑮᓂᑖᐎᑭᐗᓐ ᑌᑯᐱᓱᓂᒡ ᐅᓂᑭᓂᕽ ᒥᔅᑯ ᑲᔥᑭᒀᒋᑲᓀᔮᐲᓐ᙮ ᓰᕒᐊ#38.30 ᓰᕒᐊ: ᐃᐃᐌ ᐃᔑᓂᑳᓱᐎᓐ ᓰᕒᐊ ᑳᐃᒋᑳᑌᒃ, ᑳᐱ ᒥᔅᒀᑌᒃ, ᒦ ᐃᐌ ᐁᓂᑖᑾᓂᓂᒃ ᑳᐃᔑᑮᔗᐙᒡ ᐄᐸᕒᐆᐗᒃ᙮ Zerah ᓴ ᑮᐃᔑ ᐐᓱᐗᓐ᙮

Currently Selected:

ᒉᓂᓯᔅ 38: OJBS

Highlight

Copy