ᒉᓂᓯᔅ 24

ᐋᐃᓯᒃ ᑮᐅᓈᐸᒥᒥᓐᒡ ᑫᐐᐎᒡ

1ᐋᔕ ᑕᔥ ᐁᐸᕒᐊᐋᒻ Abraham ᐐᑫ ᑮᐊᑭᐌᓰᐎ, ᐁᑮ ᑭᒋ ᑕᓱ ᐱᐴᓉᒡ; ᑳᑎᐯᒋᑫᓂᒡ ᐃᑕᔥ ᒥᓯᐌ ᐃᓇᑫ ᐅᑮ ᐃᔑ ᔕᐌᓂᒥᑰᓐ᙮ 2ᒦᑕᔥ ᐁᐸᕒᐊᐋᒻ ᑳᐃᓈᒡ ᐅᑕᓄᑮᐋᑲᓇᓐ ᒫᐗᒡ ᑳᑮ ᓴᓰᑭᓯᓂᒡ ᑳᑮ ᓈᑲᒋᑑᓂᒡ ᑲᑭᓇ ᐅᑕᔭᐄᒪᓐ, ᑕᑲ ᐃᔑ ᓂᒌᓂᓐ ᔒᐹ ᐃᐃᒫ ᓂᒻᑆᒥᕽ᙮#24.2 ᑕᑲ ᐃᔑ ᓂᒌᓂᓐ ᔒᐹ ᐃᐃᒫ ᓂᒻᑆᒥᕽ: ᒦ ᓴ ᐃ ᑳᑑᑕᒧᐙᒡ ᑫᑰᓐ ᑮᐐ ᐊᐱᒧᐙᒡ ᑫᒋᓈᒡ ᐃᑯ ᒋᐲᑯᓂᑳᑌᓯᓂᓂᒃ᙮ 3ᑭᓇᑕᐌᓂᒥᓐ ᒋᐊᐱᒧᔭᓐ ᑳᑎᐯᒋᑫᒡ, ᑭᔐᒪᓂᑑ ᑌᐯᑕᕽ ᑮᔑᒃ, ᐊᑮᓂ ᑲᔦ, ᒋᐅᑎᓂᒫᓯᐗᒡ ᓂᑯᓯᔅ ᑫᐐᐎᒡ ᐃᑴᐗᓐ ᒋᐅᒌᓂᒡ ᐃᐃᒫ ᐁᔑᐊᔮᓂᒡ ᑫᓇᓐ ᑳᐅᒌᓂᒡ, ᐅᑯ ᒣᑴᔭᐄ ᑳᐐᒋᑖᒥᒪᒃ᙮ 4ᐌᑎ ᑕᔥ ᐃᔖᓐ ᓂᑕᑮᒥᕽ, ᓂᑎᓇᐌᒫᑲᓇᒃ ᑳᐃᔑᐊᔮᐙᒡ᙮ ᒦᑕᔥ ᐌᑎ ᑫᐅᑎᓂᒪᒡ ᑫᐐᐎᒡ ᐋᐃᓯᒃ Isaac ᓂᑯᓯᔅ, ᐅᑮᐃᓈᓐ᙮

5ᐅᐅ ᑕᔥ ᐅᑮᐃᑰᓐ ᐅᑕᓄᑮᐋᑲᓇᓐ, ᑮᔥᐱᓐ ᑕᔥ ᐐᓐ ᐊᐊ ᐃᑴ ᐐᐱᔑ ᑮᐌ ᐐᒌᐎᓯᒃ ᐅᐅᒫ ᐊᑮᕽ; ᓂᑲ ᐃᔑᐎᓈ ᓇ ᑭᑯᓯᔅ ᐌᑎ ᐊᑮᕽ ᑳᑮ ᐱ ᐅᒌᔭᓐ, ᐅᑮᐃᑰᓐ᙮

6ᐁᐸᕒᐊᐋᒻ ᑕᔥ ᐅᑮ ᐃᔑ ᓇᑴᑕᐙᓐ, ᑫᒋᓈᒡ ᐃᑯ ᐃᔑᒋᑫᓐ ᒌᔑ ᑮᐌᐎᓈᓯᐗᒡ ᐌᑎ ᓂᑯᓯᔅ᙮ 7ᑳᑎᐯᒋᑫᒡ, ᑌᐯᑕᕽ ᑮᔑᒃ, ᓂᑮ ᐅᒋ ᓵᑭᒋ ᐊᑐᒥᒃ ᓂᑌᑌᓐ ᐅᑖᐎᓂᓃᕽ, ᐊᑮᕽ ᑲᔦ ᑳᑮ ᑕᔑ ᓂᑖᐎᑭᐗᒃ᙮ ᐅᐅ ᑕᔥ ᓂᑮᐃᒃ ᑮᐊᔓᑕᒪᐎᒡ ᑮᐊᐱᒧᒡ, ᑭᐲᐌᓰᒪᒃ ᓴ ᓂᒦᓈᒃ ᐅᐅ ᐊᑮᓂ᙮ ᒦ ᓴ ᐊᐌ ᑳᑎᐯᒋᑫᒡ ᑫᐃᔑᓂᔕᐙᒡ ᐅᑌᒐᓬᐃᒪᓐ ᒋᓃᑳᓃᑕᒪᐎᒥᒃ, ᐌᑎ ᐃᔑ ᓈᓯᑲᐎᒪᒡ ᓂᑯᓯᔅ ᑫᐐᐎᒡ᙮ 8ᑮᔥᐱᓐ ᑕᔥ ᐐᓐ ᐃᓀᑕᓯᒃ ᐊᐊ ᐃᑴ ᒋᐱᑮᐌ ᐐᒌᐎᒃ, ᒦ ᐃ ᐄᓴᓐ ᒋᐴᓂᓭᒃ ᐃᐃ ᓂᑕᐱᒧᐎᓐ᙮ ᑫᑯ ᑕᔥ ᐌᑎ ᐃᔑ ᑮᐌᐎᓈᑫᓐ ᐊᐊ ᓂᑯᓯᔅ, ᐅᑮᐃᓈᓐ᙮ 9ᐊᐊ ᑕᔥ ᐊᓄᑮᐋᑲᓐ ᑮᐃᔑ ᓂᒌᓂ ᔒᐹ ᐅᑆᒥᓃᕽ ᐅᑑᑭᒫᒪᓐ ᐁᐸᕒᐊᐋᒪᓐ, ᐁᑮ ᐊᐱᒧᒡ ᒋᑑᑕᕽ ᑳᑮᐃᑯᒡ ᒌᔑᒋᑫᒡ᙮

10ᒦᑕᔥ ᐊᐊ ᐊᓄᑮᐋᑲᓐ ᑳᐃᔑ ᐅᑖᐱᓈᒡ ᒥᑖᓱ 10 ᐅᐱᒀᐎᑲᓀ ᒥᑕᑎᒨᒥᓂ ᐅᑑᑭᒫᒪᓐ, ᐁᑮ ᒫᒑᒡ᙮ ᐅᑮ ᒫᒌᑑᓇᓐ ᑲᔦ ᐯᐸᑳᓂ ᑫᑰᓇᓐ ᐌᓂᔑᔑᓂᓂᑭᓐ᙮ ᑮᐃᔖ ᑕᔥ ᒣᓱᐳᑌᒥᔭ Mesopotamia ᐊᑮᕽ, ᑭᒋ ᐆᑌᓈᕽ ᑳᑮ ᐃᔑᑖᓂᒡ ᓀᐅᕒᐊᓐ Nahor᙮ 11ᐊᐲ ᑕᔥ ᐌᑎ ᑌᑯᔑᕽ ᐅᑮ ᐅᔑᔑᒫᐞ ᐱᒀᐎᑲᓀ ᒥᑕᑎᒨᐞ ᐅᑕᐃᐹᓂᕽ ᓵᑭᒋ ᐆᑌᓇ ᑳᑮ ᐊᔮᓂᒃ᙮ ᐋᔕ ᑕᔥ ᑮᐊᓂ ᐅᓈᑯᔑᓂᓂ, ᐊᐲ ᐃᑴᐗᐞ ᑮᓂᑖ ᐱ ᓈᑕᐃᐲᓂᒡ᙮ 12ᒦᑕᔥ ᑳᐃᔑ ᐊᓇᒥᐋᒡ, ᐆ ᑌᐯᒋᑫᔭᓐ, ᐌᑭᔐᒪᓂᑑᒥᒃ ᓂᑑᑭᒫᒻ ᐁᐸᕒᐊᐋᒻ, ᑕᑲ ᒥᓄᓭᐃᔑᓐ ᓅᑯᒻ ᑳᑮᔑᑲᒃ, ᓈᑯᑑᓐ ᐁᒥᓄᑑᑕᐗᒡ ᓂᑑᑭᒫᒻ ᐁᐸᕒᐊᐋᒻ᙮ 13ᐃᓇᔥᑫ ᐅᐅᒫ ᓂᓃᐸᐤ ᐅᑕᐃᐹᓂᕽ, ᐃᑭ ᑕᔥ ᐅᔥᑭᓃᑭᑴᐗᒃ ᐆᑌᓈᕽ ᐌᒌᐙᒡ, ᐋᔕ ᐱᓵᑲᐊᒨᒃ ᐁᐱ ᓈᑕᐃᐲᐙᒡ᙮ 14ᐅᐅ ᓴ ᐯᔑᒃ ᓂᑲ ᐃᓈ, ᑕᑲ ᓃᓯᓇᓐ ᑭᑕᑑᐸᓐ ᒋᒥᓂᑴᔮᓐ, ᑮᔥᐱᓐ ᐃᑕᔥ ᐃᔑᒡ, ᐱᓵᓐ ᒥᓂᑴᓐ, ᓂᑲ ᒥᓇᐋᒃ ᑲᔦ ᑭᐱᒀᐎᑲᓀ ᒥᑕᑎᒨᒪᒃ, ᑕᑲ ᒦ ᐊᐌ ᑫᐋᐎᒡ ᑳᐅᓈᐸᒥᒪᒡ ᒋᐐᐎᒡ ᑭᑕᓄᑮᐋᑲᓐ ᐋᐃᓯᒃ; ᒦᑕᔥ ᐃᐃᒫ ᑫᐅᒋ ᑭᑫᑕᒫᓐ ᐁᓈᑯᑖᐗᒡ ᐁᒥᓄᑑᑕᐗᒡ ᓂᑑᑭᒫᒻ, ᑮᐃᔑ ᐊᓇᒥᐋ᙮

15ᒋᑆ ᑕᔥ ᑮᔑ ᐊᓇᒥᐋᒡ, ᐃᑴᐗᓐ ᐅᕒᐃᐯᑲᐗᓐ Rebekah ᑮᐱ ᑕᑯᔑᓐ ᐅᑎᓂᒫᑲᓂᓃᕽ ᐁᐱᒥᐎᑑᓂᒡ ᐊᑑᐹᓐ᙮ ᐅᑌᑌᓐ ᑕᔥ ᐊᐊ ᐃᑴ ᐯᑦᔪᐁᓬ Bethuel ᑮᐃᔑᓂᑳᓱᐗᓐ᙮ ᐆᑯᒪᓐ ᐃᑕᔥ ᒥᓬᑲ Milcah ᑮᐃᔑᓂᑳᓱᐗᓐ, ᐅᒥᔔᒥᓴᓐ ᐃᑕᔥ ᓀᐅᕒ Nahor ᑮᐃᔑᓂᑳᓱᐗᓐ᙮ ᐁᐸᕒᐊᐋᒻ ᐄᑐᒃ ᑮᐐᒋᑭᐌ ᓀᐅᕒᐊᓐ᙮ 16ᐃᓂ ᑕᔥ ᐃᑴᐗᓐ ᐐᑫ ᑮᒥᓄᓈᑯᓯᐗᓐ, ᑮᐯᑭ ᐅᔥᑭᓃᑭᑴᐎᐗᓐ#24.16 ᐯᑭᐅᔥᑭᓃᑭᑴ: ᒦ ᓴ ᐗᐊ ᑎᓄ ᐃᑴ ᒪᔑ ᑳᐸᐹᒣᓂᒥᑯᓯᒃ ᐃᓂᓂᐗᓐ᙮ ᑲᔦ ᒪᔑ ᐐᑳ ᐃᓂᓂᐗᓐ ᐁᑮ ᐐᐯᒥᑯᓯᓂᒃ᙮ ᑮᓃᓵᑕᐌᐗᓐ ᑕᔥ ᐁᔑ ᒨᑭᒋᐗᓂᓂᒃ ᓂᐱ, ᐁᑮ ᒨᔥᑭᓀᐸᑑᓂᒡ ᐊᑑᐹᓐ, ᒦᓇᐙ ᑕᔥ ᐁᑮ ᐱ ᐊᒀᑕᐌᓂᒡ᙮ 17ᐊᓄᑮᐋᑲᓐ ᑕᔥ ᑮᐊᐸᑑ ᐁᐊᑕ ᓇᑭᔥᑲᐙᒡ ᐃᓂ ᐃᑴᐗᓐ ᐁᑮᐃᓈᒡ, ᑕᑲ ᐸᑮ ᑭᑕᑑᐹᓂᕽ ᐅᒋ ᒥᓇᐃᔑᓐ, ᐅᑮᐃᓈᓐ᙮

18ᒦᔥ ᑳᐃᑯᒡ, ᓂᑑᑭᒫᒻ, ᐱᓵᓐ ᒥᓂᑴᓐ, ᐅᑮᐃᑰᓐ᙮ ᒦᔥ ᑳᐃᔑ ᓃᓯᓇᒥᓂᒡ ᐅᑕᑑᐹᓂᓂ ᐁᑮ ᒥᓇᐃᑯᒡ᙮ 19ᑳᐃᔥᒀ ᒥᓂᑴᒡ ᑕᔥ ᐅᐅ ᐅᑮᐃᑰᓐ, ᓂᑲ ᒥᓇᐋᒃ ᑲᔦ ᑭᐱᒀᐎᑲᓀ ᒥᑕᑎᒨᒪᒃ, ᐲᓂᔥ ᒌᔥᒀ ᒥᓂᑴᐙᒡ, ᐅᑮᐃᑰᓐ᙮ 20ᒦᑕᔥ ᑳᐃᔑ ᒑᑭ ᓰᑭᓇᒥᓂᒡ ᐅᓂᐲᒥᓂ ᐃᐃᒫ ᐌᑖᑲᒪᒋᑫᓂᒡ ᐊᔭᐋᐎᔕᐞ᙮ ᒦᔥ ᑳᐃᔑ ᓃᓵᑕᐌᓂᒡ ᒦᓇᐙ ᐁᓈᑕᐃᐲᓂᒡ, ᐲᓂᔥ ᑲᑭᓇ ᐁᑮ ᒥᓇᐋᓂᒡ ᐅᐱᒀᐎᑲᓀ ᒥᑕᑎᒨᒪᐞ᙮ 21ᐊᐊ ᑕᔥ ᐃᓂᓂ ᐅᑮ ᑭᒋ ᑲᓇᐙᐸᒫᓐ ᐁᑮ ᓅᑖᑎᓯᒃ, ᐁᐐ ᑭᑫᑕᕽ ᑕᑲ ᑳᑎᐯᒋᑫᓂᒡ ᑳᒥᓄᓭᐃᑰᑴᓐ ᐅᐅ ᑳᑮ ᐲᔖᒡ᙮

22ᐊᐲ ᑕᔥ ᑳᐃᔥᒀ ᒥᓂᑴᓂᒡ ᐱᒀᐎᑲᓀ ᒥᑕᑎᒨᐞ, ᐊᓄᑮᐋᑲᓐ ᐅᑮ ᐅᑖᐱᓈᓐ ᐅᓵᐎ ᔔᓂᔮ ᐙᐱᑯᐎ ᐅᔕᑾᓀ ᓈᐱᔥᑭᑲᓇᓐ ᑳᑮ ᐋᑾᑭᓱᓂᒡ, ᓃᔑᓐ ᑲᔦ ᑭᒋ ᐅᓵᐎ ᔔᓂᔮ ᐙᐱᑯᐎ ᓈᐱᓂᑳᒋᑲᓇᐞ᙮ 23ᒦᑕᔥ ᑳᐃᓈᒡ, ᑕᑲ ᐐᑕᒪᐎᔑᓐ, ᐊᐌᓀᓐ ᐌᑖᓂᓯᒥᒃ᙮ ᑕᐙ ᓇ ᑭᑌᑌ ᐅᐙᑳᐃᑲᓂᕽ ᑫᔑ ᓂᐹᔮᑭᐸᓐ? ᐅᑮᐃᓈᓐ᙮

24ᐅᐅ ᑕᔥ ᐅᑮᐃᑰᓐ, ᓃᓐ ᓴ ᐯᑦᔪᐁᓬ ᐅᑖᓂᓴᓐ᙮ ᓂᑌᑌ ᑕᔥ ᐅᒫᒫᓐ ᒥᓬᑲ ᐃᔑᓂᑳᓱᐗᓐ᙮ ᐅᑌᑌᓐ ᑕᔥ ᓀᐅᕒ ᐃᔑᓂᑳᓱᐗᓐ, ᐅᑮᐃᑰᓐ᙮ 25ᐅᐅ ᑕᔥ ᐅᑮ ᐊᓂᐃᑰᓐ, ᓂᐹᑏᓇᑑᒥᓐ ᐅᔕ ᒪᔥᑯᓯᐗᓐ, ᐊᔭᐋᐎᔑᒦᒋᒻ ᑲᔦ, ᓂᑕᔮᒥᓐ ᑲᔦ ᑫᔑ ᓂᐯᐃᑰᔭᓐ, ᐅᑮᐃᑰᓐ᙮

26ᐊᓄᑮᐋᑲᓐ ᑕᔥ ᑮᐅᒋᒌᑾᓇᐲᑖ, ᐁᑮ ᐊᓇᒥᐁᑕᐙᒡ ᑭᔐᒪᓂᑑᓐ, 27ᐅᐅ ᐁᑮ ᐃᑭᑐᒡ, ᑕᒦᑴᒋᐌᑖᑯᓯ ᑳᑎᐯᒋᑫᒡ, ᑳᐅᑭᔐᒪᓂᑑᒥᒡ ᓂᑑᑭᒫᒻ ᐁᐸᕒᐊᐋᒻ᙮ ᑳᐐᓐ ᓴ ᐅᐴᓂ ᒥᓄᑑᑖᑯᓰᓐ, ᑌᐺ ᑲᔦ ᐅᑑᑖᑰᓐ ᐃᐃ ᑳᑮᐃᑯᒡ᙮ ᒪᔮ ᓴ ᑕᔥ ᐃᑯ ᓃᓐ ᑳᑎᐯᒋᑫᒡ ᓂᑮ ᐱ ᐃᔑᐎᓂᒃ ᐁᔑᐊᔮᓂᒡ ᓂᑑᑭᒫᒪᓐ ᐅᑎᓇᐌᒫᑲᓂᓂ᙮

28ᐊᐊ ᑕᔥ ᐃᑴ ᑮᐊᐸᑑ ᐅᒫᒫᓐ ᐅᐙᑳᐃᑲᓂᓃᕽ ᐁᑮ ᐐᑕᒪᐙᒡ ᑲᑭᓇ ᑳᑮ ᐃᔑᓭᓂᒃ᙮ 29ᐊᐊ ᑕᔥ ᐃᑴ ᐅᕒᐃᐯᑲ Rebekah ᐅᑮ ᐊᔮᐙᓐ ᐅᑕᐌᒫᓐ ᓬᐁᐸᓐ Laban ᐁᑮ ᐃᔑᓂᑳᓱᓂᒡ᙮ ᑮᐊᐸᑑᐗᓐ ᑕᔥ ᐅᑕᐃᐹᓂᕽ ᐁᔑᐊᔮᓂᒡ ᐃᓂ ᐊᓄᑮᐋᑲᓇᓐ᙮ 30ᔐᒫᒃ ᐄᓴᓐ ᐃᑯ ᐊᐲ ᐁᐙᐸᒥᑯᒡ ᐅᑕᐌᒫᓐ ᐁᑭᑭᔥᑲᐙᒡ ᐅᔕᑾᓀ ᓈᐱᔥᑭᑲᓇᓐ, ᓈᐱᓂᑳᒋᑲᓇᐞ ᑲᔦ, ᐁᑮ ᓅᑖᑯᒡ ᑲᔦ ᐁᑎᐹᒋᒫᒡ ᐃᓂ ᐃᓂᓂᐗᓐ, ᔐᒫᒃ ᐅᑮ ᐊᑕ ᐙᐸᒫᓂ᙮ ᐅᑮ ᒥᑲᐙᓂ ᑕᔥ ᐁᓇᓃᐸᐎᓂᒡ ᐁᔑᐊᔮᓂᒡ ᐱᒀᐎᑲᓀ ᒥᑕᑎᒨᐞ ᒌᑭ ᐅᑕᐃᐹᓂᕽ᙮ 31ᐅᐅ ᑕᔥ ᐅᑮᐃᓈᓂ, ᐱᑮᐌ ᐐᒌᐎᔑᓐ, ᑮᓐ ᑳᔕᐌᓂᒥᒃ ᑳᑎᐯᒋᑫᒡ! ᐌᑯᓀᓐ ᐅᐅᒫ ᐊᑾᒌᕽ ᐌᒋ ᓃᐸᐎᔭᓐ? ᓂᑮ ᑾᔮᒋᑑᓐ ᐅᔕ ᐙᑳᐃᑲᓐ, ᑫᔑᐊᔮᐙᒡ ᑲᔦ ᐱᒀᐎᑲᓀ ᒥᑕᑎᒨᒃ, ᑮᐃᑭᑐᐗᓐ᙮

32ᐊᐊ ᑕᔥ ᐊᓄᑮᐋᑲᓐ ᑮᐲᑎᑫ ᐃᐃᒫ ᐙᑳᐃᑲᓂᕽ᙮ ᐃᓂ ᑕᔥ ᐐᓐ ᓬᐁᐸᓐ ᐁᔑᓂᑳᓱᓂᒡ ᐅᑮ ᑮᒋᐗᓀᐋᓂ ᐱᒀᐎᑲᓀ ᒥᑕᑎᒨᐞ, ᐁᑮ ᒦᓈᓂᒡ ᒪᔥᑯᓯᐗᓐ, ᐁᑮ ᐊᔕᒫᓂᒡ ᑲᔦ᙮ ᓂᐲᓂ ᓴ ᐁᐸᕒᐊᐋᒻ ᐅᑕᓄᑮᐋᑲᓇᓐ ᑮᐲᑕᒪᐙ, ᐃᐃ ᑲᔦ ᐅᑎᓂᓃᒪᐞ ᒋᑭᓰᐲᑭᓯᑌᓂᒡ᙮ 33ᐊᐲ ᑳᐊᒋᑳᑌᓂᒃ ᒦᒋᒻ ᐁᓈᓴᒪᐱᒡ ᒋᐐᓯᓂᒡ, ᒦ ᐃ ᑳᑮ ᐃᑭᑐᒡ, ᑳᐐᓐ ᓂᐐ ᐐᓯᓂᓰ, ᐹᓂᒫ ᑮᐃᔥᒀ ᐐᑕᒪᐎᓇᑰᒃ ᐅᐅ ᑳᐐ ᐃᑭᑐᔮᓐ, ᑮᐃᑭᑐ᙮

ᓬᐁᐸᓇᓐ ᑕᔥ ᐅᑮᐃᑰᓐ, ᐐᑕᒪᐎᔑᓈᒻ᙮

34ᐅᐅ ᑕᔥ ᑮᐃᑭᑐ, ᓃᓐ ᐅᔕ ᐁᐸᕒᐊᐋᒻ ᐅᑕᓄᑮᐋᑲᓇᓐ! 35ᑳᑎᐯᒋᑫᓂᒡ ᐅᔕ ᓂᑑᑭᒫᒻ ᐅᑭᒋ ᒥᓄᓭᐃᑰᓐ, ᐁᑮ ᐃᔑᐃᑯᒡ ᒋᐌᓅᑎᓯᒡ᙮ ᐅᑮ ᒦᓂᑯᓐ ᒫᓇᒑᓂᔕᐞ, ᐱᔑᑭᐗᐞ, ᐱᒀᐎᑲᓀ ᒥᑕᑎᒨᐞ, ᒫᔑᒥᑕᑎᒨᐞ ᑲᔦ᙮ ᐅᑮ ᒦᓂᑯᓐ ᑲᔦ ᐙᐹᐱᑯ ᔔᓂᔮᓐ, ᐅᓵᐎ ᔔᓂᔮᓐ ᑲᔦ, ᐊᓄᑮᐋᑲᓇᐞ ᑲᔦ ᐁᐃᓂᓃᐎᓂᒡ, ᐁᑴᐎᓂᒡ ᑲᔦ᙮ 36ᓂᑑᑭᒫᒻ ᑕᔥ ᐐᐗᓐ ᓭᕒᐊ Sarah ᐁᔑᓂᑳᓱᓂᒡ ᐁᑭᒋ ᐊᔭᐋᐎᓂᒡ ᐅᑮ ᐊᔮᐙᓂ ᐅᑯᓯᓴᓐ᙮ ᑲᑭᓇ ᑕᔥ ᑫᑰᓐ ᐅᑮ ᒦᓈᓐ ᐁᔮᒡ ᐃᓂ ᐅᑯᓯᓴᓐ᙮ 37ᓂᑑᑭᒫᒻ ᑕᔥ ᓂᑮ ᐃᔑᐃᒃ ᒋᐊᐱᒧᐗᒃ ᐅᐅ ᐁᑮᐃᔑᒡ, ᑫᑯ ᐅᑎᓂᒫᑫᓐ ᓂᑯᓯᔅ ᑫᐐᐎᒡ ᐃᑴᐗᓐ ᒋᐅᒌᓂᒡ ᐃᐃᒫ ᑳᔑ ᐊᔮᓂᒡ ᑫᓇᓐ ᑳᐅᒌᓂᒡ ᐅᑕᑮᒥᓂᕽ ᑳᐃᔑᑖᐗᒃ᙮ 38ᐌᑎ ᓴ ᑭᑲ ᐃᔖ ᓂᑌᑌ ᑳᑮ ᐱ ᐅᒌᒡ, ᑳᔑ ᐊᔮᐙᒡ ᓂᑎᓇᐌᒫᑲᓇᒃ, ᒦᔥ ᐌᑎ ᑫᐅᑎᓂᒪᒡ ᑫᐐᐎᒡ ᓂᑯᓯᔅ᙮ 39ᐅᐅ ᑕᔥ ᓂᑮ ᐃᔑ ᑲᑴᒋᒫ ᓂᑑᑭᒫᒻ, ᑮᔥᐱᓐ ᑕᔥ ᐐᓐ ᐊᐊ ᐃᑴ ᐃᓀᑕᓯᒃ ᒋᐱ ᐐᒌᐎᒡ? ᓂᑮᐃᓈ᙮ 40ᐅᐅ ᑕᔥ ᓂᑮᐃᒃ, ᑳᑎᐯᒋᑫᒡ ᓴ ᑳᓇᐃᑕᐗᒃ ᐁᓈᓴᒦᒡ ᐅᑲ ᐃᔑᓂᔕᐙᓐ ᐅᑌᒐᓬᐃᒪᓐ ᒋᐐᒌᐎᒥᒃ ᒋᒥᓄᓭᐗᒡ ᐅᐅ ᑳᒫᒑᐗᒡ᙮ ᒦᑕᔥ ᐌᑎ ᑫᐅᑎᓂᒪᒡ ᑫᐐᐎᒡ ᓂᑯᓯᔅ ᐁᔑᐊᔮᓂᒡ ᓂᑎᓇᐌᒫᑲᓇᒃ, ᓂᑌᑌᓐ ᑲᔦ ᐅᐙᑳᐃᑲᓂᓃᕽ᙮ 41ᐊᐲ ᐅᑎᓴᑣ ᓂᑎᓇᐌᒫᑲᓇᒃ; ᒦᓂᓯᓄᐎᒀ ᑕᔥ ᐃᓂ ᐃᑴᐗᓐ, ᑳᐐᓐ ᒣᒬᒡ ᒋᑲᓇᐌᑕᒪᓐ ᐃᐃ ᓂᑕᐱᒧᐎᓐ᙮ ᒦᑕᔥ ᐃᐃ ᒋᐴᓀᓂᒥᑯᔭᓐ ᓂᑕᐱᒧᐎᓐ, ᓂᑮᐃᒃ᙮

42ᓅᑯᒻ ᑕᔥ ᑳᑮᔑᑲᒃ ᑮᐱ ᑕᑯᔑᓈᓐ ᐅᑕᐃᐹᓂᕽ, ᐅᐅ ᓂᑮᐃᑭᑦ, ᐆ ᑌᐯᒋᑫᔭᓐ, ᐅᑭᔐᒪᓂᑑᒪᓐ ᓂᑑᑭᒫᒻ ᐁᐸᕒᐊᐋᒻ, ᑮᔥᐱᓐ ᑕᔥ ᓅᑯᒻ ᐐ ᒥᓄᓭᐃᔭᓐ ᐅᐅ ᑳᐱᒥ ᐊᔮᔮᓐ᙮ 43ᐃᓇᔥᑫ, ᓂᓇᓃᐸᐤ ᐅᐅᒫ ᐅᑕᐃᐹᓂᕽ, ᑕᑲ ᒦ ᐊᐌ ᑫᐋᐎᒡ ᐃᑴ ᐅᐅᒫ ᑫᐱ ᓈᑕᐃᐲᒡ ᐅᐅ ᑫᐃᓇᒃ, ᑕᑲ ᐸᑮ ᐅᒋ ᒥᓇᐃᔑᓐ ᑭᑕᑑᐹᓂᕽ᙮ 44ᐅᐅ ᑕᔥ ᓂᑲᐃᒃ, ᐱᓵᓐ ᒥᓂᑴᓐ, ᓂᑲ ᒥᓇᐋᒃ ᑲᔦ ᑭᐱᒀᐎᑲᓀ ᒥᑕᑎᒨᒪᒃ, ᑕᑲ ᒦ ᐊᐌ ᐃᑴ ᑫᐋᐎᒡ ᑳᑎᐯᒋᑫᒡ ᑳᐅᓈᐸᑕᒪᐗᒡ ᑫᐐᐎᓂᒡ ᓂᑑᑭᒫᒻ ᐅᑯᓯᓴᓐ᙮ 45ᒋᑆ ᐃᔥᒀ ᑳᑮᑭᑐᔮᓐ ᑕᔥ ᓂᑌᐃᕽ, ᐅᕒᐃᐯᑲ Rebekah ᑮᐱ ᑕᑯᔑᓐ, ᐅᑕᑑᐹᓐ ᐁᐱᒥᐎᑑᒡ ᐅᑎᓂᒫᑲᓂᕽ᙮ ᑮᓃᓵᑕᐌ ᑕᔥ ᐅᑕᐃᐹᓂᕽ ᐁᑮ ᓈᑕᐃᐲᒡ᙮ ᐅᐅ ᑕᔥ ᓂᑮᐃᓈ, ᑕᑲ ᒥᓇᐃᔑᓐ᙮ 46ᔐᒫᒃ ᐃᑕᔥ ᐅᑮ ᓃᓯᓈᓐ ᐅᑕᑑᐹᓐ ᑳᑮ ᐱᒥᓂᑫᒡ ᐁᑮᐃᔑᒡ, ᒥᓂᑴᓐ, ᓂᑲ ᒥᓇᐋᒃ ᑲᔦ ᑭᐱᒀᐎᑲᓀ ᒥᑕᑎᒨᒪᒃ᙮ ᒦᑕᔥ ᑳᐃᔑ ᒥᓂᑴᔮᓐ, ᐁᑮ ᒥᓇᐋᒡ ᑲᔦ ᓂᐱᒀᐎᑲᓀ ᒥᑕᑎᒨᒪᐞ᙮ 47ᓂᑮ ᑲᑴᒋᒫ ᑕᔥ ᐊᐌᓀᓇᓐ ᐌᑌᑌᒡ, ᐊᐌᓀᓐ ᐌᑖᓂᓯᒥᒃ, ᐁᑮᐃᓇᒃ᙮ ᐅᐅ ᑕᔥ ᓂᑮᐃᒃ, ᓃᓐ ᓴ ᐯᑦᔪᐁᓬ Bethuel ᐅᑖᓂᓴᓐ᙮ ᓅᑯᒻ ᑕᔥ ᒥᓬᑲ Milcah ᐃᔑᓂᑳᓱ, ᓂᒥᔔᒥᔅ ᑕᔥ ᓀᐅᕒ Nahor ᐃᔑᓂᑳᓱ, ᓂᑮᐃᒃ᙮ ᒦᑕᔥ ᑳᐃᔑ ᐱᓯᑲᒧᐊᒃ ᐅᔕᑾᓀ ᓈᐱᔥᑭᑲᓇᓐ ᐅᔕᑾᓈᕽ, ᓈᐱᓂᑳᒋᑲᓇᐞ ᐃᑕᔥ ᐅᓂᑭᕽ᙮ 48ᒦᑕᔥ ᑳᑮ ᐊᓂᒥᑯᑖᔮᓐ ᐁᑮ ᐊᓇᒥᐁᑕᐗᒃ ᑳᑎᐯᒋᑫᒡ, ᐁᑮ ᒦᑴᒋᐌᓂᒥᒪᒃ ᓂᑑᑭᒫᒻ ᐁᐸᕒᐊᐋᒻ ᐅᑭᔐᒪᓂᑑᒪᓐ᙮ ᐋᓃᔥ ᑾᔭᒃ ᓂᑮ ᐃᔑᐎᓂᒥᒃ ᐁᔑᐊᔮᓂᒡ ᐅᑎᓇᐌᒫᑲᓂᓂ ᑫᐅᑎᓂᒪᒃ ᐃᑴᐗᓐ ᑫᐐᐎᓂᒡ ᐅᑯᓯᓴᓐ᙮ 49ᑮᔥᐱᓐ ᑕᔥ ᓅᑯᒻ ᐐᒥᓄᑑᑕᐗᒡ, ᑌᐺ ᑲᔦ ᐐᑑᑕᐗᒡ ᓂᑑᑭᒫᒻ, ᐐᑕᒪᐎᔑᓐ᙮ ᑮᔥᐱᓐ ᑕᔥ ᑳᐐᓐ, ᑭᑫᑕᒨᔑᔑᓐ, ᒦᔥ ᒋᑭᑫᑕᒫᓐ ᑫᐃᔑᒋᑫᔮᓐ, ᑮᐃᑭᑐ᙮

50ᓬᐁᐸᓇᓐ Laban ᑕᔥ ᐃᓂ ᑲᔦ ᐯᑦᔪᐁᓬᐗᓐ ᐅᐅ ᐅᑮ ᐃᔑ ᓇᑴᑖᑰᐞ, ᑳᐐᓐ ᐄᓴᓐ ᓃᓇᐎᓐᑦ ᐃᐃ ᓂᑖ ᐅᓀᑕᓰᒥᓐ ᐋᓃᔥ ᑳᑎᐯᒋᑫᑳᕽ ᐅᐅ ᐅᒌᒪᑲᓐ᙮ 51ᐃᓇᔥᑫ ᑕᔥ ᐗᐊ ᐅᕒᐃᐯᑲ, ᐊᓂ ᒫᒌᔥ᙮ ᑕᑲ ᐱᓵᓐ ᐅᑲ ᐐᑎᑫᒥᑰᓐ ᑭᑑᑭᒫᒻ ᐅᑯᓯᓴᓐ, ᑖᐱᔥᑰ ᑳᑎᐯᒋᑫᒡ ᑳᑮ ᐃᑭᑐᒡ, ᐅᑮᐃᑰᐞ᙮ 52ᐊᐲ ᑕᔥ ᐊᓄᑮᐋᑲᓐ ᐁᐸᕒᐊᐋᒪᓐ ᑳᑮ ᐅᑑᑭᒫᒥᒡ ᐁᓅᑕᕽ ᐅᐅ ᐁᐃᑭᑐᓂᒡ, ᒥᑕᑲᒥᒃ ᑮᐃᔑ ᐊᓂᒥᑯᑖ ᐁᓈᓴᒦᓂᒡ ᑳᑎᐯᒋᑫᓂᒡ᙮ 53ᒦᑕᔥ ᐊᐊ ᐊᓄᑮᐋᑲᓐ ᑫᑰᓐ ᑳᐙᐹᐱᑯ ᔔᓂᔮ ᐙᐱᑯᐗᓂᓂᑭᓐ, ᑳᐅᓵᐎ ᔔᓂᔮ ᐙᐱᑯᐗᓂᓂᑭᓐ ᐃᑕᔥ ᑲᔦ, ᑭᑭᔥᑭᑲᓇᓐ ᑲᔦ, ᒦᔥ ᑳᐃᔑ ᒦᓈᒡ ᐅᕒᐃᐯᑲᐗᓐ᙮ ᑫᑰᓇᓐ ᑕᔥ ᑲᔦ ᑳᐋᑾᑭᑌᓂᑭᓐ ᐅᑮ ᒦᓈᓐ ᐅᑕᐌᒫᓂ, ᐅᒫᒫᓂ ᑲᔦ᙮

54ᒦᑕᔥ ᑳᐃᔑ ᐐᓯᓂᒡ, ᐁᑮ ᒥᓂᑴᒡ ᐃᐃ ᑲᔦ ᐃᓂᓂᐗᐞ ᑳᑮ ᐐᒌᐎᑯᒡ᙮ ᑮᓂᐹᐗᒃ ᑕᔥ ᑲᔦ ᐃᒫ᙮ ᑫᔐᐹᐗᑲᓂᓂᒃ ᑕᔥ ᐁᐗᓂᔥᑳᐙᒡ ᐅᐅ ᑮᐃᑭᑐ, ᑕᑲ ᐸᑭᑎᓂᔑᒃ ᒋᓈᓯᑲᐗᒃ ᓂᑑᑭᒫᒻ, ᑮᐃᑭᑐ᙮

55ᐅᕒᐃᐯᑲ ᑕᔥ ᐅᑕᐌᒫᓐ, ᐅᒫᒫᓐ ᑲᔦ ᑮᐃᑭᑐᐗᐞ, ᑕᑲ ᓴᓈ ᐊᐊ ᐃᑴ ᓃᔣᓱᑮᔑᒃ, ᑯᒫ ᑲᔦ ᒥᑖᓱ ᑮᔑᒃ ᓂᑲ ᐐᒋᐊᔮᒥᑯᓈᓐ, ᒦᔥ ᑫᐃᔑ ᒫᒑᒡ, ᐅᑮᐃᑰᐞ᙮

56ᐅᐅ ᑕᔥ ᐅᑮᐃᓈᐞ, ᑫᑯ ᐅᑕᒦᐃᔑᑫᒃ, ᑳᑎᐯᒋᑫᒡ ᐄᑐᒃ ᓂᑮ ᒥᓄᓭᐃᒃ ᐅᐅ ᑳᑮ ᐲᔖᐗᒃ; ᑕᑲ ᐸᑭᑎᓂᔑᒃ ᐱᓵᓐ ᒋᐊᑕ ᐙᐸᒪᒃ ᓂᑑᑭᒫᒻ, ᐅᑮᐃᓈᐞ᙮

57ᒦᔥ ᑳᑮ ᐃᑭᑐᐙᒡ, ᑕᑲ ᐊᑐᒫᑖ ᐅᕒᐃᐯᑲ, ᒋᑲᑴᒋᒪᕽ ᐁᓀᑕᒧᑴᓐ᙮ 58ᐅᑮ ᐊᑐᒫᐙᓐ ᑕᔥ ᐅᕒᐃᐯᑲᐗᓐ ᐁᑮᐃᓈᐙᒡ, ᑭᑖ ᐊᓂ ᐐᒌᐙ ᓇ ᐗᐊ ᐃᓂᓂ᙮

ᒦᑕᔥ ᑳᐃᔑ ᓇᑴᑖᑯᐙᒡ, ᐁᔭᐞ, ᓂᑲᓂ ᐐᒌᐙ, ᑮᐃᑭᑐᐗᓐ᙮

59ᒦᑕᔥ ᑳᐃᔑ ᒫᒋᓂᔕᐙᓂᒡ ᐅᑕᐌᒫᓂ ᐅᕒᐃᐯᑲᐗᓐ ᐃᓂ ᐃᑴᐗᓐ ᑳᐐᒋᐃᑯᓂᒡ ᒋᐊᓂ ᐐᒌᐙᓂᒡ ᐃᓂ ᐁᐸᕒᐊᐋᒻ ᐅᑕᓄᑮᐋᑲᓂᓂ, ᐅᑖᓂᑫ ᐊᓄᑮᐋᑲᓂᒥᓂ ᑲᔦ᙮ 60ᒦᑕᔥ ᑳᐃᔑ ᔕᐌᓂᒫᓂᒡ ᐅᕒᐃᐯᑲᐗᓐ ᐅᐅ ᐁᑮᐃᓈᓂᒡ, ᑕᑲ ᑮᓐ, ᓂᑕᐌᒫᓈᓐ, ᐋᐱᒋ ᑕᓂ ᑭᒋ ᐹᑏᓄᐗᒃ ᑭᐲᐌᓰᒪᒃ᙮ ᒦᐗᒃ ᐃᑕᔥ ᑫᔖᑰᒋᑑᐙᒡ ᐆᑌᓇᐗᓐ ᐁᔑᑖᓂᒡ ᑳᔒᑫᓂᒥᑯᐙᒡ, ᐅᑮᐃᓈᓂ᙮ 61ᒦᑕᔥ ᐅᕒᐃᐯᑲ, ᐃᐃ ᑲᔦ ᐃᑴᐗᐞ ᑳᑮ ᐐᒋᐃᑯᒡ ᑳᐃᔑ ᐅᓇᐱᐙᒡ ᑳᐃᔑ ᐱᒥᐗᓈᓱᐙᒡ ᐱᒀᐎᑲᓀ ᒥᑕᑎᒨᐞ, ᐁᑮ ᐊᓂ ᑮᐌ ᐐᒌᐙᐙᒡ ᐁᐸᕒᐊᐋᒻ ᐅᑕᓄᑮᐋᑲᓂᒥᓂ᙮

62ᐋᐃᓯᒃ Isaac ᑕᔥ ᑮᐱᐅᒋ ᑕᑯᔑᓐ ᐌᑎ, ᐅᑑᑕᐃᐹᓐ ᐯᒫᑎᓯᒡ ᑳᐙᐸᒥᒡ, ᑳᑮ ᐃᒋᑳᑌᓂᒃ᙮ ᔖᐗᓄᕽ ᐃᓇᑫ ᑫᓇᓐ Canaan ᐊᑮᕽ ᓀᑫᑉ Negev ᐁᔑᓂᑳᑌᓂᒃ ᓴ ᑮᐃᔑᑖ᙮ 63ᐁᐅᓈᑯᔑᓂᓂᒃ ᑕᔥ ᐋᐃᓯᒃ ᑮᐅᓈᑯᔑ ᐸᐹᒧᓭ ᒥᔕᐗᑲᒥᒃ᙮ ᐁᐃᓈᐱᒡ ᑕᔥ ᐅᑮ ᐙᐸᒫᐞ ᐱᒀᐎᑲᓀ ᒥᑕᑎᒨᐞ ᐁᐱᓈᑯᓯᓂᒡ᙮ 64ᐊᐲ ᑕᔥ ᐅᕒᐃᐯᑲ ᐁᐙᐸᒫᒡ ᐋᐃᓯᑰᓐ, ᑮᓃᓵᑕᐌ ᐱᒀᐎᑲᓀ ᒥᑕᑎᒨᕽ᙮ 65ᒦᔥ ᑳᐃᔑ ᑲᑴᒋᒫᒡ ᐃᓂ ᐊᓄᑮᐋᑲᓇᓐ, ᐊᐌᓀᓐ ᑕᔥ ᐊᐊ ᐃᓂᓂ ᑳᐱᐊᑕ ᓇᑭᔥᑲᐎᓇᕽ? ᐅᑮᐃᓈᓐ᙮

ᒦᔥ ᐅᐅ ᑳᐃᑯᒡ, ᒦ ᓴ ᐊᐌ ᓂᑑᑭᒫᒻ᙮ ᒦᑕᔥ ᑳᐃᔑ ᐅᑖᐱᓇᕽ ᐅᑖᑲᐐᑴᐱᓱᓐ, ᐁᑮ ᐋᑲᐐᑴᐃᑎᓱᒡ᙮

66ᐊᓄᑮᐋᑲᓐ ᑕᔥ ᐅᑮ ᐐᑕᒪᐙᓐ ᐋᐃᓯᑰᓐ ᑲᑭᓇ ᑳᑮ ᐃᔑᒋᑫᒡ᙮ 67ᐋᐃᓯᒃ ᑕᔥ ᐅᑮ ᐲᑎᑲᓈᓐ ᐅᕒᐃᐯᑲᐗᓐ ᑳᑮ ᐃᔑ ᐅᐸᒀᓀᑲᒥᑯᓂᒡ ᐅᒫᒫᓐ ᓭᕒᐊᐗᓐ, ᒦᔥ ᑳᐃᔑ ᐐᐎᒡ᙮ ᐁᑮ ᐐᐎᒡ ᑕᔥ ᐐᑫ ᐅᑮ ᓵᑭᐋᓐ; ᒦᑕᔥ ᐃᒫ ᑳᑮ ᐅᒋ ᓇᐁᑕᕽ ᐁᑮ ᐗᓂᐋᒡ ᐅᒫᒫᓐ᙮

Currently Selected:

ᒉᓂᓯᔅ 24: OJBS

Highlight

Copy