ᐃᔑᒋᑫᐎᓇᓐ 8

1ᔂᓬ Saul ᑕᔥ ᐅᑮᒥᓍᐸᑖᓐ ᐁᓂᓯᒥᓐᒡ᙮

ᔂᓬ ᑮᑲᒀᑕᑭᐋᒡ ᐅᑌᐺᑕᒨᐞ

ᒦᑕᔥ ᐃᐃ ᐊᐲ ᐁᑮᔑᑲᒃ ᑳᑮᒫᒋᓭᒃ ᐁᑮᑭᒋ ᑲᒀᑕᑭᐃᑣ ᐅᑌᐺᑕᒨᒃ ᒉᕒᐆᓴᓬᐊᒥᕽ Jerusalem ᐁᔮᐙᒡ᙮ ᑲᑭᓇ ᑲᔦ ᐅᑌᐺᑕᒨᒃ ᒥᓯᐌ ᑮᐃᔑ ᐊᔪᓶᑕᐸᓰᐗᒃ ᒎᑏᔭ Judea ᐊᑮᕽ, ᓴᒣᕒᐃᔭ Samaria ᐊᑮᕽ ᑲᔦ᙮ ᐃᔑᓂᔕᐙᑲᓇᒃ ᐁᑕ ᑳᐐᓐ ᑮᑕᐸᓰᓰᐗᒃ᙮ 2ᐋᓂᑕ ᑕᔥ ᐌᐌᓂ ᐁᓇᒥᐁᐙᑎᓯᐙᒡ ᐅᑮ ᓇᐃᓈᐙᓐ ᐃᔅᑏᐱᓇᓐ Stephen, ᐐᑫ ᑕᔥ ᐅᑮᑭᒋ ᒨᑲᐙᓈᐙᓐ᙮

3 # Acts 22.4-5; 26.9-11. ᔂᓬ ᑕᔥ ᐐᓐ ᐅᑮᐌᓵᓂᐋᐞ ᐅᑌᐺᑕᒨᐞ ᐁᑮ ᐹᐲᑎᑫᒡ ᑲᑭᓇ ᐙᑳᐃᑲᓂᑳᕽ, ᐁᑮᐅᑎᑎᓈᒡ ᐃᓂᓂᐗᐞ, ᐃᑴᐗᐞ ᑲᔦ ᑭᐸᐅᑏᐎᑲᒥᑯᕽ ᐁᑮᐃᔑ ᐲᒋᐌᐱᓈᒡ᙮

ᒥᓍᒋᒧᐎᓐ ᑮᑎᐹᑐᑌᒃ ᓴᒣᕒᐃᔭ ᐊᑮᕽ

4ᐃᑭᐌᓂᐗᒃ ᑕᔥ ᑳᑮᐅᓶ ᑕᐸᓰᐙᐸᓐ ᒥᓯᐌ ᑮᐸᐹ ᐃᔖᐗᒃ ᐁᑮᐐᑕᒫᑫᐙᒡ ᒥᓍᒋᒧᐎᓐ᙮ 5ᐱᓬᐊᑉ Philip ᐃᑕᔥ ᑮᐃᔖ ᐌᑎ ᑳᔑ ᓃᑳᓀᑖᑾᓂᓂᒃ ᐆᑌᓈᕽ ᓴᒣᕒᐃᔭᑮᕽ ᐁᑮ ᑕᔑᒫᒡ Xᑕᓐ Christ᙮ 6ᑮᐹᑏᓄᐗᐞ ᐃᓴ ᑳᑮᓅᑖᑯᒡ ᐱᓬᐊᑉ, ᐁᐙᐸᑕᒥᓂᒡ ᑲᔦ ᒫᒪᑳᒋᒋᑫᐎᓇᓐ ᑳᑮ ᑑᑕᕽ, ᒦᔥ ᑲᑭᓇ ᐌᐌᓂ ᑳᐃᔑ ᐱᓯᑕᒥᓂᒡ ᐋᓃᓐ ᑳᐃᑭᑐᒡ᙮ 7ᓃᐱᐗᐞ ᐋᓃᔥ ᑳᑮ ᑭᑭᔥᑳᑯᓂᒡ ᒪᒋᐊᒑᑾᐞ ᐅᑮᓇᑲᓂᑯᓂ ᐁᑮ ᔖᑯᐌᓂᒡ ᐁᑭᔒᐌᓂᒡ᙮ ᓃᐱᐗᐞ ᑲᔦ ᒣᒫᒋᒀᐱᓀᓂᒡ, ᑳᑮᒫᑭᔥᑳᓂᒡ ᑲᔦ ᑮᒥᓄᐊᔮᐗᐞ᙮ 8ᐊᐱᒋ ᑕᔥ ᑮᐹᑎᓇᑦ ᒥᓉᑕᒧᐎᓐ ᐃᐃᒫ ᐆᑌᓈᕽ᙮

9ᑮᐊᔮ ᑕᔥ ᐯᔑᒃ ᐃᓂᓂ ᐃᐃᒫ ᐆᑌᓈᕽ ᓵᐃᒪᓐ Simon ᐁᑮᐃᔑᓂᑳᓱᒡ, ᒣᐎᔕ ᐁᑮ ᐱᐅᒋ ᐋᐸᒋᑑᒡ ᒥᑌᐎᐎᓐ᙮ ᐅᑮᒫᒪᑳᑌᑕᒧᐋᐞ ᐃᑕᔥ ᐯᒫᑎᓯᓂᒡ ᓴᒣᕒᐃᔭᑮᕽ Samaria ᐁᔮᓂᒡ, ᐋᓃᔥ ᑮᐃᓍᓂᑎᓱ ᐁᑭᒋ ᐃᓀᑖᑯᓯᒡ᙮ 10ᑲᑭᓇ ᑕᔥ ᐯᒫᑎᓯᓂᒡ ᑫᒋ ᐃᓀᑖᑯᓯᓂᒡ, ᑌᐸᓭᑖᑯᓯᓂᒡ ᑲᔦ ᐅᑮᑭᒋ ᐃᓂᑖᑰᐞ ᐅᐅ ᐁᑮᐃᑭᑐᓂᒡ: ᒦ ᓴ ᐗᐊ ᐃᓂᓂ ᑳᐃᓂᓐᒡ ᐅᑭᒋ ᒪᔥᑲᐎᓰᐎᓐ ᑭᔐᒪᓂᑑ᙮ 11ᐋᐱᒋ ᑕᔥ ᐅᑮᑭᒋ ᐃᓂᑖᑰᐞ ᐋᓃᔥ ᐋᔕ ᒣᐎᔕ ᐅᑮᐱ ᐅᒋ ᒫᒪᑳᑌᑕᒧᐋᐞ ᐃᐃ ᑳᑮᐃᔑ ᒥᑌᐎᒋᑫᒡ᙮ 12ᐊᐲ ᑕᔥ ᑳᑌᐺᑕᒧᐙᒡ ᐱᓬᐊᐴᓐ ᐁᔑ ᑕᔑᑕᒥᓂᒡ ᐁᔑ ᒥᓍᑐᑌᓂᒃ ᑭᔐᒪᓂᑑᓐ ᐅᑎᐯᒋᑫᐎᓂᓂ, ᐅᐐᓱᐎᓂᓂ ᑲᔦ ᒋᓴᔅ Xᑕᓐ, ᒦ ᓴ ᐃ ᑳᐃᔑ ᓰᑲᐊᑖᓱᐙᒡ ᐃᓂᓂᐗᒃ, ᐃᑴᐗᒃ ᑲᔦ᙮ 13ᑫᐐᓐ ᑕᔥ ᓵᐃᒪᓐ ᑮᑌᐺᑕᒻ, ᒦᔥ ᑳᐃᔑ ᓰᑲᐊᑖᓱᒡ᙮ ᒥᓯᐌ ᐅᑮᐃᔑ ᐸᐹ ᐐᒌᐙᓐ ᐱᓬᐊᐴᓐ᙮ ᑮᒫᒪᑳᑌᑕᒻ ᐁᑮᐙᐸᑕᕽ ᐁᔑᒋᑫᓂᒡ ᒪᒫᑖᐎᒋᑫᐎᓇᓐ, ᒫᒪᑳᒋᒋᑫᐎᓇᓐ ᐃᑕᔥ ᑲᔦ᙮

14ᐊᐲ ᑕᔥ ᐃᔑᓂᔕᐙᑲᓇᒃ ᒉᕒᐆᓴᓬᐊᒥᕽ ᐁᔮᐙᒡ ᐁᓅᑕᒧᐙᒡ ᓴᒣᕒᐃᔭ ᐌᒌᓂᒡ ᐁᑌᐺᑕᒥᓂᒡ ᑭᔐᒪᓂᑑᓐ ᐅᑎᑭᑐᐎᓂᓂ, ᒦᔥ ᑳᐃᔑ ᐃᔑᓂᔕᐙᐙᒡ ᐲᑕᕒᐆᓐ, ᒞᓇᓐ ᑲᔦ ᒋᐊᑕ ᐙᐸᒫᓂᒡ ᓴᒣᕒᐃᔭ ᐌᒌᓂᒡ᙮ 15ᐊᐲ ᑕᔥ ᐁᐊᓂ ᑕᑯᔑᓂᓂᒡ ᐅᑮᐊᓇᒥᐁᑕᐙᓂ ᑳᑮ ᑌᐺᑕᒥᓂᒡ ᒋᒦᓂᑰᐎᓯᓂᒡ ᑭᔐᒪᓂᑑᓐ ᐅᑕᒑᑯᓂ᙮ 16ᑳᐐᓐ ᒪᔑ ᐃᐃ ᐊᐲ ᒋᑮᐅᑎᓯᑯᓂᒡ ᑭᔐᒪᓂᑑᓐ ᐅᑕᒑᑯᓂ, ᑮᐃᔑ ᓰᑲᐊᑖᓱᐗᐞ ᐁᑕ ᐅᐐᓱᐎᓂᓃᕽ ᑌᐯᒋᑫᓂᒡ ᒋᓴᓲᓐ᙮ 17ᐲᑕᕒ ᑕᔥ, ᐊᐊ ᑲᔦ ᒞᓐ ᐅᑮ ᓵᒥᓈᐙᐞ, ᒦᔥ ᑳᐃᔑ ᐅᑎᓯᑯᓂᒡ ᑭᔐᒪᓂᑑᓐ ᐅᑕᒑᑯᓂ᙮ 18ᐊᐲ ᑕᔥ ᓵᐃᒪᓐ ᐁᐙᐸᒫᒡ ᐃᔑᓂᔕᐙᑲᓇᐞ ᐁᓵᒥᓈᓂᒡ ᐅᑌᐺᑕᒨᐞ ᐃᐃᒫ ᑕᔥ ᐁᐅᒋ ᒦᓂᑰᐎᓯᓂᒡ ᑭᔐᒪᓂᑑᓐ ᐅᑕᒑᑯᓂ, ᒦ ᐃ ᑳᑮᒦᓈᒡ ᔔᓂᔮᓐ ᐲᑕᕒᐆᓐ, ᒞᓇᓐ ᑲᔦ, 19ᐁᑮᐃᑭᑐᒡ: ᑫᓃᓐ ᒦᔑᔑᒃ ᐃᐃ ᑲᔥᑭᐁᐎᓯᐎᓐ, ᐊᐎᔭ ᐱᑯ ᑫᓵᒥᓇᒃ ᒋᐅᑎᓯᑯᒡ ᑭᔐᒪᓂᑑᓐ ᐅᑕᒑᑯᓂ, ᐅᑮᐃᓈᐞ᙮ 20ᐲᑕᕒ ᑕᔥ ᐅᐅ ᐅᑭᐃᓈᓐ: ᑭᔑᓅᔮᒻ ᑭᑲ ᑭᑭᓂᔑᐗᓈᑎᔅ, ᐁᐃᓀᑕᒪᓐ ᔔᓂᔮᕽ ᒋᐅᒋ ᐊᑖᐌᐗᒡ ᑭᔐᒪᓂᑑ ᐅᒦᑭᐌᐎᓐ! 21ᑳᐐᓐ ᑲᓇᑫ ᑭᑕᑾᑭᒥᑰᓰ, ᐴᔥᑫ ᑳᐐᓐ ᑭᐐᑑᑳᓱᓰ ᐅᐅ ᐊᓄᑮᐎᓐ, ᐋᓃᔥ ᑳᐐᓐ ᑾᔭᑯᓈᑾᓯᓅᓐ ᑭᑌᐞ ᐁᓈᓴᒦᒡ ᑭᔐᒪᓂᑑ᙮ 22ᐃᓇᔥᑫ ᑴᑳᑎᓯᓐ ᒋᓇᑲᑕᒪᓐ ᐃᐃ ᑭᑭᒋᒪᒋ ᐃᔑᐌᐱᓯᐎᓐ᙮ ᐊᓇᒥᐁᑕᐤ ᑳᑎᐯᒋᑫᒡ ᒫᑭᔖ ᑕᐃᓀᑕᒻ ᒋᐐ ᐴᓀᑕᒪᐎᒃ ᐁᓀᑕᒧᐗᒡ ᑭᑌᐃᕽ᙮ 23ᓂᐙᐸᑖᓐ ᐅᔕ ᐁᒨᔥᑭᓀᔥᑳᑯᔭᓐ ᓂᔥᑫᑕᒧᐎᓐ ᐁᒥᒋᒥᓂᑯᔭᓐ ᑲᔦ ᒪᒋ ᐃᔑᐌᐱᓯᐎᓐ, ᐅᑮᐃᓈᓐ᙮

24ᐅᐅ ᑕᔥ ᓵᐃᒪᓇᓐ ᑮᐃᔑ ᓇᑴᑕᒻ: ᑕᑲ ᐊᓇᒥᐁᑕᐎᒃ ᑳᑎᐯᒋᑫᒡ ᓃᓐ ᐅᒋ ᑫᑰᓐ ᒋᐃᔑᓭᓯᐙᓐ ᐃᐃ ᑳᐃᑭᑐᔭᓐ, ᐅᑮᐃᑰᓐ᙮

25ᐊᐲ ᑕᔥ ᑳᐃᔥᒀ ᑎᐹᒋᒫᐙᒡ ᑳᑎᐯᒋᑫᓂᒡ, ᑳᐃᔥᒀ ᐐᑕᒫᑫᐙᒡ ᑲᔦ ᐅᑎᑭᑐᐎᓂᓂ, ᑮᐊᓂ ᑮᐌᐗᒃ ᒉᕒᐆᓴᓬᐊᒥᕽ᙮ ᑮᐊᓂ ᐐᑕᒫᑫᐗᒃ ᐃᑕᔥ ᒥᓍᒋᒧᐎᓐ ᓃᐱᐗᐞ ᐁᔑ ᐊᔭᔮᓂᑭᓐ ᐆᑌᓇᐗᓐ ᓴᒣᕒᐃᔭ ᐊᑮᕽ᙮

ᐱᓬᐊᑉ ᑮᑲᓅᓈᒡ ᐄᑎᔫᐱᔭ ᐊᑮᕽ ᐌᒌᓂᒡ ᐌᑭᒫᐌᑖᑯᓯᓂᒡ

26ᐱᓬᐊᑉ Philip ᐃᓴ ᐅᑮ ᑲᓅᓂᑰᓐ ᑳᑎᐯᒋᑫᒡ ᐅᑌᒐᓬᐃᒥᓂ: ᑕᑲ ᔖᐗᓄᕽ ᐃᓇᑫ ᐃᔑᒫᒑᓐ, ᒋᒣᒀᔥᑲᒪᓐ ᐌᑎ ᐃᐃ ᒦᑲᓇ ᑳᐃᓇᒧᒃ ᒉᕒᐆᓴᓬᐊᒥᕽ Jerusalem ᐲᓂᔥ ᐌᑎ ᑫᓴ Gaza᙮ ᐃᐃ ᐄᑐᒃ ᒦᑲᓇ ᐱᑾᒐᔭᐄ ᐃᔑᐱᒪᒧᓐ᙮ 27ᒦᑕᔥ ᑳᐃᔑ ᐅᔒᑖᒡ ᐁᑮᐊᓂ ᒫᒑᒡ᙮ ᒦᔥ ᑳᑮᒣᒀᔥᑲᐙᒡ ᐌᑭᒫᐌᑖᑯᓯᓂᒡ ᐃᓂᓂᐗᓐ ᐄᑎᔫᐱᔭ Ethiopia ᐊᑮᕽ ᐌᒌᓂᒡ᙮ ᐋᐱᒋ ᐁᑮᑕᑭᒥᑯᓂᒡ ᑭᒋᐅᑭᒫᑴᓐ ᑳᑕᔅ Candace ᑳᐃᔑᓂᑳᓱᓂᒡ ᑳᑮ ᑎᐯᓂᒫᓂᒡ ᐄᑎᔫᐱᔭ ᐊᑮᕽ ᐌᒌᓂᒡ᙮ ᒦᐗᓐ ᐃᓂ ᑲᔦ ᑳᑮ ᑲᓇᐌᑕᒪᐙᓂᒡ ᐅᐌᓅᑎᓯᐎᓂᓂ᙮ ᒉᕒᐆᓴᓬᐊᒥᕽ Jerusalem ᐁᑮ ᐲᔖᓂᒡ ᐁᑮᐱᐊᓇᒥᐁᑕᐙᓂᒡ ᑭᔐᒪᓂᑑᓐ᙮ 28ᑮᐱᒥ ᑮᐌᐗᓐ ᑕᔥ ᐁᓇᒪᑕᐱᓂᒡ ᐅᑑᑖᐹᓈᑯᓃᕽ, ᐁᐊᓇᒥᑑᓂᒡ ᑳᑮᐃᔑᐲᐃᑫᓂᒡ ᐋᐃᓭᔭᐗᓐ Isaiah ᑳᑮ ᑲᓅᑕᒪᐙᓂᒡ ᑭᔐᒪᓂᑑᓐ᙮ 29ᑭᔐᒪᓂᑑᓐ ᐅᑕᒑᑯᓂ ᑕᔥ ᐱᓬᐊᑉ ᐅᐅ ᐅᑮᐃᑰᓐ: ᐯᔓ ᓈᓯᑲᐤ ᐊᐊ ᑳᐱᒥᑖᐹᓱᒡ, ᐊᓂᐐᒋᐤ ᐃᑕᔥ ᑲᔦ, ᐅᑮᐃᑰᓐ᙮ 30ᒦᔥ ᐱᓬᐊᑉ ᐯᔓ ᑮᐊᐸᑑ ᐲᓂᔥ ᐁᑮᓅᑕᐙᒡ ᐁᐊᓇᒥᑑᓂᒡ ᑳᑮᐃᔑᐲᐃᑫᓂᒡ ᐋᐃᓭᔭᐗᓐ ᐅᑲᓅᑕᒫᑫᓐ᙮ ᒦᔥ ᐅᐅ ᑳᐃᔑ ᑲᑴᒋᒫᒡ: ᑭᓂᓯᑐᑖᓐ ᐃᓇ ᐁᑭᑑᒪᑲᒃ ᑳᐊᓇᒥᑑᔭᓐ? ᐅᑮᐃᓈᓐ᙮

31ᒦᑕᔥ ᑳᐃᑯᒡ: ᐋᓃᓐ ᑕᔥ ᑫᔑ ᓂᓯᑐᑕᒫᐹᓐ, ᑳᐐᓐ ᐄᑐᒃ ᐊᐎᔭ ᓂᑭᑭᓄᐊᒫᑯᓰ? ᐅᑮᐃᑰᓐ᙮ ᒦᔥ ᑳᑮᐃᔑᑲᓅᓂᑯᒡ ᒋᐴᓯᒡ ᒋᐐᑕᐱᒫᒡ᙮ 32#Isa 53.7-8. ᐃᐃᒫ ᑕᔥ ᑳᑮᐃᔑ ᐊᓇᒥᑑᓂᒡ ᑭᒋᒪᓯᓇᐃᑲᓐ ᐅᐅ ᑮᐃᔑᐲᐃᑳᑌᓂ:

ᑖᐱᔥᑰ ᓴ ᒫᓇᒑᓂᔥ ᑳᐃᔑᐎᓂᓐᒡ ᐙᑕᔑ ᓂᓯᓐᒡ,

ᑖᐱᔥᑰ ᒫᓇᒑᓂᔐᔅ ᑳᓅᑖᑎᓯᒃ ᐁᐸᔥᑯᔓᓐᒡ,

ᑳᐐᓐ ᐊᐙᒡ ᑫᑰᓐ ᑮᐅᒋ ᐃᑭᑐᓰ᙮

33ᑮᐊᑲᒋᑑᑕᐙᑲᓂᐎ ᑕᔥ,

ᑳᐐᓐ ᑮᐊᔮᓯᓂᓂ ᐃᓈᑯᓂᑫᐎᓐ ᑫᑮᐅᒋ ᓈᑕᒪᐎᑎᐸᓐ,

ᑳᐐᓐ ᐊᐎᔭᓐ ᑕᑎᐹᒋᒧᓰᐗᓐ ᒋᑕᔑᒫᓂᒡ ᐅᐲᐌᓰᒪᐞ,

ᐋᓃᔥ ᐋᔕ ᑮᐃᔥᒀᓭᓂ ᐅᐱᒫᑎᓯᐎᓐ ᐅᐅᒫ ᐊᑮᕽ᙮

ᒦ ᐃ ᑳᐃᔑᐲᐃᑳᑌᓂᒃ ᑳᑮᐊᓇᒥᑑᓂᒡ᙮

34ᐃᓂ ᑕᔥ ᐌᑭᒫᐌᑖᑯᓯᓂᒡ ᐅᑮᐃᑰᓐ: ᑭᓇᑕᐌᓂᒥᓐ ᒋᐐᑕᒪᐎᔭᓐ ᐊᐌᓀᓇᓐ ᐅᐅ ᑳᐃᓈᒡ ᐗᐊ ᐅᑲᓅᑕᒫᑫ᙮ ᐐᓐ ᐃᓇ ᐃ ᑳᐃᑎᓱᒡ, ᑯᒫ ᑲᔦ ᐸᑳᓐ ᐊᐎᔭᓐ ᑳᑕᔑᒫᒡ? ᐅᑮᐃᑰᓐ᙮ 35ᒦᑕᔥ ᐱᓬᐊᑉ Philip ᑳᐃᔑ ᒫᒌ ᑲᑭᑐᒡ, ᐁᑮᒫᒌ ᑕᔑᑕᕽ ᐁᔑ ᐊᓇᒥᑑᓂᒡ ᐃᐃ ᑭᒋᐅᔑᐲᐃᑲᓐ, ᐁᑮᐐᑕᒪᐙᒡ ᐁᔑ ᒥᓍᒋᒥᒥᓐᒡ ᒋᓴᓲᓐ᙮ 36ᐁᐊᓂᐱᒥ ᐊᔮᐙᒡ ᑕᔥ ᒦᑲᓈᕽ ᐅᑮᐅᑎᑖᓈᐙ ᐁᓂᐲᑳᓂᒃ᙮ ᐃᓂ ᑕᔥ ᐌᑭᒫᐌᑖᑯᓯᓂᒡ ᐅᑮᑰᓐ: ᐃᓇᔥᑫ ᑭᓃᓐ ᐃᓈ ᐅᐅ ᓂᐱ! ᑫᑰᓐ ᐃᓇ ᑕᔥ ᐊᔮ ᑫᐅᒋ ᓰᑲᐊᑖᓱᓯᐙᐹᓐ? 37ᐱᓬᐊᑉ ᑕᔥ ᐅᑮᐃᓈᓐ: ᑮᔥᐱᓐ ᒥᓯᐌ ᑭᑌᐃᕽ ᐃᔑᑌᐺᑕᒪᓐ, ᐱᓵᓐ ᑭᑲ ᓰᑲᐊᑖᔅ, ᐅᑮᐃᓈᓐ᙮ ᐅᐅ ᑕᔥ ᐅᑮᐃᑰᓐ: ᓂᑌᐺᑖᓐ ᒋᓴᔅ X ᐁᐅᑯᓯᓯᒥᑯᒡ ᑭᔐᒪᓂᑑᓐ, ᑮᐃᑭᑐᐗᓐ᙮#8.37 ᐋᓂᑕ ᑫᑌ ᐅᔑᐲᐃᑲᓂᕽ ᑳᐐᓐ 37 ᐅᔑᐲᐃᑲᓀᔅ ᑕᑯᐲᐃᑳᑌᓯᓅᓐ᙮ 38ᒦᑕᔥ ᑳᐃᔑ ᐊᓅᓈᓂᒡ ᐌᑖᐸᐃᐌᓂᒡ ᒋᑭᐱᑎᓈᓂᒡ ᑎᑎᐱᑖᐹᓇᓐ᙮ ᒥᒋᓃᔥ ᑕᔥ ᑮᐸᑯᐲᐗᒃ ᐱᓬᐊᑉ, ᐊᐊ ᑲᔦ ᐌᑭᒫᐌᑖᑯᓯᒡ᙮ ᒦᔥ ᑳᐃᔑ ᓰᑲᐊᑕᐙᒡ᙮ 39ᐊᐲ ᑳᐱ ᐊᒀᓰᐙᒡ, ᑭᔐᒪᓂᑑᓐ ᐅᑕᒑᑯᓂ ᐱᓬᐊᑉ ᑫᑕᑐ ᐅᑮᒫᒌᓂᑰᓐ᙮ ᑳᐐᓐ ᑕᔥ ᐊᐗᔑᒣ ᐅᑮᐙᐸᒥᑯᓰᓐ ᐌᑭᒫᐌᑖᑯᓯᓂᒡ, ᒦᔥ ᑳᐊᓂ ᐃᔑᒫᒑᓂᒡ ᐁᑭᒋ ᒥᓉᑕᒥᓂᒡ᙮ 40ᐱᓬᐊᑉ ᑕᔥ ᑫᑕᑐ ᐅᑮᑭᑫᑖᓐ ᐊᓲᑕᔅ Azotus ᐆᑌᓈᕽ ᐁᐅᒋ ᐊᔮᒡ᙮ ᒦᑕᔥ ᐃᐃᒫ ᑳᐅᒋ ᒫᒑᒡ ᐁᑮᐊᓂ ᐙᐐᑕᒫᑫᒡ ᒥᓍᒋᒧᐎᓐ ᑲᑭᓇ ᑖᐎᓂᑳᕽ ᐲᓂᔥ ᓭᓴᕒᐄᔭ Caesarea ᐆᑌᓈᕽ ᐁᑮᐊᓂ ᑕᑯᔑᕽ᙮

Currently Selected:

ᐃᔑᒋᑫᐎᓇᓐ 8: OJBS

Highlight

Copy