Hch 19

Éfesorã Ᵽablote imataᵽaeka

1Corintowejearã Aᵽolore imañujuju, ᵽusi watoᵽekarã imaeka kaꞌia oꞌriwaꞌritirã Éfesowejearã Ᵽablote eyaeka. Torã eyatirã Jesúre ãꞌmitiriᵽẽaekarã ĩꞌrãrimarãre kĩatõᵽoeka. 2Suᵽa imarĩ ikuᵽaka nare kijẽrĩaeka:

—Jesúre mija ãꞌmitiriᵽẽaraᵽaka ᵽoto ¿yaje Esᵽíritu Santore mijare ñaꞌrĩjãiraᵽe?== nare kẽrĩka.

Ĩꞌrã, ikuᵽaka kire yiꞌrikarã:

—“Esᵽíritu Santore ima”, maki yijare bojaberaᵽaki,==

3Suᵽa imarĩ Ᵽablore nare jẽrĩaeka:

—¿Makire yiꞌriwaꞌri ruᵽukoꞌa mija jũjerũjeraᵽe?== kẽᵽakãꞌã.

—Juanre wãrõeka uᵽakaja ruᵽukoꞌa yijare najũjeraᵽe,== narĩka.

4Toᵽiji ikuᵽaka Ᵽablore nare ãrĩka:

—Ᵽoꞌimaja baꞌiaja nabaaika jaꞌataekarãre ruᵽukoꞌa Juanre jũjeka. Suᵽabaatirã, “Yibeꞌerõꞌõ etarũkikare mija yiꞌririjaᵽe”, ãrĩwaꞌri Juare wãrõeka. Kibeꞌrõ etarũkika Jesús kime,== Ᵽablore nare ãrĩka.

5Sãꞌmitiritirã, naruᵽukoꞌa najũjerũjeka, “Maĩᵽamaki Jesúre yiꞌyurã yija ime”, ãrĩwaꞌri. 6Suᵽabaatirã naᵽoꞌiarã kiᵽitaka Ᵽablore jaꞌaᵽeaeka ᵽoto Esᵽíritu Santore nare ñaꞌrĩjãika. Suᵽa imarĩ norĩbeyua oka najaika. Suᵽabaatirã Tuᵽarãre nare õrĩrũjeka nabojaeka. 7Ĩꞌᵽoũꞌᵽuarãeꞌearirakamaki rõꞌõjĩrã nimaeka.

8Maekarakamaki aiya jẽrĩtarirĩmi rakaka judíorãka rẽrĩriwiꞌiarã nare kibojaeka naꞌmitiriᵽẽaokaroꞌsi ᵽoꞌimajare jaiẽjeriyaᵽaiki Ᵽablore imaeka. “Ikuᵽaka Jesúre yiꞌyurãte jãꞌmebaraka Tuᵽarãte nare imaruᵽutarãñu”, ãrĩwaꞌri kĩkirimarĩaja nare kibojaeka. 9Imakoꞌomakaja ĩꞌrãrimarã kijaika ãꞌmitiriyaᵽaberiwaꞌri, aᵽekurioka sanaꞌmitiriyaᵽaberika. Ᵽoꞌimaja wãjitãji Jesúre ᵽoꞌimajare tããika majaroka baꞌiaja najaika. Suᵽa imarĩ nare aꞌritaᵽawaꞌritirã Jesúre ãꞌmitiriᵽẽaekarãte kika keꞌewaꞌrika, Tirano wãmeiki wãrõriwiꞌiarã. Torã ĩꞌrãrĩmi jariwaꞌririmarĩa nare kiwãrõeka. 10Ĩꞌᵽakuri wejejẽꞌrãka torã ᵽoꞌimajare wãrõbaraka kimaeka. Suᵽa imarĩ Asia wãmeika kaꞌiakarã, judíotatarã, judíotatamarĩrã imaekarãoka maĩᵽamaki Jesúrika bojariroka ãꞌmitiriᵽataekarã. 11Ᵽabloᵽi ãrĩwaꞌri rĩkimaka maikoribeyua Tuᵽarãte beaeka. 12Suᵽa imarĩ Ᵽablore rabeka mirãka sayaᵽãia, jariroakaoka ᵽoꞌimaja jĩñurã ᵽõꞌirã neꞌewaꞌᵽakãꞌã narisirika oꞌrika. Suᵽabaatirã Satanárika ima ñaꞌrĩjãikarãoka jiikarã.

13-14Iꞌsia ᵽoto ĩꞌrãrimarã judíotatarã ᵽoꞌimajareka Satanárika ima ñaꞌrĩjãikarãreka poataekarã. Ᵽablote baaeka ĩajiꞌawaꞌri, ĩꞌrãoka Jesúwãmeaᵽi ĩꞌrãtiji baariyaᵽakoᵽekarã. “ ‘Jesús, Ᵽablote kireka bojaiki wãmeaᵽi nareka mija ᵽoᵽe’, marĩũꞌmukoyeyeꞌe”, narĩka. Nabaaika uᵽakajaoka, kurarãka ĩᵽamaki, Esceva makarãre baataᵽaeka. Ĩꞌᵽotẽñarirakamaki nimaeka. 15Ĩꞌrãrĩmi, Satanárika ima ikuᵽaka nare yiꞌrika:

—Jesúre ñoñu, suᵽabaatirã Ᵽablo majaroka ñoñu. Mijare ᵽuri ñiawãrũbeyu. ¿Marã jeꞌe mija?== nare kẽrĩka.

16Suᵽabaatirã Satanárika ima ñaꞌrĩjãikite naᵽõꞌirã teritaeka. Tẽrĩrikaja jãjiaᵽi baꞌiaja nare kibaaeka. Suᵽabaatirã najariroakaoka kibaiwaꞌruika. Suᵽa imarĩ riwejuᵽaraka wiꞌiaᵽi naruꞌriwaꞌrika. 17Éfesowejeakarã nimauᵽatiji, judíotatarã suᵽabaatirã judíotatamarĩrãoka iꞌsia majaroka ãꞌmitiriᵽẽaekarã. Sãꞌmitiritirã nakĩkika. “Tẽrĩritaki kime Jesús”, ãrĩwaꞌri rĩkimarã maĩᵽamaki Jesúre jiyiᵽuᵽaka õrĩkarã mae.

18Iꞌsia majaroka ãꞌmitiriwaꞌri, “Ikuᵽaka baꞌiaja yibaajaꞌatabeyu ruᵽu”, ãrĩwaꞌri rĩkimarãja Jesúre yiꞌrikarãte bojabuꞌaeka. 19Suᵽabaatirã ikuᵽaka ĩꞌrãrimarã yeꞌoirãre baaeka yeꞌoa õrĩrimajare: Yeꞌoa bojaika ᵽaᵽera, ᵽoꞌimaja wãjitãji eꞌewaꞌritirã sanajoeka. Iꞌsia ᵽaᵽera cincuenta mil rakato ᵽlata rõꞌõjĩrã waᵽajãꞌrĩa simaeka.#19.19 Cincuenta mil dracmas. Una dracma (moneda) valía un día de trabajo. 20Maĩᵽamaki Jesús majaroka ᵽibika imarĩ, rĩkimarãja Jesúre naꞌmitiriᵽẽaeka.

21Sabeꞌerõꞌõ Jerusalénrã ᵽeꞌririka Ᵽablote ᵽuᵽajoaeka. “Macedoniakaꞌia, suᵽabaatirã Acayakaꞌia yoꞌririjarirãñu. Jerusalénrã imatatirã, Romawejearã yaꞌrirãñu jeꞌe aᵽeyari”, kẽrĩᵽuᵽajoaeka. 22Suᵽa imarĩ, kire jeyobaarimaja ĩꞌᵽarãre kiᵽũataeka kiruᵽu Macedoniakaꞌiarã Timoteore suᵽabaatirã Erastore. Ᵽablo ᵽuri matikuriji Asiakaꞌiarã#19.22 En Éfeso. tuikaki ruᵽu.

Éfesorã rukubaka naᵽuᵽajoamaka oka ᵽoꞌijirika

23Ᵽablore Éfesorã imaeka ᵽoto, “Jesús ĩꞌrĩkaja kime ᵽoꞌimajare tããrimaji”, ãrĩwaꞌri ᵽoꞌimajare yaᵽabeᵽakãꞌã jimarĩ oka naᵽoꞌijiaeka iꞌsia wejearã. 24Demetrio wãmeiki kimaeka iꞌsia oka bitamataũꞌmuekaki. Artemisare#19.24 Artemisa era la diosa principal de Éfeso. Los romanos la llamaban Diana. Su templo en Éfeso era magnífico. najiyiᵽuᵽayeerũkiwiꞌi uᵽaka ĩoikarĩjaka ᵽlatakaka baarimaji kimaeka. Aᵽerãoka kiuᵽaka baarimaja imarĩ, aᵽerãte sĩjibaraka rĩkimakaja niñerũ natõᵽoroyika. 25Suᵽa imarĩ kire jeyobaarimajare, aᵽetata nuᵽakajaoka baꞌiraberimajare kirẽrãtaeka. Suᵽabaatirã ikuᵽaka nare kẽrĩka:

—Maa, ika baꞌirabeirã ᵽuri, rĩkimaka niñerũ tõᵽoirã maime. 26¿Ᵽablo rĩkimarã ᵽoꞌimajare kibojaika ãꞌmitiribeyurã bai mija? “Mija õñu uᵽakaja baatirã mija jiyiᵽuᵽayeeika, jiyiᵽuᵽayeerũkimarĩa sime”, kẽñu. Kijaika ãꞌmitiritirã rĩkimarã ᵽoꞌimajare kire ãꞌmitiriᵽẽayu. Éfeso wejeakarã takamarĩa kire ãꞌmitiriᵽẽairã. Ritaja Asia kaꞌiarã imarãre kire ãꞌmitiriᵽẽairã oyiaja nime. 27-28Baꞌiaja maroꞌsi simarãñu. Suᵽa imarĩ mabaaᵽoꞌijiaika ᵽoꞌimajare waruaribesarãñu. Suᵽa simamaka sawaᵽa matõᵽowãrũbesarãñu. Suᵽabaatirã Artemisare jiyiᵽuᵽayeeriwiꞌiarã ᵽoꞌimajare aꞌribesarãñu. Ritaja Asiakaꞌiarã, suᵽabaatirã ritatojo wejeareka Artemisare jiyiᵽuᵽaka õñurã. Ᵽablore ãꞌmitiriᵽẽawaꞌri, “Imatiyaikomarĩa Artemisare ime”, ᵽoꞌimajare ãrĩrãñu,== Demetriore nare ãrĩka ãꞌmitiritirã, jimarĩ boebariwaꞌri ikuᵽaka nakasereka:

—¡Éfesokarãre jiyiᵽuᵽayeerijayuko, Artemisa jiitako koime!== narĩka.

29Nakaseremaka, rĩkimarãja ᵽoꞌimajare naᵽõꞌirã aꞌrika. Ĩꞌrãoka nuᵽaka boebaritirã, akaserekarã. Suᵽa imarĩ ritaja wejeareka oka ᵽoꞌijirika. Iꞌsuᵽaka simamaka Ᵽabloka jeyoaꞌriwaꞌrikarãre nañiꞌaeka, Gayo, Aristarco. Macedoniakaꞌiakarã nimaeka ĩꞌrã ĩꞌᵽarã. Nare ñiꞌatirã ᵽoꞌimaja rẽrĩriwiꞌiarã#19.29 El anfiteatro en Éfeso. nare neꞌewaꞌrika. 30Kijeyomarãre jaijeyobaarĩ Ᵽablore torã kãkariyaᵽakoᵽeka. Iꞌsuᵽaka kibaamaka ĩatirã, “Mikãkaꞌsi”, Jesúre ãꞌmitiriᵽẽaekarãte kire ãrĩka. 31Ĩꞌrãrimarã iꞌsia kaꞌia ĩᵽarimarã#19.31 Oficiales de la provincia. torã imaekarã. Ᵽablo jeyomarã imarĩ, “Naka ĩꞌrãtiji baabekaja mimabe”, ãrĩwaꞌri oka kire naᵽũataeka. 32Rẽrĩrũkikõꞌrĩmatorã aᵽeuᵽaka, aᵽeuᵽaka nakasereka. Ĩꞌrĩka uᵽaka ᵽuᵽajoawãrũberiwaꞌri suᵽa nabaaeka. “¿Dakoa baaerã yija rẽrĩkoꞌo?”, narĩwãrũberika. 33Judíotataki Alejandro naka imaekaki kire ᵽoꞌimaja wãjitãji najairũjeka judíorãka. Toᵽiji, Alejandro kiᵽitaka miꞌmataekaki jaiokaroꞌsi, “Mija jaiaꞌsi ruᵽu”, ãrĩwaꞌri. Imakoꞌomakaja nokataꞌriberika. “Dakoa oka imabeyua judíorãkaroꞌsi”, ãrĩwaꞌri nare kibojaerã baakoᵽeka. 34Judíotataki kimaeka õrĩwaꞌri jãjibaji judíorãkamarĩrãte akasereka,

—¡Éfesokarãre jiyiᵽuᵽayeerijayuko, Artemisa jiitako koime!== nakasereka, ĩꞌrĩka uᵽaka oyiaja ĩꞌᵽakuri aiyajẽrãrõꞌõjĩrã.

35Ĩꞌrĩka tokaki imaruᵽutarimaji ᵽoꞌimajare okataꞌrirũjetirã, ikuᵽaka nare kẽrĩka:

—Mija ãꞌmitiᵽe Éfeso wejeareka imarã. Majiyiᵽuᵽayeeiko Artemisa wiꞌia ĩarĩrĩrimaja maime ika wejeareka imarã. Suᵽabaatirã koᵽoꞌijẽrãka ĩmiᵽi ñaꞌrĩka maiarĩrĩrijayu. “Iꞌsuᵽaka imarã nime”, ritaja ᵽoꞌimajare ãrĩᵽatayu mareka. 36Nirã ᵽoꞌimaja, “Ᵽakirika sime”, ãrĩbeyurã. Suᵽa imarĩ mija joꞌriaꞌsi, iꞌtojĩrãja samija jaꞌatabe. Baꞌiaja mija baaꞌsi, jia mija ᵽuᵽajoabe. 37Ĩrã ĩmirĩja mija eꞌeraꞌairã majiyiᵽuᵽayeeiko Artemisarika kareeꞌebeyurã. Suᵽabaatirã baꞌiaja koreka jaibeyurã nime. 38Demetriore naka baꞌirabeirãᵽitiyika aᵽerãte nare okabaajĩkareka, niᵽarimarã ᵽõꞌirã oka jierĩ nare eꞌewaꞌritirã oka najiejĩñu. Oka naroꞌsi imajĩkareka, ĩᵽarimarãre nabojajĩñu. Ĩᵽarimarãre, jãꞌmerimaja nime oka jierimaja. 39Aᵽea oka bojarika mija yaᵽajĩka, Romakarãre jãꞌmeka ãñu uᵽakaja ĩᵽarimarãre rẽrĩrãka ᵽoto nawãjitãji mija bojajĩkareka jia simajĩñu. 40¿Marãkãꞌã Romatatarã ĩᵽarimarãre ᵽuᵽajoarãñu ruku iꞌsuᵽaka ᵽoꞌimajare oka ᵽoꞌijiamaka? Ikuᵽaka naᵽuᵽajoarãñu jeꞌe aᵽeyari: “Mare boebariwaꞌri ĩꞌrãᵽẽꞌrõtorãja mare nabaariyaᵽayu Éfesokarã”, narĩᵽuᵽajoarãñu jeꞌe. Imakoꞌomakaja werika maroꞌsi simajĩñu. Suᵽa imarĩ, “¿Marãkãꞌã oka imamaka mija ᵽiᵽeyu?”, Romatatarãre ãrĩrãkareka, marãkãꞌã nare yiꞌriwãrũberijĩka maime,== torã imaruᵽutarimajire ãrĩka.

41Sabeꞌerõꞌõ, “Iꞌtojĩrãja simarũ”, ãrĩtirã nare kiᵽeꞌrirũjeka.

Currently Selected:

Hch 19: TNC

Highlight

Copy