Hch 15

Jerusalénrã Ᵽablorãkare eyaeka ᵽoto aᵽóstolrãka, imaruᵽutarimajaka narẽrĩka

1Antioquíarã nimaeka ᵽoto Judeakaꞌiaᵽi judíorãka Jesúre yiꞌyurãre etaeka. Torã etatirã Jesúre yiꞌrikarãre nawãrõeka judíotatarãre baaitaraꞌaekakaka.

—Bikija Moisés imaekakite jãꞌmeka uᵽaka circuncisión mija baabesarãkareka, Tuᵽarãte mijare tããbesarãñu,== nare narĩka.

2Ᵽablorãkaroꞌsi jiamarĩa simaeka. Suᵽa imarĩ ĩꞌrãtiji jãjia najaibuꞌaeka. Suᵽa imarĩ, “Ritamarĩa simejeꞌe nawãrõika”, ãrĩᵽuᵽajoawaꞌri Ᵽablore kijeyomaki Bernabére, suᵽabaatirã ĩꞌrãrimarã naka imaekarãreoka Jerusalénrã naꞌrirũjeka, aᵽóstolrãkaka, Jesúre yiꞌyurãre imaruᵽutairãka jaiokaroꞌsi. “Torã eyatirã ‘¿Dako baaerã circuncisión baarika sime?’, ãrĩwaꞌri nare mija jẽᵽe”, narĩka.

3Toᵽi aꞌritirã Feniciarã, Samaria kaꞌiarã eyatirã, Jesúre yiꞌyurãre ikuᵽaka nabojaeka: “Judíorãkamarĩrã imakoꞌomakaja yija bojaika yiꞌriwaꞌri najiyiᵽuᵽayekoᵽeka jaꞌatatirã Jesúre nayiꞌyu”, narĩka. Sãꞌmitiritirã jĩjimaka najarika.

4Jerusalénrã neyaeka ᵽoto aᵽóstolrãka, suᵽabaatirã Jesúre yiꞌyurã, nare imaruᵽutarimajaoka jia nare neꞌetorika. Toᵽi mae, Tuᵽarãᵽi ãrĩwaꞌri ritaja nabaaeka majaroka nare nabojaeka. 5Iꞌsuᵽaka naᵽakãꞌã, ĩꞌrãrimarã fariseokaka ᵽuᵽajoairã imakoꞌomakaja Jesúre yiꞌrikarã imarĩ, aᵽerã Jesúre yiꞌyurãka jairã namiꞌmirĩkaeka.

—Judíotatamarĩrã nimakoꞌomakaja Jesúre yiꞌyurãreoka circuncisión baarika sime, suᵽabaatirã Moisére jãꞌmeka uᵽakaja yiꞌririka sime,== narĩka.

6Suᵽa imarĩ aᵽóstolrãka, Jesúre yiꞌyurãte imaruᵽutarimajaoka rẽrĩkarã sajaiokaroꞌsi. 7Ñoaka jaibaraka nimaeka beꞌerõꞌõ, miꞌmirĩkatirã ikuᵽaka Ᵽedrote nare ãrĩka:

—Yuᵽaka imarã, mija ãꞌmitiᵽe. Bikija mijakakiteje eꞌetirã, Tuᵽarãte yire ᵽũataeka judíorãkamarĩrãte Jesús majaroka yibojaerã. Sãꞌmitiritirã Jesúre nayiꞌrirũ ãrĩwaꞌri nare sayibojaeka. Iꞌsuᵽaka mijare ñañua õñurã mija ime. 8-9Tuᵽarã kime ritaja ᵽoꞌimajare ᵽuᵽajoaika õñuka. Suᵽa imarĩ, “Judíorãkamarĩrãoka yirirã nimarũ”, ãrĩwaꞌri Esᵽíritu Santore nare kiñaꞌajããeka, mare kiñaꞌajããeka uᵽakajaoka. Suᵽa imarĩ, “Judíorãkamarĩrã nimamaka baꞌiaja nabaaika nareka yiyeꞌkariabesarãñu”, kẽrĩberika. Muᵽakaja Jesúre yiꞌyurã nimamaka kireyaekaᵽi ãrĩwaꞌri baꞌiaja nima nareka jõjotatirã jiiᵽuᵽarã nare kimarũjeka. 10Iꞌsuᵽaka simakoꞌomakaja, “Jĩjimaka Tuᵽarãte mijaka imaerã imañujua mija baarũkia ruᵽu”, Jesúre yiꞌyurãte mija ãrĩrijayu. Iꞌsuᵽakataka ᵽuri jãꞌmebeyuka maekaka Tuᵽarã. Mija ᵽakatayuaᵽi ãrĩwaꞌri jiamarĩa mijaka Tuᵽarãte ime. Moisés imaekakite jãꞌmeka simaja yiꞌriwãrũberikarã mañekiarãoka. Sanayiꞌriᵽatawãrũberika uᵽakajaoka maroꞌsi sime maekaka. 11Ikuᵽaka simatiyayu: Jia maĩᵽamaki Jesúre mare baaekaᵽi ãrĩwaꞌri baꞌiaja mabaaikareka Tuᵽarãte mare tããyu. Ikuᵽakajaoka sime judíorãkamarĩrãroꞌsi,== Ᵽedrote nare ãrĩka.

12Sãꞌmitiritirã nimauᵽatiji nokataꞌrika. Torãjite mae, naturitaᵽaeka ᵽoto Tuᵽarãᵽi ãrĩwaꞌri maikoribeyu uᵽaka ima judíorãkamarĩrãte nabaabeaekakaka nabojaeka, Ᵽablo, Bernabéᵽitiyika. 13Najaiweaeka ᵽoto ikuᵽaka Santiagote ãrĩka:

—Ñañua jia mija ãꞌmitiᵽe yijeyomarã. 14Judíorãkamarĩrã majaroka Simónre mare bojaweayu. Sãꞌmitiritirã, “Judíotatamarĩrãteoka kirirã nimaerã jia Tuᵽarãte baaũꞌmueka”, marĩwãrũyu. 15Iꞌsuᵽakajaoka Tuᵽarãroꞌsi bojaĩjirimajare bikija oꞌoeka:

16“David wiꞌia#15.16 El reino de David. ᵽoꞌimajare riatakoꞌomakaja ñamajĩ ate sabaaᵽeꞌaokaroꞌsi yetarãñu.

17-18‘Jia Tuᵽarãte mayiꞌriyeꞌe’, judíorãkamarĩrã yiwãꞌmaekarãte ãñaokaroꞌsi, yiꞌi, mija ĩᵽamakiji, bikijarãja yirirãte sañõrĩrũjeraꞌaeka imarĩ, iꞌsuᵽaka ñañu”.

19Ika yijaiweaikaᵽi ãrĩwaꞌri: Matãꞌomajamarĩrã nime baꞌiaja nabaaika jaꞌatairã Tuᵽarãte yiꞌriwaꞌri. Iꞌsuᵽaka simamaka, “Mañekiarãte imaraꞌaeka uᵽakaja baarika sime”, nare ãñaokoroꞌsimarĩa sime. 20-21Iꞌsuᵽaka ãrĩbekaja, ikuᵽaka ᵽaᵽera nare maᵽũatayeꞌe nare okajããokaroꞌsi: “Waᵽuju ima jẽrãka#15.20-21 Ídolo. jiyiᵽuᵽaka õrĩwaꞌri sawãꞌtarã riꞌia naᵽããeka mija baꞌaꞌsi. Rõmikirã, tĩmiakirã, rõmimarĩrã, tĩmiamarĩrãoka baꞌiaja baabekaja mija imabe. Suᵽabaatirãoka waꞌiroꞌsia sawãmua namokoruꞌataeka, sariweaoka mija baꞌaꞌsi”, ãrĩwaꞌri. Jẽrĩtarirĩmi rakakaja judíorãka rẽrĩriwiꞌiarã nabojarijarika nimataᵽaekarõꞌõ rakakaja. Iꞌsuᵽaka ñañu, jiyubeyua judíorãkare naka jarikoreka,== Santiagore nare ãrĩka.

Judíorãkamarĩrãte ᵽaᵽera naᵽũataeka

22Aᵽóstolrãka, Jesúre yiꞌyurãre imaruᵽutarimaja, suᵽabaatirã ritaja ᵽoꞌimaja ikuᵽaka ãrĩkarã: “Mare kibojaika simamaka, ĩꞌrãrimarã maka imarãre maᵽũataerã Ᵽablorãkaka ika ᵽaᵽera neꞌewaꞌrirã”, narĩka. Sayiꞌrikarã imarĩ Judas (kirejeoka narĩka Barsabás) Silasᵽitiyika ĩꞌᵽarã nimaeka Antioquíarã Ᵽablorãkaka jeyoariwaꞌrirũkirã. Jesúre yiꞌyurãte imaruᵽutarimaja nimamaka iꞌsuᵽaka nare nabaaeka. 23Ikuᵽaka sabojaeka iꞌsia ᵽaᵽera:

“Aᵽóstolrãka, suᵽabaatirã kire yiꞌyurãte imaruᵽutarimaja ika ᵽaᵽera ᵽũatairã. Antioquía, Siria, Ciliciarõꞌõrã imarãroꞌsi oka yija ᵽũatayu. Judíorãkamarĩrã mija imakoꞌomakaja Jesúre yiꞌyurã imarĩ, yija jeyomarã mija ime. 24Yijakarãja ĩꞌrãrimarã mija ᵽõꞌirã eyatirã rukubaka mijare naᵽuᵽajoarũjeraᵽe ãrĩka majaroka yija ãꞌmitiyu. Yija ᵽũataekamarĩrã nime mijare torã wãrõraᵽarã. 25-27Suᵽa imarĩ ĩꞌrĩka taꞌiarãja ᵽuᵽajoatirã ‘Naka jairimajare maᵽũatayeꞌe’, ãrĩwaꞌri, Judare, Silare, suᵽabaatirã majeyomarã Ᵽablore, Bernabéka mija ᵽõꞌirã yija ᵽũatarãñu. Aᵽerãte nare riꞌkakoꞌomakaja Jesúrika bojariroka bojarijaꞌatabeyurã nime ĩꞌrã ĩꞌᵽarã. Mija ᵽõꞌirã eyatirã ika yija oꞌoika uᵽakaja mijare nabojarãñu jeꞌe. 28Esᵽíritu Santore yijare jeyobaaikaᵽi ᵽuᵽajoairã imarĩ, ‘Mañekiarãte imaraꞌaeka uᵽakaja yiꞌririka sime’, mijare ãrĩberijĩrã yija. Suᵽa imarĩ ika takaja mijare yija ãñu: 29‘Waᵽuju ima jẽrãka jiyiᵽuᵽaka õrĩwaꞌri sawãꞌtarã riꞌia naᵽããika mija baꞌaꞌsi. Suᵽabaatirãoka waꞌiroꞌsia mija jããika ᵽoto sariwea juruika, sawãmua namokoruꞌataikaoka mija baꞌaꞌsi. Suᵽabaatirã rõmikirã, tĩmiakirã, rõmimarĩrã, tĩmiamarĩrãoka baꞌiaja baabekaja mija imabe’. Samija yiꞌrirãkareka, jia mija imarãñu, mijare yija ãñu. Jia mija imabe”, ãrĩwaꞌri noꞌoeka.

30Soꞌoweatirã nare saneꞌewaꞌrirũjeka. Antioquíarã eyatirã Jesúre yiꞌyurãte narẽrãtaeka ᵽaᵽera nare jaꞌataokoroꞌsi. 31Sĩatirã jĩjimaka tokarãre jarika, jia saᵽi nare nabojaeka imarĩ. 32Suᵽa imarĩ Judas, Silaska Tuᵽarãroꞌsi bojaĩjirimaja imarĩ, tokarã Jesúre yiꞌyurãre Jesúrika nabojawãrõeka. Iꞌsia majaroka ãꞌmitiritirã jiibaji Jesúre yiꞌriwaꞌri okajãjia najarika. 33Torã nuᵽaka imaekarãka imatatirã, “Yijare ᵽũataraᵽarã ᵽõꞌirã yija ᵽeꞌrirã baayu mae”, narĩka. Iꞌsuᵽaka naᵽakãꞌã, “Jia nimarũ mijare ᵽũataraᵽarã”, narĩka Tuᵽarãte yiꞌrikarã. 34-35Toᵽi Antioquíarã neyaeka. Suᵽabaatirã torãja natuika Ᵽablo, Bernabéᵽitiyika Jesúrika bojariroka bojarĩ najeyomarãᵽitiyika.#15.34-35 Algunos textos antiguos incluyen el versículo 34: “Õꞌõrã yituirãñu”, kẽrĩᵽuᵽajoaeka Silas.

Ᵽablote Jesúrika bojaᵽeꞌarĩ aꞌrika

36Ĩꞌrãrĩmi ikuᵽaka Ᵽablote ãrĩka Bernabére:

—Marãkãꞌã nime ruku, Jesúrika mawãrõekarã. Nare maĩari.==

37Iꞌsuᵽaka kẽᵽakãꞌã, “Jee, dajoa, suᵽabaatirã Juan Marcore maka maꞌewaꞌriyeꞌe”, Bernabére kire ãrĩka. 38Ᵽablo ᵽuri yaᵽaberikaki Juan Marcore eꞌewaꞌririka. “Ᵽanfiliarã yija imaeka ᵽoto Juan Marcore Jerusalénrã yijare ᵽeꞌritaᵽawaꞌrika”, ãrĩwaꞌri Ᵽablore kire eꞌewaꞌririyaᵽaberika. 39Jãjia okatotobuꞌakoᵽeka. Oka jiewãrũberiwaꞌri rakakaja naꞌrika. Bernabé, Juan Marcoka, waᵽuruᵽi, Chiᵽre wãmeika jũmurikarã naꞌrika. 40Ᵽabloka ᵽuri, kijeyomaki Silas aꞌrirã baaekaki. Torã naꞌrirã baaeka ruᵽu, “Jia Maĩᵽamakire mijare baarũ”, ãrĩwaꞌri, Tuᵽarãre najẽñeka Jesúre yiꞌyurã. Suᵽa nare nabaaeka beꞌrõ naꞌrika mae. 41Aꞌririjari Siriarã, suᵽabaatirã Ciliciakaꞌiarã Jesúrika bojariroka nabojaeka. Jesúre yiꞌrikarãka jaitirã jiibaji Jesúre yiꞌᵽaraka okajãjia nimaerã Ᵽablore kijeyomakiᵽitiyika nare jeyobaaeka.

Currently Selected:

Hch 15: TNC

Highlight

Copy