Hch 14

Iconiowejearã imaekarãte Ᵽablorãkare wãrõeka

1Iconiowejearã eyatirã judíorãka rẽrĩriwiꞌirã Ᵽablorãkare kãkaeka. Suᵽabaatirã Jesúrika bojariroka nare nabojaeka. Sanabojamaka, judíorãka, judíorãkamarĩrãoka rĩkimarãja nabojaeka yiꞌrikarã. 2Iꞌsuᵽaka simakoꞌomakaja ĩꞌrãrimarã judíorãka Jesúre ãꞌmitiriᵽẽaberiwaꞌri judíorãkamarĩrã imaekarã Ᵽablorãkare naboebayaokaroꞌsi nare waᵽuju najaiᵽakirijarika. Iꞌsuᵽaka nabaamaka, “Baꞌirã nime”, nareka narĩᵽuᵽajoaeka. 3Imakoꞌomakaja Iconiorã ñoaka Ᵽablorãkare imataᵽaeka ᵽoto okajãjirã imarĩ, “Ᵽoꞌimajare wayuĩawaꞌri jia Cristore mare baaeka”, ãrĩwaꞌri namajarobojataᵽaeka. “Ritatakama sime”, ᵽoꞌimajare ãñaokaroꞌsi, majẽrãkoꞌabeyua ᵽariji nabaabeaerã Tuᵽarã nare jeyobaaekaki. 4Imakoꞌomakaja ĩꞌrĩka taꞌiarãja tokarãre ᵽuᵽajoaberika. Ĩꞌrãrimarã judíorãka uᵽaka ᵽuᵽajoakoꞌomakaja aᵽerã Ᵽablorãka uᵽaka ᵽuᵽajoaekarã. 5Suᵽabaatirã Ᵽablorãkare baꞌiaja baariᵽuᵽajoawaꞌri, judíorãka, judíorãkamarĩrã, ĩᵽarimarãka jaitirã, “Ãtaᵽi Ᵽablorãkare majããyeꞌe”, narĩka. 6-7Iꞌsia rakajewaꞌri, Licaonia kaꞌiarã Ᵽablorãkare ruꞌriwaꞌrika. Torã eyatirã tokarãre Jesúrika bojariroka nabojataᵽaeka. Listra wãmeirõꞌõrã suᵽabaatirã Derbe wãmeika wejearã sanawãrõtaᵽaeka. Iꞌsuᵽakajaoka nabaaeka sawãꞌtarã imaekarãre.

Listrakarã Ᵽablote ãtaᵽi najããbareka

8-9Listrarã ĩꞌrĩka bitamaji turiwãrũbekaja ᵽoꞌijirikakite imaeka. Tokarãka Ᵽablote jaimaka kiãꞌmitiriruᵽaeka. Kire ĩarĩkatirã, “ ‘Yire jiejĩki Tuᵽarã’, ãrĩᵽuᵽajoaiki kime”, Ᵽablote kireka ãrĩᵽuᵽajoaeka. 10Suᵽa imarĩ,

—Miꞌmaaritirã jia meyarĩkaᵽe,== Ᵽablore kire ãrĩka ᵽotojo buꞌrirĩkatirã kituriũꞌmueka. 11Ikire najieka ĩawaꞌri,

—Mija ĩabe, ĩꞌrã ĩꞌᵽarã nime majiyiᵽuᵽayeeroyirã. Ᵽoꞌimaja ᵽoꞌiuᵽakaᵽi ñaꞌrĩjãitirã ĩmiᵽi maᵽõꞌirã netayu,== ãrĩwaꞌri tokarãre akasereka aᵽetomaja okaᵽi.

12Suᵽa imarĩ Bernabére Zeus, narĩka, Ᵽablore Hermes#14.12 Zeus y Hermes eran dioses en la mitología griega. Zeus era el capitán de los dioses y Hermes el mensajero de los dioses. narĩka, “Zeusroꞌsi jia bojawaᵽuꞌatarimaji kime”, ãrĩᵽuᵽajoawaꞌri suᵽa narĩka. 13Iꞌsia wejeataꞌi aꞌriwaꞌri rõꞌõrã Zeusre jiyiᵽuᵽayeeriwiꞌia imaeka. Tokaki kura uᵽaka naroꞌsi imaekaki Ᵽablorãkare jiyiᵽuᵽayeeriyaᵽaekaki. Suᵽa imarĩ waꞌibikirãwẽkoarã õꞌõrika jaꞌaᵽeatirã, wejeakuraraka koᵽerekarã sakeꞌewaꞌrika. Torã eyatirã waꞌibikirãwẽkoa jããrika nayaᵽaeka, Ᵽablorãkare jiyiᵽuᵽayeeokaroꞌsi. 14-15Ᵽablorãka ᵽuri iꞌsia ĩatirã, najariroaka baibebaruikarã. “Jiamarĩa mija baariyaᵽayuma”, ãrĩwaꞌri. Suᵽabaatirã, ᵽoꞌimaja watoᵽekarã jorobaraka jãjirokaᵽi ikuᵽaka nare najẽrĩaeka:

—¿Dako baaerã suᵽa mija baariyaᵽayu? ¡Mija uᵽakajaoka ᵽoꞌimaja yija ime! Tuᵽarãrika bojariroka mijare bojarĩ yija iꞌtayu, mija õñu uᵽakaja mija baaᵽoꞌijiaekarãte mija jiyiᵽuᵽayeerijaꞌataokaroꞌsi. Suᵽa imarĩ Tuᵽarã õñia imajiᵽakite mija jiyiᵽuᵽayeebe. Ikiji oka kime kaꞌia, wejeᵽema, riaᵽakiakaoka, suᵽabaatirã ritaja sareka imaoka ᵽoꞌijiaekaki. 16Bikija imaekarã ᵽuri nayaᵽaika uᵽakaja waᵽuju ima jiyiᵽuᵽayeeraꞌaekarã. Tuᵽarã ᵽuri sayaᵽaberikoꞌomakaja, nare sakijaꞌatarũjeberika. 17Kire najiyiᵽuᵽayeeberikoꞌomakaja jia nare kibaaeka, “Jia baaiki Tuᵽarãte ime”, narĩwãrũokaroꞌsi. Okoa kijarirũjeyu, jia baꞌarika bikiokoroꞌsi. Jia sabaꞌatirã ñaꞌᵽirika maimaerã, suᵽabaatirã jĩjimaka maimaerã mare kijeyobaayu,== Ᵽablorãkare nare ãrĩka.

18Imakoꞌomakaja waꞌibikirãwẽkoa ᵽoꞌimajare jããriyaᵽaeka nare jiyiᵽuᵽayeeokoroꞌsi sĩawaꞌri, “Yijare jiyiᵽuᵽayeewaꞌri ᵽuri waꞌibikirãwẽkoa mija jããꞌsi”, Ᵽablorãkare ãrĩtataeka ᵽoꞌimajare.

19Torãjĩrã ᵽuri Antioquíaᵽi suᵽabaatirã Iconioᵽi judíotatarãre eyaeka. Eyatirã, torã imaekarãre kire nokabaaeka Ᵽablore niariᵽeꞌyoerã. Iꞌsuᵽaka naᵽakãꞌã Ᵽablore ãtaᵽi najããbareka. “Koᵽakaja kire mariatatiyu mae”, ãrĩwaꞌri weje aꞌriwaꞌrirã kire nayiewaꞌrika. 20Iꞌsuᵽaka nabaakoꞌomakaja Jesúre yiꞌyurãte kiᵽõꞌirã eyaeka ᵽoto Ᵽablote jãjika. Suᵽabaatirã wejearã naka kiᵽeꞌriwaꞌrika ate. Aᵽerĩmi Bernabéka Derbe wãmeirõꞌõrã keꞌrika.

21Torã eyatirã Jesúrika bojariroka ᵽoꞌimajare nawãrõeka. Sanabojamaka rĩkimarãja sanayiꞌrika. Torã imatatirã Listrarã, Antioquíarã, Iconiorãoka nawiꞌituririjarika ᵽeꞌririjaᵽaraka. 22Wejerakakaja neyarijarikarõꞌõrã Jesúre ãꞌmitiriᵽẽairãka najaika. Sãꞌmitiriwaꞌri, jiibaji Jesúre yiꞌritirã okajãjia tokarãre jarika. “Jesúre mija yiꞌyua mija jaꞌataꞌsi. Tuᵽarãte jãꞌmeirõꞌõrã maeyaerã baarãka ruᵽu rĩkimakaja baꞌiaja majũarãñu”, ãᵽaraka nabojarijarika. 23Wejerakakaja neyarijarika uᵽakaja Jesúre yiꞌyurãte imaruᵽutarimaja imarũkirãte nawãꞌmaeka. Maĩᵽamaki Jesúre jiyiᵽuᵽayeewaꞌri baꞌabekaja ruᵽu ikuᵽaka kire najaika: “Õꞌõrã mirirãte imaruᵽutarimajare jia mijeyobaabe”, Ᵽablorãkare kire ãrĩka.

Siria kaꞌiakaka Antioquíarã Ᵽablorãkare ᵽeꞌriwaꞌrika

24Toᵽi naꞌrika, suᵽabaatirã Ᵽisidiarõꞌõᵽi oꞌriwaꞌritirã Ᵽanfiliakaꞌiarã neyaeka. 25Ᵽerge wãmeika wejearã Jesúrika bojariroka wãrõweatirã, Atalíarã naꞌrika, riaᵽakirijerã. 26Atalíarõꞌõᵽi kũmujãitirã Siria kaꞌiarã, Antioquíarõꞌõrã naꞌririjarika. Mamarĩ iꞌsia wejearã Jesúrika bojariroka nabojataᵽaerã baaeka ruᵽu, “Mibaꞌiraberika nare mijaꞌataeka uᵽaka oyiaja nabaawãrũerã nare mijeyobaabe”, Jesúre ãꞌmitiriᵽẽaekarãre ãrĩka Tuᵽarãre. Suᵽa imarĩ narĩka uᵽakaja baataᵽaweatirã Antioquíarã Ᵽablorãkare ᵽeꞌrietaeka ate. 27Torã ᵽeꞌrietatirã Jesúre ãꞌmitiriᵽẽaekarãte narẽrĩrũjeka. Suᵽabaatirã ritaja naturitaᵽaekarõꞌõrã Tuᵽarãte nare jeyobaaekakaka tokarãre nabojaeka. “Jia Tuᵽarãte yijare jeyobaaraᵽe. Suᵽa imarĩ judíorãkamarĩrã imarãoka Jesúrika bojariroka jia ãꞌmitiyurã imarĩ Jesúre nayiꞌyu”, ãrĩwaꞌri nabojaeka. 28Jesúre ãꞌmitiriᵽẽairãka Ᵽablorãkare ñoaka torã imaeka.

Currently Selected:

Hch 14: TNC

Highlight

Copy