1 Co 6

Jesucristore yiꞌribeyurã ᵽõꞌirã okajierĩ aꞌᵽekaja, mija tiyiaja oka mija jiebe

1Aᵽea mijare ñañu mae. Mija bojabuꞌarãka beꞌerõꞌõ, Jesúre yiꞌyurã ᵽõꞌirã sajierĩ aꞌᵽekaja, Jesúre yiꞌribeyurã ĩᵽarimarã#6.1 Jueces que no eran cristianos. ᵽõꞌirã sajierĩ mija aꞌyu. ¿Iꞌsuᵽaka mija baaika iꞌyoᵽiꞌribeyurã bai jeꞌe mija? 2Jesúre yiꞌyurã imarĩ, ñamajĩ õꞌõrã ate kiᵽeꞌrietarãrĩmi ritaja ᵽoꞌimajare baaeka mirãka ĩabaraka, “Ika jiamarĩa ima, ika ᵽuri jia ima”, ãrĩrũkirã maime. ¿Yaje samija õrĩwãrũyu jeꞌe? Ika kaꞌiareka imarãre wãꞌmarũkirã imakoꞌomakaja ¿maekaka dakomarĩjĩkaja, oka dajaka imakoᵽeika mija jiewãrũbeyu bai jeꞌe? 3Ángelrãkare baaeka mirãka ᵽariji, ika jia ima, ika ᵽuri jiamarĩa ima ãrĩrũkirã imarĩ, õꞌõrã dakomarĩjĩkaja oka mijare imakaka jia ĩawãrũrirã mija ime. 4Imakoꞌomakaja ¿dako baaerã oka mijareka ima mija tiyiaja sajiebekaja Cristore yiꞌribeyurã ᵽõꞌirã sajierĩ mija aꞌririjayu? 5Mija iꞌyoᵽiꞌyaokoroꞌsi mijare sayibojayu. ¿Ĩꞌrĩkaoka mija watoᵽekakaki jiiᵽañaka õrĩᵽũatirã okajiewãrũiki imaberitiyaiki bai jeꞌe? Imakoᵽeiki jeꞌe aᵽeyari yiᵽuᵽajoaikareka. 6Suᵽa simakoꞌomakaja ĩꞌrãrimarã mijaka imarã okajierikoᵽakaja, nokatotorijayu. Jãꞌrĩbaji sime ĩᵽarimaki Jesúre yiꞌribeyurã ᵽõꞌirã aꞌritirã, nawãjitãji nabojajããbuꞌaika.

7Mija tiyiaja mija bojajããbuꞌarijayua, Jesúre yiꞌyurã baarũkimarĩa sime. Suᵽa baarikoᵽakaja ĩꞌrãrimarãre baꞌiaja mijare baakoᵽeika mija rakajeᵽããbe. “Yire jaitaꞌatirã meꞌmaeka simaᵽarũ”, ãñurã mija imabe. 8Imakoꞌomakaja ĩꞌrãrimarã mija ᵽõꞌirã imarã ᵽoꞌimajare jaitaꞌatirã kareeꞌerimaja. Najeyomarã Jesúre yiꞌyurãre imakoꞌomakaja baꞌiaja nabaarijayu.

9-10“Baꞌiaja yija baarijayua marã imabeyua Tuᵽarãroꞌsi”, ãrĩka ᵽuᵽajoabekaja mija imabe. “Baꞌiaja baarimaja imarĩ, Tuᵽarãre jãꞌmeirõꞌõrã eyarũkirãmarĩrã nimarãñu”, ãñua, ¿mija õrĩbeyu bai? Mija ãꞌmitiᵽe, ikuᵽaka nabaayu baꞌiaja baairã: Rõmijã ĩmirĩjaka wãꞌimarĩrijayurã, suᵽabaatirã waᵽuju ima jẽrãka jiyiᵽuᵽayeerijayurã. Iꞌsuᵽakajaoka ĩmirĩja rõmikirã, rõmijã tĩmiakirãoka jeyoika jaritikarã imakoꞌomakaja aᵽerãka yaᵽabuꞌarijayurã, ĩmirĩja natiyiaja yaᵽabuꞌarijayurã. Kareeꞌerimaja, rĩkimakaja niñerũ rikairã imakoꞌomakaja rĩkimabaji yaᵽarijayurã. Wejabiaikaka ukutirã wejabiririjayurã, aᵽerãre jaiyuyeirã. Aᵽerãre rikaika jaiᵽakitirã nareka ẽꞌmarijayurã. Tuᵽarã ᵽõꞌirã eyabesarãñurã nime. Suᵽa imarĩ nuᵽaka baꞌiaja baakoꞌomakaja, “Tuᵽarã ᵽõꞌirã eyarũkirã maime”, mija ãrĩᵽuᵽajoarijariaꞌsi. 11Bikija ᵽuri ĩꞌrãrimarã nimauᵽaka baabaraka mija imaeka ruᵽu. Maekaka ᵽuri iꞌsuᵽaka baabeyurã mija imaokoroꞌsi Esᵽíritu Santore mijare jeyobaayu Jesucristore mijaroꞌsi reyaeka simamaka. Baꞌiaja mija baaekareka Tuᵽarãte mijare tããeka, suᵽabaatirã kirirã mijare kimarũjeka mae. Iꞌsuᵽakajaoka, “Baꞌiaja nabaaeka waᵽa yire waᵽaĩjibesarãñurã nime”, Tuᵽarãre mijareka ãñurã mija ime mae.

12Ikuᵽaka nañu ĩꞌrãrimarã mija watoᵽekareka imarã: “Maekaka Jesúre yiꞌyurã imarĩ, ritaja yija yaᵽaika uᵽakaja baajĩrã yija ime”, narĩkoᵽeyu. Iꞌsuᵽaka narĩkoꞌomakaja ikuᵽaka ñañu yiꞌi ᵽuri, “Ritaja mabaariyaᵽarijayuareka ĩꞌrãribaꞌikaka jiamarĩa imarijayua maroꞌsi. Suᵽabaatirã ĩꞌrãribaꞌi mabaarijayua, marãkãꞌã baatirã majaꞌatawãrũberijĩka sime. Suᵽa imarĩ iꞌsuᵽaka mabaaberjĩñu”. 13Aᵽerimarã ikuᵽaka ãñurã: “Baꞌarika mabaꞌaika ñaꞌrĩjãirũkiaroꞌsi sime ñeꞌmea. Iꞌsuᵽakaja Tuᵽarãre ᵽoꞌijiatikarã maime. Suᵽa imarĩ, imajiᵽarũkimarĩa sime mañeꞌmea, baꞌarikaoka”, narĩkoᵽeyu.#6.13 Había una creencia o pensamiento que a Dios no le importa lo que uno hace con el cuerpo (como no dura para siempre). Sobre la base de esto, tener relaciones sexuales con cualquiera cuando uno tiene el deseo es lo mismo que comer cuando uno tiene hambre. Kẽsia mare baamaka, baꞌairã maimakoꞌomakaja rõmitika ĩmirĩjaka baꞌiaja wãꞌimañua baarika mare jitoika naka baarimajamarĩrã maime. Cristore yaᵽaika uᵽakaja baairã maimaokoroꞌsi Tuᵽarãre mare ᵽoꞌijiaeka. Kirirã imarĩ, maᵽoꞌiaᵽi iꞌsuᵽaka baarũkirã maime. 14Tuᵽarãre kirikaᵽi maĩᵽamaki Jesucristore ᵽuᵽatõrõeka uᵽakajaoka mare kibaarãñu.

15Suᵽa imarĩ, Jesúᵽoꞌiakakaja sime maᵽoꞌia Tuᵽarãre ĩamaka. Iꞌsia õñurã mija ime. ¿Suᵽa imakoꞌomakaja rõmitika ĩmirĩjaka wãꞌimañua niñerũᵽi waᵽaĩjitirã, mija yaᵽaika uᵽaka koka mija baaika jia sime bai? 16Ikuᵽaka ãrĩrika mijare ñarĩkoꞌo, ĩꞌrĩka uᵽakaja imarã nime Tuᵽarãre ĩamaka. Ika ñañua õrĩwãrũekaja mija imabe. Ikuᵽaka sabojayu Tuᵽarã majaroᵽũñurã oꞌoeka: “Rõmiki kirũmuᵽitiyika ĩꞌrĩka ᵽoꞌi uᵽakaja nime”, ãrĩwaꞌri sabojayu. 17Rõmika imarikakaka sabojaika uᵽakaja, Cristorirã maima simamaka ĩꞌrĩka uᵽakaja ᵽuᵽairã maime Tuᵽarãre ĩamaka.

18Baꞌiaja baabekaja maimayeꞌe. Aᵽerãka baꞌiaja wãꞌimarĩwaꞌri ĩꞌrĩka ᵽoꞌi uᵽakaja nime. Suᵽa imarĩ naᵽoꞌia nabitatayu. Aᵽea baꞌiaja baarika uᵽakamarĩa sime rõmitika ĩmirĩjaka baꞌiaja wãꞌimañuaka baarika. 19Esᵽíritu Santore mare ñaꞌajããiki kime Tuᵽarã. Mare kiñaꞌrĩjãika ᵽoto kiwiꞌiuᵽaka sime maᵽoꞌia. ¿Mija õrĩbeyu bai? Suᵽa imarĩ Tuᵽarãrika sime maᵽoꞌia, marikatakamarĩa. 20Mija ĩabe. Jesúre reyaĩjikaᵽi ãrĩwaꞌri kirirã Tuᵽarãre mare imarũjeka. Suᵽa imarĩ kiyaᵽaika uᵽakaja baabaraka jiyiᵽuᵽaka kire mija õrĩrijaᵽe.

Currently Selected:

1 Co 6: TNC

Highlight

Copy