1 Co 5

Waᵽuju rõmitika wãꞌimarĩrika imabeyua

1Ikuᵽaka sime aᵽea. Mijaᵽoꞌikaki majaroka ikuᵽaka ñaꞌmitiyu. “Kiᵽaki rũmuka baꞌiaja kibaawãꞌimarĩrijayu”, ãrĩka sime majaroka. Baꞌitakaja kibaaika sime iꞌsia. Aᵽerã ᵽuri Tuᵽarãre yiꞌribeyurã imakoꞌomakaja iꞌsuᵽakaitaka baabeyurã. 2Mija watoᵽekareka baꞌiaja baaimakire imakoꞌomakaja, “Aᵽerã tẽrĩwaꞌribaji jia Jesúre yiꞌyurã yija ime”, ãrĩka ¿jĩjimaka mija imarijayu bai jeꞌe? Suᵽa imabekaja iꞌyoᵽiꞌriwaꞌri mijaka kire mija imarũjeaꞌsi. 3Mijaka imaberikoꞌomakaja yiᵽuᵽakaᵽi ᵽuri mija ᵽõꞌirã ñimarijayu. Suᵽa imarĩ, “Ikuᵽaka baꞌiaja kibaaika waᵽa kiwaᵽakoyirũ”, ãrĩᵽuᵽajoaweitikaki ñime. 4“Baꞌiaja baaiki kimamaka ikuᵽaka sawaᵽa kijũarãñu”, ãñaokoroꞌsi mija rẽrĩrika yiyaᵽayu. Suᵽa mija baarãka ᵽoto yiᵽuᵽakaᵽi ᵽuri mija ᵽõꞌirã ñimarãñu. Suᵽabaatirã maĩᵽamaki Jesucristore mijare jeyobaarãñu. 5Rẽrĩtirã mija jairãka beꞌerõꞌõ kire mija ĩaᵽẽaꞌsi, kiyaᵽaika uᵽakaja Satanáre kire baaerã. Baꞌiaja kijũarãñu, jia kiᵽuᵽaᵽeꞌyaokaroꞌsi. Suᵽa imarĩ maĩᵽamaki Jesucristore ᵽeꞌrietarãrĩmi kire kitããrãñu.

6Iꞌsuᵽaka baꞌiaja baaikire mija watoᵽekarã imakoꞌomakaja, “Aᵽerã tẽrĩwaꞌribaji jia Jesúre yiꞌyurã yija ime”, ãᵽekaja mija imabe. Ᵽan baaokoroꞌsi kũᵽajĩji levadura marukekoᵽekoꞌomakaja, jia koyirika sarukuka uᵽaka sime baꞌiaja baarikakaka. Baꞌiaja baaikire mija watoᵽekarã imajĩka baꞌiaja baairã uᵽaka oyiaja mija jariᵽatajĩñu. ¿Iꞌsuᵽaka simakaka õrĩbeyurã bai jeꞌe mija? 7Iꞌsuᵽaka mijaroꞌsi simakoreka mija watoᵽekarã kire mija imarũjeaꞌsi, Tuᵽarãre yaᵽaika uᵽaka oyiaja baairã mija imaokaroꞌsi. Mija ĩabe, Ᵽascua baya naroꞌsi jẽꞌrãtaꞌyu ᵽoto simauᵽatiji levadura nawiꞌiarã ima judíorãkare taarijayu. Levadura bikijaka nawiꞌiarã ima uᵽaka naroꞌsi sime baꞌiaja baarika naᵽuᵽajoamaka. Suᵽa imarĩ, “Aᵽekurioka baꞌiaja baarũkimarĩrã maimayeꞌe”, ãrĩwaꞌri levadura nawiꞌiarã ima nataarijayu. Iꞌsuᵽakajaoka Ᵽascua baya ᵽoto, oveja weiwaꞌyua najããrijayu uᵽaka baꞌiaja Jesúre maroꞌsi jũaeka. Baꞌiaja mabaaika waᵽaĩjiwaꞌri kireyaeka õñurã imarĩ, baꞌiaja baarika majaꞌatayeꞌe. 8Suᵽabaatirã, “Jimarĩ baꞌiaja Jesucristore jũaeka mare tããokaroꞌsi”, ãrĩwaꞌri ritaja baꞌiaja mabaarijayua jaꞌatatirã jĩjimakaᵽi, jia ᵽuᵽajoabaraka maimarijariyeꞌe, ᵽakirimarĩaja.

9Bikija mamarĩ ᵽaᵽera mijare yiᵽũataũꞌmuraᵽakaᵽi ikuᵽaka mijare yibojaraᵽe: “Rõmijã ĩmirĩjaka baawãꞌimarĩrijayurãka, suᵽabaatirã ĩmirĩja rõmijãka baawãꞌimarĩrijayurãka mija jeyoariaꞌsi”, ãrĩka oꞌoekaᵽi mijare yibojaᵽũaraᵽe. 10Iꞌsuᵽaka mijare ñarãᵽe, “Jesúre yiꞌribeyurãre mija waᵽataꞌritaᵽabe”, ãrĩwaꞌrimarĩa. Ikuᵽaka nime Jesúre yiꞌribeyurã: Rõmijã, ĩmirĩja aᵽerãka wãꞌimarĩrijayurã uᵽaka nime rĩkimakaja niñerũ rikakoꞌomakaja, rĩkimabaji yaᵽarijayurã. Iꞌsuᵽakajaoka kareeꞌerimaja, suᵽabaatirã waᵽuju ima jẽrãka jiyiᵽuᵽayeerijayurã Jesúre yiꞌribeyurã nime. Iꞌsuᵽaka baairã rĩkimarãja nimamaka, naka imarika yaᵽaberiwaꞌri ᵽoꞌimajamatorã mija aꞌrijĩñu. Suᵽa simakoꞌomakaja maki suᵽaitaka baaberijĩki. 11“Ikuᵽaka mija baabe”, ãrĩwaꞌri mijaroꞌsi yoꞌoᵽũaeka. “Jesucristore yiꞌyurã yija ime”, ãrĩkoꞌomakaja rõmijã ĩmirĩjaka wãꞌimarĩrijayurãka mija jeyoariaꞌsi. Suᵽabaatirãoka rĩkimakaja niñerũ rikakoꞌomakaja rĩkimabaji yaᵽarijayurãka, waᵽuju ima jẽrãka jiyiᵽuᵽayeerijayurãka, aᵽerãre jaiyuyeirãka, wejabiaikaka ukutirã wejabiririjayurãka, suᵽabaatirã waᵽuju ᵽakitirã kareeꞌerimajaka mija jeyoariaꞌsi. Suᵽabaatirãoka naka mija baꞌarijariaꞌsi. 12-13Jesúre yiꞌribeyurãre baꞌiaja baamaka, “Ikuᵽaka nare mabaayeꞌe”, ãñaokaroꞌsimarĩa maime. Tuᵽarã ĩꞌrĩkaja kime jimarĩ baꞌiaja nare baarũkika. Muᵽaka Jesucristore yiꞌyurã imakoꞌomakaja baꞌiaja nabaaika jaꞌatarika yaᵽabeyurãka jeyoaribekaja maimayeꞌe. Ikuᵽaka sabojayu Tuᵽarãrika bojariroka oꞌoeka ᵽũñurã: “Mija ᵽõꞌirã baꞌiaja baabaraka imarijayurãka mija jeyoariaꞌsi”, ãrĩwaꞌri sabojayu.

Currently Selected:

1 Co 5: TNC

Highlight

Copy