1 Co 4

Aᵽóstolrãka baꞌiraberika

1“Jesúrikaitakaja baꞌiraberimaja nime”, yijareka mija ãrĩᵽuᵽajoabe. Tuᵽarãrika bojariroka ᵽoꞌimajare ãꞌmitirikoribeyua imakoᵽekakaka yija wãrõerã yijare kiᵽũataeka. 2Ikuᵽaka sime baꞌirabeĩjirimaja imarikakaka: Baꞌiraberika nare nijikarã jia nabaꞌiraberika sime, jĩjimaka ĩᵽarimarãre naka imaokoroꞌsi. 3Mija ĩabe, ikuᵽaka sime kirika yibaꞌirabeikakaka. “Jesúre yaᵽaika uᵽakaja jia Ᵽablore baꞌirabeyu”, mija ãrĩjĩka, mija ãrĩberijĩkaoka marã imabeyua yiroꞌsi. Suᵽabaatirãoka aᵽerãre iꞌsuᵽaka yire ãrĩberikoᵽejĩka marã imabeyua. “¿Yaje ritaitaka jia Jesúrika yibaꞌirabeyu jeꞌe? Jiamarĩa yibaꞌirabeyu jeꞌe aᵽeyari”, ãrĩwãrũbeyuka yiꞌi ñoñu uᵽakaja. 4Yiᵽuᵽajoaikareka ᵽuri jia Jesúrika yibaꞌirabeyu. Iꞌsuᵽaka simakoꞌomakaja, “Oka imabeyua yire”, ãrĩrũkimarĩa sime. Maĩᵽamaki Jesús ĩꞌrĩkaja õñuka, “Jia Ᵽablore yirika baꞌirabeyu”, ãrĩrika. 5Suᵽa imarĩ kiᵽeꞌrietarãrĩmi ᵽoꞌimajare õrĩbeyua mabaaeka wããrõꞌõrãja sakibojarãñu. Iꞌsuᵽakajaoka kibaarãñu maᵽuᵽajoaeka mirãkakaka. Iꞌsi ᵽoto ĩꞌrĩka uᵽakaja kirika mabaꞌirabeka mirãka ĩatirã mabaaeka uᵽakaja sawaᵽa mare kibaarãñu. Suᵽa imarĩ ketarãka ruᵽu, aᵽerãre baaika ĩatirã, “Baꞌiaja baairã mija ime”, ãᵽekaja maimayeꞌe.

6Mija ãꞌmitiᵽe yijeyomarã. Ĩꞌrĩka taꞌiarãja mija imaokoroꞌsi yimajaroka suᵽabaatirã Aᵽolomajaroka mijare yibojayu. Suᵽa imarĩ simaraꞌaeka uᵽakaja mija ᵽuᵽajoaerã ikuᵽaka sabojayu: “Ᵽoꞌimajare mija jairãka ᵽoto Tuᵽarã majaroᵽũñu ãñu ᵽemawaꞌribaji mija baaꞌsi”, ãrĩwaꞌri sãñu. Suᵽa imarĩ, “Yijare wãrõrimaji ᵽuri mijawãrõrimajire tẽrĩwaꞌribaji jia õñuka”, mija ãrĩbuꞌaꞌsi. 7Dakoa aᵽea imabeyua aᵽikare tẽrĩwaꞌribaji mijare imarũjeika. Ritaja mija baawãrũika Tuᵽarãre mijare jaꞌataeka oyiaja sime. “Yija õñu uᵽakaja jia kirika yija baꞌirabewãrũyu”, mija ãrĩaꞌsi.

8Suᵽabaatirã, “Ritaja Tuᵽarãrikakaka õñurã yija ime maekaka ᵽuri”, mija ãrĩkoᵽeyu. Iꞌsuᵽakajaoka, “Kirika yija baꞌirabewãrũerã ritaja Esᵽíritu Santore yijare jaꞌataᵽataeka”, mija ãrĩᵽuᵽajoakoᵽeyu, yiᵽuᵽajoaikareka. Cristoka ĩꞌrãtiji jãꞌmebeyukajirã yija imakoꞌomakaja ¿mija ᵽuri kika jãꞌmerimaja jaritikarã bai jeꞌe? Karemarĩa mija ᵽuᵽajoaika uᵽaka simarikareka, yijaroꞌsioka jia simajããeka mija uᵽaka kika jãꞌmerimaja yija imaokaroꞌsi. 9Aᵽe uᵽaka sime yiᵽuᵽakareka ᵽuri. “Aᵽóstolrãka yija imakoꞌomakaja jiyiᵽuᵽaka ᵽoꞌimajare yijare õrĩbeyurã uᵽaka imarã Tuᵽarãre yijare ᵽũataeka”, yija ãrĩwãrũyu. Surararãka ñiꞌaekarã uᵽaka imawaꞌri, niᵽamakire jãꞌmeika ᵽoto, ᵽoꞌimajare ĩaika wãjitãji reyarũkirã uᵽaka yija ime. Nimauᵽatiji ᵽoꞌimaja, suᵽabaatirã ángelrãkaoka yijaroꞌsi simarãka uᵽakaja niaime. 10Jesucristore yaᵽaika uᵽakaja yija baamaka, “Dako õrĩbeyuratarã nime”, ᵽoꞌimajare yijareka ãrĩᵽuᵽajoayu. “Yija ᵽuri, Cristorirã yija imamaka, dika jariwaꞌririmarĩa yijare kiõrĩrũjeyu”, mija ãrĩᵽuᵽajoakoᵽeyu. “Tuᵽarãroꞌsi jia baakoᵽeirã nime”, yijareka nañu ĩꞌrãrimarã. Mija ᵽuri, “Tẽrĩwaꞌribaji kiroꞌsi baairã Tuᵽarãre yijare imarũjeyu”, mija ãrĩᵽuᵽajoakoᵽeyu. Suᵽabaatirã jĩjimaka ᵽoꞌimajare mijaka imakoꞌomakaja yijare jiyiᵽuᵽaka norĩbeyu. 11-12Bikija baꞌiaja yija jũaraꞌaeka uᵽakaja maekakaoka yija jũarijayu ruᵽu. Ĩꞌrãkurimarĩa yija kẽsirabarijayu, okoa ukurijitokoᵽekoꞌomakaja okoa yija tõᵽowãrũbeyu. Iꞌsuᵽakajaoka jarirorõꞌõ, yija oꞌajããrũkia imaberirijayua. Baꞌiuᵽaka yijare baawãꞌimaᵽaraka ᵽoꞌimajare yijare ᵽajewãꞌimarĩrijayu. Suᵽabaatirã wiꞌimarĩrãoka yija ime. Tuᵽarãrika bojariroka yija wãrõika simakoꞌomakaja yija imarũkiwaᵽa, yija baꞌarũkiwaᵽaoka tõᵽoerã yija baꞌirabeyaᵽarijayu. Baꞌiaja ᵽoꞌimajare yijare jaiwãꞌimarĩkoꞌomakaja, baꞌirokaᵽi nare yija okaeꞌebeyu. Suᵽa baabekaja, “Jia nare mijeyobaabe, Tuᵽarã”, ãrĩka naroꞌsi kire yija jẽñerijayu. Baꞌiaja yijare nabaataꞌakoꞌomakaja nare yija ruᵽuwaᵽaeꞌebeyu. 13Baꞌiaja yijareka najaiyuyekoꞌomakaja jiaᵽiji naka yija imarijayu. Baꞌirataka, bururataka uᵽaka yijare norĩrijayu. Bikija niaᵽeꞌyoraꞌaeka uᵽakaja maekakaoka niaᵽeꞌyoirã yija imarijayu ruᵽu.

14Mijare waᵽewaꞌrimarĩa ikuᵽaka mijaroꞌsi yoꞌoyu. Mamakarãre mawayuĩaika uᵽaka mijare yiwayuĩayu. Suᵽa imarĩ mijare okajããwaꞌri ikuᵽaka mijaroꞌsi yoꞌoyu. 15Diez mil rakamarã Jesúrika bojariroka mijare wãrõrũkirãre imakoꞌomakaja yiꞌi ĩꞌrĩkaja kirika mijare wãrõũꞌmuraᵽaki. Mijare yibojamaka Jesúrirã mija jaraᵽe. Mijare wãrõũꞌmuraᵽaki imarĩ, mijaᵽaki uᵽakaja ñime. 16Mijaᵽaki uᵽakaja yibaaraᵽaka imarĩ yuᵽakaja mija imarika yiyaᵽayu.

17Suᵽa imarĩ jiibaji Timoteore mijare wãrõerã torã kire yiᵽũatayu. Yimaki uᵽakaja wãtaka ñoñuki imarĩ, Maĩᵽamakire yaᵽaika uᵽakaja baaiki kime Timoteo. Mijare yiwãrõraᵽaka mirãkaja mijare kiwãrõrãñu jeꞌe ate. Suᵽabaatirã, “Jesúre yiꞌyuka imarĩ, ikuᵽaka Ᵽablore imarijayu”, ãrĩwaꞌri mijare kibojarãñu. Iꞌsirokajaoka aᵽerã Jesúre yiꞌyurãre yiwãrõtaᵽe. 18“Maᵽõꞌirã ᵽuri Ᵽablore etabesarãñu jeꞌe mare kĩkiwaꞌri”, ãrĩwaꞌri ĩꞌrãrimarã mija ᵽõꞌikarãre jiiwariarikoᵽeyu. 19“Tuᵽarãre yire ᵽũatarãrĩmi, mijare ĩarĩ yaꞌrirãñu”, ñarĩᵽuᵽajoayu. Mija ᵽõꞌirã yeyarãrĩmi, marãkãꞌã baawaꞌri suᵽa najaiyu ãrĩwaꞌri sayijẽrĩarãñu. “Waᵽuju jairimirãtakaja najaiyu jeꞌe aᵽeyari”, ãrĩwaꞌri suᵽa nare yibaarãñu. Karemarĩtaka Esᵽíritu Santore nare jeyobaaikaᵽi, najaika uᵽakaja nabaꞌirabemaka ñiaeyarãñu. 20Naᵽuᵽajoaika uᵽakaja najaiikaᵽitakaja Tuᵽarãrika nabaꞌiraberãkareka dako waᵽamarĩa simarãñu. Tuᵽarãre jãꞌmekarã ᵽuri kijeyobaaikaᵽi ãrĩwaꞌri kirika baꞌiraberijayurã. 21Suᵽa imarĩ, ikuᵽaka mijare yijẽrĩayu mae: ¿Marãkãꞌã mija yaᵽayu? “¿Dako baaerã baꞌiaja mija baabuꞌakũꞌñu?”, ¿mijare yiwaᵽeeyarika mija yaᵽayu bai? Baꞌiaja baarika jaꞌataekarã mija imamaka, ¿jĩjimakaᵽi mija ᵽõꞌirã yeyarika mija yaᵽayukãꞌã?

Currently Selected:

1 Co 4: TNC

Highlight

Copy