Sefanaiya 1
1
1 #
Iyi 1:3; 2 Pi 1:19; 2 Kin 22:1-2; Yel 1:2 Yosaiyaʼmo Emoni mafaʼnemoʼmo Yuta vayaʼaiteʼmo kini vekamo maiteno yagaino apateʼniya afinaʼmo Ala kava neʼmoʼa geʼamo alino ateʼnigeno Sefanaiyategamo emineʼniye. Sefanaiyaʼmo Kusi mafaʼnemo maiʼnigeno Kusiʼmo Geʼnaliya mafaʼnemo maiʼnigeno Geʼnaliyaʼmo Amalaiya mafaʼnemo maiʼnigeno Amalaiyaʼmo Hesekaiya mafaʼnemo maiʼniye.
Ala kava neʼmo alopa afinaʼamo afole aisiya kavafeʼmo huʼniya gemae
2 #
2 Kin 22:16-17; Aiy 6:11; Mka 7:13 Sefanaiyaʼmo ina gemo hunoʼaeʼmo, Ala kava neʼmoʼa ina ge huʼniye, Nagaemo muki ma mopafi haneʼniya yaʼmo alagikeʼmo aliʼna hano huʼna atalegauve, huno huʼniye. 3#Yel 12:4; Hos 4:3Nagaemo muki vayanagi afugi kokuʼnapi namagi anipi noyamegi huʼna aliʼna hano huʼna atalegauve. Nagaemo hosu vayaʼe apaiyafiʼmo hapageʼa asagauʼa neʼaiya aigofe gotigiʼeʼmo aliʼna hano huʼna apatalegauve. He, ma mopafi maiʼnaya vayaʼmo alagikeʼmo aliʼna hano huʼna apatalegauve.
4 #
Aiy 14:27; 2 Kin 23:4-5; Hos 10:5 Nagaemo nayatetiʼmo Yuta nofi vayaʼe Yulusalemu taonifi maiʼnaya vayaʼeʼmo kayoʼmo apamiguve. Aigofe Melifeʼmo mono kavaʼmo nehaya kavaʼmo alagike aliʼna hano huʼna atalege Melitefeʼmo mono huʼa neʼapataya vayaʼmo aliʼna hano huʼna apatalege huguve. Aigofe gotitefeʼmo mono huʼa neʼapataya vayaʼmo aliʼna apagoʼya lagauʼna apatalesugeno apakiʼapimo alagi ohanegaiye. 5#2 Kin 23:12; Yel 19:13; Yas 23:7Nagaemo otu nokatoʼmuleʼmo uʼa haiʼa maiʼneʼa yegelefenagi kailefenagi kanefitefenagi huʼa monoʼmo nehaya vayaʼmo aliʼna hano huʼna apatalegauve. Lole apaipa apakesamo neʼafiya vayaʼmogi nagaefeʼmo mono huteʼa nagiʼnilefeʼmo lama gemo nehuve, huʼa huge aigofe gotiʼa Molekitefeʼmo mono huteʼa agiʼaletiʼmo lama gemo nehuve, huʼa huge nehaya vayaʼmo aliʼna hano huʼna apatalegauve. 6#1 Sam 5:11; Aiy 1:4; Yel 2:13-17; Hos 4:15-16Ala kava neʼmo magoʼe huʼa akame osuʼa ataleʼnaya vayaʼe Ala kava neʼmo agesayafeʼmo kahauya huʼa ge huʼa afi okeʼnaya vayaʼeʼmo aliʼna hano huʼna apatalegauve.
7 #
Yop 40:4-5; Sam 76:8; Ham 2:20; Aiy 2:12; Aiy 34:6; Le 19:17-18 Ala kava neʼmoʼa agoti huno apatesiya afinaʼmo ago eno hogo huʼniyaʼmofeʼmo lapakaemo Yuta vayaʼmogitapamo agaetegamo etapa hogo huʼnetapa ge osuta afaʼa maiyo. Vayaʼmogi afumo amagiʼa ofalinimo nehaya agufa kava huno Ala kava neʼmoʼa vayaʼmo apamagino ofalinimo hugiye. Agaemo vayaʼaifeʼmo ago keya aeno ge huʼniyanageʼa ofalinimo hisayategamo egae. 8#Aiy 24:21; Yel 39:6-7; Loa 22:5Ala kava neʼmoʼnamo ani ofalinimo hisuva afinaʼmo nagaemo yagaiʼnaya vayanagi kini vekamo ve mafaʼne anagaʼagi alu nofi vayaʼmogimo neʼvaiya kukena yaʼapimo aliʼa neʼvaiya vayanagi, huʼna, kayoʼmo lapamiguve. 9#1 Sam 2:15-16Ani afinaʼmo nagaemo ala apaki vayaʼmogi aliʼyaʼapimo neʼaliya vayaʼmogimo vayaʼai no kipateʼmo apaya mukiki huʼa uʼa haiʼa apamagige kagemi yaʼapimo kumaya alige huteʼa aliniʼa uʼa aliʼyaʼmo afoʼamo nopiʼmo maleʼa havaite neʼmalaya vayaʼmo kayoʼmo apamiguve, huno hutenoʼaeʼmo, 10#Aiy 59:11; 2 Sit 3:1Ani afinaʼmo Yulusalemu taonimo yafa kegiʼyamo kipaʼmo agiʼamo noyame kipane, huʼa agi neʼaya kipateʼmo maiʼnaya vayaʼmogi lusi kava huʼa koli huteʼa alopa gefatiʼmo ge hisageʼa afige napa tu kipateʼmo maiʼnaya vayaʼmogi apano aeteʼa faiyosago faiʼa aviʼyaʼmo hisageʼa afige avefatiʼmo mago yaʼmo aeno apalo atiʼnigeno alopa agemo neʼaiya agufa kava huno age aisigeʼa afige hugae. 11#Yel 4:8; Ye 5:1Makatesi maketi kumateʼmo maiʼnaya vayaʼmogitapamo, faiyosago faitapa aviʼyaʼmo hiyo. Muki yaʼmo maketimo nehaya vayaʼmo ago faliʼnayaʼmofeʼmae. Mago kagemi yaʼapiʼe vayaʼmo oʼmaiʼnae, huʼa hugae.
12 #
Yel 48:11; Emo 6:1; Le 2:23; Yop 21:15; Sam 10:11-13 Ani afinaʼmo nagaemo Ala kava neʼmoʼnamo lamuʼmo aliteʼna uʼna Yulusalemu taonifiʼmo kahauya huʼna apakegauve. Apakaemo hanageke yaʼmo oʼaliʼa apakaiʼapieʼmo apakesamo afiʼapaeʼmo, Asole yaʼmo aliteta alagepa kavakeʼmo huta maiʼnone, huʼa huge apaipafiʼmo huʼapaeʼmo, Ala kava neʼmoʼa alagepa kavaʼmofi hosu kavaʼmofi huno osuno afaʼageʼmo maigiye, huʼa huge nehaya vayaʼaifeʼmo umenitata huʼna kahauya huʼna apakege huteʼna kayoʼmo apamiguve. 13#Yel 5:17; Loa 28:30,39,51Ani agufa hosu kavaʼmo nehayaʼmofeʼmo kame vayaʼapimogi eʼa kagemi yaʼapimo kumaya aliteʼa noʼapimo heʼa halagape vaiʼa atalegae. Apakaemo saufa noʼmo kigayaʼmonanafa ani nopiʼmo afaʼa oʼmaigae. Apakaemo hoyaʼapifiʼmo nofi alagamo faigayaʼmonanafa ani nofi alagafati aniʼmo oʼnegae. Kame vayaʼmogimo nofi hoyaʼapimo aligayaʼmofeʼmae.
14 #
Yel 30:7; Yol 2:1,11 Ala kava neʼmoʼa agoti huno apatesiya alopa afinaʼamo ago hemenimo eno hogo huʼniyanageno ani afinaʼmo alagi malage huno afole aigiye. Ani hosu afinaʼmo lusi lokiya ati vayaʼmogiʼeʼmo lusi kava huʼa koli huteʼa alopa gefatiʼmo ge hugae. 15#Aiy 22:5; Emo 5:18-20; Lo 2:5Ani afinaʼmo Gotiʼa aipamo neleya kavaʼmo vayaʼaiteʼmo afole aisigeno alopa kana yaʼmo apakaeteʼmo hanesigeʼa hosu apaipamo kalisigeno muki yaʼmo alagi hosugiye. Kame vayaʼmogimo eʼa noʼmo heʼa halagape vaige hoyamo aliʼa hosu huʼa atalege hugae. Hiyaʼmoʼa yegeleʼmo aino ati nekaegenoʼaeʼmo alopa haniʼmo nehiya kava huno hosu afinaʼmo afole aigiye. 16#Yel 4:19; Hos 8:1; Emo 3:6; Aiy 2:12-15Ani afinaʼmo pikulimoʼmo age neʼaisigeʼapaeʼmo taonifiʼmo maiʼnaya ati vayaʼmogimo koli huteʼa alopa gefatiʼmo ge hugae. Lokiya yafa kegiʼyamo haneʼniya taonifiʼmo kame huge kame nehaya yatala noʼmo heʼa halagape vaisayafeʼmo kame huge hugae.
17 #
Loa 28:28-29; Avi 4:14; Sam 79:2-3 Ala kava neʼmoʼa ina ge huno huʼniye. Vayaʼmogimo nagaetegamo hosu kavaʼmo huʼnayaʼmofeʼmo alu kava alu kavaʼmo hisugeno alagi hosu kavaʼmo apakaeteʼmo afole aisigeʼa apaulagamo ali huʼniya vayaʼmogi nehaya agufa kavaʼmo huʼa kafeʼmo kahauya huliʼa umenitata hugae. Kolaʼapimoʼmo anikana huno aino laki lamisigeʼa faligae. Apakufaʼamo mopafiʼmo aifamo nekasaliya agufa kava huno kasaligiye.
18 #
Iyi 7:19; Lu 12:19-21 Ala kava neʼmoʼa aipamo neleya kavaʼmo afole aisiya afinaʼmo muki siluva yafaʼapimoʼe goli yafaʼapimoʼeʼmo alagi hapa oʼmaegaiye. Haʼao. Kaino nefaiya kavaʼmoʼa atagana huno muki Isaleli mopamo leno asagaligiye. Agaemo malage huno muki mani koteʼmo maiʼnaya vayaʼmo alagi alino hano huno apatalegaiye.
Currently Selected:
Sefanaiya 1: kyg2013
Highlight
Share
Copy
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.
