Hamakaki 3
3
1Hamakaʼmo Gotitegati gemo alinino eno aeno hakalo huno hapa nepaiya vekamoʼmo nunumuʼmo huʼniya gemo mono vayaʼmogi yokemo huʼnaya gemae.
2 #
Aiy 66:2
O Ala kava nene, huʼna, lokiyakaletiʼmo huʼnana kavafeʼmo ava gemo afiteʼnaeʼmo nahau aiteʼna maiʼnove. Huʼnana kavakamo hemeniʼeʼmo halate huvo. Maiʼnona afinaʼmo afole yateʼmo alika afole aika ategeʼa ageyo. Kaipamo leka nelatanaʼmonanafa kaipamoʼmo afaʼa falu huʼninageka kaipamo falu huka lateteka kahau huka lato.
3 #
Hat 24:15-17; Sam 48:10 Gotiʼa Temani taonifatiʼmo eʼniye. Aote vekamo Palani avefatiʼmo eʼniye. He, lama ge. Ha le konali yaʼamoʼmo muki kokuʼnategamo aeno ha leʼniye. Ani kava huno ala agiʼamoʼmo ma mopafi muki haopalegamo aino atagu faeʼnigeʼa afiʼnae. 4#Sam 104:1Ha le konali yaʼamoʼmo yegemoʼmo aeno halelino haine neʼeya agufa kava huno aeno ha leʼniye. Lokiyaʼamo alino fala ki maleʼnigeno ayapatiʼmo lokiyaʼamoʼmo aeno ha leʼniye. 5#Sam 18:12Agaemo alopa kaitaʼmo alino ateʼnigeno eno asole vayaʼmo kaita hapauʼniye. Uʼnigenoʼaeʼmo magoʼe huno alopa kaitaʼmoʼa akame huno uʼnigeno magoʼe vayaʼmo kaita hapauʼniye. 6#Loa 32:8; Ap 17:26Agaemo he tino mopamo agetenoʼaeʼmo hakumo maleno apateʼniye. Apaketenoʼaeʼmo alu nofi vaya alu nofi vayaʼmo alino hapa faino apataleʼnigeʼa atagu faeʼa uʼeʼa huʼnae. Hanege hanege huno nehaneya avemo aino anakupaeno asagauno aiʼniye. Akeyaʼvilagamo haneʼnaya aveʼamo aiʼa anakupaeʼa asagau aiʼnae. Gotiʼa nehiya kavaʼmo muki afinaʼmo hanege hanege huno nehane. 7#Nap 31:2Apakeʼnovana Kusani nofi vayaʼmo hanageke yaʼmo aliʼnageʼna apakeʼnove. Mitiyani nofi vayaʼmo atete huʼnae. 8#Hat 14:21-22O Ala kava nene, huʼna, uno nelamiya anifeʼmo haoke oseʼnapiye. Uno nelamiya anifeʼmo kaipamo leʼnifiye. Solovala anifeʼmo kaipamo leʼniyaʼmofeʼmo ati vayaʼmogi hosiʼapileʼmo fai maiʼneʼa kamemo huge halauliʼa neʼvaya talalafiʼmo maiʼneʼa kame huge nehaya kava huka vayakamo hapa maesanafeʼmo eka kame huʼnane. 9Atikamo alika alo huka aliʼnane. Kagaemo kagoʼyaʼmo ataleteka ani kavaʼmo huguve, huka hutekaeʼmo kagaika nofi vayaʼmo uka hapa maeʼnane. He, lama ge. Koʼmo aiyo, huka huʼnanagenoʼaeʼmo alopa koʼmo aiteno aniʼmoʼa alino kalokalopa hatiʼniye. 10#Sam 96:11Avemogimo kageteʼapaeʼmo kanage kanage huʼnae. Alopa aniʼmo emineʼniye. Aniʼmo vasilonaʼafatiʼmo fugaligali huteno alopa agemo aiʼniye. 11#Yas 10:12Yegeʼe kaiʼeʼmo oʼuʼana noʼanifiʼmo afaʼa maiʼnaʼae. Kevekamo hetalanageno neʼunoʼaeʼmo aeno halelino uʼniye. Hayokamo yaga auka atalenagenoʼaeʼmo alino alave alave huʼniye. 12Kagaemo muki kotegaeʼmo kaipamo leʼnigeka mopafi umenitata nehukaeʼmo muki nofi vayaʼmo aeka lata paiʼnane. 13#Sam 68:21Kagaemo vayakamogi apakufamo alika katika apatesanafeʼmo emikeʼnane. Kagaika vekamo uvelimo lakika ateʼnana vekaʼeʼmo emiteʼnaʼae. Hosu afamo anagaʼai afoʼapimo agenopaleʼmo amagiʼnane. Alagi alika hano huka apataleʼnane. 14#2 Sit 20:22-24Vayaʼmo kesi kateti eʼa aliʼa afepi apateʼnaya vayaʼai neʼyaʼapimo kumaya aliteʼa apamogaga aiʼnaya kava huʼa ani ati vayaʼmogi aliʼa laha faiʼa latalesayafeʼmo eʼa apamogaga aiʼnae. Apamogaga aiʼnayaʼmonanafa apakaeteʼmo yagaino apateʼniya vekamo agaiʼa hayoletiʼmo alika agufafiʼmo aeʼnane. 15Hosikaleʼmo faika maitanageʼapaeʼmo hosi anagakamo solovala anipiʼmo lakaeʼnagenoʼaeʼmo fugaligali huʼniye.
16 #
Aiy 6:5
Ani kavafeʼmo ava gemo afiteʼnaeʼmo nagufamoʼmo atete huʼniye. Age aiʼnigeʼnaeʼmo navayamoʼmo atete huʼniye. Naiya nayaʼmo faliteno lokiyaʼnimo ohaneʼnigeno naipamoʼmo atete huʼniye. Ani nofi vayaʼmogi eʼa lagaeʼeʼmo kamemo hisagenoʼaeʼmo lusi hanageke yaʼmo afole aisiya afinaʼmo nahausoli osuʼna afaʼa agava maiguve.
17 #
Hag 2:16-17
Figi yosamoʼmo alaga oʼaege nofiʼmoʼa alagamo oʼaege olivi yosamoʼa alagamo oʼaege hoyafati neʼyaʼmo ohagege sipisipi anagaʼmo noʼapifiʼmo oʼmaige pulumaka anagaʼmo noʼapifiʼmo oʼmaige hisayana 18#Sam 33:1nagaemo Ala kava netefeʼmo namogaga aiguve. Nagufamo alino katino neʼnateya Gotifeʼmo namogaga aiguve. 19#Sam 18:2-3Ala kava neʼmo Gotiʼa lokiyaʼnimo maiʼniye. Agaemo lokiya vaino natesigeno naiyamoʼmo afela afumoʼmo nagu nagu nehiya afumo aiyagana huno haneʼnisigeʼna alopa avefiʼmo uʼna haiʼna umenitata huguve.
Ani gemo alino yokemo nehaya vayaʼaiteʼmo yagaiʼniya vekamo amiʼniye. Yokemo hisayafeʼmo neʼamagiʼa nehaya agufa kavaʼmo hisayafeʼmae.
Currently Selected:
Hamakaki 3: kyg2013
Highlight
Share
Copy
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.
