Maki 6

Nasalasa taonifiʼmo maiʼnaya vayaʼmogi Yesuna apakameʼyamo amiʼnaya gemae

(Mt 13:53-58; Lu 4:16-30)

1Yesuʼa ani kotegamo ataleno noʼalegamo uʼnigeʼapaeʼmo geʼamo neʼafiya vayaʼmo akame huʼa uʼnae. 2#Yo 7:15Agaemo Sapati afinaʼmo Yu vayaʼai mono nopiʼmo uno haino mono gemo aepa faino alino apaya maleʼniye. Asole vayaʼmogi ani gemo afiʼa hapau aiteʼapaeʼmo, mani vekamo ani gemo haiyaʼaletiʼmo aliʼniye. Alagepa agesa afi yaʼmo haiya agufa agesa afi yaʼmo aliʼniyaʼmofeʼmo noʼagona agufa lokiya kavaʼmo nehiye. 3#Yo 6:42Lagaemo ageʼnonana noʼmo nekiya vekamo maiʼniye. Maliya mafaʼnemo maiʼnigeta ageteta aganaʼamogimo Yemisiʼagi Yosesiʼagi Yutasiʼagi Saimoniʼagi huta apaketeta asaʼamogiʼeʼmo magokepi lokaeta maiʼnone, huʼa huteʼa hosu apaipamo kaliʼa ateteʼa apakameʼyamo amiʼnae.

4 # Yo 4:44 Yesuʼa hunoʼaeʼmo, Gotitegati gemo alinineno aeno hakalo huno hapa nepaiya vekamoʼmo muki haopalegamo agi haneʼniyaʼmonanafa afamo anagaʼafiʼe noʼalega vayaʼaitegaʼeʼmo agimo ohaneʼniye, huno hapa paiʼniye. 5Agaemo noʼaleʼmo noʼagaya agufa lokiya kavaʼmo afaʼa osuʼniye. Afaʼa osuʼniyaʼmonanafa magoke magoke vayaʼmo kaita hapauʼniya vayaʼaiteʼmo ayaʼmo maleʼneno alino hapageno apateʼniye. 6Agaefeʼmo apakesa afiʼa fatago osuʼnayaʼmofeʼmo agesa alaʼamo afiʼniye. Apatalenuno Goti gemo hapa pai male hapa pai male huno uneno huʼniye.

Yesuʼa tuolofuʼa vayaʼmo alino apateʼnigeʼa uʼnaya gemae

(Mt 10:5-15; Lu 9:1-6)

7 # Lu 10:1 Yesuʼa tuolofuʼa vayaʼaifeʼmo, eyo, huno huʼnigeʼa agaetegamo eʼnageno lole vekalaʼmo alino lokaeno anatete anatete huteno alino apatesigeʼa uʼa hosu apaune vayaʼmo aliʼa hapafaiʼa apatalesayafeʼmo himamuʼamo apamiʼniye. 8-9#Lu 10:4-11Apamiteno hapa painoʼaeʼmo, muki asole yatapimo alinita oʼviyo. Kunagi peleti mayagi kutapifi monigi hutapa alinita oʼviyo. Hayopa kayotapimo alige suʼmo vaige magoke siotimo vaige hutapa viyo. 10Uta taonifiʼmo avaʼyi hutetapaeʼmo magoke nopiʼmo uta haita maiʼnetapa henagaʼamo ataleta viyo. 11#Ap 13:51Neʼvisageʼapaeʼmo mago taonifiʼmo maiʼnisaya vayaʼmogimo aliʼa falu fala huʼa olapateʼa getapimo oʼafisayaʼmoʼmo Gotiʼa kavatieʼmo ohauʼniye, huʼa agesayafeʼmo apataleta ugefeʼmo lapaiyaletiʼmo mumusopamo alita fopo hutaletapa viyo. Lama ge huve, huno, Gotiʼa agoti huno apatesiya afinaʼmo Sotomi taonifiʼe Gomola taonifiʼeʼmo maiʼnaya vayaʼmogi mago hosu yaʼmo aligayaʼmonanafa ani taonifiʼmo maiʼnaya vayaʼmogi magoʼe huʼa lusi hosu yaʼmo aligae, huno hapa paiʼniye. 12Uʼa Goti gemo hapa paiʼapaeʼmo, lapaipamo alita afe leyo, huʼa hapa paiʼnae. 13#Ye 5:14Apakaemo vayaʼai apaipafatiʼmo asole hosu apaune vayaʼmo aliʼa hapa faiʼa apatalege kaita hapauʼniya vayaʼmo uvelimo faleʼa apateteʼa aliʼa hapageʼa apatege huʼnae.

Yoniʼa aniʼmo faleno neʼapateya vekamo ago faliʼniya gemae

(Mt 14:1-12; Lu 3:19-20; 9:7-9)

14 # Mt 16:14; Mk 8:28 Muki haopalegamo maiʼnaya vayaʼmogimo Yesu agiʼamo afiʼnagenoʼaeʼmo gamani vekamo yagaino apateʼniya vekamo Helotiʼeʼmo afiʼniye. Afitenoʼaeʼmo, Yoniʼa aniʼmo faleno neʼapateya vekamo kanolufatiʼmo ago he tiʼniyaʼmofeʼmo aipafatiʼmo himamuʼaletiʼmo noʼagaya lokiya kavaʼmo nehiye, huno huʼniye. 15Mago vayaʼamogi huʼapaeʼmo, Ilaiyaʼa maiʼniye, huʼa huʼnageʼa mago vayaʼamogi huʼapaeʼmo, Gotitegati gemo alinineno aeno hakalo huno hapa nepaiya vekamo akeyaʼvilaga vayaʼmogi Gotitegati gemo alini eʼa aeʼa hakalo huʼa hapa nepaiya vayakana huno maiʼniye, huʼa huʼnae. 16Ani ge huʼnayaʼmonanafa Helotiʼa hunoʼaeʼmo, Yoniʼa lugoʼamo heʼna hatagauʼna ataleʼnova vekamo kanolufatiʼmo ago he tiʼniye, huno huʼniye.

17-18 # Mon 18:16 Hogoteno Helotiʼa ati vayaʼmo alino apateʼnigeʼa uʼa Yoniʼa atafauʼa kalavusi huʼa ateʼnae. Helotiʼa aganaʼamo Filipi aʼmo agiʼamo Helotiyasitefeʼmo kalavusi huno ateʼniye. Helotiʼa Helotiyasiʼmo aliʼnigeno Yoniʼa hunoʼaeʼmo, kaganakamo aʼmo aliʼnanaʼmofeʼmo Goti keʼaepa gemo ago amagika ataleʼnane, huno huʼnigenoʼaeʼmo 19Helotiyasiʼa Yonifeʼmo hosu aipamo kaliʼnigeno amagigefeʼmo huʼniyana afaʼa oʼamagiʼniye. 20Helotiʼa hunoʼaeʼmo, Yoniʼmo aote vekamo fatago kavaʼage nehiya vekae, huno agesamo afiteno Yonifeʼmo koli huteno yagaino ateʼniyaʼmofeʼmo Helotiyasiʼa afaʼa oʼamagiʼniye. Helotiʼa Yoni geʼamo afiteno asole kavatefeʼmo akame huteno magoʼe huno afisiyafeʼmo hauʼniye. 21Helotiʼa itaʼamoʼmo alino ateʼniya afinaʼmo halate afole aiʼnigeno yagita huʼnigeʼapaeʼmo yagaiʼa apateʼnaya gamani vayanagi ati vayaʼaiteʼmo yagaiʼa apateʼnaya vayanagi Galeliya kotega ala apaki vayanagi huʼa eʼa neʼyaʼmo neʼnae. Ani afinaʼmo Helotiyasiʼa Yoniʼmo amagisiya kaʼmo ageʼniye. 22Helotiyasiʼa aʼmafaʼneʼamoʼmo yagita huʼnaya nopiʼmo eno haineno oaeʼnigeʼapaeʼmo Helotiʼe magokepi lokaeʼa maiʼnaya vayaʼmogiʼeʼmo ageteʼa amuse huʼa ateteʼa kini vekamo yagaino neʼapateya vekamoʼmo hunoʼaeʼmo, na agufa yafeʼmo kahauʼnisifigi naha paiyo, huno, afaʼa kamiguve. 23#Est 5:3,6; 7:2Yagaika apateʼnana yapatiʼmo folagapati alika fako huka magokayagaʼamo namiyo, huka hisanaʼmoʼmo afaʼa aliʼna fako huʼna kamiguve, huno huteno agoʼyamo ataleʼniye. 24Ani aʼmafaʼnemoʼmo uno itaʼamofeʼmo hunoʼaeʼmo, na yaʼmo namiyo, huʼna hisuve, huno ge huno afi geʼnigenoʼaeʼmo, Yoniʼa aniʼmo faleno neʼapateya vekamo lugoʼamo heka hatagauka agenopaʼamo alinikeka namiyo, huka ha paiyo, huno huʼniye. 25Huʼnigenoʼaeʼmo malage huno uno kini vekaeʼmo hunoʼaeʼmo, kagaemo Yoniʼa aniʼmo faleno neʼapateya vekamo lugoʼamo heka hatagauka agenopaʼamo alika yuvapafiʼmo maleteka alinikeka namiyo, huno huʼnigenoʼaeʼmo 26kini vekamoʼmo lusi kava huno aipamoʼmo kana huʼniye. Huʼniyaʼmonanafa hogoteno agoʼyamo ataleteno ge huʼnigeʼa magokepiʼmo lokaeʼa maiʼnaya vayaʼmogimo ago ageʼnayaʼmofeʼmo haʼao huno hisiyafeʼmo ohauʼniye. 27-28Kini vekamoʼmo malage huno ati vekaeʼmo hunoʼaeʼmo, uka lugoʼamo heka hatagauka agenopaʼamo yuvapafiʼmo alika maleka alinika eno, huno huteno alino ateʼnigeno kalavusi nopiʼmo uno haino Yoni lugoʼamo heno hatagauno agenopaʼamo yuvapafiʼmo alino maleno alinineno ani aʼmafaʼnemo amiʼnigeno alininuno itaʼamoʼmo amiʼniye. 29Yoni geʼamo neʼafiya vayaʼmogi ani gemo afiteʼa eʼa agufaʼamo aliniʼuʼa kiʼa ateʼnae.

Apa vayaʼmo atagi neʼeʼa maiʼnageno Yesuʼa faefu tauseniʼa vayaʼaina neʼyaʼmo apamiʼniya gemae

(Mt 14:13-21; Lu 9:10-17; Yo 6:1-13)

30 # Lu 10:17 Kiʼa atetageʼapaeʼmo apa vayaʼmo alino apateʼnigeʼa uʼnayategatiʼmo aiʼa atagi neʼa Yesutega eʼa aliʼa anupa huʼa maiʼneʼapaeʼmo ina kavaʼmo huʼnone ina gemo alita apaya maleʼnone, huʼa ha paiʼnae. 31#Mk 3:20Ha paiʼnagenoʼaeʼmo, lagaitigeʼmo uta kaʼme kotega mago afinaʼmo maita haga legaune, huno hapa paiʼniye. Asole vayaʼmo uʼeʼa huʼnageʼapaeʼmo neʼyaʼmo nesaya kanaʼapimo alagi ohaneʼniyaʼmofeʼmae. 32Huno hapa paiʼnigeʼa sipifiʼmo uʼa haiʼa maiteʼa apakaiʼapigeʼmo kaʼme kotegamo uʼnayaʼmonanafa 33asole vayaʼmogi ago apaketeʼapaeʼmo, apakaemae, huʼa huteʼa muki taonifatiʼmo nagu nagu huʼa uʼnae. Uʼa aeʼa apaka seʼa uʼa hogoteʼa avaʼyi huʼnageno 34#Mt 9:36Yesuʼa sipifatiʼmo emineno apakeyana asole vayaʼmo eʼa maiʼnageno apaketenoʼaeʼmo, sipisipile neʼyagaiya vekamo oʼmaiʼnigeʼa afa sipisipigana huʼa maiʼnae, huno huteno hau huno apateteno aepa faino alino apaya maleʼniye. 35-36#Mk 8:1-9Yegemo uno lamino falegefe huʼnigeʼapaeʼmo geʼamo neʼafiya vayaʼmogi eʼa ha paiʼapaeʼmo, kaʼme kotegamo eta maiʼnonageno yegemo uno lamino falegefe hiyanagi neʼyaʼapimo ohaneʼniyaʼmofeʼmo alika apategeʼa u eʼa huʼa hoyalegatiʼe taonifilagatiʼeʼmo neʼyaʼapimo miya faiyo, huʼa ha paiʼnae. 37Ha paiʼnagenoʼaeʼmo, lapakaemo neʼyaʼmo apamiyo, huno huʼnigeʼapaeʼmo, lagaemo neʼyaʼmo apamisuna yaʼmo ohaneʼniyanageta tu hataleti kinaletiʼmo uta peleti mayamo miya failiteta apamisunafeʼmo kahauʼnifiye, huʼa ge huʼa afi geʼnae. 38Afi geʼnagenoʼaeʼmo, Lapakaemo na magi peleti mayamo aliʼnae. Uta ageyo, huno huʼnigeʼa uʼa ageteʼapaeʼmo faefuʼa peleti mayaʼe lole noyameʼeʼmo haneʼniye, huʼa ha paiʼnae.

39Agaemo hunoʼaeʼmo, lapaote lapaote hutapa kahauleʼmo fai maiyo, huta hapa paiyo, huno hapa paiʼniye. 40Ina kava huʼa fifitiʼa vayaʼmo maige vani hataletiʼa vayaʼmo maige huʼa kahauleʼmo fai maiʼnae. 41#Mk 7:34Agaemo faefuʼa peleti mayaʼe lole noyamelaʼeʼmo aliʼneno alino maku huno kokuʼnategamo ageteno peleti mayamo alino auleno ateteno akaya heteno geʼamo neʼafiya vayaʼaina apamiʼnigeʼa aliʼa apamiʼnae. Ina kava huno lole noyamelaʼeʼmo alino akaya heteno apamiʼniye. 42Apamiʼnigeʼa aliʼa apamiʼnageʼa neʼa apamu huʼnae. 43Geʼamo neʼafiya vayaʼmogi neteʼa atalaya atupaʼamo aliʼa tuolofuʼa hona yuvapafiʼmo maleʼa havai teʼnae. 44Faefu tauseniʼa agufa vayaʼmogimo ani neʼyaʼmo neʼnae.

Yesuʼa ani agotofuleʼmo eʼniya gemae

(Mt 14:22-23; Yo 6:16-21)

45Yesuʼa malage huno geʼamo neʼafiya vayaʼaifeʼmo hunoʼaeʼmo, sipifiʼmo uta haitetapa uta hogoteta aniʼmo mugagayaga faliga Metasaita taonifiʼmo neʼvigeʼnao, huno huteno asole vayaʼmo alino apateʼnigeʼa uʼnae. 46#Lu 5:16; 6:12; Lu 9:28Utageno Yesuʼa nunumuʼmo hugefeʼmo avefiʼmo uno haiʼniye. 47Hani huʼnigeʼapaeʼmo geʼamo neʼafiya vayaʼmo ani kotu folagapiʼmo sipifi neʼvagenoʼaeʼmo Yesuʼa agaiʼageʼmo mopafiʼmo maiʼniye. 48Maiʼnenoʼaeʼmo apakeyana yasimoʼmo alino agoʼya faiʼnigeʼapaeʼmo latapa kayotetiʼmo aniʼmo avaleʼa aliʼa ataleme ataleme uʼnayana afaʼa oʼuʼnae. Saufamo kotigefe huʼnigenoʼaeʼmo apakaetegamo ani agotofuleʼmo eno aeno apaka seno ugefe huʼnigeʼa 49#Lu 24:37agayana ani agotofuleʼmo eʼnigeʼa ageteʼapaeʼmo, afene, huʼa apakesamo afiteʼa kage kage huʼnae. 50Mukiʼamogimo ageteʼa lusi kava huʼa koli huʼnayaʼmofeʼmae. Maiʼnagenoʼaeʼmo Yesuʼa malage huno hapa painoʼaeʼmo, lokiya vaita maiyo. Nagaemo neʼovanagi koli osiyo, huno huteno 51#Mk 4:39sipifiʼmo eno haino apakaeʼeʼmo magokepi maiʼnigeno yasimo hano huʼnigeʼapaeʼmo lusi kava huʼa hapau aiʼnae. 52#Mk 8:17Yesuʼa aise peleti mayafatiʼmo magoʼe huno asole neʼyaʼmo apamiʼniya kavafeʼmo alagepa huʼa apakesamo oʼafiʼnayaʼmonanafa apakesamo ago akaniʼniya vayakana huʼa maiʼnayaʼmofeʼmo yasimo hano huʼnigeʼapaeʼmo hapau aiʼnae.

Yesuʼa Genesaleti kotegamo uno kaita hapauʼniya vayaʼaina alino hapageno apateʼniya gemae

(Mt 14:34-36)

53Aniʼmo lakaeʼuʼa Genesaleti kotegamo avaʼyi huteʼapaeʼmo sipimo nofi aeʼa ateʼnae. 54Sipifatiʼmo uʼa nelamigeʼapaeʼmo ageteʼa Yesuʼmo neʼe, huʼa ageʼnae. 55Ageteʼa anile maiʼnaya vayaʼmo nagu nagu huʼa uʼa muki haopalegatiʼmo kaita hapauʼniya vayaʼmo hiʼyopa kayoʼapileʼmo aliniʼa Yesuʼa ani haopalegamo maiʼniye, huʼa huʼnaya yategamo apavaleliʼa eʼnae. 56#Mt 14:36Yesuʼa aise taonifinagi alopa taonifinagi muki haopalegagi huno umenitata huno maiʼnigeʼapaeʼmo kaita hapauʼniya vayaʼaina apavaleliʼeʼa maketi kumateʼmo apateʼnageʼa maiʼneʼapaeʼmo kaita hapauʼniya vayaʼmogimo huʼapaeʼmo, kahao ke honanagi kukenakamo atupaʼaleʼmo ame aligesune, huʼa huteʼa ame aliʼnae. Muki ame aliʼnaya vayaʼai kaitaʼapimo alino hapageno apateʼniye.

Currently Selected:

Maki 6: kyg2013

Highlight

Copy