Matiyu 7

Aliʼa fako huʼa neʼapataya kavafeʼmo huʼniya gemae

(Lu 6:37-38,41-42)

1 # Lo 2:1; 1 Ko 4:5; Ye 4:11-12 Gotiʼa kavatapimo alino fako huno olapatesiyafeʼmo alu vayaʼai kavaʼapimo alita fako huta oʼapateyo. 2#Mk 4:24Haiya kava hutapa vayaʼai kavaʼapimo alita fako huta neʼapatesafi ani agufa kavakeʼmo huno alino fako huno lapategaiye. Na agufa kavatetiʼmo alita fako hutapa neʼapatesafi ani agufa kavakeʼmo huno alino fako huno lapategaiye. 3Na kava higetapaeʼmo konagatapimo aulagafiʼmo afayaʼmo haneʼnigetapa neʼagayaʼmonanafa lapaulagafiʼmo latapa yakefamo haneʼniya yaʼmo noʼagae. 4Latapa yakefamo lapaulagafiʼmo haneʼniyaʼmonanafa na kava higetapaeʼmo konagatapieʼmo hutapaeʼmo, kaulagafatiʼmo afayaʼmo aliʼna atalegauve, hutapa nehae. 5Aeta ati nekaya vayane, huʼna, alagepa hutapa agetetapa konagatapimo aulagafatiʼmo afayaʼmo alita atalesayafeʼmo hogoteta lapaulagafatiʼmo latapa yakefamo alita akaitapa ataleyo.

6 # Mt 10:11 Gotitegatiʼmo aote yaʼmo alitapa kalamo oʼapamiyo. Lapakaemo alopa miyatetiʼmo miya nefaiya sesumo alita yaga autapa afu anagaʼmo oʼapamiyo, fiku apaiyaletiʼmo aeʼa latapaiteʼa lapaegae.

Nunumuʼmo hisuna kavafeʼmo huʼniya gemae

(Lu 11:9-13)

7 # Mk 11:24; Yo 14:13; 15:7; Yo 16:23-24 Ge hutapa afi nekegenoʼao afaʼa lapamigiyanagi. Kahauya hiyo agetapa aligayanagi. 8#Ye 1:5; 1 Yo 3:22; 1 Yo 5:14-15Hakalu hakalu nehigenoʼao kitamo yakino lapategaiyanagi. Muki vayaʼmogi Gotifeʼmo ge huʼa afi nekaya vayaʼmogimo afaʼa aligae. Kahauya nehaya vayaʼmogimo ageʼa aligae. Hakalu hakalu nehaya vayaʼmo uʼa haisayafeʼmo kitamo yakino apategaiye.

9Lapakaepatiʼmo mago mafaʼnemoʼmo afoʼamofeʼmo hunoʼaeʼmo, mayamo namiyo, huno afi nekesigenoʼaeʼmo afoʼamoʼmo mago yafaʼmo alino amigifiye. 10Inagi mago noyame alika namiyo, huno afi nekesigenoʼaeʼmo afoʼamoʼmo nagaloʼyavemo alino amigifiye. Haʼao, alino oʼamigiye. Lapakaemo mafaʼnetapimo mago hosu yaʼmo alita noʼapamiye. 11#Ye 1:17Lapakaemo hosu vayaʼmo maiʼnayaʼmonanafa mafaʼnetapimo alagepa yakeʼmo alita neʼapamiya kava huno kokuʼnapi afotapimoʼmo magoʼe huno aeno lapaka seno maiʼnenoʼaeʼmo ge huʼa afi nekaya vayaʼmo alagepa yaʼmo apamigiye. 12#Mt 22:39-40; Lu 6:31; Lo 13:8-10Mosese keʼaepa geʼe Gotitegati gemo alini eʼa aeʼa hakalo huʼa hapa nepaiya vayaʼai gemoʼeʼmo aepaʼamoʼmo hunoʼaeʼmo, lapakaemo na agufa kavaʼmo lapakaetegamo hisaya kavafeʼmo lahapauʼnisiyaʼmoʼmo ani agufa kavakeʼmo muki vayaʼaitegamo hiyo.

Lole katalafeʼmo huʼniya gemae

(Lu 13:24)

13 # Yo 10:7,9 Alino apagoʼya lagauno apatalesiya kate kipaʼmo alopa kipaʼe alopa kaʼeʼmo haneʼnigeʼa muki asole vayaʼmo ani kateʼmo neʼvayaʼmofeʼmo aise kipapiʼmo uta haiyo. 14#Ap 14:22Afaʼa maisaya yaʼmo alisaya kate kipaʼmo aise kipaʼmo haneʼnigeno lokiya kaʼmo haneʼnigeʼa magoke magoke vayaʼmogigeʼmo ha ha huʼa kahauya huʼa neʼagae, huno hapa paiʼniye.

Yosaeʼmo aeno kalafefa gemo huʼniya gemae

(Lu 6:43-44; 13:25-27)

15 # Mt 24:4,24; Ap 20:29; 2 Pi 2:1 Aigofe vayaʼmogi gemo alini eʼa aeʼa hakalo huʼa hapa nepaiya vayaʼaifeʼmo ehetapiye. Apakaemo sipisipi agufamo heʼa kalopaeʼa apakufaleʼmo vailiʼneʼa neʼayaʼmofeʼmo afela kalamoʼmo vayaʼmo nehapaeya kalagana huʼa maiʼnae. 16#Ga 5:19-22; Ye 3:12Apaipafatiʼmo alagamo neʼaesigetapa apaketetapaeʼmo, haiya agufa vayaʼmo maiʼnafi, hutapa apakegae. Aufe yosamoʼmo haga nehiya nofi alagamo afaʼa neʼaefiye. Hosu kahaumoʼmo haga alagamo afaʼa neʼaefiye. Haʼao. 17Alagepa yosamoʼmo alagepa alagaʼageʼmo neʼae. Hosu yosamoʼmo hosu yosa alagaʼageʼmo neʼae. 18Alagepa yosamoʼmo hosu yosa alagamo afaʼa oʼaegaiye. Ani kava huno hosu yosamoʼmo alagepa yosa alagamo afaʼa oʼaegaiye. 19#Mt 3:10; Lu 3:9; Yo 15:6Muki alagepa alagamo noʼaeya yosaʼamo ago heʼya aiteʼa aliʼa atafiʼmo yaga auʼa nekae. 20#Mt 12:33He, apaipafatiʼmo alagamo aeʼnisigetapa apaketetapaeʼmo haiya agufa vayaʼmo maiʼnafi hutapa apaketa aeto hugae.

21 # Lu 6:46; Mt 21:31; Lo 2:13; Ye 1:22,25 Muki vayaʼmogimo nagaefeʼmo huʼapaeʼmo, ala kava nene, ala kava nene, huʼa nehaya vayaʼmogimo Gotiʼa yagaino neʼapateya koteʼmo afaʼa uʼa ohaigayaʼmonanafa kokuʼnapi afoʼnimoʼmo hauʼniya kavaʼageʼmo nehaya vayaʼageʼmo afaʼa uʼa haigae. 22Ani alopa afinaʼmo afole neʼaisigeʼapaeʼmo asole vayaʼmogimo nagaefeʼmo, Ala kava nene, Ala kava nene, huʼa, kagikaletiʼmo Goti geʼamo aeta hakalo huta hapa opaiʼnopiye. Kagikaletiʼmo vayaʼai apaipafatiʼmo sigisiʼa hosu apaune vayaʼmo alita hapa faita oʼapataleʼnopiye. Kagikaletiʼmo asole noʼagaya aune kavaʼmo osuʼnopiye, huʼa naha paisageʼnaeʼmo, 23#Sam 6:8; Mt 10:33; 25:41; Mt 13:41-42; 2 Ti 2:19hosu kavaʼmo nehaya vayanageʼna alagi olapakeʼnovanagi nagaetegatiʼmo ago ataleta lapaune heyo, huʼna hapa paiguve.

Lole vekalaʼmoganimo noʼmo ki maleʼnaʼa kavafeʼmo huʼniya gemae

(Lu 6:47-49)

24Ani kavafeʼmo huʼnaeʼmo, muki vayaʼmogimo mani hapa nepauva gemo afiteʼa akame nehaya vayaʼmogimo mago afiteno ageʼniya vekamoʼmo noʼamo alopa yafateʼmo faino ateteno ki maleʼniya vekagana huʼa maiʼnae. 25Koʼmo aiteno aniʼmo hege yasimo alige hulineno noʼamo alino agoʼya faisiyafeʼmo huʼniyana alopa yafateʼmo noʼamo faino ateteno ki maleʼniyaʼmofeʼmo asagauno oʼaiʼniye. 26Inagi muki vayaʼmogimo mani nehuva gemo fikumo afiteʼa akame nosaya vayaʼmo mago negi vekamoʼmo noʼamo ani kahaepaleʼmo fiku ki maleʼniya vekagana huʼa maiʼnae. 27Koʼmo aiteno aniʼmo hege yasimo alige hulineno noʼamo alagi alino agoʼya faino ataleʼnigeno lusi kava huno asagauno aiʼniye, huno hapa paiʼniye.

28Yesuʼa mani gemo hapa paino hano huʼnigeʼapaeʼmo afa vayaʼmogimo afiʼa hapau aiʼnae. 29#Mk 1:22; Lu 4:32; Yo 7:46Yesuʼa keʼaepa gemo aliʼa apaya neʼmalaya tisa vayaʼapigana huno alino apaya oʼmaleʼnifa himamuʼaletiʼmo alino apaya maleʼniyaʼmofeʼmo afiʼa hapau aiʼnae.

Currently Selected:

Matiyu 7: kyg2013

Highlight

Copy