Matiyu 6

Afaʼa hapa maeʼa neʼapamiya kavafeʼmo huʼniya gemae

1 # Mt 23:5 Ehetapiye, huʼna, Vayaʼmogimo lapakesayafeʼmo apaulagaleʼmo vayaʼmo hapa maesaya agufa kavaʼmo osiyo. Hisagenoʼaeʼmo kokuʼnapi afotapimoʼmo miyatapimo olapamigiye.

2Aeʼa ati nekaya vayaʼmogimo kagemi yaʼapimo ohaneʼnisiya vayaʼmo apamisayafeʼmo pikuli nehaya vayaʼaifeʼmo hapa paiʼapaeʼmo, hogoteta uta pikulimo hiyo, huʼa hapa nepaiye. Pikulimo huʼnageʼapaeʼmo vayaʼmogi ala apakiʼapimo apamisayafeʼmo mono nopiʼmofi kategamofi huʼa kagemi yaʼapimo ohaneʼniya vayaʼmo neʼapamiye. Ani agufa kavaʼmo osiyo. Lama gemo lapa nepauve, huno, miyaʼapimo ago aliʼnae. 3#Mt 25:37-40Ani kavaʼmo nehayaʼmonanafa kagemi yaʼapimo ohaneʼnisiya vayaʼmo apamigefeʼmo hisagenoʼaeʼmo hoga lapayaʼmoʼa lamaga lapayaʼmoʼmo hisiya kavaʼmo oʼageno. 4Afotapimoʼmo fala kita apamisaya kavatapimo agetenoʼaeʼmo muki vayaʼai apaulagaleʼmo miyatapimo lapamigiye.

Mani gemo hutapa nunumuʼmo hiyo, huno huʼniya gemae

(Lu 11:2-4)

5 # Mt 23:5; Lu 18:10-14 Aeʼa ati nekaya vayaʼmogimo muki vayaʼmogi apakesayafeʼmo muki mono nopiʼmo he tiʼa maiʼneʼa nunumuʼmo huge u eʼa nehayategaʼeʼmo he tiʼa maiʼneʼa nunumuʼmo huge nehae. Ani kava hutapa nunumuʼmo osiyo. Lama ge huʼnaeʼmo, miyaʼapimo ago aliʼnae. 6#2 Kin 4:33Nehayaʼmonanafa Afotapimofeʼmo nunumuʼmo hugefeʼmo notapifiʼmo uta haitapa kitamo ki maleʼneta fala kino neʼmaiya vekaekeʼmo nunumuʼmo hiyo. Afotapimoʼmo fala kita nehaya kavatapimo neʼageya vekamoʼa muki vayaʼai apaulagaleʼmo miyatapimo lapamigiye. 7#Aiy 1:15; 1 Kin 18:26-29Goti geʼamo alagi noʼafiya vayaʼmogimo muki afinaʼmo magoke agufa geʼageʼmo hume hume neʼuʼapaeʼmo, muki afinaʼaeʼmo nehuna gemo afaʼa afigiye, huʼa apakesamo neʼafiye. Ani kava hutapa nunumuʼmo osiyo. 8#Mt 6:32Apakaekana huta oʼmaiyo. Lapakaemo hogoteta afotapimofeʼmo kafu hisaya kavafeʼmo ge huta afi okeʼnagenoʼaeʼmo ago ageʼniye.

9 # Yo 17:6 Lapakaemo nunumuʼmo hugefeʼmo ina ge hutapa hiyo,

kokuʼnapi Afotimogae, hutapa, kagikamo alagepa huno kaote haneʼniyanageʼa aliʼa asaga hisaya kavaʼmo haneʼniye. 10#Mt 7:21; 26:39; Lu 22:42Vayaʼaiteʼmo yagaika apatesana kavakamo afole aino. Muki kokuʼnapi vayaʼmogimo kahauʼniya kavakamo akame nehaya kava huʼa ma mopafi vayaʼmogimo kahauʼniya kavakamo akame hiyo. 11Hemenimo nesuna neʼyaʼmo lamiyo. 12#Mt 6:14-15; Mt 18:21-35Vayaʼai anonaʼapilefeʼmo afaʼa ateyo, huta nehuna ge huka anonatilefeʼmo afaʼa ateyo, huka laha paiyo. 13#Lu 22:40; Ye 1:13; Yo 17:15; 2 Te 3:3; 2 Ti 4:18; 1 Sit 29:11-13Lamalageka hisiya kavategamo lavalelikuka olateka hosu kavategatiʼmo alika atagineka lategeta eno. Kagaika himamukaletiʼe ha le konali yakaletiʼeʼmo yagaika neʼapatane. He, lama ge.

14 # Mk 11:25-26 Apakaemo lapakaetegamo hosu kavaʼmo nehaya vayaʼaifeʼmo, kanalenagi afaʼa ateyo, huta hapa paisagenoʼaeʼmo kokuʼnapi Afotapimoʼmo ani agufa gegeʼmo huno lapakae hosu kavafeʼmo afaʼa ateyo, huno lapa paigiyaʼmonanafa 15alu vayaʼai hosu kavaʼapimo alita oʼatalesayana ani kava huno Afotapimoʼmo hosu kavatapimo afaʼa alino oʼatalegaiye, huno hapa paiʼniye.

Neʼyaʼmo mo nesiya kavafeʼmo huʼniya gemae

16 # Aiy 58:5-9 Aeʼa ati nekaya vayaʼmogimo neʼyaʼmo oʼneʼa mosiʼa maiʼneʼapaeʼmo neʼyaʼmo mo nesiya kavaʼapimo aliʼa apave lisayafeʼmo hosu apaugosamo nekaliye. Lama ge lapa nepauve, huʼna, miyaʼapimo ago aliʼnae. Neʼyaʼmo mosita maiʼnetapaeʼmo hosu lapaugosamo okaliyo. 17Neʼyaʼmo mosita maiʼnetapaeʼmo uvelimo lapakenopafiʼmo faletetapaeʼmo lapaugosafiʼeʼmo faleyo. 18Vayaʼmogimo huʼapaeʼmo, neʼyaʼmo oʼneʼa mosiʼa maiʼnae, huʼa osisayafeʼmae. Afotapimoʼmo fala kino maiʼniya vekamoʼa lapakaemo fala kita nehaya kavatapimo agetenoʼaeʼmo muki vayaʼai apaulagaleʼmo miyatapimo lapamigiye.

Alagepa yaʼapimo ageʼa alu ai neʼmalaya kavafeʼmo huʼniya gemae

(Lu 12:33-34)

19 # Ye 5:1-3 Alagepa kagemi yatapimo ma mopafiʼmo ageta alu ai oʼmaleyo, fiku yanageno kafamoʼmo hatagauge oʼaniʼya faige kumaya vayaʼmogi noʼmo aeʼa yakiʼa kumayaʼmo alige hugae. 20#Mt 19:21; Lu 18:22; Kl 3:1-2Alagepa kagemi yatapimo ageta kokuʼnapikeʼmo alu ai malegenoʼao, kafamoʼmo ohatagauge oʼaniʼya ofaige kumaya vayaʼmogi noʼmo aeʼa yakiʼa kumaya oʼalige hugae. 21Alagepa yatapimo ageta alu ai neʼmalaya kotegageʼmo lapaipa lapakesamo uno haino hanegaiye.

Apakupiʼmo kani aeno ha neleya kavafeʼmo huʼniya gemae

(Lu 11:34-36)

22Lapaulagamo lapakupi lamugana huno haneʼniye. Lapaulagamoʼmo ageno alagepa huno neʼagesiyana lapakupiʼmo aeno ha lesigeno ha le yaʼmo havaiteno hanegaiye. 23Lapaulagamoʼmo hosu kavaʼmo huno neʼagesiyana lapakupiʼmo hani huʼnisigeno hani yaʼmo havaiteno hanegaiye. Lapakupiʼmo aeno ha nolesiyana lusi kava huno hani huʼniya yaʼmo lapakupiʼmo nehane.

Kagemi yafeʼmo huʼniya gemae

(Lu 16:13; 12:22-31)

24Mago aliʼyaʼmo neʼalisiya vekamoʼmo lole aliʼyaʼmo afoʼalaʼmoganiteʼmo aliʼyaʼmo afaʼa oʼaligiye. Agaemo mago alu aliʼyaʼmo afoʼamofeʼmo aini huʼnisiyana mago alu vekaeʼmo hau ayamopafiʼmo hauʼnisigeno geʼamo afiteno alu aliʼyaʼmo afoʼamofeʼmo ohauʼnisigeno akameʼyamo amigiye. Lapakaemo ani kava hutapa Goti aliʼyaʼe ma mopafi aliʼyaʼeʼmo afaʼa oʼaligae.

25 # Fl 4:6; 1 Ti 6:6-8; Hi 13:5; 1 Pi 5:7 Inagi ma mopafi maisaya kavafeʼmo hutapaeʼmo, na agufa neʼyaʼmo negaune, hutapa huge na agufa aniʼmo negaune, hutapa huge na agufa kukena yaʼmo lagufaleʼmo vaigune, hutapa huge huteta lapakesa alaʼamo oʼafiyo. Ofalita afaʼa neʼmaiya kavakeʼmo hogote kavaʼmo haneʼnigeno neʼyaʼmo henaga yaʼmo haneʼniye. Lapakufageʼmo hogote yaʼmo haneʼnigeno kukenamo henaga yaʼmo haneʼniye. 26#Mt 10:29-31; Lu 12:6-7Haleli uʼeʼa nehaya nama anagaʼaifeʼmo lapakesamo afiyo. Nama anagaʼmogimo avina yaʼmo ohakalege hoyaʼapifatiʼmo neʼyaʼmo oʼalige neʼyaʼmo noʼapifiʼmo aliʼa alu ai oʼmalege nehayaʼmonanafa kokuʼnapi afotapimoʼmo neʼyaʼapimo afaʼa neʼapamiye. Lapakaemo nama anagaʼmo ago aeta apaka seta hogote vayaʼmo maiʼnae. 27Lapakaepatiʼmo ina laʼmo hausoli huteno agesa alaʼamo afiʼnisiyana afaʼa maisiyafeʼmo aise afinaʼmo magoʼe huno alino yatala huno ategaiye.

28Na kava higetapaeʼmo kukena yatapimo alisayafeʼmo lapakesa alaʼamo neʼafiye. Kahaufilaga kahaumoʼmo ause neheya kavafeʼmo lapakesamo afiyo. Kahaumoʼa aliʼyaʼmo oʼalige kukenamo alo osuge nehiyaʼmonanafa afaʼa nelagiye. 29#1 Kin 10; 2 Sit 9Nelagiyaʼmonanafa ausemoʼa ala vekaʼapimo kini vekamo Salomoniʼa vaino aliʼniya kukena yaʼamo ago aeno agaseʼniye. 30Inagi Gotiʼa kahaufilaga kahaumo hemenimo haneʼniyanageno egamo ata lesiya kahaumo auseʼamo vaino neʼateyaʼmofeʼmo kukena yatapimo magoʼe huno lapamigiye. Gotifekeʼmo laha maegaiye, hutapa aiseʼamo lapakesamo afita fatago nehae. 31Lapakaemo hutapaeʼmo, haiyatetiʼmo neʼyatimo aliniteta negaune, hutapa huge, haiyatetiʼmo anitimo hefita negaune, hutapa huge, haiyatetiʼmo kukenatimo aligune, hutapa huge huteta lapakesa alaʼamo oʼafiyo. 32#Mt 6:8Malaga vayaʼmogimo mani yafeʼmo hapaʼye nehigeʼapaeʼmo kahauya huʼa maiʼnae. Kokuʼnapi afotapimoʼmo ofalita afaʼa maisayafeʼmo neʼyatapiʼe kukenatapiʼeʼmo alisaya yatapimo haneʼniye, huno ago ageʼniye. 33#1 Kin 3:13-14; Sam 37:4,25; Lo 14:17Lapakaemo hogotetapa Gotiʼa yagaino neʼapateya vayapiʼmo haitapa maige fatago kavaʼamo alige hutapa maisayafeʼmo kahauya hiyo Gotiʼa muki yaʼmo ma mopafi maisaya yaʼmo magokepiʼmo lapamigiyaʼmofeʼmae. 34#Hat 16:4,19; Mt 6:11Lapamigiyaʼmofeʼmo egamo afole aisiya kavafeʼmo lapausoli huteta lapakesa alaʼamo oʼafiyo. Ega afinafeʼmo agaiʼa yafekeʼmo agesamo afigiye. Hemenimo afole neʼaiya hanageke yaʼmo haine.

Currently Selected:

Matiyu 6: kyg2013

Highlight

Copy