Matiyu 5

1Asole vayaʼmo ete ete huʼnageno Yesuʼa apaketenoʼaeʼmo avefiʼmo uno haino itopale maiʼnigeʼapaeʼmo geʼamo neʼafiya vayaʼmo agaetegamo eʼa aliʼa anupa huʼa maiʼnagenoʼaeʼmo 2aepa faino alino apaya maleʼniye.

Alagepa huʼa neʼmaiya vayaʼaifeʼmo huʼniya gemae

(Lu 6:20-23)

3 # Aiy 57:15 Hapa painoʼaeʼmo, launelametefeʼmo kagemi yatimo ageta oʼmaleʼnona vayaʼmo maiʼnone, huʼa apakesamo neʼafisaya vayaʼmogimo Gotiʼa yagaino neʼapateya kegiʼyafiʼmo haiʼa maiʼnageno muki yaʼamo apakaiʼapi yaʼmo haneʼniyaʼmofeʼmo Goti aulena vayaʼamo maiʼnae. 4#Aiy 61:2-3; Le 7:17Gotiʼa yulagefa neʼaiya vayaʼai apaipamo alino falu huno apategaiyaʼmofeʼmo Goti aulena vayaʼamo maiʼnae. 5#Sam 37:11Himuʼnamu kavaʼmo osuʼa yagu yaga kavaʼmo huʼa neʼmaiya vayaʼmogimo muki afoʼapimogi yaʼmo mafaʼneʼapimogimo neʼaliya kava huʼa muki ma mopamo aligayaʼmofeʼmo Goti aulena vayaʼamo maiʼnae. 6#Aiy 55:1-2Goti fatago kavaʼaeʼmo apaka neteya vayaʼmo apamisigeʼa neʼa apamu hugayaʼmofeʼmo Goti aulena vayaʼamo maiʼnae. 7#Ye 2:13Gotiʼa alu vayaʼaifeʼmo hapau huʼa apateteʼa hapa neʼmaya vayaʼaifeʼmo hau huno apateteno hapa maegaiyaʼmofeʼmo Goti aulena vayaʼamo maiʼnae. 8#Sam 24:3-4; Sam 51:10; 73:1Yaveyave apaipa vayaʼmogi Gotiʼmo afaʼa agegayaʼmofeʼmo Goti aulena vayaʼmo maiʼnae. 9#1 Yo 3:2-3Gotiʼa aliʼa nanu aeʼa neʼapataya vayaʼaifeʼmo hapa painoʼaeʼmo, mafaʼneʼnimo maiʼnae, huno hapa paigiyaʼmofeʼmo Goti aulena vayaʼamo maiʼnae. 10#Hi 12:4; 1 Pi 3:14Fatago kavaʼapilefeʼmo apaini huʼa apateʼnageʼa maiʼnaya vayaʼmogimo Gotiʼa yagaino neʼapateya kegiʼyafiʼmo uʼa haiʼa maiʼnageno muki yaʼamo apakaiʼapi yaʼmo haneʼniyaʼmofeʼmo Goti aulena vayaʼamo maiʼnae. 11#1 Pi 4:14; Ye 1:2Nagaetefeʼmo huʼa faipa huʼa lapatege apaini huʼa lapatege lapakaefeʼmo aigofe gemo huʼapaeʼmo, ani hosu kavaʼmo nehae, ina hosu kavaʼmo nehae, huʼa nehisayana Goti aulena vayaʼamo maiʼnae. 12#2 Sit 36:16; Ap 7:52; Hi 11:32-38; Ye 5:10Alopa miyatapimo kokuʼnapiʼmo lapateʼniya miyatapimo aligayaʼmofeʼmo lapaipafiʼmo alagepa huta lapamogaga aiyo. Apakaemo hogoteʼa ani agufa kavaʼmo huʼa maiʼnaya vayaʼmogimo Gotitegati gemo alini eʼa aeʼa hakalo huʼa hapa nepaiya vayaʼaifeʼmo apaini huʼa apateʼnayaʼmofeʼmo lapamogaga aiyo.

Hagegana hutapa maige ha le yakana hutapa maige huʼnaya vayaʼmogitapaeʼmo huʼniya gemae

(Mk 9:50; Lu 14:34-35)

13Lapakaemo ma mopafi vayaʼai hageʼapigana hutapa maiʼnae. Maiʼnayaʼmonanafa hagemoʼmo haga nehiya yaʼamo hano hisiyana haiya kava huno halate haga nehiya yaʼamo alino hamalegaiye. Aliʼyaʼamo ohanegaiyaʼmofeʼmo aliʼa yaga auʼa ataleʼnageʼa ani hageleʼmo apaiyaletiʼmo aeʼa umenitata nehae.

14 # Yo 8:12; 9:5 Lapakaemo ma mopafi vayaʼai ha le yaʼapigana hutapa maiʼnae. Mago taonimo avefiʼmo ki maleʼnisaya taonimoʼmo fala kino ohanegaifa afole yateʼmo haneʼnisigeʼa agegae. 15#Mk 4:21; Lu 8:16; 11:33Vayaʼmogimo lamufiʼmo kani aeʼa kaeteʼapaeʼmo paketimo ayopiʼmo noʼmalafa hiʼyalamutekeʼmo malenageno muki ani nopiʼmo maiʼnaya vayaʼmo alagepa huno aeno ha leno apateʼnigeʼa ageʼa ha leʼa neʼmaiye. 16#Ef 5:8-9; 1 Pi 2:12Ani kava hutapa vayaʼai apaulagaleʼmo kanitapimo aeta ha legeʼapao alagepa kavatapimo ageteʼapaeʼmo kokuʼnapi afotapimo agiʼaleʼmo aliʼa asaga huʼa ateyo.

Keʼaepa geʼaeʼmo huʼniya gemae

17 # Mt 3:15; Lo 3:31; 10:4 Lapakaemo nagaefeʼmo hutapaeʼmo, Agaemo Mosese keʼaepa geʼe Gotitegati gemo alini eʼa aeʼa hakalo huʼa hapa nepaiya vayaʼai geʼapiʼeʼmo alino atalesiyafeʼmo emineʼniye, hutapa lapakesamo oʼafiyo. Aliʼna atalesuvafeʼmo emiʼnoʼmeʼnofa aliʼna afole aiʼna atesuvafekeʼmo emineʼnove. 18#Lu 16:17; 21:33Lama ge lapa nepauve, huno, Keʼaepa gemoʼa aise yaʼatomo alagena yaʼmo magoke yaʼatomo alagi hano osuno afaʼa haneme haneme neʼvisigeno kokuʼnaʼe mopaʼeʼmo hano hugiye. Hogoteno muki keʼaepa geʼamo afole aite afole aite huno afole aino hano hugiye. 19#Ye 2:10Inagi mago vekamoʼmo henaga keʼaepa gefatiʼmo mago aise gemo amagino ataleteno vayaʼmogi amagiʼa atalesayafeʼmo alino apaya malesiyana Gotiʼa yagaino neʼapateya koteʼmo ina agufa vekamo maigiye. Maigiyaʼmonanafa mago vekamoʼmo keʼaepa gemo akame nehunoʼaeʼmo vayaʼmogi akame hisayafeʼmo alino apaya maleʼnisiyana Gotiʼa yagaino neʼapateya koteʼmo ala vekamo maigiye. 20Nagaemo lapa paiʼnaeʼmo, fatago kavatapimoʼmo keʼaepa gemo avoʼmo kaeʼa aliʼa apaya neʼmalaya vayaʼai fatago kavaʼapiʼe Falasi mono vayaʼai fatago kavaʼapiʼeʼmo alagi aeno oʼagasesiyaʼmoʼmo Gotiʼa yagaino neʼapateya koteʼmo uta ohaigae, huno hapa paiʼniye.

Apaipamo neleya kavafeʼmo ava gemo huʼniya gemae

(Lu 12:57-59)

21 # Hat 20:13; Hat 21:12; Mon 24:17; Loa 5:17 Akeyaʼvilaga vayaʼmogimo huʼapaeʼmo, Vayaʼmo kamitimo oʼapamagiyo. Mago vekamoʼmo mago vekamo kamitimo amagisigeʼapaeʼmo agoti huʼa ategae, huʼa huʼnagetapa ago afiʼnae. 22#1 Yo 3:15Afiʼnayaʼmonanafa nagaemo huʼnaeʼmo, mago vekamoʼmo agaetegamo hosu kavaʼmo osuʼnisiya konagaʼamofeʼmo aipamo leno atesiyana agoti huno ategaiye. Mago vekamoʼmo konagaʼamofeʼmo, nagiʼnaga vekae, huno huʼnisiyana kanisole vayaʼaitegamo avalelinuno alino he tino ategaiye. Mago vekamoʼa konagaʼamofeʼmo, faipa nagiʼnaga vekae, huno huʼnisiyana ata kopiʼmo uʼa nelamiya kateʼmo neʼviye.

23 # Mk 11:25 Ani gemo haneʼniyaʼmofeʼmo Gotiʼmo ofalinimo amisanafeʼmo hiʼyalamuteʼmo maleʼnekaeʼmo, konagaʼnimoʼmo nagaefeʼmo hosu aipamo kalino neʼnate, huka kagesa neʼafisanana 24ofalini hiʼyalamutetiʼmo atalekuka hogoteka alika kao yaʼmo hutetana magoke lanaipa lanakesamo alitetana atagi negeka ofalinimo amiyo. 25#Mt 6:14-15; Mt 18:34-35Mago vekamoʼa hunoʼaeʼmo, agoti huʼna kategesuve, huno hisigekaeʼmo malage huka alagepa huka alika fako huka ato. Agotileʼmo kavalelino oʼuʼnisigekaekeʼmo kategamo neʼutanaeʼmo malage huka alika alagepa huka ato. Fiku yanageno kavalelinuno alino fako huno neʼapateya vekamo ayapiʼmo katesigeno alino fako huno neʼapateya vekamoʼmo kavalelinuno ati vekamo ayapiʼmo katesigeno ati vekamoʼmo alino kalavusi huno kategaiye. 26Lama ge kaha nepauve, huno, anonakalefeʼmo alagi maleka hano osisanaʼmoʼmo afaʼa ataleka oʼugane.

Kumai kavafeʼmo huʼniya gemae

27 # Hat 20:14; Loa 5:18 Mago vayaʼmogimo, Kumai kavaʼmo osiyo, huʼa huʼnagetapa ago afiʼnae. 28#2 Pi 2:14Mani gemo ago huʼnayaʼmonanafa hemenimo nagaemo lapa paiʼnaeʼmo, Mago vekamoʼa a kanomo agetenoʼaeʼmo haʼye nehisiyana aipafiʼmo ani a kanoʼeʼmo kumai kavaʼmo huʼniye. 29#Mt 18:9; Mk 9:47; Kl 3:5Lamaga lapaulagamoʼmo lapayate aliʼnisigetapa hosu kavaʼmo nehisayana alita katita ataleyo. Lapakufafatiʼmo magoke yatapimo alita ataletetapa ata kopiʼmo oʼvisayana kanale hugiyaʼmonanafa hosu kavaʼmo nehisageno muki lapakufaʼaʼeʼmo alino ata kopiʼmo yaga auno lapatalesigenoʼaeʼmo hosugiye. 30#Mt 18:8; Mk 9:43Lamaga lapayaʼmoʼmo lapayate aliʼnisigetapa hosu kavaʼmo nehisayana heta hatagauta ataleyo. Lapakufafatiʼmo magoke yatapimo alita ataletetapa ata kopiʼmo oʼvisayana kanale hugiyaʼmonanafa hosu kavaʼmo nehisageno muki lapakufaʼaʼeʼmo alino ata kopiʼmo yaga auno lapatalesigenoʼaeʼmo hosugiye.

31 # Loa 24:1-4; Mk 10:4; 1 Ko 7:10-11 Akeyaʼvilaga vayaʼmogimo huʼapaeʼmo, Mago vekamoʼmo aʼamo ha faino atalesiyafeʼmo hunoʼaeʼmo hapa faiʼa neʼapatalaya avoʼmo kaeno amiteno hafaino atalegaiye, huʼa huʼnae. 32Ani gemo huʼnayaʼmonanafa hemenimo nagaemo huʼnaeʼmo, mago vekamoʼmo aʼamoʼmo kumai kavaʼmo osuʼnisiya a kanomo ha faino ataleʼnisiyana kumai kavaʼmo hisiyafekeʼmo ha faino atalegaiye. Ani kava huno mago vekamoʼa ha faino ataleʼnisiya aʼmo aliʼnisiyana kumai kavakeʼmo hugiye.

Gotitegatiʼmo alagi lama gemo nehuve, hutapa osiyo, huno huʼniya gemae

33 # Hat 20:7; Mon 19:12; Nap 30:2; Loa 23:21 Akeyaʼvilaga vayaʼmogimo magoʼe gemo huʼapaeʼmo, Gotitegatiʼmo alagi lama gemo nehuve, hutapa hisaya gemo amagita oʼataletapa alagi akame hiyo, huʼa huʼnagetapa ago afiʼnae. 34#Aiy 66:1; Ye 5:12; Mt 23:22; Ap 7:49Ani gemo huʼnayaʼmonanafa hemenimo nagaemo lapa paiʼnaeʼmo, Gotitegatiʼmo alagi lama gemo nehuve, hutapa osiyo. Kokuʼnapiʼmo Gotiʼa fai maiʼneno yagaino neʼapateya aimuʼyamo haneʼniyaʼmofeʼmo muga anaga kokuʼnategatiʼmo alagi lama gemo nehuve, hutapa osiyo. 35#Sam 48:2; Aiy 66:1Ma mopafiʼmo Gotiʼa aiyamo aeno neʼmaiya mopamo haneʼniyaʼmofeʼmo ma mopaletiʼmo alagi lama gemo nehuve, hutapa osiyo. Yulusalemu taonimo hogote kini vekamo taoniʼamo haneʼniyaʼmofeʼmo Yulusalemu taonifatiʼmo alagi lama gemo nehuve, hutapa osiyo. 36Lapakaemo anupa lapayokapatiʼmo magoke lui lapayokamo afaʼa alita afole aitapa oʼatege lui lapayokapatiʼmo magoke anupa lapayokamo afaʼa alita afole aitapa oʼatege hugayaʼmofeʼmo lahapaniletiʼmo alagi lama gemo nehuve, huta osiyo. 37#Ye 5:12He, nehutapaeʼmo heʼagekeʼmo hiyo. Haʼao, nehutapaeʼmo haʼaoʼagekeʼmo hiyo. Magoʼe huta hosu agufa gemo nehaya gemo alagi hosu vekalegatiʼmo neʼe.

Hosu kavaʼmo anonaʼapileʼmo aeta atagaina huta hosu kavaʼmo osiyo, huno huʼniya gemae

(Lu 6:29-30)

38 # Hat 21:24; Mon 24:20; Loa 19:21 Akeyaʼvilaga vayaʼmogimo huʼapaeʼmo, Mago vekamoʼmo kaulagamo aino apalo atisigekaeʼmo ani kava huka agae aulagamo aika apalo atiyo. Kaveʼmo aino atafaisigekaeʼmo ani kava huka agae aveʼmo aika atafaiyo, huʼa huʼnagetapa ago afiʼnae. 39#Mon 19:18; Yo 18:22-23Mani gemo huʼnayaʼmonanafa hemenimo nagaemo lapa paiʼnaeʼmo, Lapakaetegamo hosu kavaʼmo hisagetapaeʼmo afaʼa maiyo. Mago vekamoʼmo lapakalametaleʼmo lapamagisigetapaeʼmo magokayaga lapakalametamo aita afe letapa amigeno lapamagino. 40#1 Ko 6:7Mago vekamoʼmo siotitapimo alisiyafeʼmo hunoʼaeʼmo, agoti huʼna lapategesuve, huno hisigetapaeʼmo alapa saketitapiʼeʼmo asagita amiyo. 41Mago gamani vekamoʼmo hunoʼaeʼmo, kuʼnileʼmo naha maeta alita kofilitutapa mago afafaleʼmo nateyo, huno hisigetapaeʼmo kuʼamo ha maetapa alita kofilituta atetetapaeʼmo halate magoʼe hutapa alita kofilituta mega afagiʼaleʼmo ateyo. 42Mago vekamoʼa hunoʼaeʼmo, mago yaʼmo namiyo, huno lapafi gesigetapaeʼmo afa amiyo. Mago vekamoʼa mago yafeʼmo hunoʼaeʼmo, yoka namiyo, huno lapafi gesigetapaeʼmo lapakameʼyamo oʼamita afa amiyo.

Kame vayatapieʼmo lapau lapayamopafiʼmo lapaino, huno huʼniya gemae

(Lu 6:27-28,32-36)

43 # Mon 19:18 Akeyaʼvilaga vayaʼmogimo huʼapaeʼmo, lapaopaleʼmo maiʼnaya vayaʼaifeʼmo lapau lapayamopafiʼmo lapauʼninagetapa kame vayatapieʼmo lapaini huta hiyo, huʼa lapa paiʼnageta ago afiʼnae. 44#Hat 23:4-5; Lu 23:34; Ap 7:60; Loa 12:14,20Lapa paiʼnayaʼmonanafa hemenimo nagaemo huʼnaeʼmo, kame vayatapieʼmo lapau lapayamopafiʼmo lapaino. Lifana gemo lapa nepaiya vayaʼaifeʼmo aulena gemo hapa paiyo. Lapakaefeʼmo apaini huʼnisaya vayaʼaitegamo alagepa kavaʼmo hiyo. Lapakaetegamo hosu kavaʼmo huteʼa apaini huʼa nelapatesaya vayaʼaifeʼmo nunumuʼmo huta apateyo. 45#Ef 5:1Lapakaemo kokuʼnapi Afotapimokana hutapa maisayafeʼmo ani agufa kavaʼmo hiyo. Agaemo hosu vayaʼaitegaʼe alagepa vayaʼaitegaʼeʼmo, yegemo lo, huno nehigenoʼaeʼmo apakaeteʼmo yegemo nele. Agaemo fatago kavaʼmo nehaya vayaʼaitegaʼe fatago kavaʼmo nosaya vayaʼaitegaʼefeʼmo koʼmo aiyo, huno nehigenoʼaeʼmo apakaeteʼmo koʼmo neʼaiye. 46Apakaemo lapakaefeʼmo hapau apayamopafiʼmo nehapausiya vayaʼaifekeʼmo lapau lapayamopafiʼmo nelapausiyana na agufa miyatapimo aligae. Takesi moni neʼaliya vayaʼmogimo ani agufa kavaʼmo nehae. 47Konagatapiekeʼmo ge apamamaetapa alita falu fala huta apatetetapaeʼmo haiya kava higetapaeʼmo mago vayaʼmo aeta neʼapakasae. Haʼao, malaga vayaʼmogimo ani agufa kavaʼmo nehae. 48#Mon 19:2; Loa 18:13Kokuʼnapi Afotapimoʼmo alagepa kavaʼageʼmo nehiya kava huta alagepa kavaʼageʼmo hutapa maiyo, huno hapa paiʼniye.

Currently Selected:

Matiyu 5: kyg2013

Highlight

Copy