Matiyu 2

Mago ageteʼa afiʼnaya vayaʼmogimo eʼa Yesuʼmo ageʼnaya gemae

1Maliyaʼa Yesuʼmo Metelehamu taonifiʼmo Yuta kotegamo Helotiʼa kini vekamo maiʼneno vayaʼaiteʼmo yagaino apateʼniya afinaʼmo alino ateʼniye. Alino ateʼnigeʼapaeʼmo kanefiʼmo alagepa huʼa neʼagaya vayaʼmo yegemo haine neʼeya kotegatiʼmo eʼa Yulusalemu taonifiʼmo avaʼyi huteʼapaeʼmo, 2#Nap 24:17Yu vayaʼaiteʼmo yagaino apatesiya kini vekamo saufamo alino ateʼniya mafaʼnemo haiyaʼaleʼmo maiʼniye. Lagaemo agae kanefiʼmo yegemo haine neʼeya kotegatiʼmo ageteta agaefeʼmo mono hisunafeʼmo agaetegamo neʼone, huʼa huʼnae.

3Helotiʼa yagaino neʼapateya kini vekamoʼmo ani gemo afitenoʼaeʼmo hausoli huʼnigeʼapaeʼmo muki Yulusalemu taonifiʼmo maiʼnaya vayaʼmogiʼeʼmo ani kava huʼa hapausoli huʼnae. 4Helotiʼa mono huʼa neʼapataya vayaʼaiteʼmo yagaiʼa neʼapataya vayaʼaifenagi keʼaepa gemo avoʼmo kaeʼa aliʼa apaya neʼmalaya vayaʼaifenagi huno keya aeno ge huʼnigeʼa eʼa aliʼa anupa huʼa maiʼnagenoʼaeʼmo, Kalaisi vekamo haiya kotegatiʼmo afole aigiye huʼa huʼnae, huno ge huno apafi geʼnigeʼapaeʼmo, 5Metelehamu taonimo Yuta kotegatiʼmo afole aigiye. Gotitegati gemo alinineno aeno hakalo huno hapa nepaiya vekamoʼmo hunoʼaeʼmo, 6#Mka 5:2; Yo 7:42; Mt 2:11; Sam 72:10-15; Aiy 60:6Kagaemo Metelehamu taoniyo, huno, Yuta kotega taoniyo, huno, vayaʼmogimo sipisipileʼmo neʼyagaiya kava huno Isaleli vayaʼnileʼmo yagaino apatesiya vekamo kagaepatiʼmo afole aigiyaʼmofeʼmo Yuta vayaʼaiteʼmo yagaiʼa neʼapataya vayaʼai apaulagaleʼmo afa taonimo ohaneʼnananageʼa muki taonimogimo aeʼa kaga oseʼnae, huno avoʼmo kae maleʼniye, huʼa ha paiʼnae.

7Ha paiʼnageno ani gemo afitenoʼaeʼmo ageteʼa afiʼnaya vayaʼaifeʼmo fala kino ge huʼnigeʼa eʼa aliʼa anupa huʼa maiʼnagenoʼaeʼmo, hainu afinaʼmo kanefiʼmo afole aiʼniye, huno apafi geʼniye. 8Agaemo Metelehamu taonifilagamo alino apatetenoʼaeʼmo, alagepa huta uteta hutapa kahauya huta ani mafaʼnemo ageyo. Nagaeʼeʼmo uʼna mono hisuvafeʼmo agetetapaeʼmo eta naha paiyo, huno hapa paiʼniye.

9Ani gemo afiteʼapaeʼmo atale uʼa agayana hogoteʼa yegemo haine neʼeya kotegatiʼmo ageʼnaya kanefiʼmo halate uno hogoteʼnigeʼa ageʼnageno uno saufa mafaʼnemo maiʼniya yateʼmo haneʼniye. 10Haneʼnigeʼa ageteʼapaeʼmo lusi kava huʼa apamogaga aime aime uʼnae. 11Apakaemo nopiʼmo uʼa haiʼa anakayana mafaʼneʼaʼe itaʼamoʼmo Maliyaʼeʼmo maiʼnaʼageʼa anaketeʼapaeʼmo apaleʼyamo faiʼneʼa ape huʼa Yesufeʼmo mono huʼnae. Kesiʼapifatiʼmo yakiʼa goli yafanagi lusi moniletiʼmo miya nefaiya yaʼmo atafiʼmo kaeʼnageno alagepa atumo neʼaiya yanagi alagepa atumo neʼaiya uvelimogi huʼa amiʼnae.

12Gotiʼa alagamuna kategatiʼmo hapa painoʼaeʼmo, Helotitegamo halate atagi neta oʼviyo, huno hapa paiʼnigeʼa ataleʼa alu katetiʼmo koʼapilegamo uʼnae.

Apaune heʼa Isipi kotegamo uʼnaya gemae

13Apakaemo utagenoʼaeʼmo Yosefeʼa alagamuna ageʼniyana Ala kava neʼmo enisole vekaʼamoʼa hunoʼaeʼmo, he tika mafaʼneʼaʼe itaʼamoʼeʼmo anavalelika kaune heka Isipi kotegamo uvo. Helotiʼa ani mafaʼnemo amagisiyafeʼmo kahauya nehiyanagi anavalelikuka Isipi kotegamo nagava maiʼnegeʼnao kaha paiguve, huno ha paiʼniye.

14Yosefeʼa aupatiʼmo he tino haniʼilagamo mafaʼneʼaʼe itaʼamoʼeʼmo anavalelino Isipi kotegamo uʼniye. 15#Hos 11:1Uʼa maiʼnagenoʼaeʼmo Helotiʼa ago faliʼniye. Ani kava huno Ala kava neʼmoʼa agaetegati gemo alinineno aeno hakalo huno hapa nepaiya vekamo avayafatiʼmo huʼniya gemo afole aiʼniye. Ani gemoʼmo hunoʼaeʼmo, Nagaemo keya aeʼna ge huʼnogeno mafaʼneʼnimo Isipi kotegatiʼmo eʼniye, huno avoʼmo kae maleʼniye.

16Helotiʼa agesamo afiʼniyana, ageteʼa afiʼnaya vayaʼmogimo humi nateteʼa nagesasi huʼa uʼnae, huno huteno lusi kava huno aipamo leʼniye. Agaemo, Metelehamu taonifiʼe Metelehamu haopalegaʼeʼmo uteta hutapa muki ve mafaʼne anagaʼmo lole kafugamo oʼmaiʼnisaya ve mafaʼne anagaʼmo apamagigeʼa faliyo, huno hapa paiʼniye. Agaemo ageteʼa afiʼnaya vayaʼmogimo ani afinaʼmo kanefiʼmo afole aiʼnigeta ageʼnone, huʼa ha paiʼnaya geʼapieʼmo agesamo afiʼniyaʼmofeʼmo ani gemo huʼniye. 17Ani afinaʼmo Yelemaiyaʼmo Gotitegati gemo alinineno aeno hakalo huno hapa nepaiya vekamo avayafatiʼmo huʼniya gemo afole aiʼniye. 18#Yel 31:15; Aep 35:19Ani gemoʼmo hunoʼaeʼmo, Lama taonifatiʼmo apakemo aiʼnageʼa afiʼnae. Yulagefa aige aviʼyaʼmo huge huʼnageʼa afiʼnae. Lesoʼa mafaʼne anagaʼaeʼmo aviʼyaʼmo huno apateʼniye. Mafaʼne anagaʼamo ago faliʼnayaʼmofeʼmo aipamo aliʼa falu huʼa atesayafeʼmo huʼnayana oʼafiʼniye, huno avoʼmo kae maleʼniye.

Isipi kotegatiʼmo atagi neʼa Nasalasa taonifiʼmo eʼa maiʼnaya gemae

19Helotiʼa ago falitegenoʼaeʼmo Yosefeʼa Isipi kotegamo maiʼnenoʼaeʼmo alagamuna ageʼniyana Ala kava neʼmo enisole vekaʼamo afole aiʼnigeno ageʼniye. 20#Hat 4:19Agaemo ha painoʼaeʼmo, mafaʼnemo amagisayafeʼmo huʼnaya vayaʼmo ago faliʼnayanagi he tika mafaʼnekaʼe itaʼamoʼeʼmo anavalelika Isaleli kotegamo uvo, huno ha paiʼniye. 21Ha paiʼnigeno Yosefeʼa aupatiʼmo he tino mafaʼneʼaʼe itaʼamoʼeʼmo anavalelinuno Isaleli kotegamo maiʼniye.

22Akaleyasiʼmo afoʼamo Heloti aimuʼyaleʼmo kini vekamo maiʼneno yagaino apateʼniye, huʼa huʼnageno Yosefeʼa afiteno Yuta kotegamo uno maisiyafeʼmo koli huʼniye. Alagamuna ageʼniyana Yuta kotegamo uka oʼmaiyo, huno ha paiʼnigeno afitenoʼaeʼmo Galeliya kotegamo uteno 23#Lu 2:39; Aiy 11:1; 53:2; Yo 1:46Nasalasa taonifiʼmo uno maiʼniye. Gotitegati gemo alini eʼa aeʼa hakalo huʼa hapa nepaiya vayaʼmogi huʼapaeʼmo, Nasalasa vekae, huʼa agi aegae, huʼa huʼnaya gemo afole aisiyafeʼmo Nasalasa taonifiʼmo uno maiʼniye.

Currently Selected:

Matiyu 2: kyg2013

Highlight

Copy