Aepa Gemae 47

1Inagi Yosefeʼa uno kini vekaeʼmo ani gemo huno ha paiʼniye. Afoʼnimoʼe konagaʼnimogiʼeʼmo Kenani kotegatiʼmo ataleʼa eʼa avaʼyi huʼnae. Apakaemo muki sipisipi anagaʼapimo apavalege muki pulumaka anagaʼapimo apavalege muki yaʼapimo alige huteʼa hemenimo eʼa Goseni koteʼmo maiʼnae, huno ha paiʼniye. 2Yosefeʼa konagaʼamogipatiʼmo faefuʼa konagaʼamogimo apavalelino uʼnigeʼa Felo aulagaleʼmo he tiʼnae. 3Inagi Feloʼa apakaefeʼmo ina ge huno ge huno apafi geʼniye. Lapakaemo na agufa aliʼyaʼmo neʼaliya vayane, huno apafi geʼnigeʼapaeʼmo geʼaleʼmo aeʼa atagaina huʼapaeʼmo, Afotimogimo akeyaʼvilagamo sipisipileʼmo yagaiʼnaya kava huta lagaemo hemeniʼeʼmo sipisipileʼmo neʼyagauna vayane, huʼa ha paiʼnae. 4Kenani mopaleʼmo alopa kafu kavaʼmo afole aiʼnigeno sipisipi anagaʼmogimo kahaumo nesaya yaʼmo ohaneʼniyaʼmofeʼmo mani koteʼmo kalaga hageta eta kalaga vayaʼmo maisunafeʼmo eʼnonaʼmofeʼmo kahoke honanagi kagaemo aliʼyakamo neʼaluna vayaʼmo afaʼa lategeta Goseni koteʼmo maigune, huʼa huʼnae. 5Inagi kini vekamo Feloʼa Yosefefeʼmo ina ge huno ha paiʼniye. Afokamoʼe konagakamogiʼeʼmo kagaeʼeʼmo magokepi lokaeʼa maisayafeʼmo ago eʼnae. 6Muki Isipi kote mopamo ageʼnane. Kagaemo afokamoʼe konagakamogiʼeʼmo Goseni koteʼmo kanale hogote mopamo afaʼa apamisanageʼa maigae. Inagi kagaemo apakaepatiʼmo pulumakale yagaisaya kavaʼmo ageʼa alagepa huʼnisaya vayaʼmo apakeʼnisana vayaʼmo alika apategeʼa pulumakaʼnileʼmo yagaigae, huno ha paiʼniye.

7Inagi Yosefeʼa afoʼamoʼmo Yekopuʼmo Kini vekamo Felotegamo avalelinuno eʼnigeno Yekopuʼa Felofeʼmo, Gotiʼa alino auleno kateno, huno huʼniye. 8Feloʼa Yekopufeʼmo, Kagaemo na magi kafugamo maiʼnane, huno afi geʼniye. 9#Yop 14:1Yekopuʼa ha painoʼaeʼmo, Nagaemo vani hataleti tetiʼa kafugamo maiʼneʼnaeʼmo alu vayaʼai mopaleʼmo kalaga vekamo maiʼnove. Afoʼnimoʼe lotoʼnimoʼeʼmo kalaga vekalaʼmo maiʼnaʼa kafugaʼanimoʼmo nagae kafugamo ago aeno aga seʼnigeʼna kana yaʼmo alime alime eʼnove. 10Inagi Yekopuʼa Felofeʼmo alino auleno ateteno ataleno uʼniye.

11Inagi Yosefeʼa Kini vekamo Feloʼmo huvo, huno huʼniya kavaʼmo akame huno kanale hogote mopamo Lamesisi koteʼmo haneʼniya mopamo afoʼamoʼagi konagaʼamogiʼenagi huno apamiʼnigeʼa maiʼnae. 12#Hi 11:21Inagi Yosefeʼa afoʼamoʼe afamo anagagi nepuʼamogiʼe afamo anagaʼapigi na magi vayaʼmo maiʼnafi ani kava huno neʼyaʼmo alino fako apamiʼniye.

Alopa kafu kavaʼmo Isipi koteʼmo afole aiʼniya gemae

13Alopa kafu kavaʼmo Isipi koteʼmo afole aiʼnigeno neʼyaʼmo muki haopalegamo ohaneʼnigeʼa Isipi kotegamo maiʼnaya vayaʼe Kenani kotegamo maiʼnaya vayaʼeʼmo lusi apaka teʼnigeno lokiyaʼapimo ohaneʼniye. 14Muki Isipi vayaʼe Kenani vayaʼeʼmo muki moniʼapimo ago alini uʼa Yosefeʼa neʼyaʼmo maleʼniya nopatiʼmo miya faiʼnageno moniʼapimo alagi hano huʼniye. Yosefeʼa ani monimo aliteno Kini vekamo Feloʼa moni neʼmaleya nopiʼmo ago alinino uno maleʼniye. 15Muki Isipi koteʼe Kenani koteʼeʼmo alagi monimo hano huʼniyaʼmofeʼmo Yosefetegamo eʼa, Alagi monimo hano huʼniyanageta fiku yanageta faligunanagi neʼyaʼmo mago lamiyo, huʼa afi geʼnae. 16Yosefeʼa hunoʼaeʼmo, Muki monitapimo hano huʼnisiyaʼmoʼmo inagi muki pulumaka anagatapimo afaʼa apavalelitapa eta namisageʼna neʼyaʼmo lapamiguve, huno hapa paiʼniye. 17Inagi apakaemo hosiʼapigi sipisipiʼapigi memeʼapigi pulumakaʼapigi nokiʼapigi huʼa apavaleliʼa Yosefetegamo eʼnageno miya faigekana huno aliteno anonale neʼyaʼmo alino ani kafugafiʼmo apamiʼniye. Ani kavaʼmo hume hume eʼnageno muki afu anagaʼapimo alagi hano huʼniye. 18Inagi ani kafugamo uno hano huʼnigeno mago kafugamo Yosefetegamo eʼa, Ala vekae, huʼa, lagaemo muki monitimo hano huge muki afutimo hano huge huʼnigi kagae kaulagaleʼmo aeta ati okaegune. Mago yatimo afaʼa ohaneʼnigeno mopatiʼe lagufaʼekeʼmo haneʼniye. 19Lagaemo kaulagaleʼmo falisunageno mopatimo afaʼa hanegaiyaʼmofeʼmo kagaemo lagaeʼe mopatiʼeʼmo miya faisanafeʼmo neʼyaʼmo lamisanageno Felo agiʼalefeʼmo maige mopatimo hanege hugiye. Lagaemo ofalita afaʼa maisunafeʼmo avina yaʼmo lamisanageta maisunageno mopatimo alagepa huno hanegaiye, huʼa ha paiʼnae.

20Inagi Yosefeʼa muki Isipi mopaʼamo Felo mopamo hanesiyafeʼmo miya faino ateʼniye. Lusi alopa kafu kavaʼmo apakaeteʼmo afole aiʼnigeʼa muki vayaʼmogimo mopaʼapimo Yosefena amiʼnageno miya faiʼniyaʼmofeʼmo muki Isipi kote mopamo Felo mopaʼageʼmo haneʼniye. 21Haneʼniyaʼmofeʼmo Yosefeʼa muki Isipi mopamo mago atupaleti uno mago atupaletinagi huno muki vayaʼmo mopaʼapimo atale uʼa taonifi maisayafeʼmo hapa paiʼnigeʼa eʼnae. 22Yosefeʼa muki vayaʼai mopamo miya faiʼniyaʼmonanafa mono huʼa neʼapataya vayaʼai mopamo miya ofaiʼniye. Kini vekamo Feloʼa neʼyaʼmo afaʼa apamiʼnigeʼa neʼnayaʼmofeʼmo mopaʼapimo miya faisiyafeʼmo oʼamiʼnae. 23Inagi Yosefeʼa muki vayaʼaifeʼmo hapa painoʼaeʼmo, Afiyo, huno, nagaemo hemenimo lapakaemo miya faige mopatapimo miya faige huʼnovaʼmofeʼmo Felo vayaʼmo maige Felo mopamo hanege hugiye. Ageyo, huno, avina yatapimo haneʼniyanagi alinitutapa mopatapifiʼmo hakaleyo. 24Hoyatapifatiʼmo neʼyaʼmo lesiya kanamo esigetapaeʼmo faefuʼa hetamamo maleyo. Male maleʼnetapa magoke hetamamo alitapa Kini vekamo Feloʼmo amitetapa loleʼe loleʼe hetamamo lapakaitapimo maleʼnetapa afamo anagatapiʼe aise mafaʼne anagatapiʼeʼmo nege lapakaemo avinaʼamo maleʼnetapa hakalege hiyo, huno hapa paiʼniye. 25Apakaemo huʼapaeʼmo, Ala vekae, huʼa, kagaemo lagufamo alika katika lateʼnane. Kagaemo Ala vekamogamo lagaefeʼmo lahaoke heʼnana gemo kahauya huta agegaunaʼmofeʼmo Felo aliʼyaʼamo afaʼa aligune. 26Inagi Yosefeʼa magoke keʼaepa gemo Isipi kotefeʼmo hunoʼaeʼmo neʼyaʼmo lesigeʼapaeʼmo muki vayaʼmogimo faefuʼa hetamamo maleteʼa magoke hetamamo Kini vekamo Feloʼmo amigae. Ani keʼaepa gemo alagi haneʼniyaʼmonanafa mono huʼa neʼapataya vayaʼai mopamo Felo mopamo ohaneʼniye. Hemeniʼeʼmo ani keʼaepa gemo afaʼa haneʼniye.

Yosefeʼa Yekopufeʼmo, Falisanageʼnaeʼmo Kenani kotegamo aliʼnuʼna kiʼna kategauve, huno ha paiʼniya polomasi gemae

27Isaleli vayaʼmo Isipi kote Goseni mopaleʼmo maiʼneʼapaeʼmo asole yaʼmo alige asole vayaʼmo afole aige huʼnae. 28Yekopuʼa Isipi kotegamo sevetiniʼa kafugamo maiʼnigenoʼaeʼmo muki kafugaʼamoʼmo vani hataleti foti seveniʼa kafuga maiʼniye. 29Isaleliʼa falisiya kanaʼamo ago hogo huʼnigenoʼaeʼmo mafaʼneʼamo Yosefefeʼmo ge huʼnigeno eʼnigeno ha painoʼaeʼmo, Hemenimo nagaefeʼmo nahaoke heʼnana gemo kahauya huʼna ageʼnisuvana kayaʼmo naluʼmo afeʼalumenagamo maleʼneka polomasi hukaeʼmo, kagaetegamo alagepa kavaʼmo huʼna geʼnimo akame huʼna Isipi koteʼmo kiʼna okategauve, huka naha paiyo. 30Nagaemo afoʼnimoʼe lotoʼnimoʼeʼmo kiʼa anateʼnaya kanolufiʼmo kita natesayafeʼmo nahauʼniye. Kagaemo Isipi kotetiʼmo nagufamo alinika uka kiʼa anateʼnaya kanolufiʼmo kika nato, huno huʼnigeno Yosefeʼa hunoʼaeʼmo, huʼnana gemo afaʼa akame huguve, huno ha paiʼniye. 31Yekopuʼa hunoʼaeʼmo, kagoʼya ataleteka alagi lama gemo nehuve, huka naha paiyo, huno huʼnigeno agoʼyamo ataleteno alagi lama ge nehuve, huno huʼniye. Inagi Isaleliʼa hipaleʼmo maiʼnenoʼaeʼmo ape huʼneno Gotifeʼmo mono huʼniye.

Currently Selected:

Aepa Gemae 47: kyg2013

Highlight

Copy