Aepa Gemae 48

Yekopuʼa Ifalemiʼe Manasaʼeʼmo Gotiʼa alino auleno anatesiya gemo hana paiʼniya gemae

1Inagi ago maime eʼnageno Yosefefeʼmo ha paiʼapaeʼmo, Afokamoʼmo kaitaʼmo hauʼniye, huʼa ha paiʼnagenoʼaeʼmo lole mafaʼneʼalaʼmo Manasaʼe Ifalemiʼeʼmo anavaleteno uʼniye. 2Inagi mago vekamoʼmo Yekopufeʼmo ha painoʼaeʼmo, Ago, huno, mafaʼnekamo Yosefeʼmo kagaetegamo neʼe, huno ha paiʼnigenoʼaeʼmo agaiʼamo lokiya vaino he tino hipaleʼmo fai maiʼniye. 3#Aep 28:13,19Yekopuʼa Yosefefeʼmo ha painoʼaeʼmo, Gotiʼa muki lokiyaʼamo haneʼniya Gotiʼa Kenani kotega Lusa taonifiʼmo maiʼnogenoʼaeʼmo naulagaleʼmo afole aiteno alino auleno nateʼniye. 4Naha painoʼaeʼmo, Afiyo, huno, Nagaemo kaha maesugeno asole kaginago vayaʼmo afole aiteʼa aiʼa atagu faeʼa maigae. Kagaepatiʼmo asole vayaʼmo aliʼna afole aiʼna apateteʼna mani mopamo kaginago vayaʼmo apamisugeno alagi apakaiʼapi mopamo hanege hanege huno hanegaiye, huno naha paiʼniye. 5Hemenimo mafaʼnekalaʼmo Ifalemiʼe Manasaʼeʼmo mani Isipi kote oʼmeʼnogekaeʼmo alika anateʼnana mafaʼnelaʼmo nagaiʼni mafaʼnelaʼmae. Lumeniʼe Simiyoniʼeʼmo mafaʼneʼnilaʼmo maiʼnaʼa kava huʼana maigaʼae. 6Henagaʼamo alika apatesana mafaʼne anagaʼmo kagaika mafaʼne anagakamae. Ani mafaʼne anagaʼmogimo mopamo aliʼa fako huʼa alisayapatiʼmo nepuʼapimogiʼeʼmo aligae. 7#Aep 35:9,16-19Nagaemo Mesopotemiya kotegatiʼmo ataleʼna halate Kenani kotegamo Efalata taonifi hogo kateʼmo uta Efalata taonifiʼmo avaʼyi hisunafeʼmo nehutaeʼmo Lesoʼa nahaopaleʼmo faliʼniye. Faliʼnigeʼna ani kaʼmo agiʼnaleʼmo kiʼna ateʼnove, huno ha paiʼniye. Ani taonimo alu agiʼamo Metelehamu taonimae.

8Isaleliʼa Yosefe mafaʼnelaʼmo anaketenoʼaeʼmo, ani mafaʼnelaʼmo ina laganie, huno ge huno afi geʼniye. 9Yosefeʼa, Nagae mafaʼnelaʼmae. Gotiʼa Isipi koteʼmo maiʼnogenoʼaeʼmo namiʼniya mafaʼnelane, huno ha paiʼnigenoʼaeʼmo, kahaoke hovanagi nagaetegamo anavalelika egeʼnao nagaemo aliʼna auleʼna anategauve, huno huʼniye. 10Isaleliʼa ago kosuna leʼniyaʼmofeʼmo aulagamo hosuʼnigeno oʼageʼniye. Yosefeʼa afoʼamo haopaleʼmo anavalelino eʼnigeno Yekopuʼa ananu kiteno hanaeno neʼniye. 11Isaleliʼa Yosefefeʼmo ha painoʼaeʼmo, Nagaemo nagesa afiʼnaeʼmo kaugosamo okagegauve, huʼna huʼnovaʼmonanafa Gotiʼa kagaeʼe mafaʼnekalaʼeʼmo alino nave liʼnigeʼna lapakeʼnove, huno ha paiʼniye. 12Inagi Yosefeʼa Yekopu alutalateʼmo mafaʼneʼalaʼmo anavaleno alino he tino anateteno mopafiʼmo aleʼya faiʼneno ape huʼniye. 13Yosefeʼa mafaʼneʼamo Ifalemiʼmo afoʼamo hoga haopaleʼmo ateteno Manasaʼmo afoʼamo lamaga haopaleʼmo ateteno huʼniye. 14Isaleliʼa lamaga ayaʼmo aganaʼamo Ifalemi agenopaleʼmo maleteno hoga ayaʼmo nepuʼamo Manasa agenopaleʼmo maleʼniye. Yekopuʼa ayaʼmo malege malege huno maleno alagepa huno maleʼniye. Manasaʼmo yege mafaʼnemo maiʼniyaʼmofeʼmae. 15#Aep 17:1; Sam 23:1Yekopuʼa Yosefefeʼmo alino auleno atetenoʼaeʼmo ani ge huʼniye. Lotoʼnimo Emalehamuʼe afoʼnimo Aisakiʼeʼmo Goti aulagaleʼmo maiʼnaʼae. Ani Gotiʼa muki afinaʼmo maime maime eʼnova afinaʼmo neʼyaʼmo namilineno hemeniʼeʼmo neʼnamiye. 16#Aep 31:11Enisole vekamoʼa muki hosu kavategatiʼmo nagufamo alino katino nateʼniya enisole vekamoʼa lole mafaʼnelaʼmo alino auleno anatesigeʼa vayaʼmogimo anakaefeʼmo huʼapaeʼmo, Yekopu mafaʼnelane, huʼa huge Emalehamu nofi vekalane, huʼa huge Aisaki nofi vekalane, huʼa huge hugae. Anakaepatiʼmo Gotiʼa asole vayaʼmo alino afole aino apateno, huno huʼniye.

17Yosefeʼa ageʼniyana afoʼamo lamaga ayaʼmo Ifalemi agenopaleʼmo maleʼnigeno agetenoʼaeʼmo ani kavafeʼmo ohauʼnigeno afoʼamo lamaga ayaʼmo alino Manasa agenopaleʼmo malesiyafeʼmo huʼniye. 18Yosefeʼa afoʼamofeʼmo, Afo, huno, ina kava osuka ago, ani mafaʼnegeʼmo yege mafaʼnemo maiʼniyanagi agae agenopaleʼmo lamaga kayaʼmo malo, huno ha paiyaʼmonanafa 19afoʼamoʼmo ohauʼniye. Agaemo Yosefefeʼmo ha painoʼaeʼmo, Mafaʼneʼnimogae, huʼna, afiʼnove, he, ageʼnove. Agaepatiʼmo ani kavaʼmo huʼa asole vayaʼmo afole aisageno ala agimo aligiyaʼmonanafa aganaʼamokeʼmo ago aeno aga segaiye. Aganaʼamopatiʼmo asole nofi vayaʼmo afole aigae, huno ha paiʼniye. 20Ani afinaʼmo Yekopuʼa lole mafaʼnelaʼmo alino auleno anateʼniye. Agaemo hunoʼaeʼmo, Isaleli nofi vayaʼmogi anakiʼaniletiʼmo huʼapaeʼmo, Gotiʼa Ifalemiʼe Manasaʼeʼmo alino auleno anateʼniya kava huno alino auleno lapategaiye, huʼa hugae. Inagi Ifalemiʼa alino hogote vekamo ateteno Manasa agae aiyaʼafiʼmo ateʼniye. 21Isaleliʼa Yosefefeʼmo ha painoʼaeʼmo, nagaemo falisuva kanaʼnimo alagi hogo huʼniye. Hogo huʼniyaʼmonanafa Gotiʼa lapakaeʼeʼmo magokepi lokaeno maiʼneno lapakinago vayaʼai mopaleʼmo halate afaʼa lapavalelino ugiye. 22#Yo 4:5Nagaemo muki yaʼanimo aliʼna fako huʼna magoke aiyaya huʼna konagakamogimo apamiguvaʼmonanafa kagaemo aeʼna apaka seʼna magoʼe yaʼmo kamiteʼna naipeʼe atiletiʼeʼmo Emo nofi vayaʼeʼmo kamemo huʼna aeʼna apaka seteʼna mopaʼapimo aliʼnova mopamo kamiʼnove, huno ha paiʼniye.

Currently Selected:

Aepa Gemae 48: kyg2013

Highlight

Copy