Aepa Gemae 14

Kini vayaʼai folagapiʼmo alopa kame kavaʼmo afole aiʼniya gemae

1-6 # Aep 13:10; 19:22 Ketolaomeʼa Elami kotega kini vekamo maiteno tuolofuʼa kafugamo faefuʼa kini vayaʼaiteʼmo yagaino apateʼniye. Ani kini vayaʼai apakimo Melaʼa Sotomi taonifi kini vekagi Misaʼa Gomola taonifi kini vekagi Sinapiʼa Atama taonifi kini vekagi Semepaʼa Sepoimi taonifi kini vekagi Pela taonimo alu agiʼamo Sova taonifi kini vekagi huʼa maiʼnae. Apakaemo ani kini vayaʼmogimo tetiʼa kafugamo afole aiʼniya afinaʼmo kini vekamo Ketolaome geʼamo ago amagiʼa ataleʼnae. Fotiniʼa kafugamo Ketolaomeʼa loleʼe magoʼe kini vayaʼaifeʼmo ge huʼnigeʼa agaetegamo eʼnae. Ani kini vayaʼai apakiʼapimo Amalefeleʼa Mamiloni kini vekagi Aliyokiyaʼa Elasi kotega kini vekagi Titalaʼa Goimi kotega kini vekagi huʼa maiʼnae. Ani loleʼe loleʼe kini vayaʼmogi ati vayaʼapimo apavaleliʼa uʼa Lefaimi nofi vayaʼai taonimo Asataloti Kanaimi taonifi vayaʼmo kamemo huʼa aeʼa apaka seʼnae. Uʼa Susa nofi vayanagi Hamu taonifi vayanagi Ema nofi vayanagi Kiliyataimu taonifi vayanagi Hova nofi vayanagi Siya aveleʼmo maiʼnaya vayanagi huʼa kamemo huʼa aeʼa apaka seʼa apavegala aeʼa hapaeliʼuʼa Elopaleni kotega vayaʼmo oʼmaiʼnaya haopalegamo apataleʼnae. 7Henagaʼamo halate aiʼa atagineʼa Katesi taonifilagamo uʼnae. Ani taonimo hogote agiʼamo Enimisapati taonie. Huteʼapaeʼmo Emaleki nofi vayaʼe Emo nofi vayaʼeʼmo kamemo huʼa aeʼa apaka seʼnae. Emo nofi vayaʼmo Hasasoni Tama taonifiʼmo maiʼnae. 8Ani afinaʼmo Sotomi taonifi kini vekagi Gomola taonifi kini vekagi Atama taonifi kini vekagi Sepoimi taonifi kini vekagi Mela taonifi kini vekagi ati vayaʼapigi huʼa aliʼa anupa huteʼa Sitimi otuleʼmo kamemo huʼnae. 9Apakaemo Ketolaomeʼmo kini vekagi loleʼe magoʼe ao vayaʼenagi huʼa kamemo hisayafeʼmo alo huʼnae. Loleʼe loleʼe kini vayaʼmogi faefuʼa kini vayaʼeʼmo kamemo huʼnae.

10Sitimi otufiʼmo asole kelimo anupa kameʼmo haneʼniya keligoʼmo haneʼniye. Gomola kini vekagi Sotomi kini vekagi ati vayaʼanigi huʼa kamemo osuʼa ataleʼa apaune heʼa uʼnayategamo uʼa ani kelifiʼmo asagauʼa aitageʼapaeʼmo mago ati vayaʼamo avelegamo apaune hetaleʼa uʼa haiʼnae. 11#Aep 14:16,21Ketolaomeʼe ao kini vayaʼeʼmo kamemo huʼa aeʼa apaka seteʼapaeʼmo Sotomi vayaʼai kagemi yaʼe neʼyaʼenagi Gomola vayaʼai kagemi yaʼe neʼyaʼenagi huʼa aliniʼa uʼnae. 12Lotiʼa Emalemi aganaʼamo mafaʼnemo ani Satomi taonifiʼmo maiʼnigeʼa eʼa agaemo avaleteʼa kagemi yaʼaʼeʼmo aliniʼa uʼnae.

13Mago vekamo faino kasalo paetaleno eʼniya vekamoʼmo eno Himulu vekamo Emalemifeʼmo ha paiʼniye. Emalemiʼa maiʼniya alopa yosa aepafiʼmo Emo nofi vekamo Mamali yosamo aepafiʼmo maiʼniye. Lole konagalaʼmo Esikoliʼe Aneʼeʼmo Emalemiʼeʼmo aliʼana anao ya huteʼa maiʼnae. 14#Aep 13:8Emalemiʼa, aganaʼamo mafaʼnemo atafauʼa avaleliʼa uʼnaya kavafeʼmo ava gemo afitenoʼaeʼmo inagi aliʼyaʼamo neʼaliya vayaʼmo 318ʼa vayaʼaifeʼmo keya aegeʼa ageno kamemo hisayafeʼmo kame hisaya yaʼmo apamitegeʼa aliniʼa Nani taonifiʼmo uʼnae. 15Emalemiʼa ati vayaʼamo alino fako huno lole vayaʼmo apateʼniye. Haniʼilagamo agaeʼe ati vayaʼaʼeʼmo kame huteʼa apavegala aeliʼa hoga haopalega Namasikasi taoniletiʼmo uʼa Hopa taonilegamo uʼnae. 16Kamemo huʼa aeʼa apaka seteʼa kumaya aliniʼa uʼnaya kagemi yaʼe aganaʼamo mafaʼnemo Lotiʼe kagemi yaʼaʼenagi muki ve aʼneʼaʼenagi huʼa apavaleliʼa eʼnae.

Melekisetekiʼa Emalemifeʼmo, Gotiʼa kaha maeno, huno ha paiʼniya gemae

17Emalemiʼa Ketolaometegaʼe ao kini vayaʼaitegaʼeʼmo ani kamemo ago huno aeno apaka seteno atagineno eʼniye. Inagi Sotomi taonifi kini vekamo Save otuʼmo kini vekaʼapimo otulene, huʼa nehaya koteʼmo uʼnigeʼana fotu huʼnaʼae. 18#Sam 110:4; Hi 7:1-10; 5:6Melekisetekiʼa Selemi taonifi kini vekaʼmoʼmo Anaga Gotitefeʼmo mono huno neʼapateya vekamoʼmo peleti mayaʼe nofi alagafati aniʼeʼmo alinino Emalemitegamo eʼniye. 19#Lut 3:10; Mt 11:25Agaemo Emalemifeʼmo alino auleno ateteno ha painoʼaeʼmo, Gotiʼa aeno apaka seno anaga vekamoʼmo muki kokuʼnapi yanagi muki ma mopafi yanagi huno agaiʼa yaʼmo haneʼniya vekamoʼmo alino auleno kateno. 20#Aep 24:27Gotiʼa aeno apaka seno anaga vekamoʼmo kaha maeʼnigeka kamemo vayakamo kame huka aeka apaka seʼnanaʼmofeʼmo aliʼna auleʼna ateʼnove, huno ha paiʼnigenoʼaeʼmo muki kagemi yaʼamo naya loleʼa agufa yapatiʼmo magoke yaʼmo alino Melekisetekina taesimo amiʼniye.

21Inagi Sotomi kini vekamoʼmo Emalemifeʼmo hunoʼaeʼmo, Kamefatiʼmo muki aliʼnana kagemi yaʼmo afaʼa aligananagi vayaʼnigeʼmo afaʼa apavaleka namiyo, huno huʼniye. 22#Nen 12:7Huʼniyaʼmonanafa Emalemiʼa Sotomi kini vekaeʼmo ha painoʼaeʼmo, Nagaemo Ala kava neʼmo Gotiʼa aeno apaka seno anaga Gotiʼa muki kokuʼnapi yanagi muki ma mopafi yanagi huno agaiʼa yaʼmo haneʼniya vekalefeʼmo nagoʼyamo ataleʼnaeʼmo, 23magoke yakamo afaʼa oʼaliguve, huʼna ago ha paiʼnove. Nagaemo kukenamo nefakaniya nofikamofi su nofikamofi huʼna alagi oʼaliguve. Fiku yanageka kagaemo, Emalemiʼa kagemi yaʼaʼe vekamo aliʼna hamaleʼna ateʼnove, huka hugane. 24Nagaiʼnimo magoke yakamo alagi oʼaliguvaʼmonanafa vayaʼnimogigeʼmo ago neʼnaya neʼyaʼakageʼmo ago aliʼnove. Navagi vayaʼmo Aneʼagi Esikoliʼagi Mamaliʼagi huka afaʼa apatalegeʼa hetamaʼapimo afaʼa aliyo, huno ha paiʼniye.

Currently Selected:

Aepa Gemae 14: kyg2013

Highlight

Copy