Aepa Gemae 15

Gotiʼa Emalemiʼeʼmo kotalakemo hu maleʼniya gemae

1 # Sam 27:1; Loa 33:29; Mai 11:18 Henagaʼamo Emalemiʼa alagamuna agegekana huno ageʼniyana Ala kava neʼmoʼa ha painoʼaeʼmo, Emalemiyo, huno, koli osuvo. Nagaemo halegukamo maiʼneʼna hetamakamo maiʼnove, huno ha paiʼniye. 2#Ap 7:5Ha paiʼniyaʼmonanafa Emalemiʼa hunoʼaeʼmo, Ala kava neʼmo Gotiʼnimogae, huno, nagaemo mafaʼneʼnimo oʼmaiʼniyaʼmofeʼmo falisuva afinaʼmo muki yaʼnimo alisiya vekamo Namasakasi taonifi vekamo Eliyesakeʼmo maiʼniye. Na yaʼmo namigane. 3#Aep 14:14Afiyo, huno, mago mafaʼnemo oʼnamiʼnagenoʼaeʼmo itaʼamoʼmo nagae nopiʼmo mago avalelino eno ateʼniya vekamoʼmo muki yaʼnimo aligiye, huno ha paiʼniye. 4Ala kava neʼmoʼa Emalemifeʼmo ha painoʼaeʼmo, Haʼao, huno, ani vekamoʼmo muki yakamo afaʼa oʼaligiye. Kagaikageʼmo alika atesana mafaʼnemokeʼmo muki yakamo aligiye, huno ha paiʼniye. 5#Sam 147:4; Hat 32:13Ha paiteno kumatega avalelino uno lamino ina ge huno ha paiʼniye. Kokuʼnategamo alika aulu heka ago. Kanefiʼmo afaʼa lekana paisapigi lekana paika ago. Asole kanefiʼmo haneʼniya kava huʼa kaginago vayaʼmo afole aiʼa maigae, huno ha paiʼniye. 6#Lo 4:3,9,22Inagi Emalemiʼa Ala kava neʼmo geʼaeʼmo agesamo afino fatago huʼnigenoʼaeʼmo Ala kava neʼmoʼa fatago kavaʼamo amiʼniye.

7 # Aep 12:1 Gotiʼa ha painoʼaeʼmo, Nagaemo Ala kava neʼmoʼnamo A taonimo Kalatiya kotegatiʼmo mani mopamo fikumo kamisuvafeʼmo kavaleliʼna eʼnove, huno ha paiʼnigeno 8#Lu 1:18Emalemiʼa hunoʼaeʼmo, Gotiyo Ala kava neʼnimogae, huno, Ani mopamo afaʼa aliguve, huʼna agesuvafeʼmo haiya agufa kavaʼmo agegauve, huno ge huno afi geʼniye. 9Gotiʼa hunoʼaeʼmo, Loleʼe magoʼe kafugamo maiʼnisiya a pulumakagi loleʼe magoʼe kafugamo maiʼnisiya a memegi loleʼe magoʼe kafugamo maiʼnisiya ve sipisipigi mago kaugoʼyave namagi lufi agapagi huka apavalelika eno, huno ha paiʼnigeno 10#Yel 34:18muki ani yaʼamo apavalelino Gotitegamo eno ani muki yaʼamo folagapatiʼmo heno apalo atino lole hetamamo maleʼniye. Lole namalaʼmo heno apalo oʼatiʼniye. 11Hakiki nama anagaʼmogi heno apalo atino maleʼniya apakufaleʼmo haleli eʼa hakaleteʼa nesayafeʼmo nehagenoʼaeʼmo Emalemiʼa alino hapa faino apataleʼniye.

12Yegemo uno lamino falegefe huʼnigenoʼaeʼmo Emalemiʼa au kaleno alagi huʼnigeno lusi hani huʼniya yaʼmoʼa aino ati kaeʼnigeno koli huʼniye. 13#Hat 12:40Ala kava neʼmoʼa ina ge huno ha paiʼniye. Afika alagepa huka afiyo. Kaginago vayakamo uʼa alu vayaʼai koteʼmo maiʼneʼa aliʼyaʼapimo aliʼa apatesageʼa fo hataletiʼa kafugamo lusi kana yaʼmo apamigae. 14#Hat 6:6; 12:36Henagaʼamo nagaemo aliʼyaʼapimo alisayafeʼmo aliʼa apaiyafiʼmo apateʼnaya vayaʼmo agoti huʼna apatetesugeʼapaeʼmo apataleʼa kagemi yaʼapimo aliniʼa ugae. 15Kagaemo alagepa huka maiʼneka asole kafugamo maiteka kaipamoʼmo falu huʼnisigeka kaginago vayakalegamo visanageʼa kiʼa kategae. 16#1 Kin 21:26Foʼa kaginago nofi vayakamo afole aiteʼapaeʼmo halate atagineʼa manileʼmo egae. Emo nofi vayaʼmogi hosu kavaʼapimoʼmo kosime kosime haineno ani afinaʼmo havai tegaiyamofeʼmae.

17 # Yel 34:18-19; Hi 12:29; Yo 8:12 Yegemo uno lamino faletegeno hani huʼnigenoʼaeʼmo halina neʼaiya alopa sitopumoʼe aeno ha neleya kaniʼmoʼeʼmo lole hetamalaʼani folagapatiʼmo uʼniye. 18#Aep 24:7Ani afinakeʼmo Ala kava neʼmoʼa Emalemiʼeʼmo mago kotalakemo huʼniye. Ina ge huno huʼniye. Nagaemo kaginago mafaʼne anagakamo ma mopamo aliʼna apamiʼnove. Isipi kotega uno nelamiya anitetiʼmo uno alopa Yufaletisi aniteʼmo utegeʼna mani haopalega haneʼniya mopamo apamiʼnove. 19-21Apakaemo Keni nofi vayaʼai mopagi Kenasi nofi vayaʼai mopagi Katamoni nofi vayaʼai mopagi Hiti nofi vayaʼai mopagi Pelesi nofi vayaʼai mopagi Lefaimu nofi vayaʼai mopagi Emo nofi vayaʼai mopagi Kenani nofi vayaʼai mopagi Gigasi nofi vayaʼai mopagi Yemusi nofi vayaʼai mopagi huʼa aligae.

Currently Selected:

Aepa Gemae 15: kyg2013

Highlight

Copy