Aepa Gemae 13

Lotiʼa Emalemiʼmo ataleno uʼniya gemae

1-2 # Aep 12:16; 24:35 Emalemiʼa asole kagemi yaʼamo pulumakagi sipisipigi siluva goli yafaʼagi huno haneʼniya vekamo maiʼniyana Isipi kotegamo ataleno muki ani yaʼamo aliteno uʼniye. Lotiʼeʼmo magokepi lokaeʼana Negevi kotegamo uʼnaʼae. 3Agaemo vayaʼaʼeʼmo Negevi koʼmo aliʼa ataleʼa halate Meto taonifiʼmo hogoteno seli noʼamo haneʼniya Meto taonimo hanete Ai taonimo hanete hutegeno folagapiʼmo uʼnae. 4Hogoteno Emalemiʼa ofalinimo nehaya agufa yafa hiʼyalamuʼmo hu maleʼniya yategamo eno halate Ala kava neʼmo agiʼaleʼmo keya aeno ge huno nunumuʼmo huʼniye. 5Lotiʼa Emalemiʼmo avagi huno eʼniya vekamoʼeʼmo sipisipiʼagi pulumakaʼagi huno apavaleteno mago seli noʼamo kiʼniya selimogi huno aliteno eʼniye. 6#Aep 36:6-7Emalemiʼe Lotiʼeʼmo asole kagemi yaʼanimo haneʼnigeno mopamo aiseʼamo haneʼniyaʼmofeʼmo magokepiʼmo alagepa huʼana lokaeʼana maisaʼa kavaʼmo osuʼniye. 7Loti sipisipi anagaʼaleʼe pulumaka anagaʼaleʼeʼmo neʼyagaiya vayanagi Emalemi sipisipi anagaʼaleʼe pulumaka anagaʼaleʼemo neʼyagaiya vayanagi huʼa ke vaiʼnae. Ani afinaʼmo Kenani nofi vayaʼe Pelesi nofi vayaʼeʼmo ani haopaleʼmo maiʼnae. 8#Mai 15:1,18; 20:3; Mt 5:9; Hi 12:14Inagi Emalemiʼa Lotifeʼmo ha painoʼaeʼmo, Kahaoke hove, huno, laʼagaemo magoke afamotalaʼmo maiʼnoʼaʼmofeʼmo ge oʼvaisuʼageʼa afutiʼaleʼmo neʼyagaiya vayatiʼamogiʼeʼmo afaʼa ge oʼvaigae. 9Ago, huno, kaulagaleʼmo alopa mopamo haneʼniyanagi kahao ke hovanagi kagaikamo mago mopamo lekana paiteka nagaemo nataleka uvo. Kagaemo hoga haopalegamo visanageʼnaeʼmo nagaemo lamaga haopalegamo uguve. Kagaemo lamaga haopalegamo visanageʼnaeʼmo nagaemo hoga haopalegamo uguve, huno ha paiʼniye. 10#Aep 19:22,30Lotiʼa he tino alino maku huno ageyana mago otu mopamo haneʼnigeno ageʼniye. Ani haopalegamo asole aniʼmo haneʼnigeno alagi kanale hoyamo Ala kava neʼmo hoyagana huno hanege Isipi vayaʼai mopagana huno hanege huʼniye. Ani afinaʼmo Ala kava neʼmoʼa lole taonilaʼmo Satomi taoniʼe Gomola taoniʼeʼmo alino hosu huno oʼataleʼniya afinaʼmae. 11Lotiʼmo agaiʼa mopamo hanesiyafeʼmo Yoneni aniʼmo uno nelamiya kotega otu mopamo lekana paiteno yegemo haine neʼeya haopalegamo uʼniye. Lotiʼe Emalemiʼeʼmo ani afinaʼmo aliʼana fako huʼnaʼae. 12Emalemiʼa Kenani mopaleʼmo maiʼnigeno Lotiʼmo uno otu koʼmo Sotomi taonimo haopaleʼmo seli noʼmo alino he tino ateʼniye. 13#Aep 18:20Sotomi taonifiʼmo maiʼnaya vayaʼmo alagi hosu vayaʼmogeʼa Ala kava netegamo lusi hosu kavaʼmo huʼnae.

14Lotiʼmo utegenoʼaeʼmo Ala kava neʼmoʼa Emalemifeʼmo ha painoʼaeʼmo, Kagaemo manile maiʼneka muki haopalegamo aulu heka ago. Yegemo uno nelamiya haopalegamo agege yegemo haine neʼeya haopalegamo agege aluga aluga haopalegamo agege huvo. 15Muki ani ageʼnisana mopamo kagaeʼe kaginago vayaʼeʼmo lapamiguve. 16#Aep 15:5; Nap 23:10Nagaemo kaginago vayaʼmo ani kahaepagana agufa vayaʼmo aliʼna afole aiʼna apategauve. Apatesuva vayaʼmo ani kahaepamo vayaʼmogimo lekana nopai kava huʼa kaginago vayaʼmo afaʼa lekana opaigae. 17#Nap 13:17-24Inagi he tika muki mopaʼaleʼmo uka haisanategamofi emikesanategamofi visanategamofi esanategamofi huka umenitata huka ageteka alagi kamisuva mopamo ago, huno ha paiʼniye. 18#Aep 8:20; 12:7Ha paitegenoʼaeʼmo Emalemiʼa ani kotetiʼmo ataleno uno Hipaloni taonifiʼmo alopa yosamo Mamali yosamo aepafiʼmo ofalinimo nehaya hiʼyalamuʼmo Ala kava netefeʼmo huʼniye.

Currently Selected:

Aepa Gemae 13: kyg2013

Highlight

Copy