Apa 16

Poloʼe Sailasiʼeʼmo Timotiʼmo avaleliʼana uʼnaʼa gemae

1 # Ap 14:6; 2 Ti 1:5 Poloʼa ani haopalegatiʼmo ataleno uno Nemi taonifiʼmo maigeno ataleno Lisitiya taonifiʼmo uno maiʼniye. Mago vekamo geʼamo neʼafiya vekamo agiʼamo Timotiʼa ani taonifiʼmo maiʼniye. Itaʼamoʼmo agesamo afino fatago huʼniya a kanomo Yu a kanomo maiʼnigeno afoʼamoʼmo Galiki nofi vekamo maiʼniye. 2#Fl 2:19-22Lisitiya taonifi konaga vayaʼe Aikoniyamu taonifi konaga vayaʼmogiʼeʼmo huʼapaeʼmo, kanale vekamo maiʼniye, huʼa huʼnae. 3#Ga 2:3-5Yu vayaʼmogi ani gemo afiteʼapaeʼmo Timoti afoʼamoʼmo Galiki vekamo maiʼniye huʼa ago ageʼnayaʼmofeʼmo Poloʼa Timotifeʼmo, agufamo lagauʼna ateteʼna avaleliʼna uguve, huno huʼniye. 4#Ap 15:23-29Apakaemo taoniʼafi taoniʼafiʼmo umenitata nehuʼapaeʼmo Yulusalemu taonifi apa vayaʼmogiʼe yagaiʼa neʼapataya vayatama vayaʼmogiʼeʼmo ani kavaʼmo osiyo, huʼa huʼnaya keʼaepa geʼapimo hapa paiʼapaeʼmo, Ani kavaʼmo osiyo, huʼa hapa paimale hapa paimale huʼnae. 5#Ap 2:47; 18:23Inagi muki siosiʼale siosiʼaleʼmo maiʼnaya vayaʼmogimo magoʼe magoʼe huʼa lokiya vaiʼa maiʼnageʼapaeʼmo muki afinaʼae afinaʼaeʼmo magoʼe vayaʼmo Goti mafaʼnemo hamaleteʼa eʼa magokepi lokaeʼa maiʼnae.

Poloʼmo alagamuna agegekana huno ageʼniya gemae

6Apakaemo Filisiya kotegaʼe Galesiya kotegaʼeʼmo umenitata huʼa maiʼnagenoʼaeʼmo Goti Aunemeʼamoʼmo Esiya kotegamo uʼa Goti geʼamo aeʼa hakalo huʼa hapa opaisayafeʼmo ka akanino apateʼniye. 7#2 Ti 1:15Apakaemo Misiya haopalega uʼa avaʼyi huteʼa Pitiniya kotegamo uʼa haisayafeʼmo huʼnayaʼmonanafa Goti Aunemeʼamoʼmo ka akanino apateʼniye. 8Ka akanino apateʼnigeʼapaeʼmo Misiya kotegamo aeʼa agaseʼa uʼa Toloʼasi taonimo ani haigifiʼmo haneʼniya taonifiʼmo uʼa lamiʼa maiʼnae. 9Maiʼneʼapaeʼmo Poloʼa alagamuna agegekana huno ageʼniyana mago Masetoniya kotega vekamoʼmo he tino Polofeʼmo aukaya huno ge hunoʼaeʼmo, kahao ke hovanagi aniʼmo lakaeka Masetoniya kotegamo eka laha mao, huno ha paiʼnigeno ageʼniye. 10Ageteno laha paiʼnigetaeʼmo, Gotiʼa hunoʼaeʼmo, Masetoniya vayaʼaitegamo utapa alagepa faigoko geʼnimo aetapa hakalo hutapa hapa paiyo, huno laha paiʼniye, huta magoke laipa lagesamo aliteta Masetoniya kotegamo ugune, huta huʼnone.

Mago a kanomo agiʼamo Litiyaʼa Goti mafaʼnemo hamaleʼniya gemae

11Lagaemo sipifiʼmo uta haita maiteta Toloʼasi taonifatiʼmo ataleta aniʼmo lakaetuta Samotalesi ani agoʼnanenafiʼmo uta avaʼyi huteta havaetetaeʼmo ataleta Niyapolisi taonifiʼmo uta avaʼyi huʼnone. 12Ani taonifatiʼmo ataleta Filipai taonifiʼmo uta avaʼyi huteta maiʼnone. Filipai taonimo Masetoniya kotega hogote taonimo Lomu vayaʼmogimo ki maleʼnaya taonifiʼmo mago afinaʼmo maiʼnone. 13Lagaemo sapati afinaʼmo taonifatiʼmo ataleta ani haigifiʼmo nunumuʼmo nehaya yategamo uta lamiʼnone. Lamita aliʼa anupa huʼa maiʼnaya aʼne anagaʼaifeʼmo hapa paiʼnone. 14Mago a kanomoʼa getimo alagepa huno afiʼniya a kanomo agiʼamo Litiyaʼa Taiyataila taonifi a kanomo alopa moniletiʼmo miya nefaiya oko kenamo miya failineno maketi huʼnigeʼa miya nefaiya a kanomo maiʼniye. Ani a kanomoʼa Gotifeʼmo mono nehiya aʼmo maiʼnigeno Ala kava neʼmoʼa aipa agesamo alino halo aiʼnigeno Polo geʼamo alagepa huno afiʼniye. 15#Ap 16:33; 18:8Lagaemo agaeʼe noʼafiʼmo maiʼnaya vayaʼeʼmo aniʼmo faleta apateʼnonagenoʼaeʼmo, Agaemo hunoʼaeʼmo, Nagaefeʼmo hutapaeʼmo, Ala kava nefeʼmo aigofe osuʼniyanageta afaʼa alita amufa amigune, hutapa lapakesamo afiʼnisayaʼmoʼmo mani taonifiʼmo maiʼnetapaeʼmo nagae nopiʼmo etapa maiyo, huno laha paiʼniye.

Poloʼe Sailasiʼeʼmo kalavusi huʼa anateʼnaya gemae

16 # Ap 19:24 Lagaemo nunumuʼmo nehaya yategamo neʼunagenoʼaeʼmo hosu aune aʼmafaʼnemo kalavusi aliʼyaʼmo aligekana huno aliʼyaʼmo neʼaliya aʼmafaʼnemo kateʼmo neʼegeta uta fotu huʼnone. Agaeteʼmo yagaiʼneʼa hogoteno afole aisiya kavaʼmo ageteno hapa paiʼnigeʼapaeʼmo alopa monimo alige alige huʼa neʼmaiya aʼmafaʼneʼeʼmo uta fotu huʼnone. 17#Mk 1:24,34Ani aʼmafaʼnemoʼmo Poloʼe lagaeʼeʼmo lakame huno uneno nehunoʼaeʼmo alopa gefatiʼmo hunoʼaeʼmo, Ani vayaʼmogi Gotiʼa hogote vekamo anaga vekamo aliʼyaʼamo neʼaliya vayane. Gotiʼa lagufamo alino katino latesiya gemo aeʼa hakalo huʼa laha nepaiye, huno 18#Mk 16:17muki afinaʼae afinaʼaeʼmo ani agufa gemo huno hapa paige hapa paige huno maiʼniye. Poloʼa lusi kava huno alagaʼmo haeʼnigenoʼaeʼmo aino afe leno ani hosu aune vekaeʼmo hunoʼaeʼmo, Yesu Kalaisi agiʼaletiʼmo ani aʼmafaʼnemo ataleka emikeno, huʼna kaha nepauve, huno ha nepaigenoʼaeʼmo malage huno ataleno emineʼniye. 19Ani aʼmafaʼneleʼmo neʼyagaiya vayaʼmogimo ani kavaʼmo ageteʼapaeʼmo, Vaehae, huʼa, lagaemo magoʼe huta monimo oʼalisuna kava hiye, huʼa huteʼa Poloʼe Sailasiʼeʼmo anatafauʼana heʼa anavayu huliʼana uʼa haiʼa taoni folagapiʼmo aliʼa anupa huʼa neʼmaiya yateʼmo gamani vayaʼai apaulagaleʼmo anateʼnaʼae. 20#Mk 13:9; Ap 17:6; Mt 5:11Anateʼneʼanaeʼmo Lomu gamani vayaʼaifeʼmo, Ani vekalaʼmo Yu vekalaʼmo maiʼnaʼana lagae taonifiʼmo eʼana lusi hanageke kavaʼmo nehaʼae. 21Ani kavaʼmo hiyo, huʼana nehaʼaʼmonanafa lagaemo Lomu vayaʼmogita keʼaepa getimo amagita ataleteta alu gemo lagaemo akame osisuna agufa gemo laha nepaiʼae, huʼa hapa paiʼnae. 22#2 Ko 11:25; Fl 1:30; 1 Te 2:2Muki vayaʼmogimo ani gemo afiteʼapaeʼmo anamagisayafeʼmo eʼnae. Yagaiʼa neʼapataya vayaʼmogimo Poloʼe Sailasiʼeʼmo kukenaʼanimo aliʼa apake aiteʼa aliʼa asagiʼa ataleʼneʼapaeʼmo, kayotetiʼmo anamagiyo, huʼa hapa paiʼnageʼapaeʼmo 23lusi kava huʼa anamagiteʼa kalavusi huʼana anateteʼanaeʼmo kalavusi vayaʼaiteʼmo yagaino neʼapateya vekaeʼmo huʼapaeʼmo, kanale huka yagaika anato, huʼa ha paiʼnae. 24Kalavusi vayaʼaiteʼmo yagaino neʼapateya vekamoʼmo ani gemo afitenoʼaeʼmo kalavusi noʼmo folagapiʼmo aeʼa anagi maleʼnaya yapiʼmo alino anateteno anaiyalateʼmo yosaletiʼmo aino atafauno anateʼniye.

25Haniʼilaga folaguʼmo Poloʼe Sailasiʼeʼmo nunumuʼmo huge mono yokemo huge huʼnaʼageʼapaeʼmo kalavusi huʼa apateʼnaya vayaʼmogimo afiʼa maiʼnae. 26Maiʼnagenoʼaeʼmo malage huno lusi imimaʼmo aliteno noʼmo faiʼa ateʼnaya yafaʼmoʼa lusi kava huno uti uti aiʼnigeno muki kitaʼamo malage huno ago aino yakiʼnigenoʼaeʼmo kalavusi huʼa apateʼnaya vayaʼai seli nofiʼmo aino hatu maeʼniye. 27#Ap 12:18-19Kalavusi vayaʼaiteʼmo yagaino neʼapateya vekamo aupatiʼmo he tino ageyana kitamo ago aino yakiʼnigeno agetenoʼaeʼmo, muki kalavusi vayaʼamo ago kumatega uʼa lamiteʼa apaune heʼa uʼnae, huno agesamo afitenoʼaeʼmo naipeʼamo asagino agaiʼa agufafiʼmo aeteno falisiyafeʼmo huʼniye. 28Aegefeʼmo nehigeno Poloʼa agetenoʼaeʼmo alopa gefatiʼmo hunoʼaeʼmo, kagaikamo kamitimo aeka kika katesanafeʼmo hananagi ani kavaʼmo osuvo. Lagaemo mukiʼamo afaʼa maiʼnone, huno ha paiʼniye. 29Kalavusi vayaʼaiteʼmo yagaino neʼapateya vekamoʼmo hunoʼaeʼmo, kani aeka namiyo, huno huteno alinino nagu nagu huno nopiʼmo uno haino Poloʼe Sailasiʼeʼmo anaiyafiʼmo asagauno aino agoʼya faiteno atete huʼniye. 30#Ap 2:37Agaemo nopatiʼmo anavalelino neʼunoʼaeʼmo, Ala vekalane, huno, Gotiʼa nagufamo alino katino natesiyafeʼmo na agufa kava hisuve, huno ge huno anafi geʼnigeʼanaeʼmo 31Ala kava neʼmo Yesu Kalaisifekeʼmo kagesa afika fatago hugenoʼao Gotiʼa kagaeʼe afamo anagakaʼeʼmo lapakufamo alino katino lapategaiye, huʼana ha pailiʼana uʼnaʼae. 32Uʼanaeʼmo agaeʼe noʼafiʼmo maiʼnaya vayaʼefeʼmo Ala kava neʼmo ava gemo hapa paiʼnaʼae. 33#Ap 16:15Ani afinaʼmo kalavusi vayaʼaiteʼmo yagaino neʼapateya vekamoʼmo anamagiʼnaya anamuteʼmo anitetiʼmo sese huno anateʼniye. Anakaemo agaeʼe muki afamo anagaʼaʼeʼmo aniʼmo faleʼana apateʼnaʼae. 34Agaemo Poloʼe Sailasiʼeʼmo noʼafiʼmo anavalelino uno haino neʼyaʼmo anamiʼniye. Gotifeʼmo agaeʼe afamo anagaʼaʼeʼmo apakesamo afiʼa fatago huteʼa apamogaga aiʼnae. 35Ega netepiʼmo yagaiʼa neʼapataya gamani vayaʼmogimo ati vayaʼaifeʼmo huʼapaeʼmo, Lole vekalaʼmo kalavusifatiʼmo hatu maeka anato, hutapa uta ha paiyo, huteʼa aliʼa apateʼnageʼa uʼnae. 36Kalavusi vayaʼaiteʼmo yagaino neʼapateya vekamoʼmo ani gemo afitenoʼaeʼmo Polofeʼmo hunoʼaeʼmo, Yagaiʼa neʼapataya vayaʼmogi huʼapaeʼmo, hatu maeka anato, huʼa naha paiʼnayaʼmofeʼmo afaʼa viʼao, huno hana paiʼniye. 37#Ap 22:25; Mt 8:34Huno hana paiʼnigeno Poloʼa ati vayaʼaifeʼmo hunoʼaeʼmo, haʼao, Lomu gamani vayaʼmogi neʼyagaiya kegiʼyafiʼmo maiʼnoʼageʼapaeʼmo yagaiʼa nelaʼatae. Lomu vayaʼai kegiʼyafiʼmo maiʼnetaʼaeʼmo mago hosu kavaʼmo osuʼnoʼaʼmonanafa agoti huʼa olaʼateʼneʼa muki vayaʼai apaulagaleʼmo afaʼa laʼamagiʼnae. Hemenimo kesi katetiʼmo hatu maeʼa laʼatesayafeʼmo huʼnae. Haʼao. Yagaiʼa neʼapataya gamani vayaʼmogimo apakaiʼapigeʼmo eʼa laʼavaleliʼa ugae, huno hapa paiʼniye. 38Ati vayaʼmogi uʼa ani gemo yagaiʼa neʼapataya gamani vayaʼaifeʼmo hapa paiʼnae. Lomu gamani vayaʼai kegiʼyafiʼmo maiʼnaʼae, huʼa hapa paiʼnaya gemo afiteʼapaeʼmo apamoʼyamo aiʼniye. 39Eʼa kalavusi kegiʼyafatiʼmo anavaleliʼa kumatega lamiteʼapaeʼmo, Lanahao ke honanagi mani taonifatiʼmo ataletana alu kotega viʼao, huʼa hana paiʼnae. 40Poloʼe Sailasiʼeʼmo kalavusi nopatiʼmo ataleʼana Litiya notegamo uʼana maiʼneʼanaeʼmo konagaʼanimogifeʼmo Gotiʼa apaipamo alino lokiya vaino apatesiya gemo hapa paiteʼana apataleʼana uʼnaʼae.

Currently Selected:

Apa 16: kyg2013

Highlight

Copy