Apa 17

Poloʼe Sailasiʼeʼmo Tesalonaika taonifiʼmo uʼana maiʼnaʼageʼanaeʼmo anamagisayafeʼmo huʼnaya gemae

1 # 1 Te 1:1-2 Anakaemo uʼana Amifipolisi taonimo aliʼana atale uʼana Apoloniya taoniʼeʼmo aliʼana atale uʼana Tesalonaika taonifiʼmo uʼana maiʼnaʼae. Yu vayaʼai mono noʼmo haneʼnigeno 2Poloʼa nehiya kava huno uno haino mono nopiʼmo loleʼe magoʼe Sapati afinaʼmo Goti Mukufi gemo lekana paino alino apaya maleʼnigeʼapaeʼmo agaeʼeʼmo ge huge afige huʼa maiʼnae. 3#Lu 24:26; Ap 3:18; 9:22Ani gemo aepaʼamo aeno hakalo huno hapa painoʼaeʼmo, Goti geʼamo alino afole aino atesiyafeʼmo Mesaiya vekamo Gotiʼa alino ateʼnigeno emineʼniya vekamo faliteno ago he tiʼniye, huno Goti Mukufi haneʼniya geletiʼmo alino apaya maleʼniye. Poloʼa hunoʼaeʼmo, Ani ava gemo aeʼna hakalo huʼna hapa nepauva vekamo Yesuʼa Mesaiya vekamo maiʼniye, huno hapa paiʼniye. 4#Ap 13:50Mago vayaʼmogimo ani gemo afiteʼa Polo geʼaeʼmo apakesamo afiʼa fatago huteʼapaeʼmo anakame huʼnae. Asole Galiki vayaʼmogi Gotifeʼmo mono nehaya vayaʼe apaki haneʼniya aʼnemogiʼeʼmo eʼa lokaeʼa maiʼneʼa geʼanimo afiʼnae. 5Afiʼnayaʼmonanafa apakesa afiʼa fatago osuʼnaya Yu vayaʼmogimo apaipa kafa hanaeteʼa hosu vayaʼmo aliʼyaʼmo oʼaliʼa afaʼa maiʼneʼa maketilegamo umenitata huʼa neʼmaiya vayaʼmo apavaleʼa aliʼa anupa huteʼa apavaleliʼa uʼnageʼapaeʼmo muki taonifiʼmo maiʼnaya vayaʼmogiʼeʼmo apano aeteʼa apavamusa valeʼa Yesoni notegamo uʼnae. Apakaemo huʼapaeʼmo, lole vekalaʼmo nopatiʼmo anayate heta anavayu hulita egaune, huʼa huteʼa eʼnayana 6#Ap 16:20nopiʼmo oʼmaiʼnaʼageʼapaeʼmo Yesoniʼe mago konagaʼaʼeʼmo eʼa apayate heʼa apavayu huliʼa yagaiʼa neʼapataya vayaʼaitegamo eʼapaeʼmo, muki haopalega hanageke kavaʼmo nehaʼa vekalaʼmo manileʼmo eʼana maiʼnaʼageno 7#Lu 23:2; Yo 19:12Yesoniʼa alino falu fala huno anateteno noʼafiʼmo anavalelinuno yagaino anateʼniye. Muki vayaʼmogimo huʼapaeʼmo, alatimo yagaino nelateya vekamo Sisa keʼaepa gemo ago amagiʼa ataleteʼapaeʼmo, alu vekamo Yesuʼa alaʼapimo yagaino neʼapateya vekae, huʼa nehae, huʼa hapa paiʼnae. 8Hapa paiʼnageʼapaeʼmo muki apano aeʼnaya vayaʼe taonifiʼmo yagaiʼa neʼapataya vayaʼmogiʼeʼmo hapau aiteʼa lusi kava huʼa apakesa alaʼamo afiteʼa 9Yesoniʼe alu vayaʼefeʼmo huʼapaeʼmo, agotimo miya faitetapa viyo, huʼa hapa paiʼnageʼa miya faitageʼa aliʼa apatalageʼa uʼnae.

Meliya taonifiʼmo uʼnaʼa gemae

10Hani nehigeʼapaeʼmo konagaʼanimogimo Poloʼe Sailasiʼeʼmo aliʼa anateʼnageʼana Meliya taonifiʼmo uʼana avaʼyi huʼnaʼae. Uʼana avaʼyi huteʼana Yu vayaʼai mono nopiʼmo uʼa haiʼana Goti geʼamo hapa paiʼnaʼae. 11#Yo 5:39Meliya vayaʼmogimo ani gemo afiʼnageno apakesamo aino halo aiʼnigeʼa Tesalonaika vayaʼmo aeʼa apakaseʼa magoʼe huʼa alagepa huʼa afiʼnae. Apakaemo muki afinaʼae afinaʼaeʼmo Poloʼa lama gemo nehifi, huʼa apakesamo afiteʼa Goti Mukufiʼmo haneʼniya geeʼmo kahauya huʼa agege lekana paige huʼa maiʼnae. 12Asole vayaʼmogi apakesamo afiʼa fatago huʼnae. Asole Galiki aʼne anaganagi apaki haneʼniya aʼne anaganagi Galiki ve anagaʼenagi huʼa apakesamo afiʼa fatago huʼnae. 13#Ap 13:50; 14:19Ani kavaʼmo huʼnayaʼmonanafa Tesalonaika Yu vayaʼmogimo afiʼnayana Poloʼa Meliya taonifiʼmo uno maiʼneno Goti geʼamo aeno hakalo huno hapa nepaiye, huʼa huʼnageʼa afiteʼapaeʼmo eʼa alu ge alu gemo huʼa muki vayaʼai apakesamo faiʼnae. 14Ani kavaʼmo nehageʼapaeʼmo konagaʼamogimo Poloʼmo aliʼa ateʼnageno uno lamino solovalategamo maiʼnigeʼanaeʼmo Sailasiʼe Timotiʼeʼmo Meliya taonifiʼmo maiʼnaʼae. 15Mago vayaʼamogimo Poloʼa avaleliʼuʼa Atenisi taonifiʼmo ateʼnagenoʼaeʼmo Poloʼa, Sailasiʼe Timotiʼeʼmo egefe hisaʼa afinaʼmo nagaetega malage hutana eʼao, hutapa hana paiyo, huno hapa paiʼnigeʼa ataleʼa aiʼa atagi neʼa eʼnae.

Poloʼa Atenisi taonifiʼmo Goti geʼamo aeno hakalo huno hapa paiʼniya gemae

16Poloʼa anakava maiʼnenoʼaeʼmo Atenisi taonifiʼmo ageyana muki alo huʼa maleʼnaya yafekeʼmo gotitimogimo maiʼnae, huʼa nehaya aigofe yaʼmo haneʼnigeno agetenoʼaeʼmo hosu aipamo kaliʼniye. 17#Ap 18:19Agaemo muki afinaʼae afinaʼaeʼmo Yu vayaʼai mono nopiʼmo uno haino hapa paiʼnigeʼapaeʼmo Yu vayaʼe alu nofi vayaʼmogimo mono nehaya vayaʼeʼmo magokepi ge huge afige huʼa maiʼnae. Ani kavaʼmo huno muki afinaʼae afinaʼaeʼmo uno maketileʼmo eʼa maiʼnaya vayaʼaifeʼmo hapa paiʼnigeʼa agaeʼeʼmo magokepi ge huge afige huʼa maiʼnae. 18Mago Epikuliya gemo akame nehaya vayaʼe Sitoʼiki gemo akame nehaya vayaʼmogiʼeʼmo eʼa Poloʼeʼmo ge huge afige huʼa maiʼnae. Mago vayaʼmogi huʼapaeʼmo, Ani negi nagi tisa vekamoʼmo haiya agufa gemo hugiye, huʼa huʼnageʼapaeʼmo, Alu nofi vayaʼai gotiʼapimogifeʼmo apava gemo aeno hakalo huno hapa nepaiya vekae, huʼa huʼnae. Poloʼa Yesufeʼmo ava gemo hunoʼaeʼmo, faliʼniyatetiʼmo ago he tiʼniye, huno aeno hakalo huno hapa paiʼniyaʼmofeʼmo ani gemo huʼnae. 19Apakaemo Polofeʼmo, alita anupa huta neʼmauna yategaeʼmo agiʼamo Aliyopagasigayagamo kagaemo eka saufa gemo nehana gemo laha paisanageta afigunanagi eno. 20Kagaemo aeto agufa gemo nehanaʼmofeʼmo ani gemo aepaʼamo afigefesune, huʼa ha paiʼnae. 21Muki Atenisi taonifi vayaʼe nata vayaʼmogiʼeʼmo saufa gemo huge afige huʼa maisayafeʼmo hapauʼniye. 22Poloʼa Aliyopagasi kanisole vayaʼai apaulagaleʼmo he tino hapa painoʼaeʼmo, Atenisi taonifi vayaʼmogitapae, huno, Nagaemo ago lapakeʼnovana lapakaemo lusi kava hutapa mono nehaya vayaʼmo maiʼnae. 23Lapakae taoni folagapiʼmo umenitata nehuʼnaeʼmo mono nehaya yatapimo ago ageʼnove. Ageʼnovana mago ofalini yaʼmo maleʼnetapa neʼapamiya hiʼyalamuteʼmo mago avoʼmo kae maleʼnaya gemoʼa hunoʼaeʼmo,

Oʼageʼnona Goti hiʼyalamune,

huʼa avoʼmo kae maleʼnageʼna ageʼnove. Lapakaemo ani Gotifeʼmo mono nehayaʼmonanafa oʼageʼnae. Hemenimo ani Gotifeʼmo nagaemo ava gemo aeʼna hakalo huʼna lapa nepauve. 24#1 Kin 8:27; Ap 7:48Gotiʼa ma mopaʼe muki ma mopafi haneʼniya yaʼeʼmo alo huteno kokuʼnate haneʼniya yateʼe ma mopafi haneʼniya yateʼeʼmo neʼyagaiye. Vayaʼmogi muki ki maleʼnaya mono nopiʼmo noʼmaiye. 25#Sam 50:12; Aiy 42:5Gotiʼa muki yaʼamo haneʼniya vekamo maiʼniyaʼmofeʼmo vayaʼmogi mago yaʼmo ha maeʼa amisafiye. Haʼao, agaiʼageʼmo hapa maeno apavamusanagi afaʼa neʼmaiya yanagi muki yanagi huno neʼapamiye. 26Agaemo magoke vekamo alo huʼniya vekafatiʼmo alu nofi vaya alu nofi vayaʼmo alino afole aino apateʼniye. Hogoteno hunoʼaeʼmo, hainu afinaʼmo maisafi haiyategamo maisafi, huno lekana pai maleʼniye. 27#Loa 32:8; Aiy 55:6; Sam 145:18; Yel 23:23Agaefeʼmo kahauya huta agegesune, huʼa huteʼa kahauya huʼa agesayafeʼmo Gotiʼa ani kavaʼmo huʼniyaʼmonanafa afagitega noʼmaifa lahaopaleʼmo neʼmaiye. 28Agaeʼeʼmo lokaeta neʼmaunaʼmofeʼmo afaʼa maisuna yaʼmo aliteta umenitata huta neʼmaune. Mago lagaepati vayaʼmogi avoʼmo kaeʼnaya vayaʼmogimo, Mafaʼneʼamo maiʼnone, huʼa huʼnae. 29#Aiy 40:18-20; 44:10-17; Ap 19:26Goti mafaʼneʼamo maiʼnonaʼmofeʼmo goli yafatetinagi siluva yafatetinagi alu yafatetinagi huʼa alo huʼnaya vekamo maiʼniye, huta lagesa oʼafigune. Gotiʼa vayaʼmogimo ageʼa alagepa huʼneʼa apayatetiʼmo alo nehaya yakana huno oʼmaiʼniye. 30#Ap 14:16Akeyaʼvilaga vayaʼmogimo Goti geʼamo oʼafiʼneʼapaeʼmo negi kavaʼmo huʼnagenoʼaeʼmo afaʼa apakeno apataleʼniyaʼmonanafa hemenimo muki haopalegamo neʼmaiya vayaʼaifeʼmo hunoʼaeʼmo, Lapaipamo alita afe leyo, huno hapa nepaiye. 31#Sam 9:8; 96:13; Ap 10:42Gotiʼa agoti huno apatesiya afinaʼmo lekana pai maleteno agoti huno apatesiya vekamo ago lekana paino ateʼniye. Lekana paino ateʼniya vekamoʼmo alagi lama geʼaletikeʼmo alino alagepa huno agoti huno apategaiye. Muki vayaʼmogimo ani kavatefeʼmo magoke apaipa apakesamo alisayafeʼmo Gotiʼa ani vekamo faliʼniyatetiʼmo ago alino he tino ateʼniye, huno hapa paiʼniye. 32Poloʼa hunoʼaeʼmo, faliʼniyatetiʼmo ago he tiʼniye, huno hapa paiʼnigeʼa afiteʼapaeʼmo mago vayaʼamogimo huʼa faipa huʼa ateʼnageʼapaeʼmo mago vayaʼamogimo, Ani kavafeʼmo ava gemo magoʼe huta afigesune, huʼa ha paiʼnae. 33Inagi Poloʼa ago apataleno uʼniye. 34Mago vayaʼamogimo akame huʼa neʼuʼapaeʼmo apakesamo afiʼa fatago huʼnae. Ani vayapatiʼmo mago vekamo agiʼamo Naiyonisiyasiʼa Aliyopagasi kanisole vekagi mago a kanomo agiʼamo Namalisiʼagi magoʼe vayanagi huʼa maiʼnae.

Currently Selected:

Apa 17: kyg2013

Highlight

Copy