NUMBERS 27
27
Ziilófehad bitsi'ké da'dííkeed
1Nít'éé' Jóseph biye' Manáseh ba'áłchíní náás ahoolchíiłii Méíkir éí Manáseh biye', Gíliyad éí Méíkir biye', Híífer éí Gíliyad biye', Ziilófehad éí Híífer biye', éí Ziilófehad bitsi'ké yíkai; éí bitsi'ké kódaolyé: Mála, Nóah, Hágla, Mílka índa Térza. 2Áko éí níbaal bii' dahozdísinii bich'éédą́ą'gi Mózes áádóó náá'iiłniihii Eliyéízar áádóó naat'áanii danilíinii índa dah oonéłígíí t'áá ałtso yidááhdóó niikaigo ádaaní, 3Nihizhé'é yę́ę honoojíidi ádin; éí Kórah yił ahíikaigo Bóhólníihii yich'į' nidaalteeh nít'é'ígíí doo yił naakai da nít'éé', nidi t'áá bí ádił ni'iisíihgo daaztsą́, áko biye'ké éí t'áadoo hazlį́į' da. 4Ha'át'íísh biniyé nihizhé'é yę́ę biye'ké t'áadoo hazlį́'ígíí biniinaa dabik'is bitahdóó bízhi' doo bééhodoozįįł da? Éí bąą nihizhé'é yę́ę dabik'is bitahdóó kéyah nihíí' dooígíí ła' nihaa dinoh'aah.
5Kót'éego Mózes éí díí yaa nídaat'ínígíí Bóhólníihii baazhdiní'ą́. 6Áko Bóhólníihii éí Mózes yich'į' haadzíi'go ííłní, 7Ziilófehad bitsi'ké t'áá aaníígóó hadaasdzíí'; t'áá aaníí bizhé'é yę́ę bik'is bitahdóó kéyah daahóó' dooígíí hataadidíí'aał, áko bizhé'é yę́ę bikéyah baa dadidíí'ááł.#Num. 36:2. 8Áádóó Ízrel dine'é bich'į' hadíídzihgo kóbididííniił, Diné ła' biye' t'áadoo hazlį́į́'góó bí daaztsą́ągo bikéyah bitsi'ké bíí' nidahaleehgo ádaałe' doo. 9Nidi bitsi' t'áadoo hazlį́į́'góó éí bik'isóó bíí' dooleełgo baa dahidoh'aah doo. 10Bik'isóó ałdó' doo hólǫ́ǫ́góó bizhé'é yázhí bíí' dooleełgo baa dahidoh'aah doo. 11Nidi bizhé'é yázhí doo ła' hólǫ́ǫ́góogo éí t'áá hak'éí nilínígíí ła' kéyah bíí' dooleeł, áko Ízrel dine'é bich'į' yee nihoní'áanii bee nihodiit'aah doogo Bóhólníihii éí Mózes yich'į' yee haadzíí'.
Mózes á dzizį́į́ nít'éé' yę́ęjį' Jáshowa adoogááł biniyé nizhníłtį́
(Deut. 31:1-8)
12Áádóó Bóhólníihii éí Mózes ííłní, Nílááh, díí Dził Ábarim góde hasínáahgo kéyah éí Ízrel dine'é baa diní'ánígíí dínííł'įįł. 13Áko nííníł'į́į'go t'áá nik'is Éran anábi'dooltínígi át'éego ni ałdó' nidine'é daazlį́'ígóó ándi'doolnííł. 14Háálá honoojí Zin hoolyéegi dah oonéłígíí saad dahółǫ́ yę́ędą́ą́' shibik'eh ó'oo'níiłii bik'ijį' nííníltee'; tóogi dabinááł ts'ídá dinishyingo áshíínísin doo nít'éé';#Deut. 3:23-27; 32:48-52. éí Méribah tóodi Kéídesh nahós'a' Zin honoojíigi áhóót'įįd.#Num. 20:12,13. 15Ákohgo Mózes éí Bóhólníihii yich'į' haadzíi'go ání, 16Bíni' Bóhólníihii éí nihokáá' dine'é t'áá ałtso biníłch'i yiDiyin God nilíinii diné ła' dah oonéłígíí yá sizį́įgo íidoolííł; 17éí yá ch'énádáah doo índa yilą́ąjį' yah anáhádáahgo yoo'ish doo índa yah anáyii'éesh doo, áko éí Bóhólníihii bits'ą́ą́dóó dah oonéłígíí doo dibé yaa áhályáanii bee ádinígíigi ádaat'ée da doo.#1Kgs. 22:17; Ezek. 34:5; Mt. 9:36; Mk. 6:34. 18Áko Bóhólníihii éí Mózes ííłní, Nan biye' Jáshowa#Ex. 24:13. bił nídiit'aash; éí yá'át'éehgo diné bii' honít'i'ii bik'i dah didíílnihgo 19náá'iiłniihii Eliyéízar áádóó dah oonéłígíí t'áá ałtso bidááhdóó bił nidíí'ash, áko t'áá dabinááł bee óhólnííh baa díísįįł. 20Áádóó bee níhólníhígíí bąąh nidíílééł, áko Ízrel dine'é dah yinéłígíí t'áá ałtso bik'eh dahół'į́į doo. 21Áádóó náá'iiłniihii Eliyéízar wolyéii yidááhdóó néidzįįhgo, áko há na'ak'íyáłti'go Yúrim#Ex. 28:30; 1Sam. 28:6. bibee nihodiit'aahii há bee Bóhólníihii binááł há na'ídíkid doo, áko éí bik'ehgo Jáshowa áádóó Ízrel dine'é dah yinéłígíí t'áá ałtso hazaad k'ehgo ch'énákah doo índa yah anákah doo. 22Ákohgo Mózes éí Bóhólníihii áhodííniidígíí bi'jiilaa; Jáshowa bił nízhdiit'áazhgo náá'iiłniihii Eliyéízar áádóó dah oonéłígíí t'áá ałtso bidááhdóó bił nizhní'áázh, 23áádóó Jáshowa bik'i dasdees'nii'go binaanish dooleełígíí baa dadzisįįdgo#Deut. 31:23. Mózes hwee Bóhólníihii yee haadzí'ígíí ájiilaa.
Currently Selected:
NUMBERS 27: NVJOB
Highlight
Share
Copy
Want to have your highlights saved across all your devices? Sign up or sign in
Navajo Bible © 2000 American Bible Society. All rights reserved.
Bible text from the Navajo Bible is not to be reproduced in copies or otherwise by any means except as permitted in writing by American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org).
