LUKE 17
17
Bąąhági áhát'į́ biniinaa nihwiileehii
(Mt. 18:6,7,21,22; Mk. 9:42)
1Áádóó hódahooł'aahii ábizhdííniid, Bąąhági áhodooníiłgo bee na'íhontaah ts'ídá t'áádóo nídí áánííł, nidi haniinaa áhooníiłii, éí doo hojooba' ájíníi da! 2Díí áłchínígi át'éego a'ohgo ádaa nitsídaakeesgo dashoodlánígíí ła'da bąąhági át'į́ ájiilaago, tsé daashjéé' hazéédéet'ą́ągo, tónteel biih hodi'yoolghango há yá'át'éeh doo nít'éé'. 3Ádaa ádahołyą́; nik'is nich'į' bąąhági ádzaago didííteh, áko yąąh bíni'go yaa tsídeezkéezgo, bá yóó'adidíí'ááł,#Mt. 18:15. 4áádóó t'áá ła'a jį́ tsosts'idi nich'į' bąąhági ánádzaago, nít'éé', Bąąh shíni'go baa nitséskees, nidííniidgo tsosts'idi nich'į' ninádzáago bá yóó'anáhididíí'ááł.
Nihe'oodlą' bee aa dadzííníidlíhígíí bilááh ánílééh
5Áko daal'aadii éí Bóhólníihii ádeidííniid, Nihe'oodlą' bee aa dadzííníidlíhígíí bilááh ánílééh! 6Áádóó Bóhólníihii ázhdííniid, Nihe'oodlą' bee aa dzódlí ch'il mástad yolyéhígíí bílástsii'gi áníshéhí nidi, díí tsin síkamin sikaadii ábididoohniił, Hani'dólts'ǫǫdgo tónteel bii'di k'ini'dólyééł, áko t'áá ákǫ́ǫ́ nihik'ehgóó ádoonííł.
Naal'a'í binaanish
7Da' nihíísh nihitahdóó ła' nihá naal'a'í hólǫ́ǫgo, áko éí nihwiiłdlaadę́ę́', doodaii' na'niłkaadę́ę́' nádzáago ábididoohniił, Hágoshį́į́ nídaahgo ííyą́? 8Dooda lą́ą. Kót'éego bich'į' hadoohdzih, Ni'éé' bee áká nílzisgo adeeshį́į́ł áádóó adeeshdlį́į́ł biniyé ch'iyáán shá áníléehgo shiyaa ni'níkaah, áádóó índa ni adííyį́į́ł áádóó adíídlį́į́ł? 9Da' há naal'a'ísh ábizhdííniidígi ádzaaígíí biniyé ahéhee' bijiníi doo? Dooda! 10T'áá ákót'éego nihí ałdó' bich'į' danihi'dool'aadígíí ádaahłaago ádadidoohniił, Á naal'a'í doo ílíinii daniidlį́; t'áá bich'į' danihi'dool'aadígíí t'éí ádeiilyaa.
Diné neeznált'éego łóód ats'íís yiyáanii naałdzidii bee bąąh dah nahaz'áanii hadaałt'é áńdabi'diilyaa
11Jerúsalemgóó joogáałgo Samériya índa Gálilii kéyah bita'góó ch'ízhníyá. 12Nít'éé' kin sinil léi'gi jiníyáago, diné neeznált'éego łóód ats'íís yiyáanii naałdzidii bee bąąh dah nahaz'ą́ą́ léi' hadááh yíkaigo, t'áá nízaadę́ę́' naazį́, 13áko hadadeeshghaazhgo ádahodííniid, Jesus, Bóhólníihii nílíinii, nihaa jiiníbaah. 14Áko jiiłtsą́ągo ábizhdííniid, Nihílááh, nááda'iiłniihii danihinóoł'į́į́'.#Lev. 14:1-32. Nít'éé' t'áá ákǫ́ǫ́ yikahgo, hadaałt'é nídaasdlį́į́'. 15Nít'éé' ła' hadaałt'é násdlį́į'go bił bééhoozin, áko yéego Diyin God yaa haniihgo t'ą́ą́' nádzá, 16áko Jesus yich'į' nitsidinígo'go yich'į' ahééh niizį́į́'. Éí Samériya dine'é jílį́įgo ájít'į́. 17Áko Jesus haadzíi'go ádííniid, Da' doósh neeznált'éego hadaałt'é nídaasdlį́į' da? Náhást'éí yilt'éhígíí éí háájí? 18Da' Diyin God yich'į' ahééh dadínóozįįł biniyé t'áadoo t'ą́ą́' nákai da, t'áá hazhó'ó díí łahdę́ę́' dine'é nilíiniísh t'éiyá? 19Áádóó áhozhdííniid, Nídiidáahgo nílááh yínááł; ne'oodlą' bee doo ánít'éhí da násínídlį́į́'.
Diyin God bee bóhólníihgo bił haz'áanii bił hoolzhishii
(Mt. 24:23-28,37-41)
20Nít'éé' Férisii danilíinii nidahódééłkidgo ádadííniid, Hahgoshą' Diyin God bee bóhólníihgo bił haz'áanii baa hodoolzhish? Áko hadzoodzíi'go ábizhdííniid, Diyin God bee bóhólníihgo bił haz'áanii yit'į́įgo doo hodooleeł da; 21doo nidi kódadidoohniił da, Jó, kǫ́ǫdí! éí doodaléi', Jó, níláhgóó! háálá jó'akon, Diyin God bee bóhólníihgo bił haz'áanii nihiyi'di hólǫ́.
22Áádóó hódahooł'aahii ábizhdííniid, T'áá ła'a jínígoda Diné Silį́į'ii dzoołtsééł laanaa danohsingo yoołkáał dooleełii baa hodoolzhish, nidi doo deiidoołtséeł da. 23Áádóó ádanihididooniił, Jó, níláhgóó! éí doodago, Jó, kǫ́ǫdí! danihiłníigo t'ááká ákǫ́ǫ́ dah doohjeeh yíila', t'ááká bikéé' dadohkááh lágo. 24Háálá t'áá atsiniltł'ish aheta'go yá ha'naa aheta'ígi át'éego Diné Silį́į'ii beidoołkááł. 25Nidi k'ad átsé lą'ígóó ti'hwiizhdoonih áádóó díí oochíłígíí doo dahodínóozįįł da. 26T'áá Nóah bíyoołkááł yę́ędą́ą́' áhoot'éé nít'é'ígi át'éego,#Gen. 6:5-8. t'áá ákót'éego ałdó' Diné Silį́į'ii náádááł beiníłką́ągo ákóhoot'ée doo. 27Nóah tsinaa'eeł yiih híyáajį', diné da'ayą́ áádóó da'adlą́ índa nida'ayeh áádóó ahaa daha'nííł nít'éé', ákondi tó yíląądgo ałtso ábísdįįd.#Gen. 7:6-24. 28T'áá Lat bíyoołkááł yę́ędą́ą́' áhoot'éé nít'é'ígi át'éego, da'jiyą́ áádóó da'jidlą́, ahaa nida'jiilniih, haa nida'iiniih, k'éédazh'didlééh áádóó kin ádajile', 29nidi Lat éí Sádam kin haal'áádóó ch'íníyá bijį́įdi yádiłhił biyi'dę́ę́' kǫ' índa tsékǫ' łitsoígíí nááłtą́ągo diné ałtso íísdįįd;#Gen. 18:20—19:25. 30ts'ídá ákót'éego Diné Silį́į'ii yit'íní ályaa bijį́įdi áhodoonííł. 31Éí bijį́įdi, t'áá háiida hakin bighą́ą'di nijigháhígíí wóne'dę́ę́' hanaalye'é ch'ízhdoojih biniyé doo yahanízhdoolwoł da, áádóó t'áá ákót'éego t'áá háiida dá'ák'ehgi nijigháhígíí doo t'ą́ą́' nízhdoolwoł da.#Mt. 24:17,18; Mk. 13:15,16. 32Lat be'asdzą́ą́ béédaałniih.#Gen. 19:26. 33T'áá háiida jiinánígíí ádá shójoost'e'ígíí éí yóó'azhdootłish, nidi t'áá háiida jiinánígíí yóó'azhdíí'ą́ągo éí jiinánígíí doodzih.#Mt. 10:39; 16:25; Mk. 8:35; Lk. 9:24; Jn. 12:25. 34Ánihidishní, T'áá éí bitł'éé' diné ła' tsásk'eh yikáá' shitéezh doo; ła' nídidooltééł, ła'ígíí éí t'áá ákǫ́ǫ dooleeł. 35Asdzání nidilt'éego t'ááłáhígóó ak'áa dooleeł; ła' nídidooltééł, ła'ígíí éí t'áá ákǫ́ǫ dooleeł. 36[Áko dá'ák'ehgi diné naaki naa'aash doo; ła' nídidooltééł, ła'ígíí éí t'áá ákǫ́ǫ doo.]#17:36 Saad ła' áádóó saad naazhjaa' ła' kót'éego daasdzohígíí [ ] bita'gi dabiká'ígíí éí Diyin God bizaad t'áá ałk'idą́ą́' bee ak'eda'ashchínígíí doo t'áá ałtso dabikáa' da, nidi ła' t'éiyá dabikáá'. 37Áádóó ádahodííniid, Bóhólníihii, díishą' háadi ákóhodoonííł? Áádóó ábizhdííniid, T'áá ha'át'íhída daaztsą́ągo sitį́įgi, ákwe'é jeeshóó' áłah nilį́į doo.
Currently Selected:
LUKE 17: NVJOB
Highlight
Share
Copy
Want to have your highlights saved across all your devices? Sign up or sign in
Navajo Bible © 2000 American Bible Society. All rights reserved.
Bible text from the Navajo Bible is not to be reproduced in copies or otherwise by any means except as permitted in writing by American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org).
