LUKE 16
16
Naalye'é yaa áhályáanii bina'adlo'ii binahjį' hane' bee ak'idi'dootį́įłii
1Jesus bídahooł'aahii ałdó' áyidííniid, Diné léi' ła' ajit'į́įgo hanaalye'é há yaa áhályáanii hwee hólǫ́, nít'éé' éí yik'i dahodii'ą́ągo ádeiłní, Ninaalye'é t'óó yóó'ayiinííł. 2Nít'éé' hágo bizhdííniidgo ábijiní, Haa shį́į́ yit'éego naa hodiists'a'. Naaltsoos bik'ehgo shinaalye'é baa áhólyánígíí yah anáníłtsóós, háálá kodóó shinaalye'é doo shá baa ánááhólyą́ą da doo. 3Áko naalye'é baa áhojilyą́ą́ nít'é'ígíí t'áá hayi'ídi ázhdííniid, Haa lá deeshnííł lá, jó, shinanit'a'í binaalye'é baa áháshyą́ą́ nít'é'ígíí yits'ááshiníłt'e'? Áko la' na'ageed bich'į' doo shidziil da, índa adókeed baa yánísin. 4Ádeeshníłígíí lá bee hasht'e'nitsíníkéez ni. Kósht'į́įgo naalye'é baa áháshyą́ą́ nít'é'ídóó ats'ááshi'deelt'e'go t'óó diné dabighangóó tádísháah doo. 5Ákohgo binanit'a'í yąąh hadeis'áhígíí t'ááłá'í nítínígo hágo yidííniidgo, áłtséhígíí áyidííniid, Shinanit'a'íshą' díkwíí nąąh hayííł'á? 6Nít'éé' ázhdííniid, Ak'ah tóshjeeh t'ááłáhídi neeznádiin bee shąąh háá'á. Áádóó ánááhodoo'niid, Nąąh háá'áhígíí nídiiłtsóosgo tsį́įłgo nídaahgo, t'áá ashdladiinígo ánílééh. 7Náánáła'ígíí ánéidoo'niid, Nishą' éí díkwíí nąąh háá'á? Áko ání, Tł'oh naadą́ą́' neeznádiin azis hadeezbingo bee shąąh háá'á. Nít'éé' ánéidoo'niid, Nąąh háá'áhígíí nídiiłtsóosgo t'áá tseebídiinígo ánílééh. 8Áko naalye'é yaa áhályáanii doo ákwii áát'įįdígíí hóyą́ągo ádzaaígíí binahjį' binanit'a'í baa haznih, háálá díí hoolzhishígíí biyi' nihokáá' dine'é áda'ahil'ínígíí yee adinídíín ba'áłchíní yiláahdi dahóyą́. 9Áádóó ánihidishní, Na'adlo' bee at'į́ bee nihik'is ádá ádaałne', áko at'į́ ásdįįdgo nihik'is ádaahłaaígíí hool'áágóó kéédahat'į́į́ góne' nihaa dahodidoo'ááł.
10T'áá háiida t'áá kóníshéhí nidi bee ba'ahódlíhígíí, t'áá éí ałdó' lą'í bee ba'ahódlí, áádóó t'áá háiida t'áá kóníshéhí nidi bee bina'adlo'ígíí, t'áá éí ałdó' lą'í bee bina'adlo'. 11Ákohgo at'į́ doo t'áá ákogi át'éii aya'iidoolohígíí nidi doo bee nihada'ahódlíi da nít'ée'go, ákoshą' háí at'į́ t'áá aaníinii yee niha'iidooliił? 12Áádóó diné náánáła' bíhígíí nidi doo bee nihada'ahódlíi da nít'ée'go, háishą' t'áá danihíhígíí nihaididoo'ááł? 13Naal'a'í ła'da doo t'áá łahjį' naat'áanii naaki bá nijól'a' át'ée da, háálá ła' bik'eezhdiniih doo, ła' éí ayóó'ájó'níi doo, éí doodaléi' ła' doo nahdi jó'níi da doo, ła' éí jijoołáa doo. Diyin God índa at'į́ doo t'áá łahjį' bá nijól'a' át'ée da.#Mt. 6:24.
Bee haz'áanii Mózes baa deet'áanii
(Mt. 11:12,13; 5:31,32; Mk. 10:11,12)
14Férisii danilíinii, éí béeso yíchą́deídéelni'ii, díidí deidiizts'ą́ą'go há nídahodiiłt'i'. 15Nidi ábizhdííniid, Nihí éí diné dabinááł doo nihidahodiit'i'góó ídadi'diilnííł danohsin, nidi Diyin God éí nihijéí bił bééhózin, háálá diné bitahgóó ayóó ádaat'é dawó'níinii éí Diyin God binááł nádį́'ídi t'óó baa'ihii ádaat'é.
16Bee haz'áanii Mózes baa deet'áanii índa Diyin God yá dahalne'ii binaaltsoos John níyáhíjį' bee nihoolzhiizh, áádóó wóshdę́ę́' Diyin God bee bóhólníihgo bił haz'áanii baa hane' yá'át'éehii baa hodeezne', áko diné t'ááłá'í nítínígo t'áá bizááká yiih hijeeh.#Mt. 11:12,13. 17Nidi yádiłhił índa nahasdzáán bił yóó'ahodoogááłjí éí doo bohónéedzą́ą da, nidi bee haz'áanii biyi'dóó t'ááłáhígo dah alzhin t'áadoo biniyéhí da dooleełjí éí agháago doo bohónéedzą́ą da.#Mt. 5:18.
Jesus ałts'á'iildééh yeinít'į́
(Mt. 5:31,32; Mk. 10:1-12)
18T'áá háiida hwe'asdzą́ą́ yóó'azhdíí'ą́ągo áádóó náánáłahjį' asdzání bá náá'dzísgehígíí éí azhdííláago át'é, áádóó asdzání yóó'abi'doot'ánígíí t'áá háiida bá náá'ázyehgo éí azhdííláago át'é.#Mt. 5:32; 1Cor. 7:10,11.
Diné at'íinii áádóó Lázaras
19Diné ła' t'áá íiyisí at'į́į́ léi', éé' tsídídééh nahalingo łichí'ígíí índa áłts'óózígo yisdizígíí bee na'at'ą́hí łigaii dits'idgo ályaii yee hadít'é áádóó t'áá ákwíí jį́ ch'iyáán ałtaaskąądí t'éiyá yiyą́. 20Áko bich'éédą́ą'gi adókeedí léi', Lázaras yolyéego sitį́, éí t'áá át'éé nít'éé' łóód bąąh hólǫ́. 21Diné at'ínígíí bibikáá' adání bikáá'dę́ę́' ch'iyáán hadahindéhígíí sha'dooltsoł jinízingo; t'ah nááyówehígo łééchąą'í nidi hach'į' dah yijahgo halóód deiłnaad. 22Nít'éé' diné bahojoobá'íígíí daaztsą́ągo diyingo nidaal'a'í dah dabidiiłtį́įgo Éíbraham yílák'e deistį́. Áádóó diné at'íinii ałdó' daaztsą́ągo yóó'ábi'diilyaa, 23áko hool'áágóó ti'hojoonííhdóó hajííghal, nít'éé' doo deighánídi Éíbraham jiiłtsą́, Lázaras dah yoołtéełgo. 24Áko hazhdoolghaazhgo ájíní, Shizhé'é Éíbraham, t'áá shǫǫdí shaa jiiníbaah, áádóó Lázaras shich'į' díł'á, bíla' bílátahgi yee taah didoolnihgo shitsoo' yee néidínóołk'as, háálá díí kǫ' biyi'gi t'áá íiyisí ti'hooshnííh. 25Nidi Éíbraham áhodííniid, Shiye', hinínáádą́ą́' t'áá ałtso yá'ádaat'éehii bee ákisínídla'ígíí béénílnííh áádóó éí t'áá bináłt'éego Lázaras bich'į' nahwii'náá nít'é'ígíí ałdó' béénílnííh, nidi k'ad éí kwe'é bił náhoojǫǫd, nidi ni t'éí t'áá íiyisí ti'hwiyínííh. 26Áádóó nihí índa ni ałdó' nihita'gi doo tsé'naa nijóya'ígi át'éégóó hasht'ehoolyaa, áko kodóó naa doodáłígíí doo bohónéedzą́ą da, áádę́ę́' ła' nihaa doogáłígíí ałdó' doo bohónéedzą́ą da. 27Áko ázhdííniid, Éí lá bąą shizhé'é, nánooshkąąh, shizhé'é bighangóó hodíł'á, 28háálá bił háájéé' ashdla', áko oo'íinii k'ehgo bił dahozhdoolnih, áko éí ałdó' díí ti'hoo'níhígi doo nidahidookah da. 29Nidi Éíbraham áhodííniid, Éí Mózes índa Diyin God yá dahalne'ii binaaltsoos bee dahólǫ́; bíni'dii éí dayíists'ą́ą́'. 30Áko ázhdííniid, Dooda, shizhé'é Éíbraham, jó, ła' daaztsą́ą́dę́ę́' baa nádzáago, bił hoolne'go łahgo át'éego tsíńdadookosgo Diyin God yich'į' nídadooyis. 31Nít'éé' ánáábizhdoo'niid, Mózes índa Diyin God yá dahalne'ii doo dayíists'ą́ą́'góó, ha'át'éegoshą' áko da'aztsą́ą́dę́ę́' ła' náádiidzáii dayíists'ą́ą' doo.
Currently Selected:
LUKE 16: NVJOB
Highlight
Share
Copy
Want to have your highlights saved across all your devices? Sign up or sign in
Navajo Bible © 2000 American Bible Society. All rights reserved.
Bible text from the Navajo Bible is not to be reproduced in copies or otherwise by any means except as permitted in writing by American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org).
