GENESIS 4
4
Kéin áádóó Éíbel
1Áádóó Ádam hwe'asdzą́ą́ Íiv bił ałt'ajíí'áazhgo i'niiltsąądgo Kéin yishchį́, áko ázhdííniid, Bóhólníihii bits'ą́ą́dę́ę́' shiyáázh shee hazlį́į́'. 2Áádóó náábík'ijį' bitsilí Éíbel jishchį́. Éíbel éí dibé yaa áhályáanii silį́į́', nidi Kéin éí dá'ák'ehgi naalnishii silį́į́'. 3Áádóó baa hoolzhiizhgo Kéin éí dá'ák'ehgi neest'áanii yiníjaa'ígíí Bóhólníihii yich'į' nááyiisnii'. 4Áádóó Éíbel ałdó' hadibé áłtsé deishchíinii aláahgo łik'aii ła' jiníłtį́. Áko Éíbel áádóó náájiisnii'ígíí éí Bóhólníihii bił yílįįd,#Heb. 11:4. 5nidi Kéin índa nááyiisnii'ígíí doo bił yílįįd da. Áko Kéin t'áá íiyisí báhóóchįįdgo hashké niidzį́į́' noos'níí'. 6Áko Bóhólníihii éí Kéin áyidííniid, Ha'át'éegoshą' náhóóchįįdgo hashké nínídzin yínílnii'? 7Yá'át'ééh íinidzaago nidí'nóodzįįł. Jó, doo yá'át'ééh íinidzaagóó éí bąąhági'át'éii nídin nilį́įgo ch'é'étiindę́ę́' naa héestį́, nidi bik'eh dídleeh.
8Nít'éé' Kéin hatsilí Éíbel bił ałch'į' yájíłti', ákohgo dá'ák'ehgi Kéin bitsilí Éíbel yich'į' nídiidzáago yiyiisxį́.#Mt. 23:35; Lk. 11:51; 1Jn. 3:12. 9Áko Bóhólníihii éí Kéin áyidííniid, Háájíshą' nitsilí Éíbel? Áko ázhdííniid, Doo shił bééhózin da. Shí hanii bitsilí yaa áhályáanii nishłį́? 10Áko ání, Haashą' yínít'įįd? Nitsilí bidił biinéé' łeeshtahdę́ę́' shich'į' yicha.#Heb. 12:24. 11Nitsilí síníłhį́įgo bidił éí łeeh sinootseedígíí biniinaa nahasdzáán bits'ą́ąjį' hóyée'go ná ha'oodzíí'. 12Áko k'ad kodóó dá'ák'ehgi nanilnishgo doo lą'ígo na'níłt'ą' da doo; ni' bikáá'góó naníchée doo, índa t'áá áłahjį' naanáá'néeł doo. 13Áko Kéin éí Bóhólníihii áyidííniid, Bee atíshiinilaaígíí ts'ídá doo bíínísh'hah da. 14K'ad kéyah bits'ą́ąjį' hashinííníyood; ninii' bits'ąą nashidi'nil'in doo; nanishchée doo; ni' bikáá'góó t'áá áłahjį' naanáásh'néeł doo; t'áá shik'íníyáhígíí shidiyoołhééł, jó'akon. 15Áko Bóhólníihii áhodííniid, Éí bąą t'áá Kéin jiisxínígíí tsosts'idi k'ééhodi'doolnííł. Áko Bóhólníihii éí Kéin bee hwééhózin dooleełii há áyiilaa, áko ła'da hak'íníyáago doo hodiyoołhéeł da. 16Áádóó Kéin éí Bóhólníihii bits'ą́ąjigo dashdiiyáago Ííden kéyahdóó ha'a'aahjigo kéyah Náad hoolyéhígi kééhojit'į́.
Kéin bits'ą́ą́dóó adideezhchíinii
17Nít'éé' Kéin hwe'asdzą́ą́ bił ałt'ajíí'áazhgo i'niiltsąądgo Íínak yishchį́, áádóó Kéin éí kin haal'áago ájiilaa, áko éí kin haal'áhígíí haye' Íínak bízhi' bee hojíízhi'. 18Áádóó Íínak biye' éí Áírad wolyé, áádóó Áírad biye' éí Miihójeiyel, áádóó Miihójeiyel biye' éí Miithóseiyel índa Miithóseiyel biye' éí Léímek. 19Áádóó Léímek ba'ákéí naaki: ła' Éídah wolyé, náánáła'ígíí Zílah wolyé. 20Áko Éídah biyáázh éí Jéíbal wolyé; éí níbaal yii' kéédahat'ínígíí índa bilį́į́' dahólóonii bizhé'é dzizlį́į́'. 21Áádóó hatsilí éí Júbal wolyé; éí tsin tł'óół bąąh daneelzhee'go bee nida'a'néii índa tsin bee í'dílzoołí yee nidaanéhígíí bizhé'é dzizlį́į́'. 22Zílah biyáázh éí Túbal-kéin wolyé; éí béésh łitsoii índa béésh nitł'izii bee t'áá ha'át'íhída ádaal'į́į doogo bínazh'niłtin, áádóó Túbal-kéin bideezhí éí Néíyamah wolyé.
23Léímek ha'ákéí ábijiní:
Éídah áádóó Zílah, shizaad yínółts'ą́ą́';
Léímek ba'ákéí nohłínígíí, ádísh'nínígíí yínółts'ą́ą́',
Háálá diné shijizhgishígíí biniinaa hoséłhį́,
Índa diné ániid naagháii atíshijiilaaígíí biniinaa hoséłhį́.
24Ííshją́ą́ ła'da Kéin jiisxínígíí biniinaa tsosts'idi k'éébidi'doolníiłgo,
T'áá aaníí ła'da Léímek jiisxínígíí biniinaa tsosts'idiindóó ba'aan tsosts'idi k'ééhodi'doolnííł.
Seth bits'ą́ą́dóó adideezhchíinii
25Áádóó Ádam hwe'asdzą́ą́ bił ałt'anáájoot'áazhgo biyáázh yishchį́įgo éí Seth#4:25 Seth jiníigo éí Hííbrew k'ehjígo aa yiltíinii jiníigo óolyé. yee yiyíízhi', háálá ájíní, Éíbel éí Kéin hwiisxį́įgo bąą hatsásk'ehgi Diyin God éí shiyáázh ła' shaa náánéíltį́. 26Áádóó Seth ałdó' haye' há yizhchį́; éí Íínas bee jíízhi'. Áádóó índa nihokáá' dine'é éí Bóhólníihii dayózhíigo yich'į' sodadilzingo hodideeshzhiizh.
Currently Selected:
GENESIS 4: NVJOB
Highlight
Share
Copy
Want to have your highlights saved across all your devices? Sign up or sign in
Navajo Bible © 2000 American Bible Society. All rights reserved.
Bible text from the Navajo Bible is not to be reproduced in copies or otherwise by any means except as permitted in writing by American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org).
