GENESIS 3
3
Diné doo ak'eh hóół'įįd da
1Áko íídą́ą́' tł'iish#Rev. 12:9; 20:2. agháago nítséékosii éí nihokáá'góó naaldeehii Bóhólníihii Diyin God ábiilaaígíí t'áá ałtso yiláahgo át'é. Áko asdzání áyidííniid, Da' t'áásh aaníí Diyin God kóní, Tsin t'áá ałtso dá'ák'ehgi naazkaadígíí t'áadoo bąąhdóó ohsání? 2Áádóó asdzání éí tł'iish áyidííniid, Tsin bineest'ą' yiidą́ biniyé dá'ák'ehgi naazkaadígíí nihaa deet'ą́, 3nidi tsin bineest'ą' hólóonii dá'ák'eh ałníi'gi sikaadígíí éí Diyin God ánihiłní, Éí doo bąąhdóó adoohsį́įł da; bidinoołchidgo éí dínóohnééł. 4Áádóó tł'iish éí asdzání ánéidoo'niid, Doo t'áá aaníí dínóohnéeł da, 5háálá Diyin God bił bééhózin, éí bijį́ wooyą́ą'go jideezghaliigi ádoohnííł áádóó Diyin Godgi ánóht'ée doo; yá'át'ééhjí índa doo yá'át'ééhjí nihił ééhodoozįįł. 6Áádóó asdzání éí tsin bineest'ą' ch'iyáán yá'át'éehii át'éego áádóó bik'izhníghalgo hoł yá'íít'éehgo índa tsin la' t'áá hojíyą́ áhóle'ígi át'é dziniizį́į'go bineest'ą' ła' nizhdii'ą́ągo jííyą́ą́', áádóó hahastiin ałdó' ła' baazhní'ą́ągo yiyííyą́ą́'. 7Áko t'áá ájíłah jideezghaliigi ádziidzaago t'áá jilchí'ígo hoł bééhoozin, áko fig sikaadii bit'ąą' ahídazhdiiłkadgo bee átł'adziskał.
8Áádóó honiik'aazgo dá'ák'ehgi Bóhólníihii Diyin God honíle'go biinéé' dzidiizts'ą́ą́', áko Ádam hwe'asdzą́ą́ bił dá'ák'ehgi tsintahgi Bóhólníihii Diyin God bits'ąą nízdeest'į́į́'. 9Áádóó Bóhólníihii Diyin God éí Ádam yíká ádííniidgo áyidííniid, Háadish naniná? 10Áko ázhdííniid, Dá'ák'ehgi niinéé' diséts'ą́ą'go nísísdzííd, háálá t'áá łinishchí'í; éí bąą nídísht'į́į́'. 11Áádóó Bóhólníihii ádííniid, Háísh, T'áá łiníchí'í, niłní? Da' tsin doo bąąhdóó adííyį́įł da, nidishní yę́ęésh bąąhdóó ííníyą́ą́'? 12Áko diné ázhdííniid, Asdzání shéíníłtį́įgo bił naash'aashígíí éí sha'níłtsoodgo yíyą́ą́'. 13Áádóó Bóhólníihii Diyin God éí asdzání áyidííniid, Díishą' ha'át'íí baa nisíníyá? Áko asdzání ázhdííniid, Tł'iish shina'azlo'go#2Cor. 11:3; 2Tim. 2:14. bíniik'ehgo yíyą́ą́'.
14Áádóó Bóhólníihii Diyin God éí tł'iish áyidííniid,
Díí baa nisíníyáhígíí biniinaa alį́į́' t'áá ałtso biláahgo áádóó nihokáá'góó naaldeehii t'áá ałtso biláahgo hóyée'go ná ha'oodzíí'; nibid bee nani'na' doo; łeezh nildeełgo níyoołkáałgo hinínáa doo.
15Áádóó ni índa asdzání bił ałk'ee diní'niihgo ádeeshłííł;#Rev. 12:17. na'áłchíní índa éí ba'áłchíní yił ałk'ee dadi'niihgo ádeeshłííł; éí nitsiits'iin yidoołjish; ni éí bikétal dííłjish.
16Asdzání ałdó' áyidííniid, Ts'ídá ayóó át'éego yínííł nide ánát'įįhgo i'niiłchíihgo ti'hoyíníihgo ádeeshłííł; nił nahonigaahgo ni'iyíłchíih doo; nahastiin bídin nílį́į doo, áádóó bí bóhoníłníih doo.
17Áádóó Ádam ałdó' áyidííniid, Ne'asdzą́ą́ ánínígíí yísíníłts'ą́ą'go, Tsin doo bąąhdóó adííyį́įł da, nidishní yę́ę bąąhdóó ííníyą́ą́'; éí bąą niniinaa ni' hóyée'go bá ha'oodzíí'; nich' į' nahwii'náago nanilnishgo bits'ą́ą́dóó i'dílnahgo ni'dííłdįįł;
18ch'il dadeeníinii índa hosh ałdó' nich'į' hááhinoot'į́į́ł;#Heb. 6:8. dá'ák'ehdóó nidanise'ii niyą́ą doo.
19Łeezh nísínídlį́į'jį' nitásiil nahgóó ahíghaasgo nanilnishgo índa íyą́ą doo, háálá łeezh bits'ą́ą́dóó áni'diilyaago łeezh nílį́, áko łeezh nídíídleeł.
20Ádam éí hwe'asdzą́ą́ Íiv#3:20 Íiv jiníigo éí Hííbrew k'ehjígo iiná jinínígi át'éego diits'a'. bee jíízhi', háálá dajiináanii t'áá ádzíłtso hamá silį́į́'. 21Áádóó Bóhólníihii Diyin God éí Ádam índa be'asdzą́ą́ ałdó' bá akágí éé' ájiilaa áádóó bee hazhdiilaa.
22Áádóó Bóhólníihii Diyin God ádííniid, Shoo, diné t'áá nihígi át'éego yá'át'ééhjí áádóó doo yá'át'ééhjí bił bééhózin silį́į́'. Áko k'ad kodóó iiná tsin#Rev. 22:14. bineest'ą' neidi'doo'áałgo yidooyį́įłgo bá hashja'doolííł dó'óshłí áádóó hináago ahool'áa doo. 23Éí bąą Bóhólníihii Diyin God éí Ííden dá'ák'ehdóó nahgóó ahonííyood, áko łeezh bits'ą́ą́dóó áho'diilyaaígíí t'áá éí bininájílnish dooleeł. 24Áko diné ch'ínizhníłchą́ą́' áádóó Diyin God éí dá'ák'eh Íídendi ha'a'aahjígo diyingo nidaal'a'í áádóó kǫ' bits'áhodino'ii diltłishgi át'éego t'áá ałtsogóó náálkiłgo iiná tsin bich'į' atiinígíí yaa ádahalyą́ą doo biniyé niinínil.
Currently Selected:
GENESIS 3: NVJOB
Highlight
Share
Copy
Want to have your highlights saved across all your devices? Sign up or sign in
Navajo Bible © 2000 American Bible Society. All rights reserved.
Bible text from the Navajo Bible is not to be reproduced in copies or otherwise by any means except as permitted in writing by American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org).
