Mako 7

Ifishilano

(Mateo 15:1-9)

1Abafalise na bakafundisha bamafunde bamo bafumine ku Yerusalemu, baisa longana ukwali Yesu. 2Elyo bamona ukuti abasambi bakwe bamo balelya ne minwe iyakowela, emukuti iyabula ukusamba. 3Pantu Abafalise pamo pene na Bayuda banabo bonse tabalya nga tabasambile iminwe ukufika na munkonkoni, ekusunga ifishilano fya fikolwe fyabo. 4Kabili nga bafuma ku cisankano, tabalya kano batala basamba. Kuliko na fimbi ifishilano ifingi ifyo bakonka, ifili nge misambile ya nkombo ne nongo ne fipe fya mukuba.

5Kanshi Abafalise na bakafundisha bamafunde balamwipusha abati, “Cinshi ico abasambi bobe bashikonkela ifishilano fya fikolwe fyesu, bena balelya icakulya ne minwe iyakowela?” 6#Esaya 29:13Nao abasuka ati, “Cine cine Esaya alilungike ilyo aseseme pali imwe mwe mfundabuteshi ngomo calembelwa ukuti,

“‘Aba bantu bancindikafye pa kanwa,

lelo imitima yabo

yalitaluka nganshi kuli ine.

7Baicushafye pakumpepa,

na mafunde bafunda,

mafunde ya bantufye!’

8“Imwe mwalisuula amafunde yakwa Lesa, mwalemenenafye ku fishilano fya bantu.”

9Elyo abeba ati, “Mwaba ne nshila yabucenjeshi iyakusuulilamo amafunde yakwa Lesa, pakuti mulesunga ifishilano fyenu. 10#Ukuf 20:12Pantu Mose atile, ‘Ulecindika wiso na noko,’ kabili atile nokuti, ‘Uwalapisha wishi nangu nyina, alingilefye ukumwipaya.’ 11Nomba imwe mutila, umuntu nga aeba wishi nangu nyina ati, ‘Fintu mfwile namupeela pakumwafwako ni kolobani’, ekutila calituulwa kuli Lesa. 12Awe lyena tamusuminisha uyu muntu ukuti acite nelyo cimo icakwafwako wishi nelyo nyina. 13Mukucita ifi, monaula icebo cakwa Lesa pa mulandu wa fishilano fyenu mushilana. Kabili kuli ifintu ifingi ifyo mucita ifyapalana neci.”

Ifikowesha umuntu

(Mateo 15:10-20)

14Nakabili Yesu aita ibumba, alalyeba ati, “Kutikeni kuli ine imwe bonse, mumfwikishe. 15Takwaba cintu nangu cimo icifuma kunse, icingengila mu nda ya muntu no kumukowesha. Kano ififuma mu mutima wa muntu efikowesha umuntu.”#7:15 Muli ba Baibele bamo mwaba icikomo 16, “Uli na matwi yakumfwa naomfwe!” (moneni 4:23).

17Ilyo afuma pebumba aya ingila mu ŋanda, abasambi bakwe balamwipusha umulolele ipinda. 18Nao abeba ati, “Bushe kanshi na imwe bene tamulailuka? Bushe tekuti mumone ukuti conse icifuma kunse no kwingila mu nda ya muntu tekuti cimukoweshe nakalya. 19Pantu taciya mukwingila mu mutima wakwe, lelo ciya mu cifu, elyo panuma cafumina kunse.” Mukulanda ifi, Yesu asuminishe ukuti ifyakulya fyonse tafikowesha. 20Elyo akonkanyapo ati, “Ala icikowesha umuntu cintu cifuma mu muntu. 21Pantu mukati ka mitima ya bantu, emufuma amatontonkanyo yabipa, ubulalelale, ubupupu, imisoka, ulubembu, 22ulunkumbwa lwa fyuma, ubunkalwe, ubucenjeshi, bucilende, umufimbila, umusaalula, icilumba no buwelewele. 23Ifibi fyonse ifi efifuma mu muntu, kabili efikowesha umuntu.”

Icisumino ca mwanakashi umwina Sirofonisia

(Mateo 15:21-28)

24Awe afumine ku ncende ilya, aima aya na ku calo umwali umusumba wa Turi. Aya ingila mu ŋanda imo, talefwaya nelyo umo ukuti eshibe uko afikilile, nomba cakaana, afilwa ukufisama. 25Awe umwanakashi uwali na kamwane akakashana akali no mupashi wakowela, ashumfwafye ukuti Yesu naisa, apopene aisa, amufukamina. 26Uyu mwanakashi ali Mwinafyalo, umwina Sirofonisia. Elyo alapapata Yesu ukuti atamfye umupashi wakowela ufume mu mwana wakwe. 27Nao amweba ati, “Pakubala kuleka abana balya baikuta, tacilingile ukubuula icakulya ca bana no kuposela imbwa.” 28Nao umwanakashi amwasuka ati, “Kwena nifyo fine mukwai, lelo ne mbwa nasho shilalyako utubufungau twa bana, tulya tuleponena mwisamba lye tebulo.” 29Elyo Yesu amweba ati, “Apo wayasuka umusango uyu, kabiye kumobe, umupashi wakowela naufuma mu mwana obe.” 30Awe abwelelamo kumwakwe, asanga umwana nalala pa busanshi no mupashi wakowela naufumamo.

Yesu aposha cibulu uwakoma amatwi

(Mateo 15:21-31)

31Elyo afumine mu calo umwali umusumba wa Turi, apita mu Sidoni, na mu calo ca Dekapoli, asuka afika na kuli bemba wa Galile. 32Awe abantu bamo bamuletela nkomamatwi, uwali cibulu. Elyo balamupapata pakuti amutambalikilepo amaboko. 33Awe amufumya pebumba, baya ukwakuti bali beka. Elyo aingisha iminwe yakwe mu matwi ya uyu muntu. Elyo afwisa amate amukumya nayo pa lulimi. 34Kabili alosha amenso ku mulu, aisha no mweo, ati, “Efata,” emukuti, “Komoka.” 35Awe apopene amatwi yakwe yakomoka, na kalimba akakakile ululimi lwakwe kaputuka, atampa no kulalandafye bwino. 36Elyo Yesu abakonkomesha ati, “Tecakwesha ukwebako umuntu nelyo umo.” Nomba atila ntinti ukubalesha, awe abantu nabo bashimikafye. 37Kabili balepapisha nganshi abati, “Alecita fyonse bwino bwino! Alelenga bankomamatwi ukulaumfwa na bacibulu ukulalanda.”

Currently Selected:

Mako 7: ILL15

Highlight

Copy